موتور سيتروين zx

[sherif0333]

السلام عليكم
انا معايا سيتروين zx الموتور بتاعها تعب جدا وبيطلع دخنه من ورا اكتر من عربيات رش الناموس مع انى لسه عامله شنبر من حوالى 2000 كيلومتر
العربيه مبقاش ينفع يتمشي بيها فى الشارع حطيت زيت شنبر الدخنه زادت
هل فيه حل
وهل اعمل عمره ولا اغير الموتور احسن مع العلم انى لو غيرت الموتور مش عايز اغير الجزء بتاع الورق والرخصه هل ينفع؟
موتورها بيعمل كام وبيتباع فين؟
عمرتها تتكلف فى حدود كام ؟
هل يمكن اعمل حاجه تقلل الدخان ده؟
معلش طولت عليكم ارجو الافاده

[rotanamasoud]

الموتور كامل من 2500 حتى 3500 حسب حالته وزهر ولا الومنيوم(الزهر اقوى واغلى)
فى حل تانى بتركب بلوك اكسارا على وش السلندر والاكارتيره والفتيس بتاعك (بس برضو الورق بيتغير مع البلوك الجديد)
الميزه بلوك من الزهر المكنه اصبحت 1600 وحتغير العربيه تماما(تقريبا البلوك ب1000 وده افضل حلى من وجهه نظرى)
دى حلول التغيير
اما الاصلاح ازاى شنبر بعد 2000 كيلو يعمل كده انت كنت بتلمها ولا الميكانيكى اللى مبيعرفش

[sherif0333]

لا للاسف الميكانيكي طلع مبيفهمش العربيه قعدت عنده 10 ايام عمل شنبر وطقم سيور وطقم جوانات كامل والعربيه طلعت اسوأ من الاول ياريت حل من غير موضوع الرخصه ده لو ينفع يتظبط او لو عمره كامله هتخش فى كام تقريبا وشكرا على اهتمامك وردك

[rotanamasoud]

مكنتك نوعها ايه لو الومنيوم حتتكلف كتير تقريبا الالربع شمايز ب1200 غير باقى اجزاء العمره يعنى حتصرف كتير غير اهم حاجه ميكانيكى فاهم
لو زهر ممكن تخرط الزيرو التالى وتغير بساتم الخ
كل ده حيصرف واهم حاجه ميكانيكى فاهم والا حتضيع فلوس فى الارض
الورق والمرور متعب(بس يتعمل) بس تعب ورق ارحم من تعب صنيعيه وانت فاهم ومجرب
الاختيار ليك انا عمرت مكنتى الزهر بس بامانه قولت اللى اتصرف كان جاب مكنه تانيه او بلوك اكسارا 1600 على ax كانت حتبقى صاروخ
فكر واختار اللى يناسبك بس لو نويت على مكنه قولى اعرفك ازاى تعرف الفرق بين ال1100 وال1400 احسن دول شويه نصابين بيبيعو ال1100 على انه 1400

[sherif0333]

شكرا ياباشا طيب عمرت مكنتك الزهر بكام واعرف منين زهر ولا الومنيوم

[sherif0333]

وياريت تقولى لو هجيب بلوك اكسارا هو البلوك ده عباره عن ايه وهل هحتاج اغير حاجه تانى والبلوك بكام تقريبا وهل البلوك ده اللى فيه البساتم وكده ولالا

[rotanamasoud]

المكنه بتاعتى اتعمرت ب2500
الزهر او الالومنيوم هو الجسم اللى فيه الشمايز(كده كده وش السلندر الومنيوم عشان متتلخبطش)الجسم اللى تحت الوش هو المقصود تشوف خامته زهر ولا الومنيوم(ولا تفضل العمره للالومنيوم )
هو البلوك الجسم اللى فيه البساتم انا مش فنى عشان اقولك ايه بيتغير بدقه بس اللى اعرفه ان كل الاجزاء بتركب على البلوك بدون مشاكل واخر سعر سئلت عليه كان ب 1000 فى اسكندريه ومتنساش يبقى البلوك بورقه عشان المرور (والبلوك هو الجزء اللى عليه رقم المكنه اللى بيتثبت فى الرخصه)ويكتبلك فى الورق 1400 عشان الضريبه
مكنه الاكسارا قدرتها 120 حصان وبتجيب ال160 والشنبر خفيف ولو مظبوطه تجيب ال190 بس انت هنا مش حتوصل 120حصان لحسابات اخرى -انجكشن-كارتات الخ
والفرق فى استهلاك البنزين لا يذكر
واى استفسار انا متابعك واى خدمه

[sherif0333]

الف شكر ياباشا بس انا كنت محتاج اعرف البلوك ده هو جسم الموتور بالكامل من غير وش السلندر ولالا وده اللى فيه الصبابات والبساتم والشمايز؟؟؟

[rotanamasoud]

ده البلوك

[amrmaismail]

بص يا باشا نصيحة انسي العمرة خااااااااااالص
هات استيراد وفكرة البلوك دي عجبتني اوي الحقيقة ولوني افضل تجيب موتور كامل طالما كدا كدا هتغير الرقم في الرخصة
وبعدين مين قالك ان الموضوع صعب ؟؟
انت بتاخد الافراج الجمركي للمكنة وساعت التجديد والفحص بتديلهم الورق وتقولهم انا غيرت الموتور وبيثبتهولك عادي
المهم انه يكون سيتروين ( مش مهم اكسارا - زد إكس - ..... إلخ)
ويكون نفس السي سي وبس
ولو عايز تشتري البلوك يفضل تشتريه بالجزء السفلي يعني بالبساتم والكرنك إلخ علشان انت لو عليت السي سي يبقي بتوعك مش هينفعوا

[aly_72200]

خلى بالك الكلام ده مش هينفع لان الوش 1400 مش هيشتغل على البلوك 1600 ولو حضرتك جبت وش 1600 يبقى لازم يجى بالضفيرة بالكنترول بادوات التغذية

[rotanamasoud]

خلى بالك الكلام ده مش هينفع لان الوش 1400 مش هيشتغل على البلوك 1600 ولو حضرتك جبت وش 1600 يبقى لازم يجى بالضفيرة بالكنترول بادوات التغذية

الكلام من ميكانيكى عمل كده وركب وش ال1400 على البلوك

[elghrory]

المحرك 1400 زهر عامل 1700 إستيراد و200 تركيبة
محرك 1600 إكسارا من 3500 الى 4000 بس مش عارف ده سعر الواحد كامة والا 2 كامة

[aly_72200]

الكلام من ميكانيكى عمل كده وركب وش ال1400 على البلوك

الكلام ده لا يمكن لان كده نسبة الانضغاط هتبقى اعلى من 11 وده هيحتاج بنزين اوكتان 95 لاما هتلاقى تسقيف شديد هو بيديك بلوك 1400 وحضرتك حط الكود بتاعه وانت تتأكد

[rotanamasoud]

الكلام ده لا يمكن لان كده نسبة الانضغاط هتبقى اعلى من 11 وده هيحتاج بنزين اوكتان 95 لاما هتلاقى تسقيف شديد هو بيديك بلوك 1400 وحضرتك حط الكود بتاعه وانت تتأكد

انا مشوفتش كود المكنه انا نقلت الموضوع على لسانه وكمان قالى لو عايز تعمل كده اعملك
ممكن فعلا تكون المكنه 1400 لانى شفت اشتغالات كتير ناس بتبيع مكن 1100 على انه 1400 بس الاكواد اللى بتفضحهم ومش كل الناس عارفه حكايه الاكواد دى
طيب الهورس باور بتاع الاكسارا ال 1400-75 حصان
الهورس باور بتاع الax اوzx ال1400-75 حصان
يبقى مستفدناش اى حاجه من حركه البلوكه
طيب انت متاكد من حكايه التسقيف دى وسببها ان الضغط حيبقى اعلى على وش السلندر ممكن توضحلى سببها
انا كنت حدخل axالzx فى مكنتها بيظه واعمل موضوع البلوكه ارجو الافاده سريعا لان واضح ان عند حضرتك خبره جيده