تجربتى فى السفر الى مرسى مطروح بالستروين Ax

[AAAH]

السلام عليكم ورحمة الله وبركاتة
كنت ظبطت عربيتى الستروين Ax شهر 10 اللى فات

وعملت اللى حكيت ليكم عليه فى الموضوع ده:
http://www.nilemotors.net/Nile/383762-ax.html

وكان نفسى اجربها فى السفر وفعلا جربتها وروحت بيها مرتين الزقازيق بس برضه كان نفسى فى سفرية اطول من دى :)
لحد ما جت الفرصة الاسبوع اللى فات وروحت مرسى مطروح وطريق مرسى مطروح مقسم الى 3 اجزاء
الاول من القاهرة للريست بتاع طريق مصر اسكندرية الصحراوى حوالى 130 كيلو
الثانى من الريست طريق العلمين لحد العلمين ومارينا حوالى 160 كيلو
الثالث من العلمين لحد مرسى مطروح وده اطولهم حوالى 180 كيلو
كده يبقى 470 كيلو بالتمام والكمال :)

فولت العربيه يوم الجمعه وقضيت بيها كذا مشوار صغيرين اقل من 10 كيلو وركنتها وانطلقت بعد صلاة الفجر السبت 31-5-2014
خدت اول 130 كيلو وريحت شوية فى الريست بتاع ربع ساعه كده
ابتديت طريق العلمين 160 كيلو وريحت فى النص مرة واحده برضه حوالى 5 دقايق بس
فولت من العلمين ولسعادتى العظيمة العربيه خدت 17 لتر فقط فى 300 كيلو يعنى حوالى 18 كيلو فى الليتر وده طبعا هايل جدا
الطريق التالت ده ال 180 كيلو كنت زهقت وقولت هاخده كله مره واحده بس بصراحه جيت قبل مطروح ب 30 كيلو كده وكنت فيصت فريحت 5 دقايق وكملت
وبكده الحمد لله وصلت بالسلامه
مشيت فى مطروح قرابة 200 كيلو داخل المحافظه (نظرا لبعد الشواطئ والمزارات عن بعضها) وفولت قبل ما امشى بيوم خدت 21 لتر وده يعتبر اكتر من الممتاز الاولانى :)
مشيت من مطروح يوم الاربع 4-6-2014 اللى هو امبارح برضه بعد صلاة الفجر والمره دى خدت طريق العلمين ال 180 كيلو مره واحده
وقفت فولت فى العلمين برضه خدت 18 لتر
المفاجأة بقى كانت فى طريق العلمين المؤدى الى مصر اسكندريه الصحراوى من اول ما دخلته وعاصفه ترابيه رهيبه كانت شغاله لدرجه انى ماكنتش شايف مترين عاى بعض قدامى وطبعا حاولت اقف فى اى ريست بس بمجرد انى فتحت الباب اتعميت تراب فدخلت تانى وقولت اعدى بقى الطريق ده وخلاص وابقى اريح براحتى بعد كده
وصلت بالسلامه لحد طريق مصر اسكندريه الصحراوى وقفت حوالى 10 دقايق على جنب كده وبعد كده كملت لحد البوابات بتاعه القاهره وكنت تعبت جدا من السواقه وولادى فرهدوا من الحر فوقفت قدام كارفور واشتريت شويه حاجات وعصائر وريحت شويه وكملت لحد القاهرة الحمد لله

طريق الذهاب حوالى 5 ساعات ونص
طريق العوده حوالى 8 ساعات :( لأن الدائرى كان واقف والطريق كان زى النيله داخل القاهره فى الوقت ده
متوسط السرعه 100 و 110 و 120 واحيانا 130 بس مش كتير
العربيه ما شاء الله ما اشتكيتش ولا قالت اى ولا حتى فرده كاوتش نامت (اللهم لك الحمد)
قبل السفر ماعملتش حاجه فى العربيه غير انى غيرت فلتر البنزين وربطت العفشه وظبت زوايا واشتريت بوجيهات بس ماركبتهومش ولسه معايا لحد دلوقتى
العربيه ثباتها ممتاز على السرعات العاليه بس لازم تكون محمله لانى لو كنت لوحدى ومامعييش شنط ولا اولادى كانت العربيه خدتها مراجيح فى العاصفه الترابيه اللى ربنا سترها معانا فيها دى
تقييمى للعربيه فى السفر لمسافات طويله 98 % والاتنين فى الميه اللى ناقصين دول علشان مافيهاش تكييف وخفه وزنها خصوصا مع وجود تيار هوا جامد والعربيه فاضيه
الحمد لله وصلت بالسلامه واطمنت ان العربيه ممتازة ويعتمد عليها اعتماد كلى عكس الفيات اللى كان معايا كذا عربيه قبل الستروين الجميله وافضلهم كانت 132 روحت بيها مره اسماعيليه وبهدلتى هناك لدرجه انى قطرتها لحد الشرقيه :(
ملحوظه: كان معايا اخويا معاه عربيه رينو 9 وكانت ما شاء الله زى الفل ونفس اداء عربيتى
عربيته الكحلى اللى واقفه جنب عربيتى فى الريست
واخيرا صور للعزيزة الغالية





وصورة من البلكونه للبحر



معلش طولت عليكم شويه
بس كنت حاسس انها تجربة مثيره وتستحق انى احكيها بالتفصيل

اخوكم
على عبد الفتاح
ابو احمد

[kazamodia]

حمد الله على السلامة وفعلا انا نفسي اسافر بالعربية مسافة كبيرة كده برضو
بس اخبار طريق العلمين ايه ؟ انا بسمع انه من اخطر الطرق في مصر في موضوع التثبيت ده

[J A G U A R]

حمد لله على السلامه
تقرير جميل

[masryxt]

حمدا لله علي السلامة
انا عاوز منك لو ينفع تدينا فكرة عن رحلتك من ناحية الاقامة والاسعار ووهل الصورة اللي فوق من المكان اللي كنت قاعد فية
وشكرا مقدما

[AAAH]

حمد الله على السلامة وفعلا انا نفسي اسافر بالعربية مسافة كبيرة كده برضو
بس اخبار طريق العلمين ايه ؟ انا بسمع انه من اخطر الطرق في مصر في موضوع التثبيت ده

الله يسلمك
يا باشا ماتقلقش خالص الطريق امان جدا ومليان عربيات وفى لجنه فى اوله ولجنه فى اخره
اطمن واتوكل على الله واجازة سعيده ان شاء الله :)

[AAAH]

حمد لله على السلامه
تقرير جميل

الله يسلمك يا باشا
انت الاجمل :)

[AAAH]

حمدا لله علي السلامة
انا عاوز منك لو ينفع تدينا فكرة عن رحلتك من ناحية الاقامة والاسعار ووهل الصورة اللي فوق من المكان اللي كنت قاعد فية
وشكرا مقدما

الله يسلمك يا باشا
الصورة من الشقه اللى كنت قاعد فيها
بس هى بتاعه صديق اخويا بتتأجر ب 400 جنيه فى اليوم علشان فى وسط البلد ش اسكندرية وبتطل على البحر بس هو حسبلنا اليوم ب 150 جنيه بس يعنى قعدنا 4 ايام ب 600 جنيه
باقى المناطق بتبدأ الاسعار فيها من 100 جنيه وانت طالع والشقق الفاضيه بالهبل يعنى انزل من غير حجز وهاتلاقى شقق كتير جدا
بالنسبه لأسعار البقاله واحده زى القاهرة الخضار والفاكهة زياده طفيفه جنيه او 2 جنيه بالكتير اللحوم مش عارف بصراحه لأنى كنت واخد لحمة وفراخ من القاهره فى الايس بوكس
ولو عايز تنزل فى نفس الشقه اللى احنا كنا فيها ممكن اكلمهولك واشوف هايحاسبك على كام
وانا مصور الشقه حته حته بما فيهم الحمام :) لو عايز تشوفهم

[rotanamasoud]

الف مبروك على اعتماديه العربيه والرحله وربنا يباركلك فيها(مفيش حد عارف قيمه العربيات دى الا اللى ركبها)

[AAAH]

الف مبروك على اعتماديه العربيه والرحله وربنا يباركلك فيها(مفيش حد عارف قيمه العربيات دى الا اللى ركبها)

الله يبارك فيك يا باشا
وده حقيقى فعلا لحسن حظنا :)

[محمود سامح]

حمد لله على السلامة

[AAAH]

حمد لله على السلامة

الله يسلمك يافندم
شكرا جزيلا

[waelelgazawey]

حمدالله على سلامتك.. واجازة سعيدة وتتكرر تاني باذن الله وتكون اكثر سعادة انت واسرتك
بخصوص الاستاذ اللي بيسال على طريق العلمين فهو امن جدا بس يفضل انك تطلعه تكون عربيتك مظبوطة 100% لان الطريق لا يوجد عليه اي خدمات سوى بنزينه واحدة في اوله.. لكن موضوع التثبيت والكلام دة غير حقيقي على الاطلاق

[AAAH]

حمدالله على سلامتك.. واجازة سعيدة وتتكرر تاني باذن الله وتكون اكثر سعادة انت واسرتك
بخصوص الاستاذ اللي بيسال على طريق العلمين فهو امن جدا بس يفضل انك تطلعه تكون عربيتك مظبوطة 100% لان الطريق لا يوجد عليه اي خدمات سوى بنزينه واحدة في اوله.. لكن موضوع التثبيت والكلام دة غير حقيقي على الاطلاق

ربنا يكرمك يا استاذ وائل ويديم السعاده على الجميع يارب

[Eng HateM]

ما شاء الله تبارك الله , ربنا يبارك لك في السيارة وحمد لله ع السلامة

[AAAH]

ما شاء الله تبارك الله , ربنا يبارك لك في السيارة وحمد لله ع السلامة

الله يبارك فيك ويسلمك يارب