معايا اكسنت وبفكر اشترى ابيزا 98

[ehab_mansour]

بالتوفيق ان شاء الله

بس اهم اهم حاجه تدور كويس وتكشف عليها كويس عشان اهم حاجه في العربيات دي انها تكون حالتها كويسه وان شاء الله تعيش معاك وتستمتع بيها لكن الحالة السيئة منها هتكرهك في سيات وأسبانيا و ألمانيا كمان

[miro1995]

الاكسنت مرجيحه يا راجل حرام عليك ده انا معايا واحده موديل 2000 ولسا بحالتها زى ما تقول خارجه من المصنع وباسابق بيها ناس كتيروبعدين الاخ اللى بيقول ان الكورى مش بيعيش والالمانى بيعيش اكتر انا معايا موتسيكل صينى جايبه من 1/2006 ولسه بحالته وما اتضربش فيه مفك ليه لان انا بحافظ عليه فموضوع تعيش او ما تعيشش ده بيعتمد على استعمالك للحاجه والاكسنت اللى مع حضرتك كام سى سى ولو 1500 وحالتها كويسه هتندم بجد انك بعتها وجبت عربيه 1000 سى سى لانك هتحس انك راكب بطه ويا سلام لو شغلت تكييفها هتلاقى العربيه مش عايزه تمشى وصدقنى الاكسنت تمنها فيها ده كفايه انها شغاله فى محافظات كتيره تاكس من بتاع 10 سنين فكر 100000000 مره قبل ماتاخد قرار والقرار الاخير ليك

[soficom]

على فكره انا انشاء الله هفكر كويس قبل ما لبيع واشترى والفيصل دلوقتى انى اركب الابيزا بالتكيف واشوف الفرق وهو ده كلام العقلين وبعدين اقرر مين الاحسن
ومن موقعى دلوقتى اطلب من اى حد فى المنتدى انو يخلينى اعمل تست دريف للعربه الابيزا ومش شرط اسوقها طبعا بس اركب جمبيه و اشوف العفشه اه نظمها مع العلم انو هيركب عربيتى ويتمرجح فيها شويه
انا مستنى الرد

[waelms3]

ممكن ارد بقى يا باشا القصة مش انك تحافظ او متحافظش على حاجة القصة فى الخامات المصنع بها والتقفيل ما بتستحملش عوامل التعرية بتاعتنا من مطبات و حفر و مكروبصات و مطبقات صناعية وبرده ما ينفعش اشترى عربية واحطها جنب الحيط و مع ذالك وجهة نظرك سليمة برده

[soficom]

اه بالنسبه للخامات نسيت اقوللك انى من كام يوم ماشى ورحت نازل فى حفره بلاعه (حفره عاديه )المساعد ضرب
وبحس ان المساعدين وانا ماشى فى المدئات ان المساعد بينزل كله ولدرجه انى بترزع معاه ووالله المساعدين جديده ويبانى kyp

[ibiza50]

كنت احب اشارك لو سمحتولى انا شايف الموضوع سخن و فيه شويه تحدى من الاعضاء مع ان الموضوع بسيط جدا جميع العربيات فيها مزايا و عيوب و اللى عند واحد ميزه الاخر بيشوفها عيب و على فكرة مافيش عربيه حتى الان من العربيات الصغيره بتاعتنا دى كويسه 100% العربيات خاليه العيوب بنسبة 90% ثمنها فوق 500 الف بكتير يعنى و مش بحبطكوا او بدايقكوا عربيتنا دى كلها متواضعه يعنى ماينفعش نقول ان دى احلى و دى احلى (مجرد راى يا اصدقائى).
فى وجه نظرى اللى يحدد نوع العربيه اللى هتشتريها عوامل اساسيه

• اولها طريقه استخدامها
• و انت عاوزها فى ايه
• و هل سياره عائليه ام ليك لوحدك كاشاب
• بتحب الجرى و لا بتمشى معقول
• بتحب التكييف الجامد و لا المعقول
• بتحب تشعر ان العربيه ثابته و لا لاْ
• قطع الغيار
• و حجات تانيه كتيره

احب اقول ان العربيات ازواق بشكل واضح جداً
عن تجربتى الشخصيه فى البيت عندى 3 عربيات حسب الترتيب هيونداى 96 و ابيزا 98 و يارس 2008 و كلهم عندى من الزيرو
هقول مميزات و عيوب العربيات دى
مميزات الهيونداى

• التكييف فى الهيونداى رهيب مالوش حل
• العفشة ناعمة نسبياً
• السحب مخيف بتجرى جامد مافيش عربيه تقدر تشد و تجر زيها
• الاتساع معقول
• استهلاك البنزين معقول
• شنظه السياره واسعه

السياره الهيونداى ماشيه حوالى 95 الف كيلو لم اغير شىء فى العفشه نهائيا
العيوب

• صوت الموتور فى الجرى عالى
• العربيه فى الجرى غير ثابته على الاطلاق
• منخفضة على الارض
• الصاج مش كويس خالص
• تكنولوجيا العربيه قديمة (الاكسل و الاكسنت) مقارنه بالعربيات اليابانى او الاوربى من نفس سنة الصنع
• سواقع العربيه مش ممتعه عادية
• بعض خامات السياره داخل الموتور رديئه جدا جدا تحتاج تغيير و متابعه باستمرار على سبيل المثال دورة المياه و الريداتير و غيرت الريداتير خلال فترة ال 14 عام الماضيه 3 مرات و ايضا عوامة البنزين رديئه جدا بغيرها كل 3 سنوات تقريبا
• اعطالها كتيره و متكرره

مميزات الابيزا

• استهلاك بنزين منخفض جدا
• ثبات اكثر من رائع فى كل ظروف القياده
• سواقه العربيه ممتعه و كراسيها مع وضعية الدركسيون مريحه جدا و الكرسى ممكن التحكم فى ارتفاعه بشكل مميز
• صاج العربيه و هيكلها قوى
• فيها جهاز انزار اصلى
• مريات كهرباء
• التحكم فى مستوى اضائة الكشاف الامامى
• فوانيش شبوره اصلى امامى و خلفى
• صوت الماتور فى الجرى منخفض و ناعم
• استهلاك قطع الغيار محدود قطع غيارها معمرة بشرط ان تكون الاصلى
• اعطال العربيه المفاجئه محدوده - العربيه دى تقريبا مالهاش اعطال عمرها ما عطلت معايا و لا حتى سخنت مع العلم انى مابزودهاش مياه بالست اشهر او اكتر ما بتنقصش
• بالرغم من ماتورها ال صغير 1000cc الا انها بتجيب حتى 165 كيلو متر سرعه
• بتستحمل القرص على الموتور لفترات طويله دون اجهاد الموتور
• فى السفر و السواقه لمسافات طويله مريحه جداً
• الموتور متطور جدا فيه كنترول يونت و حساسات بالاضافع الى نظام حقن الوقود المتطور اللى ما بيعطلش و لا بيتسد , غير انظمه اخرى كتير زى دوره المياه و التكييف المتطور اللى ما يعملش احمال كبيره على الموتور

العيوب

• السحب مش كبير ثقيلة نسبياً
• صغيره مش عائلية
• شنطها صغيره
• قطع غيارها الاصليه غالية جداً بتعور (اشتريت ليها طرمبة بنزين من فتره بـ 2000 جم)شىء مبالغ فيه طبعاً
• ناشفه شويه فى المطبات خصوصا العفشه الخلفيه وده من و هى على الزيرو بتدب شويه
• فرامله مش قويه
• فرش العربيه الداخلى و التابلوه حساس جدا محتاج عنايه و محتاج يبعد عن الشمس لانه بيتكسر من اقل حاجه خصوصا الجزء الاوصط فرش الباب بيقب من عند مسند الايد وده من الحراره و الشمس او انه بتغسل بمية
• اهم العيوب البنزين لازم يتحطلها بنزين 98 او 95 وده مكتوب على غطاء تنك البنزين البنزين ال 92 او 90 اداء مش كويس و بيخرب علبة البيئه على طول (اتعطلت عندى بعد 3 سنين)
• فيها بعض الاجزء السيئه مثل ذراع الاشاره بيتحرق الزجاج الكهربائى ضعيف مابيستحملش بيحتاج تعديل بس بيكون على حساب اصوات بتطلع من الباب و انت ماشى او لما تقفل الباب تسمع صوت

اليارس
مميزاتها
ناعمه جدا

• مريحه فى السواقه
• استهلاك البنزين معقول بالرغم انها اتوماتيك
• التكييف فوق المتوسط
• ثباتها جيد جدا
• عفشنها ناعمة جداً
• الباور خفيف جدا (كهرباء)
• الشنطه واسعه
• الكنبه مريحه خصوصه ان ارضية العربيه مافيهاش البروز الشائه الارضيه مستويه
• ارتفاعها عن الارض مناسب جداً
• التسارع بتاعها ممتاز
• الموتور متطور جدا و كلها اجهزه حديثه جدا من اول الكونتاكت وحتى اجهزة التحكم بالثبات و التحكم بالتماسك

عيوبها

• الصاج شويه خفيف
• لوحه العدادات فى منتصف التابلوه
• قطع غيرها و صيانتها غاليه
• الدخول و الخروج من العربيه صعب شويه لو حد طاويل لازم راسه تخبط فى السقف وهو بيركب

و ده تقريبا اللى قدرت افتكره عنهم و انا عن نفسى بفضل الابيزا لانها عربيه اوربى بموتور المانى اكثر من محترم صحيح هى ابطىء واحده و لكن اكتر واحده سواقتها و قعدتها مريحانى
و بقول لصديقى اللى هيشترى او بيفكر انه يغير العربيه المهم اولاً تحدد احتياجاتك من العربيه اللى بناءاً عليه هتحدد الماركة و الموديل اللى يناسبك و تزكر ان لكل واحد راىء فى العربيات و لكل واحد ميول اتحددت على اساس تجربته او ميولة
و ثانياً العربيه اللى هتستقر عليها لازم تكون نظيفه مش ملعوب فيها باى شكل من الاشكال
و تحياتى للجميع و خصوصاً اللى شاركو برايهم
محمد مصطفى

[ehab_mansour]

و ده تقريبا اللى قدرت افتكره عنهم و انا عن نفسى بفضل الابيزا لانها عربيه اوربى بموتور المانى اكثر من محترم صحيح هى ابطىء واحده و لكن اكتر واحده سواقتها و قعدتها مريحانى
و بقول لصديقى اللى هيشترى او بيفكر انه يغير العربيه المهم اولاً تحدد احتياجاتك من العربيه اللى بناءاً عليه هتحدد الماركة و الموديل اللى يناسبك و تزكر ان لكل واحد راىء فى العربيات و لكل واحد ميول اتحددت على اساس تجربته او ميولة
و ثانياً العربيه اللى هتستقر عليها لازم تكون نظيفه مش ملعوب فيها باى شكل من الاشكال
و تحياتى للجميع و خصوصاً اللى شاركو برايهم
محمد مصطفى

اهلا بك أستاذ محمد فينك من زمان يا راجل وبتغيب كتيييييييييير جدا
أشكرك علي الحيادية في كلامك وعلي المقارنة الممتازة ولكنك ظلمت الابيزا و الهيونداي لما تقارنهم ب الياريس لأن هناك فرق شاسع في 10 سنوات للموديل وخلال هذه الفترة اختلفت التكنولوجيا في الجميع بشكل كبير جدا جدا
وأشكرك أيضا علي تفضيلك للابيزا في وضعية القيادة المريحة والراحة في السفر والاستمتاع بالقيادة وده اللي فعلا بعاني منه جدا لما أركب عربية اخويا اللانوس او عربية زوج أختي النوبيرا ورغم اختلاف الفئة بينهم وأختلاف الموديل .
جزاك الله خيرا

[ibiza50]

اهلا بك أستاذ محمد فينك من زمان يا راجل وبتغيب كتيييييييييير جدا
أشكرك علي الحيادية في كلامك وعلي المقارنة الممتازة ولكنك ظلمت الابيزا و الهيونداي لما تقارنهم ب الياريس لأن هناك فرق شاسع في 10 سنوات للموديل وخلال هذه الفترة اختلفت التكنولوجيا في الجميع بشكل كبير جدا جدا
وأشكرك أيضا علي تفضيلك للابيزا في وضعية القيادة المريحة والراحة في السفر والاستمتاع بالقيادة وده اللي فعلا بعاني منه جدا لما أركب عربية اخويا اللانوس او عربية زوج أختي النوبيرا ورغم اختلاف الفئة بينهم وأختلاف الموديل .
جزاك الله خيرا

صديقى العزيز ايهاب
لا شكر على واجب يا صديقى انا بحب العربيات جدا جدا و خصوصا العربيات الالمانى و بحاول اساعد الاصدقاء فى حدود خبريى المتواضعه عن كل العربيات على حد سواء و بحيادية فعلا لان مش من حقى انى اقنع اى شخص بحاجه ماهى الا وجهة نظرى انا بحاول اوضح الفرق و ازاى يختار و خلاص.......انا بعتذر عن قلة دخولى بس ده لانشغالى و قلة الوقت

واحب اضيف كمان ان الابيزا اقتصادية فى البنزين كتير فى السفر على سرعه 100 كيلو متر بتستهلك متوسط 5 لتر لكل 100 كيلو
و فى وسط البلد فى حدود 7 لتر للـ 100 كيلو و مع التكييف 8.5 لتر لكل 100 كيلو ده غير التصميم الرائع للعربيه اللى فى نظرى انه سابق وقته حتى الان و الاستغلال الممتاز لكل جزء فيها شوف مثلا عمق الشنطه اد ايه و شوف حمولة التنك 60 لتر شوف كمان تقفيل العربيه من تحت و من بره و شوف شكل تقفيل الموتور العربيه فعلا اكثر من ممتازه
و اخيرا تحياتى ليك

[windofchange]

*بس سؤال يااستاذ محمد التانك 47 لتر ولا 60 اللي اعرفه انه 47لتر وده في عربيتي ايبيزا 99
*طرمبة البنزين جبتها من محل في رمسيس vdo الماني زي اللي باظت ب300 جنيه بس متصنعه فالصين بس متاكد انها اصلي ومبتبرشمة والبار بتاعها(ضغط البنزين) 3بار
*علبة البيئة عرفت منين انها باظت وعملت ايه لما باظت
*لمض الشبورة ورا عندي مش شغالة والأمامية مش موجودة شاريها ومتشالة مالعربية ممكن يكون عيب في فيوز يارب يكون كده وجزاك الله خير علي تعليقك الرائع ولو تعرف ميكانيكي كويس ليها قولنا عليه وربنا يوفقك لكل خير


سبحانك اللهم وبحمدك ، أشهد أن لا إله إلا أنت أستغفرك وأتوب إليك

[ibiza50]

*بس سؤال يااستاذ محمد التانك 47 لتر ولا 60 اللي اعرفه انه 47لتر وده في عربيتي ايبيزا 99
*طرمبة البنزين جبتها من محل في رمسيس vdo الماني زي اللي باظت ب300 جنيه بس متصنعه فالصين بس متاكد انها اصلي ومبتبرشمة والبار بتاعها(ضغط البنزين) 3بار
*علبة البيئة عرفت منين انها باظت وعملت ايه لما باظت
*لمض الشبورة ورا عندي مش شغالة والأمامية مش موجودة شاريها ومتشالة مالعربية ممكن يكون عيب في فيوز يارب يكون كده وجزاك الله خير علي تعليقك الرائع ولو تعرف ميكانيكي كويس ليها قولنا عليه وربنا يوفقك لكل خير


سبحانك اللهم وبحمدك ، أشهد أن لا إله إلا أنت أستغفرك وأتوب إليك

صديقى الايبزاوى
يارب اكون عرفت افيدك
العربية تنكها لو فاضى تماماُ 59 لتر انا مليته اكتر من مره 56 لتر و بيكون فيها شويه بنزين لسه و ده ممكن طبعا لان فيها زرار داخل التنك بيحول على منطقه داخل التنك (بيسموها تنك احطياطى) حوالى 8 لتر اضافية
بالنسبة للطرمبه انا جيبتها الاصلى من حوالى 4 سنوات ب الفين جنية من التوكيل و كانت بتتباع بره ب 1450 جنيه انما دلوقتى ممكن يكون فيه منها صينى باسعار اقل زى ما انت اشتريت
تعرف ان علبة الدركسيون الاصلى باور ب 7 الاف جنيه والصينى بيقولوا انها اصلى ب 3200 جنه
اما علبة البيئه باظت لانها كانت بتتكسر واتوزع محتوى العلبة دى على العلبتين التانيين و العلبه قعدت تشخلل زى الشخشيخه كام شهر و بعد كده راحت لوحدها وده خلى العربييه صوتها يعلى نتيجه ان العلبة بقت مجوفه
اما الشابوره اللى ورا دى مشاكل عدم شغلها كتير ممكن يكون الزرار وعلى فكره الزرار فيه مستويين لما بتشده الاول للشبوره الامامى و المستوى الثانى للخلفى
و ان شاء الله يكون حاجه بسيطه
ولو عاوز ميكانيكى كويس انا اعرف واحد فى الحرفيين اكثر من ممتاز و اسمه محمد ابراهيم و رقمه 0107632146 كلمة و قله انك من طرفى قله محمد اللى معاه الابيزا النبيتى ال 98 وقله كمان بتاع النت و هو هيفتكر وان شاء الله هترجع مبسوط
مع خالص التحيه
محمد مصطفى

[windofchange]

افدتني جدا طبعا والشبوره انا عارف ميكانيزم الزرار بس مش شغال برده والطرمبة اكيد سعرها نزل انا لقيتها ساعتها من 6شهور كده ب500 جنيه طرمبة بالعوامة بتاعت مستوي البنزين وده فالتوكيل.... بس ام 300 جنيه دي اصلي برده للي عايز يشتري لأن vdo بتعمل طرمبات لكله فولكس وبي ام واودي وسكودا وسيات وكده وانا اتأكدت انها اصليه من عالموقع نفسه بس طرمبه من غير عوامة البنزين بتركب عادي عالعوامة القديمة ومحمد ابراهيم طالما بتشكر فيه ان شاء الله هسقط عنده الموتور لأني احترت اسقط عند مين.......شكرا ليك ياباشا نورتنا والله

[ashouhdy]

بس لما ركبت الابيزا ورجهت الكرسى للاخر وكمان الضهر كنت مقرفص فالكرسى والكنبة اللى ورا خلصت منيين بقى جبتوا راحة ووضعية الجلوس للعلم انا من عشاق الابيزا98 اللون الاصفر الكنارى وحلم عمرى فيها بس تكون كاملة موتور 1400 لو فى اداخلها راس براس فى عربيتى

[windofchange]

مفيش شيء كامل في الدنيا دي
"والآخرة خير وابقي"

[soficom]

انتو ناس زى الفل الواحد مستمتع معاكوا اوى اه---------- واه كمان ههههههه

[ibiza50]

افدتني جدا طبعا والشبوره انا عارف ميكانيزم الزرار بس مش شغال برده والطرمبة اكيد سعرها نزل انا لقيتها ساعتها من 6شهور كده ب500 جنيه طرمبة بالعوامة بتاعت مستوي البنزين وده فالتوكيل.... بس ام 300 جنيه دي اصلي برده للي عايز يشتري لأن vdo بتعمل طرمبات لكله فولكس وبي ام واودي وسكودا وسيات وكده وانا اتأكدت انها اصليه من عالموقع نفسه بس طرمبه من غير عوامة البنزين بتركب عادي عالعوامة القديمة ومحمد ابراهيم طالما بتشكر فيه ان شاء الله هسقط عنده الموتور لأني احترت اسقط عند مين.......شكرا ليك ياباشا نورتنا والله

لا شكر على واجب و ربنا يوفقك باذن الله و لو عاوز اى حاجه ماتترددش انا فى خدمتك
مع تحياتى محمد مصطفى