العربية جابت مني اسطوانة وديسك

[egman]

السلام عليكم ورحمة الله وبركاته

إمبارح وانا مروح من المطار وانا على بوابة الكارته بتاعت المطار والمكان كان زحمة عربية خبطت فى العجل عندى بس بسيط دنا وهو كنا واقفين وانا داخل على البوابة وهو طلع معايا بس تريحة فى الكاوتش بتاعى الشمال المهم انا طلعت عادى جدا وسحب تمام قلت اركن اشوف اية الى حصل الحمد لله ما فيش اى حاجة حصلت دخلت العربية وبدور صوت صريخ جامد اوى ودواسة الدبرياج واقعه وسايبة فى الارض نزلت بصيت على السلك بتاع الدبرياج لقيته مفكوك من مكانه ربط عليه عليت الدواسة ادوس عليها تقع تانى وصوت صريخ .

1. المهم جالى الميكانكي الحمد لله بعد ما روحت اشتريت سلك زي ما قالى فى الموبايل علشان نكسب وقت ووصلنا للعربية قالى السلك سليم دور صريخ قالى بس ده طقم الدبرياج فيه حاجة .
   
   
2. المهم الحمد لله هو ساق العربية لحد الورشة على التانى بقى يجيب الغيار التانى ويدور العربية تقعد تنتش وتمشي من المطار لحد امبابة هل الموضوع ده يضر العربية هو كان بيطلع على التانى وبعد كده على السرعه يقو ملقم التالت ونمشي عليه .
   
   
3. الحمد لله وصلنا للورشة وبدا يحل علشان يطلع الطقم انا اول مرة بقى اشوف الموضوع ده لقيته فك الخراطيم بتاعه التبريد وطلع الريداتير قالى علشان اوسع لنفسي واعرف افك .
   
   
4. رفع العربية ونزل تحتها بعد ما حل فردة الكاوتش الشمال الى عند السواق وفك فك فك لحد ما فك الكوبلن وقالى لانه متوصل بجسم الفتيس واحنا لازم نفك الفتيس علشان نطلع الطقم كل ده وانا بطنى بدات توجعنى بقى منظر منيل بنيله .
   
   
5. المسامير بتاعته الفتس بيقولى كتير اوى وفى منها كان مربوط جدا لدرجة ان حالب فى مكانه او مفوت زي ما بيقول وده خد منه وقت .
   
   
6. المهم فك الجزء الشمال من الفتيس وراح مخرج الطقم قالى البلية متسكرة اهى فعلا طلع حاجة كده زي الاوويل سيل بس معدن وكبيرة عن الاويلسيل مفككه من بعض .
   
   
7. قالى وادى كمان الديسك سنونه فى منها متسكرة هو جزء فى نصه كده مجموعه سنون مكونه دايرة السنون ده فى منها حوالى 5 حروفهم مكسرة .
   
   
8. والاسطوانة هى حاجة عاملة زي حجر الجلخ كده قالى انت طالما هتجيب بلية وديسك يبقى تجيبها جديدة احسن وقالى انها كمان الالوظ الى بيكون فى منتصفها فى بوش او تاكل بسيط قالى بس تجيبها جديد احسن بالمرة .

اية رايكم فى الكلام الى حصل ده وهل هو كده فك الدنيا صح وهل فعلا كل الفك ده لازم يتعمل علشان يطلع الطقم ده كمان نزل زيت الفتيس كله هل ده عادى وطبعا لما فك خراطيم التبريد بتاعه الريداتير المية كلها نزلت وحاجة توجع القلب فهل كده الامور تمام هو مستنينى النهاردة اجيبلة الطقم الجديد علشان يبدأ يركب وهو خد بتاعه ساعه ونص او ساعتين فى الفك قالى علشان المسامير الى كان مزنوقة اوى ومش عايزة تطلع ده ؟

وقالى برده ان تغيرهم ده شي طبيعى جدا ووارد فى اى عربية وقالى كمان بص مديلها من سنة كام الى هيجننى من غير اى انزار كده على طول هو كل الى كان بيحصل وانا كنت عملت موضوع عليه قبل كده انى وانا بغير وادوس دبرياج وبشيل رجلى بسمع صوت خبطة او رزعه وبدات احافظ على الموضوع زي ما فهمت من الاخوه فى القسم انى احاول ما انتش رجلى مرة واحدة وفعلا تعايشت مع الموضوع وبقت كل حاجة تمام وكمان لما ظبت مستوى الدبرياج تقريبا الصوت بتاع الخبطه ما كنش بيظهر كتير الى لما انتش اوى وانا ماشي ؟

انا مش عارف اية الى بيجرى الواحد بيطلع من حاجة بيدخل فى حاجة تانية وخايف من تركيب الحاجات ده مرة تانية يا ترى هترجع زي ما كانت ولا الواحد ممكن يلاقى حاجة تانية طلعت بسبب التركيب ولا اية .......

[ehab_mansour]

وعليكم السلام ورحمة الله وبركاته

الله المستعان معلش هو دايما الواحد لما بيكون جديد مع العربية بياخد شوية وجع قلب وتغيير حاجات لحد ما تتظبط معاه وتبقي زي الفل ان شاء الله وربنا يعينك ويوفقك
بخصوص مشكلتك دي فالموضوع عادي انك تغير ديسك واسطوانه لأنهم اكثر الاجزاء استهلاكا في أجزاء السحب والجر بالسيارة لكن غريبة موضوع ان البلية تتكسر ده بس خير الحمد لله
الغريب انه يحتاج انه يفك الرادياتير والخراطيم وينزل المياة علي الارض وكمان انه ينزل زيت الفتيس علي الأرض كل ده شغل غلط في غلط لأن انا مغير ديسك واسطوانه وبلية قبل كده وبعدها بفترة غيرت بلية تاني وهي نفس اللي بتعمله عندك بالضبط ولكن عندي هو فك مسامير تثبيت الفتيس فقط بعد ما حل الفردة الشمال وفك الكوبلن عشان يوسع للفتيس انه يخرج بيه لبره شوية ويعرف يغير لكن الله المستعان خلاص هو فك وخلاص
علي العموم هتشتري طقم ديسك واسطوانه وبلية كامل وفيه منه أنواع انا كنت شاري فاليو اسباني ب 550 جنيه من حوالي سنة وثمانية أشهر هو شغال معايا كويس حتي الأن وبقاله 60 الف كيلو وخلالهم غيرت بلية تاني عشان كان صوتها بقي خشن شوية بس مش عجبني الطقم وفيه ناس تانية شكرت في طقم الساكس الألماني لكنه أغلي شوية علي العموم ياريت تنزل تاخد لفة علي بتوع قطع الغيار وتشوف الأسعار وتحاول تشتري حاجه نظيفة أصلية (فيه لوك ألماني و ساكس و فاليو و ...) عشان تعيش معاك
ولو تقدر تخلي الميكانيكي يبصلك علي ترس الفلام يشوفه هل سطحه مستوي وكويس ولا لأ لأنه لو سطحه مش مستوي بيعمل رجرجة في طلعة السيارة من البداية لو كانت العربية فيها الرجرجة دي قبل ما يتكسر الطقم خليه يفكه ويظبطه علي المخرطة عشان تقفل شغل علي نظافه
وربنا معاك

[egman]

والله يا ايهاب باشا انا غيرت امبارح الطقم وجبت واحد فاليو 550 جنية

المهم الميكانيكي رجع كل حاجة زي ما كانت لكن حصل شوية حاجات غريبة النهاردة وانا رايح بيها الشغل هو قالى روح بيها علشان نجرب فى مشوار طويل .

1- شميت ريحه شياط المهم وطلعت زيت نازل من الغطاء الاسود بتاع وش التاكيهات بيكون فيه تلات صواميل كده هو بينزل من واحده فيهم الى فى النص وبينزل على الجزء المعدن مع السخونه اكيد بيعمل دخان ولا اية ؟


2- بيكون فى خرطوم كاوتش موجود فى مع التلات صواميل دول بيكون مكانه فى النص خلف الصامولة الى فى المنتصف الخرطوم ده اوله ماسك فى غطاء وش التاكيهات لكن طرفه الاخير بقى فوجئت بيه انه مش ماسك فى حاجة واقع ورا العمه وطرفة سايب مش ماسك فى حاجة يا ترى ده بتاع اية وهو هل نسي يدخله فى مكانة ولا اية انا خايف يفضى زيت المكنة ؟

3- انا اول ما ركنت وشكيت ان المية تكون قلت حاولت افتح الاربه لاقيت ان المية هتنفجر فى وشي قفلتها تانى هل ده لانى كنت لسة راكن العربية ولسة سخنة ؟

4- امبارح وهو بعد ما ركب الفتيس كنا بنجرب الغيارات واحنا واقفين وبعد كده واحنا موجرين العربية وانا طلعت بيها اجرب جربت كل الغيارات ماعدا الخامس النهاردة كان فيه فرصه نجرب الغيار الخامس لكن للاسف هو بيبات فى مكانه اه بس بس ما بيجمعش يعنى اغير لكن اجي ادوس بنزين علشان امشي عليه العصاية فى مكانها وكل حاجة لكن العربية بتزعق اكن الغيار ما جاش يا ترى ده من اية ؟

[ehab_mansour]

والله يا ايهاب باشا انا غيرت امبارح الطقم وجبت واحد فاليو 550 جنية

المهم الميكانيكي رجع كل حاجة زي ما كانت لكن حصل شوية حاجات غريبة النهاردة وانا رايح بيها الشغل هو قالى روح بيها علشان نجرب فى مشوار طويل .

1- شميت ريحه شياط المهم وطلعت زيت نازل من الغطاء الاسود بتاع وش التاكيهات بيكون فيه تلات صواميل كده هو بينزل من واحده فيهم الى فى النص وبينزل على الجزء المعدن مع السخونه اكيد بيعمل دخان ولا اية ؟

ايوه طبعا بس ايه علاقة الصواميل دي باللي عمله الميكانيكي ؟؟؟؟؟ وايه اللي خلاها تسرب زيت
2- بيكون فى خرطوم كاوتش موجود فى مع التلات صواميل دول بيكون مكانه فى النص خلف الصامولة الى فى المنتصف الخرطوم ده اوله ماسك فى غطاء وش التاكيهات لكن طرفه الاخير بقى فوجئت بيه انه مش ماسك فى حاجة واقع ورا العمه وطرفة سايب مش ماسك فى حاجة يا ترى ده بتاع اية وهو هل نسي يدخله فى مكانة ولا اية انا خايف يفضى زيت المكنة ؟

أعتقد ده خرطوم الفايظ وده بيتركب في عمة الهواء اللي راكب فيها فلتر الهواء روحله خليه يركبه مكانه

3- انا اول ما ركنت وشكيت ان المية تكون قلت حاولت افتح الاربه لاقيت ان المية هتنفجر فى وشي قفلتها تانى هل ده لانى كنت لسة راكن العربية ولسة سخنة ؟

لما العربية تهدأ حرارتها شوف مستوي المياة عامل ايه وراقبه وتأكد ان الخراطيم اللي فكها ركبها تاني كويسه ومحكمه ومافيش فيها تسريب
4- امبارح وهو بعد ما ركب الفتيس كنا بنجرب الغيارات واحنا واقفين وبعد كده واحنا موجرين العربية وانا طلعت بيها اجرب جربت كل الغيارات ماعدا الخامس النهاردة كان فيه فرصه نجرب الغيار الخامس لكن للاسف هو بيبات فى مكانه اه بس بس ما بيجمعش يعنى اغير لكن اجي ادوس بنزين علشان امشي عليه العصاية فى مكانها وكل حاجة لكن العربية بتزعق اكن الغيار ما جاش يا ترى ده من اية ؟

كده يبقي فيه مشكلة في تركيب الاجزاء اللي بتوصل حركة عصاية الفتيس لداخل الفتيس ولابد من مراجعة وضبط كل شيء كما كان لأنك كده ممكن تبوظ ترس الخامس وتفوته حاول تروح لمايكانيكي تاني يكون أفضل وبيفهم كويس عشان يضبطلك كل حاجه صح لأن من الواضح ان ده بيعك وم تمشيش علي الخامس خالص لحد ما الدنيا تتظبط ......... والله المستعان

[egman]

والله يا ايهاب باشا اان بالفعل ما مشيتش على الخامس خالص لانه اصلا زي ما بيكون انه ما بيجيش اليار اصلا على الرغم من انه بيبات فى الحارة بتاعته هل ده معناه ان الترس الخامس اتكسر ولا حاجة ولا ممكن تكون تظبيطة اتياش ووصلات وبس ؟


تانى حاجة هو فى خرطوم فعلا خارج من العمه نفسها الخرطوم ده رفيع جدا اول واصل فى العمه من ورا وطرفة التانى سايب مش واصل فى حاجة ده خرطوم اية وهو على فكرة كان كده من قبل كده ؟

اما الخرطوم الى انا اقصده يا باشا بيكون موجود على وش التاكيهات الاسود الى فيه التلات صواميل هو موجود ورا الصامولة الى فى النص والخرطوم ده تخين نسبيا قطره تقريبا زي الخرطوم الى بيبقى خارج من قربة الميه نفس التخانه تقريبا ده بقى بالضبط داخل فى ومربوط فى وش التاكيهات او بمعنى بلدى لابس فى جزء طالع من وش التاكيهات ولافف لحد ورا العمه لكن الطرف التانى بتاعه مدلدل مش ماسك فى حاجة فعايز اعرف بتاع ايه ؟

طيب ازاى اتاكد ان دورة المية سليمة ؟

تانى حاجة انا لما ركنت خرجت من شوية ابص على الزيت لاقيته ما عملش تسريب دورت العربية وهى واقفة وحرقت شوية وانا ممور العربية خليت الار بي ام عدى 4000 وهى على المور فيه دخنه بيضا طلعت من الشكمان ولما بطلت العربية لقيت الزيت نزل من نفس الصامولة الى فى النص ؟

هل الكاوتش او الجلب الى تحت الصواميل ده ممكن تتغير على افتراض ان يكون الكاوتش الى تحت الصامولة عايزة تتغير ولا الحوار مش كده ؟

انا منتظر ردك يا باشا على ارح من الجمر

[egman]

وعلى فكرة يا باشا هو ما جاش ناحية الماتور خالص نهائي والعربية ما كنتش بتعمل كده ابدا كل الى كانت بتعمله يا دوب يا دوب تعريق خفيف جدا جدا جدا

[ehab_mansour]

شوف كده العملية بقت مركبة وفيه مشاكل كتير ولابد من ميكانيكي بيفهم في الابيزا وعارفها كويس هو اللي هيظبطلك الدنيا
وياريت تحاول تبعد عن اللي بتتعامل معاه ده لأن العملية بتسوء اكتر مش بتتظبط

[grumby78]

شوف كده العملية بقت مركبة وفيه مشاكل كتير ولابد من ميكانيكي بيفهم في الابيزا وعارفها كويس هو اللي هيظبطلك الدنيا
وياريت تحاول تبعد عن اللي بتتعامل معاه ده لأن العملية بتسوء اكتر مش بتتظبط

الميكانيكي اللي حضرتك بتروحله بيعك
زي ماقال المهندس ايهاب روح لميكانيكي متخصص في الابيزا

[egman]

طيب ترشحولى مين يكون كويس وعن تجربة الناس فى الايبيزا .

سواء كان فى الحرفيين او جسر السويس انا سمعت على ناس فى جسر السويس لو تعرفوا حد يا ريت تقولى لى .

واية النظام لو رحت لمركز صيانة زي اوتوماجد او تكنو وان الى موجودين فى الحرفيين هيكون اية نظام فلوسهم ؟

[ehab_mansour]

ياريت حد مجرب ناس هنا من القاهرة يقول عليه لأن انا بعمل شغلي في المنصورة ولكن اللي اعرفه من المنتدي هنا ان افضل واحد من خلال تجارب الأعضاء هو محمد سمير خلف حديقة بدر بشارع جسر السويس ولكنه أسعاره غالية شوية لكنه بيفهم كويس قوي و أفضل واحد بعد التوكيل

[egman]

والله يا جماعه انا ان شاء الله ناوى اعمل كده على اليومين الى جايين ان شاء الله .

المهم انا دمى محروق من الميكانيكي فرجعتله علشان يبص عليها :

1- قال الخرطوم ده بتاع الفايز زي ما حضرتك قلت بالضبط يا ايهاب باشا بس انا عايز اعرف هل ان فى خرطوم فايز بيبقى طالع من غطاء التاكيهات وهل ده فايز او تنفي للزيت بتاع الموتور ولا اية النظام ؟


2- تانى حاجة لما جرت معاه الخامس برده عمل نفس الموضوع العربية زعقت اوى والار بي ام على جدا على 4000 والسرعه كانت 80 والغيار اكنه ما جاش .


3- تخيلو بقى العبقرى ده بيقولى اية بيقولى ان ده عادى لان الطقم لسة جديد امشي على الرابع وهات عليه 100 او 120 وابقى انقل على الخامس على الرغم انى كنت بريح العربية وبجيب الخامس على سرعه 80 طبعا انا اسغفرت الله ومسكت نفسي عشان ما امسكش فيه وقلت هو كده ده خلاص اخر امكانياته وانه طبعا كان باين عليه انه مش عايز يفك الفتيس ويشوف فيه اية .

4- انا ان شاء الله ناوى اروح لحد بتاع ايبيزا بس ويحل الفتيس ويكشفلى على موضوع الغيار الخامس ونشوف .

ليا كام سوال معلش يا جماعه استحملونى بس والله الواحد اعصابه تعبانة جدا ودماغى هتضرب على فكرة هو خد مصنعيه 150 وخد 100 لما جالى مكان العربية لما كانت عطلانة ووداها على الورشة اية رايكم :

1- هل عدم تجميع الغيار الخامس ده يكون سببه اية انه ما يكنش ركب طقم الدبرياج الجديد صح والغيار الخامس مش شغال عليه شغال لحد الرابع وبس ؟

2- طيب هل لو هو خطا فى التركيب الطقم الدبرياج الذى ادى الى عدم تجميع الغيار الخامس هل عند الفك والكش ممكن يعاد تركيبة مرة تانية ويتظبط الغيار ولا كده ممكن اكون محتاج فتيس جديد ؟

3- يا ترى اسعار الفتيس كام وهل كله استيراد ولا فيه فتايس جديد واية احسن حاجة وانسب حاجة تركب عندى على الموتور 1300 كربراتير ؟

4- وكنت عايز اعرف كده بالمرة سعر موتور العربية ده بكام الى هو 1300 سي سي كربراتير ده للأحتياط لان الواحد اتعقد وعايز ابقى عارف كل حاجة عن الموضوع ويا ترى بيتثبت ازاى الموتور المتسقط فى الرخصة وهل فى تعقيدات ولا عادى ؟

انا اسف يا جماعه والله على التطويل ولكنكم انتم مش عارفين انا نفسيا عامل ازاى وحتى ما عنديش اصحاب افضفض معاهم بيفهموا فى المواضيع ده فدمغاى واعصابي هينفجرو .....

ويا ريت تردوا عليا فى كل نقطه على حده لانى بجد الكلام مع حضراتكم بيطمن الواحد شوية ما بيخليش الدنيا تقفل فى وشه فيا ريت ترودا عليا نقطة نقطة وبند ببند علشان احس ان فى حد بتكلم معاه لانى عقلى هيبوظ خلاص .........

على فكرة انا كنت قرات ان محمد سمير بطل يشتغل فى موديل 94 لكن عموما لو حد جرب قريب بنفس الموديل يا ريت يقولى تليفونه وانا اتصل اقوله على المشكلة واشوف بيشتغل فيها ولا لأ ولو فى حد تانى برده عن تجرب حضراتكم وتشهدولوا بالكفاءة يا ريت تقولى لى عليه

وهل فى مشكلة لو مشيت يويمن تلاتة على الرابع بس واجيب عليه سرعه كام لحد ما اروح لحد بتاع ايبيزا تقولى لى عليه ......
منتظركم يا رجالة انا شكلى مش هعرف انام الى لما تظبط العربية :)

[ehab_mansour]

والله يا جماعه انا ان شاء الله ناوى اعمل كده على اليومين الى جايين ان شاء الله .

المهم انا دمى محروق من الميكانيكي فرجعتله علشان يبص عليها :

1- قال الخرطوم ده بتاع الفايز زي ما حضرتك قلت بالضبط يا ايهاب باشا بس انا عايز اعرف هل ان فى خرطوم فايز بيبقى طالع من غطاء التاكيهات وهل ده فايز او تنفي للزيت بتاع الموتور ولا اية النظام ؟

خرطوم الفايز ده فايدته خروج بخر خفيف جدا لزيت الموتور ودخوله مرة أخري مع الهواء الداخل للموتور لترطيب حركة البلوف او الصبابات وده طبيعي وموجود في اي موتور
2- تانى حاجة لما جرت معاه الخامس برده عمل نفس الموضوع العربية زعقت اوى والار بي ام على جدا على 4000 والسرعه كانت 80 والغيار اكنه ما جاش .

رجاء عدم تجربة الغيار مرة أخري لأنك ممكن تعدم الفتيس او الغيار ده نهائيا سيبه لحد ما تضبط تركيب الفتيس كما كان وان شاء الله هيشتغل تاني عادي
3- تخيلو بقى العبقرى ده بيقولى اية بيقولى ان ده عادى لان الطقم لسة جديد امشي على الرابع وهات عليه 100 او 120 وابقى انقل على الخامس على الرغم انى كنت بريح العربية وبجيب الخامس على سرعه 80 طبعا انا اسغفرت الله ومسكت نفسي عشان ما امسكش فيه وقلت هو كده ده خلاص اخر امكانياته وانه طبعا كان باين عليه انه مش عايز يفك الفتيس ويشوف فيه اية .

كلامه غلط بنسبة 100 %

4- انا ان شاء الله ناوى اروح لحد بتاع ايبيزا بس ويحل الفتيس ويكشفلى على موضوع الغيار الخامس ونشوف .

ليا كام سوال معلش يا جماعه استحملونى بس والله الواحد اعصابه تعبانة جدا ودماغى هتضرب على فكرة هو خد مصنعيه 150 وخد 100 لما جالى مكان العربية لما كانت عطلانة ووداها على الورشة اية رايكم :

1- هل عدم تجميع الغيار الخامس ده يكون سببه اية انه ما يكنش ركب طقم الدبرياج الجديد صح والغيار الخامس مش شغال عليه شغال لحد الرابع وبس ؟

شوف انا سألت الميكانيكي اللي بعمل شغلي عنده وقلي انه السبب ان الميكانيكي اللي فك ما عرفش يضبط عصاية الفتيس والاتياش الخاصة بنقل حركة الغيارات من العصاية للفتيس والموضوع ضبطه سهل جدا ومش هياخد 10 دقايق ان شاء الله وقلي انه نازل القاهرة الجمعه لو عايزه يظبطهالك مافيش مشكلة هديلك تليفونه وتقابله وهو هيظبطلك كل حاجه وعلي فكرة هو ميكانيكي عفشة وفرامل ودبرياج وفتيس فقط ومالوش علاقة بشغل المحرك نفسه
2- طيب هل لو هو خطا فى التركيب الطقم الدبرياج الذى ادى الى عدم تجميع الغيار الخامس هل عند الفك والكش ممكن يعاد تركيبة مرة تانية ويتظبط الغيار ولا كده ممكن اكون محتاج فتيس جديد ؟

لا تقلق ان شاء الله الحل بسيط ومش هتحتاج فتيس ان شاء الله
3- يا ترى اسعار الفتيس كام وهل كله استيراد ولا فيه فتايس جديد واية احسن حاجة وانسب حاجة تركب عندى على الموتور 1300 كربراتير ؟

4- وكنت عايز اعرف كده بالمرة سعر موتور العربية ده بكام الى هو 1300 سي سي كربراتير ده للأحتياط لان الواحد اتعقد وعايز ابقى عارف كل حاجة عن الموضوع ويا ترى بيتثبت ازاى الموتور المتسقط فى الرخصة وهل فى تعقيدات ولا عادى ؟

ان شاء الله مش هتوصل لكده اصبر وما صبرك الا بالله

انا اسف يا جماعه والله على التطويل ولكنكم انتم مش عارفين انا نفسيا عامل ازاى وحتى ما عنديش اصحاب افضفض معاهم بيفهموا فى المواضيع ده فدمغاى واعصابي هينفجرو .....

ويا ريت تردوا عليا فى كل نقطه على حده لانى بجد الكلام مع حضراتكم بيطمن الواحد شوية ما بيخليش الدنيا تقفل فى وشه فيا ريت ترودا عليا نقطة نقطة وبند ببند علشان احس ان فى حد بتكلم معاه لانى عقلى هيبوظ خلاص .........

على فكرة انا كنت قرات ان محمد سمير بطل يشتغل فى موديل 94 لكن عموما لو حد جرب قريب بنفس الموديل يا ريت يقولى تليفونه وانا اتصل اقوله على المشكلة واشوف بيشتغل فيها ولا لأ ولو فى حد تانى برده عن تجرب حضراتكم وتشهدولوا بالكفاءة يا ريت تقولى لى عليه

وهل فى مشكلة لو مشيت يويمن تلاتة على الرابع بس واجيب عليه سرعه كام لحد ما اروح لحد بتاع ايبيزا تقولى لى عليه ......
منتظركم يا رجالة انا شكلى مش هعرف انام الى لما تظبط العربية :)

ونصيحة أخيرة مني حاول ما تمشيش بالعربية غير للضرورة عشان ممكن يكون فيه مشكلة اكبر هتحصل وانت مش واخد بالك وربنا معاك واصبر وان شاء الله كله خير

[egman]

والله يا ايهاب باشا ربنا يكرمك على وقفتك معايا الله يخليك .

وطبعا لو الراجل بتاعك نازل يا ريت تقولى هيكون فين هل هو عنده ورشة هنا ولا اية وهيكون فين وطبعا ادينى تليفونه يا باشا واسمه ؟

وهو يقصد اى جمعه بتاعه بكره ولا الى بعدها ؟

طيب وهل فعلا الموضوع ممكن يكون كده ولا ممكن يطلع ان الطقم متركب غلط ؟

انا اعتقد لو متركب غلط هيكون بايظ فى كل الغيرات وماكنتش العربية هتتحرك اصلا ؟

[ehab_mansour]

هو ورشته في المنصورة فقط ونازل بكرة سوق الجمعه بمدينة نصر بتاع السيارات وكلمته دلوقتي قلي ممكن تتقابل معاه علي الدائري بعد ما يطلع من طريق مصر اسكندرية الزراعي وهيعملك الممطلوب وانت هترجع تاني من علي الدائري من غير ما تلف جوه البلد
ولا تقلق لأن الطقم ما ينفعش يتركب غلط ولو راكب غلط مش هتمشي العربية نهائيا علي اي غيار
هو اسمه الأسطي هلال وده رقم تليفونه 0109167560 لو شايف ان الوضع مناسب لك اتصل بيه ورتب معاه وقله انا من طرف مهندس ايهاب صاحب الابيزا السوداء و قله انك صاحب الابيزا ال 94 اللي فيها مشكلة الغيار الخامس
والله الموفق

[egman]

الله يخليك يا ايهاب باشا على ذوقك معايا وعلى فكرة هو لو على سوق السيارات ده مناسب ليا جدا جدا لانى ساكن فى التجمع الاول بينى وبين السوق ما فيش 5 او 10 دقايق بالكتير اوى اوى .

واعتقد طبعا انه هيكون موجود من الصبح بدري صح ولا اية انا ممكن اجيله عند السوق من الساعه 7 الصبح لو حب ؟