العربية جابت مني اسطوانة وديسك

[ehab_mansour]

الله يخليك يا ايهاب باشا على ذوقك معايا وعلى فكرة هو لو على سوق السيارات ده مناسب ليا جدا جدا لانى ساكن فى التجمع الاول بينى وبين السوق ما فيش 5 او 10 دقايق بالكتير اوى اوى .

واعتقد طبعا انه هيكون موجود من الصبح بدري صح ولا اية انا ممكن اجيله عند السوق من الساعه 7 الصبح لو حب ؟

تمام زي الفل اتصل بيه ورتب معاه كل حاجه و ابقي عرفني الأخبار وربنا يوفقك
بس ياريت ترتب معاه من دلوقتي عشان يعمل حسابه وعلي فكرة هو جدع جدا وشاب سنه مش كبير لكن بيفهم قوي وما يهموش الفلوس قد ما يهمه ان الشغل يكون صح

[egman]

والله يا ايهاب باشا انا حصلتلى ظروف خارجة عن ارادتى منعتنى انى اقدر اكون متواجد فى مدينة نصر وده من سوء حظى انا طبعا لانى كنت نفسي اقابله لكن قدر الله ما شاء فعل والحمد لله على كل شي .

المهم انا امبارح واحد من زملائي قالى على ميكانيكي ايبيزا فى جسر السويس اسمه / سيد عبده المهم لما قالى انها ايبيزا بس قمنا على طول رايحلنه المهم الراجل طلع معايا جرب العربية وقالى ان الغيار الخامس مش موجود اصلا والغيار الى انا بيجيبه على انه خامس ده الغيار التالت وقام بعمل الاتى :

1- قالى انا لعصاية عندك بايظه خالص طبعا ما فهمتش ازاى وهو بيكون مشغول اوى لدرجة انه مش بيلحق يكمل كلام مع حد المهم انا العصايه عندى فعلا كانت مايلة ناححية اليمين من ساعه ما اشتريت العربية المهم هو ظبطها ولاخلها فى النص وظبط الغيار وطلعت اجرب الحمد لله كله تمام .

2- طلبت منه انه يقولى العربية محتاجة اية انا كنت بحس باى طوبه تحت العجل وشخلله قالى انت علبه الدريكسيون عندك لازم تتفك ونشوف فيها ايه وعندى طقه فى الدريكسيون وانا بلفه .

* طب يا ترى هى العلبه ده ببتصلح ولا بيتجاب بدلها جديد ؟

3- قالى وعندك حاجة تانية اسمها كاوتش حاجة الفرامل برده بيساعد على الغربلة ده وكمان قالى لما بتدوس فرامل الطارة بتترج منك وده فعلا صح بس الموضوع ده بعد ما غيرت الطقم مش عارف هو ممكن يكون ايه الى حصل .

4- ولما الراجل نزل تحت العربية علشان موضوع الفتيس ده قالى عندك ترشيحات كتير .

المهم هو قالى انى ابقى اجيله فى يوم من اوله علشان هو يعيش حياته ونشوف لانه بيقولى عربيتك فيها حاجات كتير جدا وانا بطنى بتوجعنى اول ما قال كده .

ملاحظاتى على العربية :


1- إمبارح وانا ماشي الغيار التانى هرب منى بقيت ماشي اول تالت على طول لكن لما ركنت وركبت تانى بعدها بكام ساعه الغيار اشتغل لوحده يا ترى ده من اية ؟

2- لاحظت تنقيط تحت الفتيس بس مش من ناحية الطبه بتاعته ولا من ناحية ساعه المارشدير يا ترى اية تانى ممكن يخلى الفتيس يجيب زيت ؟

3- اخر اليوم خد حفره عجب بالليل بالعجلة الشمال الى ناحية السواق وبعدها بقيت اسمع صوت خشونه جامده فى الناحية اليمين ناحية العجله اليمين مش فاهم اية العلاقة ؟

4- وفيه كمان تنقيط خفيف اوى تحت غرفة الحريق الى هو الجزء المعدنى الى بيكون تحت غطاء التاكيهات الاسود .

بس ده كل ال حصلى اليويمن الى فاتوا ومنتظر رايكم على احر من الجمر !!!!!!!!!

[ehab_mansour]

باختصار انت محتاج ميكانيكي فاهم هو بيعمل ايه يراجعلك علي كل حاجه وبضمير وبس لأن كل اللي انت كاتبه حاجات ممكن تكون بسيطة وممكن تكون كبيرة ولكن اللي هيقدر يفيدك صح هو اللي هيشوف بعينه وفاهم هو هيعمل ايه لو شايف انت سيدعبده من خلال زيارتك عنده شغله كويس روحله يظبطلك الدنيا

[egman]

هو والله كل العربيات الى لاقيتها عنده كلها ايبيزا وجولف ده غير انى سمعت عنه قبل كده فى المنتدى وربنا يوفق ودعواتكم .

- ممكن بس اعرف اية الى يخلى العربية ما تسحبش يعنى على الخامس كنت بوصل 140 وكان بالطقم القديم دلوقتى بحس انها بتغيب على ما تطلع للـ 100 ؟

- اية فرص او اسباب تنقيط زيت من الفتيس ؟

- اية اسباب انى اشم ريحة شياط خفيفه بعد ما بوصل لسرعه الـ 100 .

مع خالص تحياتى ،،

[ehab_mansour]

1- لو العربية سحبها كويس في الغيارات الأولي و عداد الأر بي ام مناسب للسرعة اللي انت ماشي عليها ومع الغيار يبقي الطقم زي الفل ومافيش فيه مشاكل تشوف المحرك ايه ظروفة وايه مشكلته محتاج سيرفيس او ضبط او .......اي حاجه
2-تنقيط زيت الفتيس بيكون بسبب اولسيل عصاية الفتيس وده بنسبة كبيرة جدا هو السبب الرئيسي
3- ريحة الشياط دي اكنها زيت محروق كده ولا ريحة ايه بالضبط
لأن انا شاكك ان اللي ركب الطقم يكون وسخ الطقم من ايديه وهو بيركب لأن الديسك لا يجب لمسه من السطح اللي بيمسك مع الاسطوانه
لو الديسك او الاسطوانه اتوسخ وهو بيركب او جه اي زيت او شحم عليهم بيسبب مشاكل كتيييييييييير منها :- ضعف السحب و ريحة الشياط وعدم تناسب سرعة المحرك مع سرعة العربية وعدم قدرة السيارة للوصول للسرعة المناسبة
والله المستعان

[egman]

هو بالفعل اكنها زيت محروق او شحم بيتحرق او كاوتش بيتحرق مش ريحة زيت محروق صريحة وهو بيركب الطقم ايده كانت متنيلة بستين نيلة شحم وارف ونيلة سودا فعلا دنتا اكنك كنت واقف معانا !!!!

تانى حاجة العربية على الاول بتجيب 20 وكسر والار بي ام على 2500 تقريبا التانى بجيب عليه 40 او 50 والار بي ام بيكون 3000 التالت 60 والار بي ام على 3500 الرابع 100 والار بي ام على 4000 على الخامس 120 على ار بي ام 3000 او 3500 !!!!

طيب فى حالة انه اولسيل الفتيس مش كده يبقى الراجل لازم يحل الفتيس مرة تانية صح ولو كده مش ممكن ينظف الطقم او يشوفه ويكشف عليه ؟

طيب اية سبب ان دواسة الدبرياج بتبقى تترعش اجي احط رجلى عليها وانا بغير الاقيها بتترعش زي ما تكون خايفة منى :) ؟

وهل لعبة الدريكسيون حلول لانى ناوى اكشف عليها ولا واحدة جديدة وبس وهتكون بكام ؟

[ehab_mansour]

بخصوص نسب السرعات مع الغيارات فهي مضبوطة أفضل حاجه تخلي ميكانيكي كويس واحكيله علي اللي بيحصل وهو ان شاء الله هيعملك المطلوب
بخصوص اولسيل عصاية الفتيس فده بيتركب من بره ومش بيحتاج فك فتيس ولا حاجه فقط بيفك تيش العصاية ويشيل القديم ويركب الجديد
اما الدواسة فبرده الميكانيكي قله عليها
بالنسبة لعلبة الدركسيون فهو هيفك ويشوف لو محتاجه تتغير هيغيرها ولو مش محتاجه والمشكلة في تيش ولا بيضة توجيه هغير المطلوب

الخلاصة ميكانيكي بيفهم يظبطلك الدنيا كلها

[egman]

والله يا ايهاب باشا انا توصلت لميكانيكي كويس قوى فى جسر السويس وهو متخصص فقط فى السيات والفولكس .

المهم انا كانت العجلة عملت صوت نحره فى المشي المهم اول ما وصلتله حكيتله على الموضوع كله وقالى نبدا نشوف العجلة والمهم طلعت بليه العجلة بايظة المهم غيرتها وظيط وغيرت شوية حاجات تانية بعد ما الراجل كشف عليها :

1- جوز بطاحات .

2- كوتش دشم الفرامل .

3- جوز كوتش كوبلن لان الى عندى كان مقطوع والكوبلن ما فيهوش شحم .

4- صواميل كوبلن جديدة .

بعد تغييير الحاجات ده الموضوع فرق معايا كتير اوى فى المطبات والمشي والدنيا بقت انعم .

بعد كده دخلنا على المشكلة الاساسيه وهى ان فى زيت بيكون تحت الفتيس وطلب منى الاتى :

1- انى اغسل العربية كويس من تحت .

2- انا غسلت فى نفس الوقت الى كنت رايحله فيه رفعنا العربية من قدام على الكوريك ودورنا العربية وسيبناها دايره لاكتر من ساعتين وما فيش اى زيت ظهر من اى ناحية .

3- طلب منى انى امشي بالعربية يومين وبعد كده اروحله تانى وان شاء الله انا هروحله يوم بكره .

ملاحظاتى :

بعد تغيير الحاجات الى فاتت فى المطبات والنقر والشوارع المكسرة العربية الحمد لله ما بقتس تشخلل ولا حاجة .

من بعد الغسيل فى كالتكس الى الان لم يظهر اى زيت تحت العربية .

انا عندى لسة مشكلة فى الفتيس وده كنا اجلنها لما اروحله بكره ان شاء الله وهى ان بحس برده ان الخامس رجع تانى زي ما يكون ما فيس سحب عليه زي الاول فى الطقم القديم انا على الطقم القديم كنت بيجب 140 وممكن لو قرصت يبقى 150 دلوقتى الخامس عندى بيجيب 100 وبشم ريحه شياط وحاسس كده ان الخمس مش هو ده وواعتقد ان ده التالت .

وبرده الغيار التانى اوقات يهرب منى اجى اجيب التانى اسمع صوت عالى قوى وما فيش سحب وشوية ويتعدل تانى لوحده .

فانا لسة متحير هل الموضوع ده سببه تربيط كويس على العصاية والتيش وظبط الغيارات ولا سوء تركيب طقم الدبرياج ولا اية بالضبط ؟؟؟

تانى حاجة فاكر يا باشا الخرطوم الى بيبقى خارج من وش التاكيهات لما قولتلى ده بتاع الفايظ الميكانيكي قالى فعلا كده بس قالى انه لية مكان لازم بيركب فيه بس صاحب العربية السابق سايبه كده علشان الموتور خفيف شوية ولو وصل الخرطوم مكان ممكن الموتور يبخر وكمان فيه خرطوم طالع من ورا الموتور بس تحت شوية من الجزء الشمال فيه ومتوصل كده بعلبه زي ما تكون بلاستيك برده الخرطوم ده لقيته بيطلع بخار وقالى ان العربية هتكون محتاجه طقم شنبر بس قالى ده ناجله دلوقتى خالص لما نظبط مواضعينا الاول فاية رايك فى الكلام ده ؟



وانا اسف على التاخير فى الرد نظرا لان النت كان فى مشاكل عندى ،،