تجربة تانية مع توكيل أرض اللوا

[ehab_mansour]

تفتكر لو رحت مركز الصيانة التاني إلي عند سوق القنال هيحصل نفس الموضوع ، مش عايز نبني انطباعنا على سلوك فردي أو صنايعي مش عايز يشتغل ، الحق عادةً بيرجع بس في مصر محتاجين دايماً مجهود عشان نرجعو
ربنا معانا

انت غيرت رأيك وانا كمان مقلتش تفاصيل ؟
الله المستعان
يا أفندم حضرتك قدامك حل من اتنين
1- التوكيل ثم التوكيل ولو متحلتش مشاكلك يبقي رقم 2
2- حماية المستهلك ومحضر في القسم وفضيحة لحد متاخد حقك او يغيرو العربية كلها

لكن انت معاك عربية جديدة وفي الضمان و بتفكر تروح لحد بره لييييييييه حرام هو انت دافع قليل

ربنا يعيننا جميعا علي المصايب اللي ماليه البلد وينجينا منهم

[harban]

عفواً ، أنا مغيرتش رأيي ، أنا مصدق إلي حضرتك بتحكيه ، و عايز اساعد في توضيح صورة محايدة للتجربة السيئة بتاعتك أو بتاعتي بصرف النظر عن مسماها
أنا مش حاروح غير التوكيل و مش هدفع حاجة مش المفروض ادفعها ، و مش هركب العربية لو مش مقتنع انها سليمة و مظبوطة ، في نفس الوقت مش حاعمل فضيحة غير لو حاجة من إلي قلتها ماحصلتش

أنا مش عايز نغير قرار لواحد كان هيشتري Seat وقفل من كلامنا ، وجود صنايعي مش فاهم أو عيب فالتصنيع (يتم إصلاحه) ميمنعش إن العربيات دي محترمة بمعنى الكلمة، بمجهود حضرتك والاخوة هنا ممكن نعدل لو في حاجة مش مظبوطة فالتوكيل

المصايب مالية البلد من زمان يا باشمهندس مش حاجة جديدة علينا ، إلي يقدر يعمل حاجة يعملها واللي ميقدرش يدعي بس لتيسير الأمور لمن يريد الخير لنا
أسف للإطالة ، أنا شغال فالسياحة و أصلاً مفيش سياحة من 5 شهور ، ربنا يرزق جميع السامعين انشالله

[ehab_mansour]

كلام حضرتك جيد جدا وفعلا المفروض كنت انا عملت كده و حاولت أصلح الحال الأعوج والغير منضبط هناك ولكن صدقني معنديش وقت لكده وكمان اتخنقت من كل الناس هناك متسألنيش السبب ايه لأني معرفش ولكن ده اللي حصل

علي فكرة اي حد قبل كده كان بيهاجم توكيل سيات كنت بتصدي له من كلام الأعضاء اللي جربو كلهم الشغل هناك و لكن للأسف من أول تجربة معاهم اتصدمت و مش اتصدمت في حاجه واحده ولكن انا فعليا مرحتش بحاجه ورجعت بها متصلحه كل اللي رحت بيه رجعت بيه و أسوأ حالا من قبل الذهاب ليهم

وتعرف اني معنديش مشكلة ان المشاكل متتحلش ولكن هما كرهوني وقتها في العربية و في فولكس بحالها و أقسم بالله كنت بفكر أبيع العربية بعد شرائها بأسبوعين و حالتي النفسية اتدمرت لفترة تزيد عن أسبوعين و دفعت فلوس و ضيعت وقت (خسرت ماديا ومعنويا كتييييييييير جدا )كل ده بسببهم تخيل بقي لو انت كنت هتعمل ايه ؟

والحمد لله كل المشاكل اللي هما عجزو عن حلها اتحلت بأسهل الطرق وبفضل الله وحده

جودة سيارات سيات شيء لا يختلف عليه أحد والسبب الرئيسي اني اشتريت قرطبه بعد الابيزا هو حبي للماركة أولا و لفولكس وسياراتها ثانيا

وعايز أقلك و لأي حد هيشتري سيات ان أداء التوكيل في خدمة ما بعد البيع جيدة جدا بل ممكن نقول ممتازة و خدمة ما بعد البيع تتمثل في الصيانات الدورية و العامة من وجهة نظرهم ولكن لما بتحصل مشكلة رخمة شوية محتاجه تركيز و فحص دقيق و اهتمام زيادة شويتين هنا بقي الفيصل و دي النقطة الرئيسية للحكم علي اي واحد جهة او شخص فنيا هو المشاكل المعقدة (معلش انا شغال في خدمة ما بعد البيع أيضا و في الصيانة أيضا ولكن في مجال أخر غير مجال السيارات ولكن الفكر واحد و طرق الحل واحدة و الأدوات واحدة ) واللي حلها بيحتاج فعلا troubleshooting صح و تحليل صح

علي العموم الله الموفق و المستعان وانا هحاول أرحلهم لو قدرت ولو رحت هوافيكم بالنتائج ان شاء الله

و أخيرا ربنا ييسرلك حالك و يوفقك ويرزقك من حيث لا تحتسب و صدقني الحال سييء في كل مكان ولكن ربنا ان شاء الله هيزيح الغمة

[harban]

طب إسمع دي ، لسة راجع من هناك النهاردة، طبعاً قراءات الكمبيوتر كلها سليمة 100% كالعادة ،
في باشمهندس إيهاب هناك، راجل محترم بمعنى الكلمة ، ركبني Ibiza جديدة عشان أشوف ال-RMP ، فعلاً زي بتاعتي بالظبط ، نفس الصوت والنحرة إلي فالموتور ، هو مصدقني في موضوع الرجة والمفروض هروحلو الإسبوع القادم تكن الدنيا فاضية شوية
المهم كان في تلات شباب زي الورد والله ، ٢ Ibiza ، ١ Leon ، كلهم جالهم مشكلة ال-DSG ، و كلهم غيرو الفتيس كامل على الضمان ، طبعاً زعلانين جداً و مش طايقين العربية بس المهم إن التوكيل عمل إلي عليه و غير
أعتقد إن لسة هنشوف مشاكل ال-DSG ال-٧ غيارات ده كتير أوي فالفترة القادمة

[esp]

انت بتكلم جد؟ مشكله فتيس في الابيزا؟ و دي في كل العربيات ولا اه؟