حكايـــــــــــــــــــتي مع البوابـــــــــــه

[Mstfun]

سلام عليكم ورحمة الله

هاحكيلكوا حكايتي بقي مع البوابه اللي بقالها شهر ونص ملففاني حوالين نفسي

وكانت سده نفسي عن العربيه وعن اللي عملوها وعن اي حاجه

اولا انا عربيتي ابيزا 2001 مسقطه موتور 1800 cc

الموتور اللي فيها موتور اوكتافيا على فكره

المهم .........من فتره طويله حصلت حاجه غريبه !!!

كونت مره مسافر زراعي ولاقيت العربيه بتبطل وهي ع التاني والتالت

كنت برميلها تدور فماخدتش ولا اديت لان عربيتي معوداني ان لو حاجه غريبه حصلت ممكن تتصلح لوحدها المشوار اللي بعده عادي.

وفعلا اشتغلت عادي بعدها

جيت ادورها من شهرين ع المغربيه كده .... تدور وتقوم مبطله وقتي

ادور.... تدور ثانيتين بالظبط وتبطل

اوقات تطول شويه بس الار بي ام يتحرك ومش ثابت كانه بيشاور عقله يبطل

وتفضل كده لحد ما امشيها بالاكراه

يعني اول ماتدور اقرص ع البنزين واطلع تبطل وتدور تبطل وتدور لحد ماتدور بعد خمس دقايق مشي..

طبعا ناهيك بقي انها ف اي اشاره واول ما اكون ممور بتبطل طبعا ولما ادور مستحيل تدور من اول مره لااازم من تاني اول تالت مره

المهم روحت لهريسه ودا اشهر واحد بيشتغل ف الفولكس هنا ف اسكندريه...

كشف عليها بالكمبيوتر قالي العربيه محتاجه التالي :-

بوابه + طلمبه بنزين + فلتر بنزين + حساس منفلو + حساس كوع مياه

طبعا كدا هايخرب بيتي رسمي

انا قولت انا هاغير حاجه حاجه كده ف السلانسيه لحد ما العيب دا يتصلح

روحت لعم السيد الميكانيكي بتاعي واولا غيرلي البامب بتاع طرمبه البنزين.. جيبته الماني اصلي جديد ب 350

برضه العيب مازال موجود

من 3 ايام خبطت مشوار القاهره ع الصحراوي ولاقيت حاجه جديده هي ان فيه صوت فرقعه بيطلع من الشكمان كده وريحه عادم بتبقي ف العربيه

روحت لعم السيد فتح الكبوت وفضل يعمل شويه حجات كده وقالي كده انا اتاكدت ان المشكله ف البوابه.

فكها وعمل شويه حجات وركبها ماشتغلتش.... قالك بس لازم واحده جديده

قولتله طب ماتنضف الاسبراتير قالي انت عربيتك مافيهاش اسبراتير

هو ينفع عربيه من غير اسبراتير زي اللي انتو عمالين تنضفوه هنا ف المنتدي كل شويه دا ؟

روحنا لواحد بتاع استعمال طلعلنا واحده حالتها كويسه.. كام ياعم قالك خمسه مقفوله

يانهااااار خمسميه جنيييييه المهم من هنا لهنا مارضاش ينزل جنيه عن ربعمايه وخمسين

الراجل علمه عشان لو ماشتغلش نرجعه

ويادوب ركبناه وقالي دور.... بدور راحت العربيه دارت من اول مره ماشاء الله

ابطل وادور تدور على طول من اول مره زي زمان

الار بي ام ثابت ومش بيتحرك العربيه فضلت دايره عشر دقايق متموره مابطلتطش ودا عمره ماكان بيحصل

بس وانا راجع بقي البيت من عند الميكانيكي الشكمان فضل يفرقع كام مره كده فمش عارف ايه سر الفرقعه دي

ودي كانت قصتي مع ام البوابه اللي قرفتني احلي قرف

مستني تعليقاتكم ولو فيها حاجه نسيتها اكيد هاضيفها

[Mstfun]

نسيت اقول انه اوقات لما يبقي فيه مطر جامد وبرك مياه

بلاقي السحب ضااااااااااع والعربيه وقفت وماتشتغلش غير بعد نص ساعه ولا حاجه

[ehab_mansour]

و عليكم السلام ورحمة الله وبركاته

علي فكرة انا حاسس ان كل الميكانيكية عندها هسهس اسمه طلمبة بنزبن
مافيش واحد هنا في المنتدي راح بعيب غير و هو راجع اشتري طلمبة بنزين معاه عشان يركبها حاجه عجيبه الصراحة و تشابه عجيب الصراحة بيؤكد ان كلهم اشتركو في شيء واحد وهو عدم قدرتهم علي تشخيص العطل بشكل صحيح !!!!!!!!!!!! الله المستعان

عموما من البداية حضرتك العيب واضح جدا انه من البوابة فقط ده بما يخص موضوع الدواره و التبطيل في الاشارات و اول ما تدور يفضل الأر بي ام يرقص و هكذا ...

ثانيا فيه عندك عيب أخر وهو موضوع الفرقعه و ده عيب كهرباء يعني من الأخر حضرتك تقلنا مغير بوجيهات امتي بالضبط و السلوك أخبارها ايه و أطرافها نضيفه ولا مملحة و كذلك الأسبراتير أطرافه نضيفه ولا مملحة و كله شغال ولا فيه طرف مش بيخرج اشاره كل ده محتاج مراجعة بسيطة من حضرتك او من اي ميكانيكي عنده ضمير و بيفهم بس

بخصوص موضوع الأسبراتير ففيه منه أنواع كتير و ممكن فعلا ميكنش عندك اسبراتير واضح لواحده زي اللي بننضفه عند مهندس محمد سيد يعني ممكن يكون عندك أسبراتير بموبينه الكتروني مع بعض قطعه واحدة و دول مع بعض يا شغالين يا لو حصلهم حاجه بيتغيرو مع بعض و بس و فيه موضوع هنا انا متكلم فيه عن أنواع الأسبراتيرات لمحركات فولكس و اللي شفتها حتي الأن هشوفه و اجبهولك
و بعدين يا سيدي ادخل استشير اخواتك هنا يمكن يساعدك بدل البهدلة و المصاريف دي كلها و متزعلش تعالي مقابلة نظبط العربية و احنا هنجيلك نتغدي عندك في اسكندرية غدوة سمك محترمة عشان متحسش بفرق
هههههههههههههههههههههههههههه
اي خدمه دبستك اهه
وربنا يوفقنا جميعا لما يحبه و يرضاه

[ehab_mansour]

نسيت اقول انه اوقات لما يبقي فيه مطر جامد وبرك مياه

بلاقي السحب ضااااااااااع والعربيه وقفت وماتشتغلش غير بعد نص ساعه ولا حاجه

ده كمان سبب أساسي و رئيسي بيؤكد ان عربيتك محتاجه مراجعة كاملة لدائرة كهرباء المحرك
و يوكد عندك تسريب في دائرة الكهرباء او أسلاك متعرية او ... اي حاجه تخص الكهرباء
ولما بيحصل و تتواجد رطوبه او مياة تزيد من فرص حدوث تلامس كهربي و فقد لكهرباء المحرك بتلاقي الدنيا ضاعت و باظت كما تفضلت و قلت
و الله الموفق

[Mstfun]

ياباشا والله تنوروا واحلي غدوه سمك وجمبري لما تنورني ف اسكندريه ف اي وقت

وانا مش بعزم عزومه مراكبيه والله

المهم..... بيني وبينك انا حسيت ان موضوع طلمبه البنزين دا انا لبستها بصراحه برضه

لاني ماحسيتش باي فرق يذكر الفرق حسيته النهارده لما غيرت البوابه

بس بصبر نفسي واقول ان الكمبيوتر الله يحرقه هو اللي قال ع الطلمبه دي

بس انا عايز اعرف الاسعار كده فعلا ولا انا اتنصب عليا ؟ ؟

وشكرا لسرعه الرد ياباش مهندس وتقريبا ماقدميش غير اني اشوف كهربائي ان شاء الله


واخر مره غيرت البوجيهات كانت النهارده برضه غيرتها ببوجيهات 2 شمعه

[ehab_mansour]

ياباشا والله تنوروا واحلي غدوه سمك وجمبري لما تنورني ف اسكندريه ف اي وقت

وانا مش بعزم عزومه مراكبيه والله

المهم..... بيني وبينك انا حسيت ان موضوع طلمبه البنزين دا انا لبستها بصراحه برضه

لاني ماحسيتش باي فرق يذكر الفرق حسيته النهارده لما غيرت البوابه

بس بصبر نفسي واقول ان الكمبيوتر الله يحرقه هو اللي قال ع الطلمبه دي

بس انا عايز اعرف الاسعار كده فعلا ولا انا اتنصب عليا ؟ ؟

وشكرا لسرعه الرد ياباش مهندس وتقريبا ماقدميش غير اني اشوف كهربائي ان شاء الله


واخر مره غيرت البوجيهات كانت النهارده برضه غيرتها ببوجيهات 2 شمعه

ربنا يخليك يا أخي الفاضل و ربنا يسهلها و ييسرلك الحال
شوف بخصوص موضوع الطلمبة فانت اشتريت طلمبة صيني و لكن بجودة عالية شوية و مش ألماني لأن مع احترامي لأي حد مافيش طلمبة للعربيات دي أوريجينال بالسعر ده نهائيا و ده سعرها هنا ايضا بالقاهرة
و يهمني أعرف انت أخدت القديمة ولا سبتهاله لأنك لو سبتها تبقي بتهرج لأنها ان شاء الله سليمة

بخصوص سعر البوابة فمهم نعرف هيا بوابة كهرباء زي اللي في المحرك ال 1000 للابيزا 2000 ولا واير زي اللي في المحرك ال 1000 للابيزا 98 ؟ لأن سعرهم مختلف و لكن أعتقد حتي لو كانت كهرباء فهي غالية شويتين لكن اعمل حسابك ان في اسكندرية و السعر عندك غالي شوية
الواير تعرفها بانك هتلاقي فيها جزء اسود دائري بيحرك البوابة و علي سوسته و بيتركب عليه الواير لكن الكهرباء هتلاقي بتتحرك كليا بالكهرباء يعني ليها مكان دخول فيشة كهرباء و بس و مبيركبش عليها اي حاجه تانية و كمان الكهرباء هتلاقي دواسة البنزين عندك كهرباء مش واير

بخصوص الأسبراتير فياريت تشوف المشاركة دي

http://www.nilemotors.net/Nile/266416-a-2.html#post3874055196

و بالنسبة للمشكلة الحالية فكده البوجيهات براءة أعتقد و المشكلة هتكون في السلوك او مجموعة الأسبراتير بالموبينه (بغض النظر عن نوعهم ) او ممكن يكون مراجعة و تنظيف بس المهم تراجع علي دائرة الكهرباء كما قلتلك
و ربنا يسهلك الحال و نشوفك المقابلة القادمة ان شاء الله لما نحدد الموعد و ياريت تسيبلنا بياناتك في موضوع المقابلة لو تقدر تشاركنا و بالتوفيق ان شاء الله

[Mstfun]

والله يا باشمهندس انا كده بهرج لاني ماخدتش القديمه :(

هي المضخه بس اللي اتغيرت مش الطلمبه كامله بس هاجيبها منه يعني انا معاه كل يومين

مش عارف هي كهربا ولا لا بصراحه بس هي ليها فيشه كده بيركب فيها كابل بسنون كده ... كده تبقي كهربا ؟

ان شاء الله الاسبوع الجاي هاروح لكهربائي اقوله يعملي فحص علي سلوك الكهرباء ويشوفلي مشكله فرقعه الشكمان دي

وفعلا انا ملاحظ ان الاسعار ف اسكندريه اغلي شويه من اسعار القاهره اللي بسمعها هنا ف المنتدي

[ehab_mansour]

والله يا باشمهندس انا كده بهرج لاني ماخدتش القديمه :(

هي المضخه بس اللي اتغيرت مش الطلمبه كامله بس هاجيبها منه يعني انا معاه كل يومين

مش عارف هي كهربا ولا لا بصراحه بس هي ليها فيشه كده بيركب فيها كابل بسنون كده ... كده تبقي كهربا ؟

ان شاء الله الاسبوع الجاي هاروح لكهربائي اقوله يعملي فحص علي سلوك الكهرباء ويشوفلي مشكله فرقعه الشكمان دي

وفعلا انا ملاحظ ان الاسعار ف اسكندريه اغلي شويه من اسعار القاهره اللي بسمعها هنا ف المنتدي

انا عارف ان القلب بس اللي اتغير مش الطلمبة كلها و اكن الأصلي ميتعوضش وربنا يهديه و يديك بتاعتك ميديكش اي واحده و خلاص

البوابتين الكهرباء و الواير ليهم فيشة كهرباء و لكن الكهرباء بيتركب فيها الفيشة بس و مالهاش جزد دائري بسوسته في شمالها يركب عليه سلك الواير

ياريت تروح لميكانيكي محركات أفضل و ياريت يكون بيفهم في فولكس لأنه مسئول عن المحرك كهرباء و ميكانيكا و فيه اوقات كهربائية مبيكنش ليهم في المحركات خالص و لكن كل شغله كهرباء لأي حاجه الا المحرك و ده انا قابلته قبل كده
و ربنا ييسرلك الحال ان شاء الله

[Mstfun]

كده يبقي واير لانه فيه سلك صلب كده بيركب على جزء دائري لما بيتشد كانك بتدوس بنزين


ياريت اعرف مكان واحد كده ف اسكندريه بيعرف في كهرباء المحركات

شكرا لردك واهتمامك يا باشمهندس

[ehab_mansour]

دي البوابة الكهرباء
Throttle Body For Seat, Please Check Fitment | eBay
و دي البوابة الواير
NEW VDO THROTTLE BODY | eBay

[Mstfun]

هي بوابه واير ياباشا

طلع عيني لحد ماجيبتها ب 450 بس حالتها حلوه

[ehab_mansour]

هي بوابه واير ياباشا

طلع عيني لحد ماجيبتها ب 450 بس حالتها حلوه

هي كده سعرها عالي شويتين بس هتعمل ايه اسكندرية بقي
عندنا في القاهرة انا فاكر ان سعرها من 250 الي 350 فقط و مش ممكن تزيد عن كده
لكن المهم تظبط معاك و ربنا ييسرلك الحال ان شاء الله

[SYD]

اولا اهلا بيك في قسم سيات

انا طبعا قريت كل المشاركات و لي تعليق واحد ليس اكثر

المهندس ايهاب قال كل شئ طبعا كالعادة وربنا يارب يبارك فيه

اولا الكمبيوتر مش بيقول ان الطرمبة بايظة او شغالة ودي كانت اكبر اشتغالة من الميكانيكي معدوم الضمير الي انت اتعاملت معاه

ثانيا البوابة الواير عندنا فعلا ب 250 -300 جنيه بحد اقصي

ثالثا البوجيهات الفولكس عموما 3 شمعة وليس 2 شمعة زي الأوبل وحضرتك تقدر تتأكد من كود البوجيه المناسب من موقع ngk

ايه دة هما بقوا 3
معلش مقدرتش امسك نفسي

تحياتي

والله المستعان
،
،

[hanyalashkr]

يا جماعه انا متابع الموضوع و كان عندى نفس مشكله الاسبراتير بنفس الاعراض للبولو .. و اللى بيظبط الاداء اكتر ثرموستات الكوعه ..
عموما عندى بعض قطع الغيار الاستيراد وبتشتغل على بولو و ابيزا لو حد عايزهم خصوصا من اسكندريه و باسعار اقل كمان من اسعار الحرفيين و اهو توفير للمشوار و مضمونه انها شغاله كويس

2 مساعدين امامى كاملين 350 جنيه
مقص كامل بدون جلبه 150 جنيه
سربنتينه تكييف 300 جنيه
علبه دركسيون باور 350 جنيه
اسبراتير بوش المانى بولو 1300 كامل ........... 250 جنيه (دى كانت راكبه عندى و كانت عامله المشكله لانها بتاعة 1300 مش 1000 فرق فى توقيت الاشعال و ده اللى بيعمل دروب للأر بى أم لكن تشتغل تمام على ماكنة 1300)
ثرموستات رادياتير المانى .... 75 جنيه
دراع اشاره المانى ... 100 جنيه
مروحه رادياتير المانى .... 175 جنيه
فبرة كونتاكت اصلى .... 100 جنيه


للاتصال 01003178327 هانى الأشقر . الإسكندرية

[Mstfun]

باشمهندس سيد منور الموضوع واسف على التاخر في الرد

انا فعلا ملاحظ ان كل اسعار الاستعمال ف اسكندريه اغلى كتير من القاهره

بس عموما انا موتور عربيتي بتاع اوكتافيا 1800 سي سي وحتي اي حاجه بجيبها للموتور بتبقي اوكتافيا مالهاش علاقه بالفولكس ولا الابيزا اصلا