محتاج مساعدة ضرورى

[maodc14]

السلام عليكم اولا
اخوكم جديد فى المنتدى ومحتاج راى الخبراء انا معايا ابيزا 2006 مانيوال وعندى شوية مشاكل فيها وانى ما افهمش حاجة فى الميكانيكا والكهرياء محتاج مساعدتكم
1- الباور تقيل شوية
2- لمبة الهاند بريك بتنور وتصفر وانا ماشى وباخد ملف بس مش على سرعة عالية مش عارف ليه
3- الماية فى الاربة بتقل بعد يومين تلاتة مع انى لسه جايب رداياتير جديد
4- وفى فى التابلوه اشارة بتظهر لما بدور العربية insp وبتروح بعد شوية
5- الصبح لما بدور العربية تدور وتبطل لوحدها بعدين مرة مرتين تلاتة حسب مزاجها بعد كده تدور
6- لمبة البنزين تنور وتصفر لو البنزين فى الربع الاخير المؤشر يطلع وينزل وساعات يقف عند الصفر
ياريت الافادة واعمل ايه وشكرا

[SYD]

السلام عليكم اولا

وعليكم السلام ورحمة الله وبركاته

اخوكم جديد فى المنتدى

اهلا بحضرتك عضو جديد معانا في المنتدي عاما وقسم سيات خاصا

ومحتاج راى الخبراء انا معايا ابيزا 2006 مانيوال وعندى شوية مشاكل فيها وانى ما افهمش حاجة فى الميكانيكا والكهرياء محتاج مساعدتكم
1- الباور تقيل شوية

احتمال يكون في ضعف في الطرمبة - ودي سهل انك تعرفها
افتح غطا الخزنة بتاعة الزيت وبص فيه (طبعا والعربية دايرة) لو لقيت الزيت بيلف بشكل مستدير (زي بالظبط كأنك يتقلب كوباية شاي) يبقي الطرمبة كويسة والمشكلة ممكن تكون اما في اللاكور بتاع الماسورة او يوجد ضيق وخنقة في احد الخراطيم او المواسير
لو مش بتقلب يبقي الطرمبة عايزة تتغير
لو بتقلب يبقي روح اكشف علي الخراطيم ومواسير الضغط واللاكور بتاعها عند اي ميكانيكي او عفشجي

2- لمبة الهاند بريك بتنور وتصفر وانا ماشى وباخد ملف بس مش على سرعة عالية مش عارف ليه

احتمال يكون الرجلاش بتاع فرامل اليد قافل شوية علي الطنابير ودة الي بيخليها تصفر وانت ماشي
بالنسبة للمبة بتاعتها ممكن تكون معلقة
شيل الجلد من علي دراع الهاند
هتلاقي مسمار في نهاية الفبرة لما تفكه هتلاقي الزرار بتاع الزراع - احتمال يكون عايز تنظيف

3- الماية فى الاربة بتقل بعد يومين تلاتة مع انى لسه جايب رداياتير جديد

راجع علي الغطاء - ممكن يكون بينفس او الجوان بتاعه نشف (الغطاء ب15 جنيه)
راجع علي شجرة المياة - احتمال يكون فيها كسر او شرخ بيسرب المياة
راجع علي طرمبة المياة - لو بتعمل صوت معاك والمية بتنقص وهي العربية ماشية يبقي الطرمبة محتاجة تغيير

4- وفى فى التابلوه اشارة بتظهر لما بدور العربية insp وبتروح بعد شوية

لا دي معرفش الصراحة
بس عموما اي error بيظهر في الطابلوه يبقي عليك وعلي اي كهربائي عنده كمبيوتر الأعطال بتاعها يقولك دي ايه

5- الصبح لما بدور العربية تدور وتبطل لوحدها بعدين مرة مرتين تلاتة حسب مزاجها بعد كده تدور
6- لمبة البنزين تنور وتصفر لو البنزين فى الربع الاخير المؤشر يطلع وينزل وساعات يقف عند الصفر

5 و6 الأتنين متعلقين ببعض
عندك اوساخ متراكمة في التانك والفلتر البنزين ووسخوا الرشاشات
حاول دايما تمشي بالعربية مفولة (اقصي حاجة 3/4 التانك)
حط منظف انجيكشن - راجع الموضوع دة (تجربة أضافة stp علي البنزين)
غير فلتر البنزين
نظف البوابة (الأحسن روح لميكانيكي فولكس ينظفلك البوابة - او انت نظفها بنفسك لو بتعرف ولو مش بتعرف راجع الموضوع دة تنضيف البوابه خطوات ونتائج




ياريت الافادة واعمل ايه وشكرا

لينكات الموضوعات

تجربة أضافة stp علي البنزين
تنضيف البوابه خطوات ونتائج

الله المستعان
،
،

[ehab_mansour]

و عليكم السلام
طبعا مهندس محمد سيد رد بما فيه الكفاية و لكني حابب فقط أضيف علي كلامه حاجه بسيطة :-

1- من ضمن الاحتمالات ان ممكن يكون متغيرلها زيت باور خصائصة غير الموصي به في الكاتالوج و دي بعد مراجعة كل اللي قالك عليه مهندس محمد فوق ابقي غير زيت الباور و اشتري الأصلي من عند أشرف الشهابي بشارع دمشق
2- يا تري تقصد بتصفر يعني بتدي انذار ان اللمبة منورة ولا الفرامل نفسها بتصفر ؟ و طبعا في كلا الحالتين الرد فوق كافي انك تشيك علي الفرامل نفسها و علي الذرار بتاعها
3- ضيف علي اللي فوق انك تراجع كمان علي خراطيم المياة بتاعت الدوره كلها و علي الأفايز اللي ماسكاها و تتأكد ان مافيهاش تفييص لأن دي مهمة جدا ولو مش راكبة كويس او مافيش افيز ركبلها
4- الرسالة اللي بتظهرلك في التابلوه دي بتقلك علي ان العربية محتاجه سيرفيس لحاجه معينه و دي ممكن تعملها ريسيت تماما و تريح دماغك لأن المفروض دي بتتظبط بكمبيوتر الأعطال عشان كل ما مسافة مثلا 10 الاف كيلو تظهر تنبهك انك محتاج تعمل صيانة و لما تعمل الصيانة تعملها ريسيت من اول و جديد برده بالكمبيوتر تمام
لذلك لو عملت الصيانة و معملتش لها ريسيت هتفضل ظهرالك كده باستمرار و عشان كده احنا هنا في مصر بنكبر دماغنا منها لأن مش مع كل تغيير زيوت و فلاتر بنحط العربية علي الجهاز كما قال المصنع
5- اعتقد تنظيف البوابة تماما و تغيير فلتر الهواء و البنزين هيحل المشكلة دي ان شاء الله
6- الرد فوق كافي ولو متلحتش المشكلة باستخدام المنظف و تفويلة 92 من بنزينة محترمة يبقي ممكن تكون العوامه فيها مشكلة و محتاجه تتغير

[Mstfun]

باشمهندس ايهاب وباشمهندس سيد

بارك الله فيكم رد اكتر من رائع

[SYD]

باشمهندس ايهاب وباشمهندس سيد

بارك الله فيكم رد اكتر من رائع

جزاك الله خير

ربنا يوفقك وتخلص الي فيها
وان شاء الله هتستمتع بيها

[maodc14]

انا بشكركم جدا على الرد

[SYD]

انا بشكركم جدا على الرد

ربنا يخليك
والله الموفق والمستعان
،
،