Tweet
قصه طويلة
السلام عليكم ورحمه الله وبركاته
اخيرا نويت اني اكتب قصه عربيتي فريده
Ibiza 1994
البداية
نويت اشتري عربية بعد الفحص والتمحيص لاقيت افضل عربية لحالتي واحتياجاتي الحاليه هي الابيزا توكلت علي الله نزلت السوق بس مفيش حاجه لقتها اثق فيها , بعد نزول اسبوعين ربنا كرمني بواحد معرفه عنده ابيزا بس كان سيبها في الشارع مركونه بقالها سنتين عشان هو ظابط جيش وكان في بعثه بره ولما رجع عايز يبيع ويجيب اجدد المهم قالي العربيه في الحرفين عشان بتتظبط مهم خدني ورحت شفت العربيه , العربيه من بره الشمس كلت الدهان في السقف بس العظم كويس ومفيش الا خبطه او اتنين الشاسيه كويس المهم
العربية متسقط ليها ماتور 1600
1.6 MPI 1598 cc 8 55 kW (75 PS)/ 4800 135 Nm / 2800–3600 AEE 1997–1999
تكيف وباور ومتغير مساعدين امامي
اخدت العربية من الحرفيين لحد البيت في ارض اللواء العربية زي الفل وسحب واتزان مكنتش متوقعه (اول مرة اركب هاتشباك).
تاني يوم مشوار للمطار رايح زي الفل وانا راجع علي بوابه الدفع العربية عملت صوت غريب اوي وبطلت المهم شويه ودارت بس الصوت غريب والعربية مفيش سحب , وصلت لحد اول الشارع وراحت مبطله وحلفت ما تدور زق يا معلم لحد البيت
تاني يوم اول كهربائي قابلني وديت عنده قالي المرش اتحرق , وروحت لحد الحرفيين الحمد لله في عربية تانيه عشان ده مشوار زي الفل , جبت المرش فك ركب دور مفيش دواره!!!!!!!!!!!! ايه يا عم الحاجه قال لازم افك الكونتكت قولت فك.
قال مش عارف افك !!!!!!.
هات حد يفكه ربنا رزقني بواحد بتاع مفاتيح فكه طلعت الفيشه بتاعت الكونتكت فيها كسر وكانت بتخلي المرش يعلق وده اللي حرقه.
مشيت بالعربيه تمام ,تاني يوم مشوار كارفور الصحراوي علي المحور وماشي تمام سبحان الله تبطل لوحدها يمين شمال انسي نص ساعه دور دارت امشي تمام هووووب تبطل المهم وصلت البيت وانا اخر خنقه واحد صحبي قالي عندي ميكانيكي تمام مهندس في فيصل روحت بعد الكشف قالي طرمبه البنزين عايزه تتظبط وغير فيها فيشه المهم مشيت من عنده تمام روحت ورحت الشغل ماشي من الشغل العربيه فيها حاجه غريبه ااتطلع علي الميكانيكي قالي سبها مشيت لقيته بيكلمني وبيقول الفتيس فيه كسر وملحوم وبيسقط الغيار الخامس والافضل يتغير زى الفل !!!!!!!!!! صباح الحرفييين
جبت فتيس ركب (غير مسامير الكبالن -ملء الاسطوانه - تظبيط مارش -تغيير بوجيهات 3 شمعه) كله ده عشان الدنيا تبقي تمام خدت العربية ومشيت السحب تمام صوت العربية اتغير روحت البيت وانا بحلم بعربيتي.
تاني يوم رايح الشغل وانا مبسوط , خلص اليوم مروح مشيت حوالي 100 م وخير الله ما اجعله خير دربكه تحت العربية وصوت يخوف لدرجه الناس كلها بتبص عليا وتبعد قولت طالما ماشيه الحق اروح للميكانيكي في فيصل روحت اول ما سمع الصوت اللي انزل ركب هو قالي الفتيس اتكسر من جوه خد العربية زي ما هي وروح للي اشتريت منه يا نهار حرفيين تاني والعربية بالمنظر ده امري لله.
رحت للراجل وقلته علي اللي حصل قالي معنديش فتيس 1600 بس في 1400 ويشتغل عادي جدا قولت ليه تمام ركب قال لي لا خده ركب انت قولت ليه ركب انت عشان يبقي علي ضمانتك
سيبت العربيه ومشيت تاني يوم البيه الميكانيكي عاد كل اللي عملته تاني
(غير مسامير الكبالن ملء الاسطوانه غيار زيت).
العربية ماشيه الحمد لله الصوت راح شهر فات بخرج مره في الاسبوع تمام .
في يوم بعد الشهر رايح كارفور ماشي تمام تروح مبطله لوحده اتخنقت واتصلت بواحد صحبي يشدني نص ساعه اجرب تدور دارت وصلت البيت ركنتها وسبتها اسبوعين ما بجيش جنبها مخنوق منها لحد وانا علي النت سمعت الناس بتتكلم علي زكريا الهواري اللي في ارض اللواء قولت هو انا عمال اروح اخر الدنيا واللي جنبي مجربتوش رحت واخد العربيه واتصلت بيه لقيته قريب مني جدا شرحت وضع العربية قالي سيبها ساعه وتعال.
رجعت قالي مشكله التقطيع كانت في فيشه فوق الاسبراتير وغيرها وقالي ابقي اعمل طقم سرفيس طالما لسه مشتري العربية قولت ليه ماشي الاسبوع اللي جي
وفعلا العربية مشيت تمام ورحت بعد اسبوع غيرت (سير كتينه- زيت شل 5000- سير دينامو- ركبت فلتر بنزين و قاعده كمبيوتر – فلتر بنزين –بوجيهات 3 شمعه) قولت عشان اخلص من كل حاجه واخلص من القصه دي بقي.
العربيه اتغيرت في كل حاجه بس ظهرت مشكله جديده مع دخول الصيف اشغل التكيف العربيه اول ما اشيل رجلي من البنزين تروح مبطله روحت لزكريا ظبط الاسبراتير والعربيه بقت تمام مشيت كام مشوار في ريحه بنزين في العربية قولت يمكن عشان مفول هتروح مشوار اتنين تلاته مفيش فايده قلت لا بقي اشوف ايه الموضوع رحت لعم زكريا تاني شامم يا عم الحاج اه ها فك لاقي خرطوم في قلب الموتور متأكل و بيجيب بنزين انا معرفش ده بتاع ايه بس هو قال ده بتاع الراجع المهم غيرته ودي كانت اخر مره اروح فيها ليه عشان يعمل حاجه في الموتور .
وضع العربية دلوقت
1- استهلاك البنزين 190 كم علي الزراعي لل 20لتر والكلام ده من كام يوم
2- العربيه بتنتش علي التاني وبتظهر اوي لما اشغل التكيف
3- لما اشغل التكيف لازم احرق الغيار علي الاخر والا تلقي العربيه مفيهاش عزم في الغيار اللي بعده
4- العربية ساعات وانا مشغل التكييف تبطل وانا داخل علي اشاره او هقف بس ده حصل مره او اتنين.
5- مؤشر البنزين مش مضبوط بيطلع وينزل وعمره ما وصل للفول حتي وانا مفول.
6- سحب العربية مش تمام العربية بقت بتجيب 120 بالعافية.
دلوقت ايه رايكم في اللي اعمله عشان انا خلاص علي اخري وخصوصا بعد موضوع البنزين اللي هيشيلوا الدعم من عليه.
ابيع العربيه واجيب حاجه اصغر في السعه اللتريه؟.
والا اخلي العربية؟.
استهلاك البنزين ده كده كويس؟.
الموتور اللي راكب ده كويس ولا لالا؟.
كمان في حاجه انا روحت سئالت علي الاكصدام الامامي كامل بالكساحه من غير فوج لايت قال600ج.
والجزء اللي تحت بس اللي هو المعدن +الستاره +الكساحه400
فرش باب داخلي 4 ب 500ج
العاكس الاسود الخلفي 150
الاسعار دي كويسه ولا ايه النظام؟.
ومنتظر اي اقتراحات من الاخوة الاعضاء لتحسين حاله فريده.
و يا رب يوفق الجميع.
واسف علي الإطالة
Comment