الدنجل اتعوج

[Karim Ibiza]

أنا عملت حادثة

بصراحة انا مش فاهم فى ايه, العربية شاريعها من 3 اسابيع وفى الفترة دى جبتلها موتور وعملت حادثة.

عموما الحمد لله على كل شىء

المهم ان الدنجل اتعوج والجنط كمان اتعوج والياى اتعوج والمساعد مبقاش بياخد ويددى وده بغض النظر عن الرفرف الخلفى اللى اتعجن بس الحمد لله الدواخل كلها سليمة

انا رحت لواحد بتاع عفشة قاللى هاتلى دنجل استعمال ولسه لمل أحل هاشوف ايه تانى عايز يتغير.

رحت لواحد تانى قاللى هحل الدنجل وهظبطه, قولتله توكل على الله وحل وانا مش مقتنع انه هيعرف يظبطه.

حل و قطع ودق ولحام وتركيب وقياس بميزان المياه وكل ده وانا واقف بتفرج وبعد لما خلص المعلم كل حاجة, طلعت على بتاع الزوايا عشان اتأكد ان المقاس تمام والحمد لله الراجل بتاع العفشة طلع معلم وظبط الدنجل بالمللى.

السؤال هنا بقى:
هل اللحام والدق واللى حصل ده كله يضعف الدنجل وهل المفروض انى اجيب واحد استعمال وهل مش هقدر أحمل اوزان فى العربية وهل فى خطر ان اللحام يفك؟

وشكرا

[windofchange]

الحمدلله قدرالله وماشاء فعل معلش متزعلش ياكريم بص هو استيراد من 400 جنيه ده اللي اعرفه وتجيبه نفس مقاس الطنابير اللي عندك ومعرفش بعد الاستعدال رجع زي ماكان ولا لأ

[khalid_adel]

الدنجل استيراد مش غالي مكنش في داعي للمخاطرة وياصابت ياخابت
ربنا يجعلها الخير لك فيها

[alzelafy]

الدنجل الخلفى ب 400 او 500 الناحيتين طبعا

[ehab_mansour]

فيه أجزاء مهمة في العربية لا يجب الدق او الطرق و الاستعدال فيها او اللحام و منها الدونجل
انا مش بخوفك ولكن الصح و الأضمن انك تغيره في أقرب فرصه لأن كل اللي حصل فيه ده بيضعفه

[ahmad_salama]

بصراحة انا مش فاهم فى ايه, العربية شاريعها من 3 اسابيع وفى الفترة دى جبتلها موتور وعملت حادثة.

هي العربيه دي كده بقالها معايا سنه بالظيط اهو مشوفتش منها يوم عدل

[windofchange]

العربية حالة ولازم توقفها تعملها صيانة كااااملة عند ناس امينة وحرفية وقطع غيار اصلية وبعدين احكم عليها وبرضه ربنا يكفينا واياكم شر العين ولا ننسي اذكار الصباح والمساء

[SYD]

قدر الله وماشاء فعل

انا مع المهندس ايهاب في رأيه
الأحسن يتغير في اقرب فرصة

والله المستعان
،
،

[khalid_adel]

حاجتين متلعبش فيهم وتستعدلهم
الدنجل و القنطرة
دول بيتغيرو استيراد افضل

[Karim Ibiza]

يا جماعة شكرا على الافادة

فعلا المفروض انه يتغير افضل من الاستعدال, انا كنت فاكر ان سعره اغلى من كده, انا دافع 250 جنيه للراجل بتاع العفشة واكيد اللى يخلينى ادفع المبلغ ده يخلينى ازود شوية واجيب واحد استعمال افضل بس الفكرة انى مكنتش اعرف ان سعره مناسب + انى مكنتش اعرف الراجل بتاع العفشة هياخد منى كام غير لما خلص شغل.

عموما قدر الله وماشاء فعل وانا همشى بيه مؤقتا وبعد كده هجيب عفشة كاملة استعمال امامى وخلفى لان المساعدين واليايات الخلفى خفاف و بالمرة اغير كمان الامامى وارجع العربية لارتفاعها الفبريكة عشان صاحبها الاولانى كان مركب كاوتشات تعلية.

وربنا يستر فى اللى بعد كده, انا بقيت بخاف وانا سايقها وبقول ياترى هتعمل معايا ايه تانى الاسبوع اللى جاى!!!!

ربنا يكفينا واياكم شر العين.

والله المستعان

[SYD]

ربنا يستر طريقك
ويباركلك فيها

[Mstfun]

ياجماعه ياريت كلنا قبل مانركب عربيتنا نقول الدعاء دا :

اللهم اني استودعتك مفسي وسيارتي ومالي واهلي يامن لا تضيع ودائعه.

ونسيبها على الله وهو خير حافظ.

[Karim Ibiza]

انا عارف ان الموضوع من زمان وعارف برده ان معظم مواضيعى بالشكل ده ودايما مفتوحة بس غصب عنى لان السبب بيكون انى مبكونش عملت حاجة جديدة بسبب ضيق وقتى وظروف شغلى وبرده حبة ظروف مادية

المرة دى غصب عنى هضطر انى اقفل الموضوع لان اللى حصل مكنتش عامل حسابه

باختصار انا هحكى الموضوع من الاول عشان الناس اللى ماحضرتش من الاول والكل يستفاد

انا عربيتى ابيزا 98 وعملت حادثة وتسببت فى ان الدنجل يتعوج والجنط يتعوج والياى يتعوج والمساعد يتعوج (طيب ماتقول الدنجل والجنط والياى والمساعد اتعوجو!!!! لازم يعنى لوك لوك لوك؟؟؟)

المهم رحت استعدلت الدنجل رغم تحذير الناس ليا ان الدنجل بيتغير ومينفعش يستعدل بس انا كنت فاكر انه غالى وعشان كده استعدلته وجبت جنط استيراد ب 50 جنيه والياى والمساعد معملتش فيهم حاجة لان الياى رجع لوضعه الطبيعى بس المساعد العامود بتاعه اتعوج حاجة بسيطة وده بيخليه يحجر ورحت ظبطت لبتاع الزوايا عشان اتأكد ان الدنجل اتظبطت وقالى تمام بس برده مكنش مقتنع انه يستعدل

والعربية مشيت بيها عادى لحد ما حصل اللى مكنتش عامل حسابه

انا من اسكندرية وجالى واجب عزاء فى الاسماعيلية وكان لازم اسافر على طول بمجرد ماجالى الخبر
المهم لسه هبتدى اطلع من البلد سمعت صوت تكتكة فى العجلة اللى ورا وكان معايا فى العربية عمى ووالدتى وبعدين الصوت راح.... طنشت

طلعت من البلد وهبتدى امسك الطريق الساحلى وبكسر شمال لقيت الصوت رجع تانى والعربية بتلعب من ورا وقفت على جنب نزلت بصيت على العربية من تحت وبصيت على الدنجل لقيت مفيش حاجة.... المهم قلت بلاش مخاطرة لان كانت الساعة 4 العصر واكيد مكنتش هلحق اوصل الاسماعيلية فى النور وخفت تعمل حاجة فى نص الطريق + ان الطريق ده مفيهوش اى نوع من انواع الخدمات ولا حتى عمدان نور ولا بنى ادمين

لفيت ورجعت تانى على البلد عشان نرجع ونجيب عربية عمى (127 4غيار عشان نسافر بيها من الاسكندرية للاسماعيلية بالليل ) المهم بعد مالفيت عشان ارجع البلد كنت بلاحظ ان طول مانا ماشى فى خط مستقيم بيكون مفيش اى مشكلة لكن مع اى ملف بلاقى العربية بتلعب من ورا والصوت بيرجع تانى وقفت وخليت عمى ينزل يبص على العربية من ورا وهى بتمشى لقيته بيقولى العجلة اللى مطرح الخبطة بتلعب وشكلها هتطير..... طلعت متاح العجل وقرطت على المسامير لقيتها مربوطة كويس.... عرفت ساعتها ان ده رولمان بلى و فرك

المهم فضلت ماشى واحدة واحدة لحد ماوصلنا لمكان العربية التانية وركنت عربيتى واخدنا ال 127 وسافرنا ورجعنا بالسلامة الحمد لله

لما رجعت اخدت العربية ورحت لهريسة الميكانيكى عشان اغير الرولمان بلى.... وانا فى الطريق قابلتنى اشارة مرور... بدوس فرامل.... هووووب الدواسة فى الارض ومفيش فرامل الحمد لله لميت نفسى ووقفت قبل ما البس واستنتجت ان المستر الخلفى للعجلة المنحوسة او الخرطوم اللى داخل على الماستر فك

المهم وصلت للميكانيكى وحكيت له على القصة وقولتلو عايز اغير الرولمان بلى وشوفلى موضوع الفرامل ده.... قالى لوغيرت الرولمان بلى هيبوظ بعد شهرين تانى ويحصل زى ماحصل دلوقتى!!!! ليه ياعم الحاج؟؟؟!!! قالك عشان الدنجل لازم يتغير.... قولتلو بتاع الزوايا قالى الدنجل مظبوط.... قالى الميللى بيفرق وعموما براحتك بس متجيش بعد شهرين تقولى الرولمان بلى فرك تانى.... قولتلو طيب انت عايز ايه دلوقتى؟؟؟ قالى هاتلى دنجل واكس استيراد والرولمان بلى من عندى (يادى الحووسة)

كلمت حبيبى عم يسرى بتاع الاستيراد وسئلته عندك دنجل؟؟؟ قاللى ان شاء الله موجود بس هات الميكانيكى معاك عشان عندى دناجل بتاعت عربيات مختلفة ومعرفش شكله.... قولتلو انا عارف شاكله... قاللى تعالى... بكام ياعم الحج؟؟؟ لما تيجى مش هنختلف

روحت ولقيت واحد بس لعربيتى وكان بطنابيره بس للاسف من غير المساعدين.... انت متأكد ان ده بتاع عربيتك؟؟؟ اى نعم... طيب لما تروح للميكانيكى كلمنى من هناك وطمنى.... حاضر, عايز كام؟؟؟ 350 جنيه... كتير يا عم يسرى.... روح اسئل عليه بره..... من هنا ل هنا؟؟؟ هات 300 جنيه.... صباح الفل

هريسة اول لما شافو قالى كويس انك جبته كامل, كده مش هنحتاج اى حاجة تانية.... متنساش تبصلى على الفرامل.... لقينا الخرطوم اللى داخل على ماستر العجلة اللى كانت بتلعب كان هربان

ركب ركب ركب هات علبة زيت فرامل dot4 ب 30 جنيه هووب اسحب هوا تمام تمام

كام يابويا؟؟؟ 120 جنيه.... يالله بجملت

النتيجة: العربية ظبطت كتيييير من ناحية الاتزان على السرعات العالية والفرامل ادائها اتحسن كتير, انا عارف ان الدنجل ملهوش علاقة بالفرامل بس الاداء اتحسن علشان وهو بيزود زيت اكتشف ان المصفاة اللى فى خزنة الزيت مسدودة وطلع منها مسمار 10 سم

الدروس المستفادة:
1 الدنجل من الاجزاء اللى مينفعش فيها الاستعدال, لازم تتغير على طول بواحد استيراد
2 قبل ما تعمل اى حاجة فى العربية لازم تقارن بين التكلفة لو غيرتها والتكلفة لو صلحتها وهل الفرق يستاهل المخاطرة بالذات فى اجزاء العفشة

ارجو انى مكنش طولت عليكم, اصلى كنت معبى

بس برده الابيزا عربية اعتمادية الحاجة اللى بتتغير يدينا ويديكم طولة العمر

وشكرا واسف على الاطالة مرة تانية

[matrix012]

الدروس المستفادة:
1 الدنجل من الاجزاء اللى مينفعش فيها الاستعدال, لازم تتغير على طول بواحد استيراد
2 قبل ما تعمل اى حاجة فى العربية لازم تقارن بين التكلفة لو غيرتها والتكلفة لو صلحتها وهل الفرق يستاهل المخاطرة بالذات فى اجزاء العفشة

الله ينور عليك
الواحد مش بيتعلم ببلاش
وربنا يستر طريقى وطريقكم

[mahmoud ghanem]

انا عارف ان الموضوع من زمان وعارف برده ان معظم مواضيعى بالشكل ده ودايما مفتوحة بس غصب عنى لان السبب بيكون انى مبكونش عملت حاجة جديدة بسبب ضيق وقتى وظروف شغلى وبرده حبة ظروف مادية

المرة دى غصب عنى هضطر انى اقفل الموضوع لان اللى حصل مكنتش عامل حسابه

باختصار انا هحكى الموضوع من الاول عشان الناس اللى ماحضرتش من الاول والكل يستفاد

انا عربيتى ابيزا 98 وعملت حادثة وتسببت فى ان الدنجل يتعوج والجنط يتعوج والياى يتعوج والمساعد يتعوج (طيب ماتقول الدنجل والجنط والياى والمساعد اتعوجو!!!! لازم يعنى لوك لوك لوك؟؟؟)

المهم رحت استعدلت الدنجل رغم تحذير الناس ليا ان الدنجل بيتغير ومينفعش يستعدل بس انا كنت فاكر انه غالى وعشان كده استعدلته وجبت جنط استيراد ب 50 جنيه والياى والمساعد معملتش فيهم حاجة لان الياى رجع لوضعه الطبيعى بس المساعد العامود بتاعه اتعوج حاجة بسيطة وده بيخليه يحجر ورحت ظبطت لبتاع الزوايا عشان اتأكد ان الدنجل اتظبطت وقالى تمام بس برده مكنش مقتنع انه يستعدل

والعربية مشيت بيها عادى لحد ما حصل اللى مكنتش عامل حسابه

انا من اسكندرية وجالى واجب عزاء فى الاسماعيلية وكان لازم اسافر على طول بمجرد ماجالى الخبر
المهم لسه هبتدى اطلع من البلد سمعت صوت تكتكة فى العجلة اللى ورا وكان معايا فى العربية عمى ووالدتى وبعدين الصوت راح.... طنشت

طلعت من البلد وهبتدى امسك الطريق الساحلى وبكسر شمال لقيت الصوت رجع تانى والعربية بتلعب من ورا وقفت على جنب نزلت بصيت على العربية من تحت وبصيت على الدنجل لقيت مفيش حاجة.... المهم قلت بلاش مخاطرة لان كانت الساعة 4 العصر واكيد مكنتش هلحق اوصل الاسماعيلية فى النور وخفت تعمل حاجة فى نص الطريق + ان الطريق ده مفيهوش اى نوع من انواع الخدمات ولا حتى عمدان نور ولا بنى ادمين

لفيت ورجعت تانى على البلد عشان نرجع ونجيب عربية عمى (127 4غيار عشان نسافر بيها من الاسكندرية للاسماعيلية بالليل ) المهم بعد مالفيت عشان ارجع البلد كنت بلاحظ ان طول مانا ماشى فى خط مستقيم بيكون مفيش اى مشكلة لكن مع اى ملف بلاقى العربية بتلعب من ورا والصوت بيرجع تانى وقفت وخليت عمى ينزل يبص على العربية من ورا وهى بتمشى لقيته بيقولى العجلة اللى مطرح الخبطة بتلعب وشكلها هتطير..... طلعت متاح العجل وقرطت على المسامير لقيتها مربوطة كويس.... عرفت ساعتها ان ده رولمان بلى و فرك

المهم فضلت ماشى واحدة واحدة لحد ماوصلنا لمكان العربية التانية وركنت عربيتى واخدنا ال 127 وسافرنا ورجعنا بالسلامة الحمد لله

لما رجعت اخدت العربية ورحت لهريسة الميكانيكى عشان اغير الرولمان بلى.... وانا فى الطريق قابلتنى اشارة مرور... بدوس فرامل.... هووووب الدواسة فى الارض ومفيش فرامل الحمد لله لميت نفسى ووقفت قبل ما البس واستنتجت ان المستر الخلفى للعجلة المنحوسة او الخرطوم اللى داخل على الماستر فك

المهم وصلت للميكانيكى وحكيت له على القصة وقولتلو عايز اغير الرولمان بلى وشوفلى موضوع الفرامل ده.... قالى لوغيرت الرولمان بلى هيبوظ بعد شهرين تانى ويحصل زى ماحصل دلوقتى!!!! ليه ياعم الحاج؟؟؟!!! قالك عشان الدنجل لازم يتغير.... قولتلو بتاع الزوايا قالى الدنجل مظبوط.... قالى الميللى بيفرق وعموما براحتك بس متجيش بعد شهرين تقولى الرولمان بلى فرك تانى.... قولتلو طيب انت عايز ايه دلوقتى؟؟؟ قالى هاتلى دنجل واكس استيراد والرولمان بلى من عندى (يادى الحووسة)

كلمت حبيبى عم يسرى بتاع الاستيراد وسئلته عندك دنجل؟؟؟ قاللى ان شاء الله موجود بس هات الميكانيكى معاك عشان عندى دناجل بتاعت عربيات مختلفة ومعرفش شكله.... قولتلو انا عارف شاكله... قاللى تعالى... بكام ياعم الحج؟؟؟ لما تيجى مش هنختلف

روحت ولقيت واحد بس لعربيتى وكان بطنابيره بس للاسف من غير المساعدين.... انت متأكد ان ده بتاع عربيتك؟؟؟ اى نعم... طيب لما تروح للميكانيكى كلمنى من هناك وطمنى.... حاضر, عايز كام؟؟؟ 350 جنيه... كتير يا عم يسرى.... روح اسئل عليه بره..... من هنا ل هنا؟؟؟ هات 300 جنيه.... صباح الفل

هريسة اول لما شافو قالى كويس انك جبته كامل, كده مش هنحتاج اى حاجة تانية.... متنساش تبصلى على الفرامل.... لقينا الخرطوم اللى داخل على ماستر العجلة اللى كانت بتلعب كان هربان

ركب ركب ركب هات علبة زيت فرامل dot4 ب 30 جنيه هووب اسحب هوا تمام تمام

كام يابويا؟؟؟ 120 جنيه.... يالله بجملت

النتيجة: العربية ظبطت كتيييير من ناحية الاتزان على السرعات العالية والفرامل ادائها اتحسن كتير, انا عارف ان الدنجل ملهوش علاقة بالفرامل بس الاداء اتحسن علشان وهو بيزود زيت اكتشف ان المصفاة اللى فى خزنة الزيت مسدودة وطلع منها مسمار 10 سم

الدروس المستفادة:
1 الدنجل من الاجزاء اللى مينفعش فيها الاستعدال, لازم تتغير على طول بواحد استيراد
2 قبل ما تعمل اى حاجة فى العربية لازم تقارن بين التكلفة لو غيرتها والتكلفة لو صلحتها وهل الفرق يستاهل المخاطرة بالذات فى اجزاء العفشة

ارجو انى مكنش طولت عليكم, اصلى كنت معبى

بس برده الابيزا عربية اعتمادية الحاجة اللى بتتغير يدينا ويديكم طولة العمر

وشكرا واسف على الاطالة مرة تانية

100/100 على الشرح