تجربة تغيير زيت المحرك - ابيزا 1.4 mpi

[SYD]

بسم الله الرحمن الرحيم

السلام عليكم ورحمة الله وبركاته

انتوا طبعاً عارفين قصتي مع زيت ليكوي مولي واللي كنت عامل بيها موضوع بعنوان حليت مشكلة صوت التاكيهات - والحل عند ليكوي مولي

وبعد الزيت العجيب دة ما أثبت فشله معايا رجعت تاني للزيت اللي كان اصيل وعمره ما نقص معايا وهو كاسترول GTX الجركن الأبيض ويمكن كنت عامل بيه تقرير هنا في القسم تجربة تغيير زيت المحرك - أبيزا 99 موتور 1.4

الجديد بقي في الزيت اللي انا أشتريته دة انه اغلي من السابق بحوالي 50 جنيه
يعني كنت بجيب زيت كاسترول GTX ب 80 جنيه
دة انا اشتريته ب135 جنيه
؟؟؟؟؟؟؟؟؟؟

هقولك الفرق
الزيت الأول اسمه castrol gtx high mileage
للأسف مش لاقي صورة ليه عندي او علي النت - بس هو 20w/50

الجديد بقي ابو 135 جنيه
castrol gtx فقط لا غير

الأول دة للمواتير الشقيانة اللي ماشية كتير
اما التاني للمواتير النص نص زي موتوري واغلب المواتير بتاعتنا

اشتريته من موزع كاسترول في شارع الأربعين - جسر السويس

ودي صور الزيت








أحذروا التقليد







تقيمي للزيت من اول لما حطيته

صوت التاكيهات الجميل رجع تاني
العربية كتمت كتمة سودة تاني زي الأول وبقيت تقيلة اوي عشان توصل لل 110 - 120 اللي كنت بوصلها باقل مجهود مع ليكوي مولي وكنت بوصل كمان ل140
صوت الموتور عالي اثناء التسارع وبعد ال80

انا رجعتله تاني لسبب واحد فقط
علشان اعرف الموتور هياكله ولا لاء
لكن بأذن الله همشي عليه لحد لما اخلص بيه مدته اياً كانت وهجرب ماجنتيك - لقيته زيه - هرجع لليكوي مولي وامري لله

مستني ارائكم وردودكم في موضوع الزيت دة

وانتظروني في تقرير جديد وتجربة جديدة ان شاء الله

والله المستعان
،
،

[alzelafy]

طيب ايه عيوب ليكوى مولى دا انا كنت هجربه

[SYD]

ايه يا عم زلفي ؟؟ انت فين يا راجل ؟؟
كل دي غيبة علينا ؟

اهم عيب فيه هو نسبة البخر العالية
كمان حسيت انه بيعلي درجة حرارة المحرك - او بمعني تاني - مش بيقدر يخفض درجة حرارة المحرك

مش شايف فيه اي عيوب تانية
بصراحة كله مميزات - صوت هادي - سحب عالي وتجميع سريع

اما عن استهلاك الوقود - فمش قادر احكم عليه لأن العربية عندي عايزة سيرفيس

تحياتي

[فادى محمد]

مشكور لنقل التجربه ياباشا..
هو ليكوي مولي اللي استخدمته
كان متعدد الدرجات ولا تخليقي؟

[SYD]

مشكور لنقل التجربه ياباشا..
هو ليكوي مولي اللي استخدمته
كان متعدد الدرجات ولا تخليقي؟

الله يخليك يا فادي
ليكوي مولي كان يعتبر تخليقي (بس مش تخليقي بالكامل) 10w/40

بس طار بسرعة

[m_elhasafy]

جرب ليكوى مولى سوبر لايت لوف 10w-40 و ده جركن 4 لتر لونه لبنى و سعره 195 جنيه
تبريده للمحرك أفضل من لايت لوف هاى تيك 5w-40 اللى لونه موف و سعره 285 جنيه و كمان أنسب للعربيات اللى ماشية أكتر من 60 ألف و بالتالى ممكن يكون بخره أقل
أنا جربت النوعين اللى قولتهم بس علشان العربية ماشية حوالى 40 ألف بس فموضوع النقص ما حصلش معايا

[m_elhasafy]

أنا ردى نزل فى نفس وقت ردك :)
يبقى الحل الأخير إنك تزود إضافة سيراتيك أو mos2 عشان ترمم الخلوصات الزيادة شوية أو تكمل على زيت معدنى 20W-50 و ما أنصحكش بأى نوع تخليقى كامل لوحده لإنه غالباً هاينقص برضه
جرب مرة نفس النوع اللى جربته قبل كده مع الإضافة ولو نقص برضه بشكل ملحوظ يبقى مضطر تكمل بالمعدنى

[egman]

والله يا ابو السيد انا عن راى طالما حضرتك كنت مرتاح مع كاسترول من البداية ، والزيت عن تجربتى الشخصية ممتاز وحضرتك شايف انه مش بينقص ولا نسبة البخر بتاعته عالية زي ما حصل فى ليكوى يبقى خليك فى كاسترول احسن .

[ehab_mansour]

تمام كده يا هندسه
انا كنت اتمني تجرب فيسكو 5000 الاف التخليقي اللي انا بستخدمه من ساعة ما اشتريت عربيتي الكوردوبا
رائع معايا و بجري كيفما أشاء ولا صوت للمحرك و استهلاك للبنزين ممتاز
يعني امبارح اتحرق دمي شويتين و انا رايح اكتوبر فأول ما طلعت علي المحور غيرت غيارات العربية علي 6 ار بي ام >>> عايز أقلك ما شاء الله لا فرق عن تغييرها عند 3 ار بي ام
فقط بتسمع صوت الشكمان سنه و بس
و بالتوفيق يا صديقي

[Karim Ibiza]

اولا مبروك ياباشا على تغيير الزيت وعقبالى ان شاء الله مع انى لسه محتار ومش عارف اجيب ايه لأن ده اول غيار فى الموتور الجديد

بالنسبة لتجربتك مع ليكوى مولى انا كان نفسى انك لما تغير كنت تجيب برده ليكوى مولى بس بدرجة لزوجة تانية عشان نتأكد ان المشكلة مش مشكلة نوع زيت لكنها مشكلة خطاء فى اختيار درجة الزيت اللى تناسب حالة موتورك وبكده منكونش ظلمنا ليكوى مولى بس عموما خير وانا عندى تفسير للى حصل معاك فى ليكوى مولى وكنا اتكلمنا فيه مع بعض على التليفون بس اسمحلى اقوله هنا عشان الكل يستفاد

حالة موتورك مينفعش معاها زيت بدرجة لزوجة 10w-40 وانا متأكد انك لو كنت حطيت اى نوع زيت تانى بالدرجة دى برده كان هينقص معاك وكان برده هيعمل نفس اللى ليكوى مولى عمله معاك سواء مميزات او عيوب

طيب على اى اساس صوت التاكيهات (الكستبانات) بيعلى او بيوطى؟؟؟
طيب على اى اساس تجميع العربية بيزيد او بيقل بشكل ملحوظ بعد تغيير الزيت؟؟؟

التفسير:
الموضوع نسبى,يعنى ايه؟ يعنى الموضوع بيتوقف حسب درجة الزيت وتناسبها مع مقدار خلوص الشنابر (حالة الموتور)
برده يعنى ايه؟؟؟
يعنى زيت 10w-40 مهما كان نوعه درجة لزوجته اقل من زيت 20w-50 برده مهما كان نوعه, طيب ما انا عارف.... ايه الجديد يعنى؟؟!!
اللزوجة دى بتفرق فى مقدار وسرعة سريان الزيت فى جميع انحاء المحرك, يعنى كل ما كانت اللزوجة اقل كل ما كان سريان الزيت فى المحرك وتزييته لكل الاجزاء افضل واسرع وبالتالى ده بيوطى صوت التاكيهات لأن طرمبة الزيت بيكون سهل عليها انها ترفع الزيت لحد فوق لأنه خفيف وكمان حركة البساتم والكرنك بتكون اخف وبالتالى سرعة تجميع اعلى وجهد اقل بيبزله المحرك للوصول لسرعات عالية وكمان تزييت افضل لأجزاء المحرك وبالتالى عمر اطول لأن التزييت بيحافظ عليه من التأكل فى فترة التشغيل وخصوصا لما تكون العربية باردة لأن ده اكتر وقت بيحصل فى تأكل بسبب ان الزيت بياخد وقت على ما يوصل لدرجة حرارة تشغيله وقدرته على اداء مهمته وهى التزييت وهو ده اللى اسمه (لازم تسخن العربية قبل ماتطلع بيها) بس مقابل المميزات دى كلها هيكون فيه نسبة بخر ونقص فى الزيت, لييييييه؟؟ عشان قلة لزوجة الزيت بتخلى الزيت يعدى من الشنبر ويدخل غرفة الاحتراق وبالتالى يتبخر وينقص, ومقدار البخر ده بيتوقف على مقدار الخلوص اللى فى الشنابر مع درجة لزوجة الزيت مهما كان نوعه

على العكس

كل ما كانت اللزوجة عالية كل ما كان صوت التاكيهات اعلى وكان الموتور بيعتل فى الجرى وكان نسبة التأكل فى الموتور ازيد بس مفيش بخر

طيب اعمل ايه انا دلوقتى؟؟؟؟

اجيب زيت درجة لزوجته تتناسب مع حالة موتورى اياً كان نوعه
طيب ودى اعرفها ازاى؟؟؟
يعنى مثلا حضرتك لو مش مرتاح مع درجة الزيت بتاعك ولتكن 10w-40 والزيت بينقص معاك يبقى حضرتك هتشوفلك زيت تكون درجة لزوجته اعلى بدرجة وغالبا هتكون 15w-40 او 15w-50 وغالبا هتلاقيها فى زيوت شيل, المهم ان يكون الرقم الصغير اعلى بدرجة
لكن 20w-50 ده كتير قوى على حالة موتورك وخصوصا فى الجو ده, يعنى ده ينفعك فى الصيف الحار جدا وتأكيداً لكلامى جرب حضرتك تنزل بالعربية على الساعة 1 او 2 الظهر وجرب تنزل بالليل الساعة 11 او 12 واجرى واعمل اللى انت عايزه وهتعرف معنى كلامى

وابقى طمننا

[S O P H O S]

هو فيسكو ليه موزع معتمد ؟

[ehab_mansour]

هو فيسكو ليه موزع معتمد ؟

طبعا
كل محظات الغاز الطبيعي لأن موزعه المعتمد هو شركة بتروجاس لنه بينزل منه زيوت للمحركات التي تعمل بالغاز الطبيعي

[kyrillos]

طيب بالنسبة لماتور 1300 هاف انجيكشن, ماشى حوالى 135, أخر مرة حطيت موبيل بس لقيته بيطير, مع العلم ان مافيش دخنه والماتور قبل الموبيل ده كان ماشى كويس جدا الزيت مش بينقص اطلاقا
الموبيل ده طار فى حوالى 5000 كيلو كان الجركن الابيض الى ب94 جنيه, مش عارف ده لزوجته ايه
اىه الزيت المناسب دلوقتى وهل ازود ولا أغير زيت وفيلتر ؟؟

[lanos2004]

ايه يا عم زلفي ؟؟ انت فين يا راجل ؟؟
كل دي غيبة علينا ؟

اهم عيب فيه هو نسبة البخر العالية
كمان حسيت انه بيعلي درجة حرارة المحرك - او بمعني تاني - مش بيقدر يخفض درجة حرارة المحرك

مش شايف فيه اي عيوب تانية
بصراحة كله مميزات - صوت هادي - سحب عالي وتجميع سريع

اما عن استهلاك الوقود - فمش قادر احكم عليه لأن العربية عندي عايزة سيرفيس

تحياتي

فاكر لما قولت لك بيتبخر بسهوله
لدرجه نقص عندى كيلو ونص فى 4500 كبلو متر وفكرت الماتور فوت
والله كنت نازل اتفق على ماتور استيراد بسببه

[Karim Ibiza]

طيب بالنسبة لماتور 1300 هاف انجيكشن, ماشى حوالى 135, أخر مرة حطيت موبيل بس لقيته بيطير, مع العلم ان مافيش دخنه والماتور قبل الموبيل ده كان ماشى كويس جدا الزيت مش بينقص اطلاقا
الموبيل ده طار فى حوالى 5000 كيلو كان الجركن الابيض الى ب94 جنيه, مش عارف ده لزوجته ايه
اىه الزيت المناسب دلوقتى وهل ازود ولا أغير زيت وفيلتر ؟؟

أساسا الموبيل الأبيض ده أخره لما تموته 3000 كيلو لأنه زيت أحادى الدرجة
غير فلتر وحط شيل الاصفر او كاسترول gtx الابيض او اى حاجة 20w-50 لأنك داخل على صيف ومحتاج زيت يصد معاك فى الحرارة العالية وهيمشى معاك 5000 كيلو وهتلاقى سعره يتراوح بين الــ 120 و الــ 130 جنيه