الموضوع: تجربة تغيير زيت المحرك - أبيزا 99 موتور 1.4

السلام عليكم ورحمة الله وبركاته

موضوع الزيوت واختيار افضل زيت اتناقشنا فيه كتير جداً علي صفحات المنتدي

وبعد شوية بحث وراء انواع الزيوت عرفت ان شركة فولكس بتنصح بأستخدام زيوت كاسترول
لحد لما قابلت عربية سيات 2010 ولقيت ملزوق علي زجاجها بدج بتاع كاسترول
ومن ساعتها ماكدبتش خبر
بالفعل قولت اجرب زيت كاسترول

من ضمن تجارب الأعضاء هنا في المنتدي لزيوت كاسترول
ناس كتير شكرت فيه
ولكن المهم ان في ناس قالت عليه ملحوظة غاية في الخطورة ورغم معرفتي بهذه المعلومة قولت لازم اجرب لأن لقيت ناس بتنفي المعلومة فتأكدت انها بتختلف من سيارة للأخري

وكانت الشكوي حول تبخر الزيت ونقصه بشكل ملفت للأنتباه

انا جربت زيت كاسترول GTX ودة أقل فئة في زيوت كاسترول ولكنه متوافق مع توصيات شركة فولكس لمحركاتها ولزوجته هي 20W/50


ودة شكل العبوة بتاعته



طبعا لما أشتريته تأكدت من وجود العلامة المائية علي الغطاء الداخلي للعبوة والموجود تحت الغطاء البلاستيكي بتاعها

كمان كان علي العبوة اللوجو بتاع يورو 2012 مما يعني ان الزيت انتاج حديث

العبوة 4 لتر وطبعا الموتور عندنا بياخد 2.75 لتر بالفلتر ودة عن تجربة ولكن الكتالوج ليه رأي مختلف وبيقول 3.5 بالفلتر


انا لما حطيت الزيت كان المؤشر بتاعي هو المقياس
ودائما بخلي الزيت بين الماكس والميني لأن بردو عن تجربة الموتور بيحرق اي زيت زيادة ومستوي الزيت بيثبت لحد المنتصف بالظبط
وبالتالي اي شوية زيت زيادة بيعتبر هالك ومفيش منه داعي غير انه هيوسخ العمة ويملاها بخر زيت



اما بقي عن تقييمي ليه

بالنسبة لصوت المحرك
مش قادر زي ماهو ولا اقدر اقول هدي عن الأول
ولكن نوعاً ما حاسس انه اوطي سنة بسيطة عن الأول ولاحظت حاجة رغم ان مالهاش دعوة لكن هقولها
لاحظت ان صوت مكنة الباور هدي عن الأول
طب ايه دخل الباور بزيت المحرك - مش عارف

بالنسبة للأستهلاك
عموما الأستهلاك ظبط كتير عن الأول وبردو ماقدرش اقول انه قل عن الأول ولكن بوجه عام الأستهلاك مرضي

بالنسبة للتسارع وتجميع العربية
لا فرق يذكر

بالنسبة للحرارة
لا فرق يذكر - خصوصا في هذه الأيام

انا لحد دلوقتي مشيت عليه 850 كم يعني حوالي ثلث عمره (3000 كم)
بالنسبة للون - لا يزال محتفظ باللون الذهبي ولكن داكن بعض الشئ وفي طريقه للسواد
بالنسبة للزوجة - ماشاء الله لا قوة الا بالله - لا يزال يحتفظ باللزوجة - ودة خدت بالي منه من شئ
لما بميل المقياس عشان اشوف المستوي الزيت بلاقيه مش بيسيل علي المقياس او بيسيل ببطئ وكأنه عسل نحل خام ومركز
بالنسبة للرائحة - رائحته طبيعية ولا يوجد ملاحظات تذكر

السعر 80 جنيه رغم اني سمعت ان في ناس جابته ب86 وفي ناس دفعت فيه 115
ولكني اعتقد اني اشتريت المنتج الأصلي لوجود العلامة المائية ولوجو يورو 2012

انا جربت الGTX علي اساس ان شاء الله هنتقل للماجناتيك ولكن في البداية حبيت اجرب كاسترول بأقل فئة وان ثبتت كفاءة سوف اجرب الأغلي (ماجناتيك)

ولكم مني جزيل الشكر علي حسن المتابعة

والله المستعان
،
،