استفسار بخصوص تسقيط موتور بولو 2001 1400 اتوماتيك كامل بكل حاجته

[SPY123]

عاوز افرغ حوض بولو 2001 كامل بالطابلوه والعفشه 1400 اتوماتك عاوز رايكو من جميع النواحى وربنا يباركلكو بجد على الرابطه دى

[المجرى]

شوف الموضوع دا هيفيدك كتير بامر الله

http://www.nilemotors.net/Nile/341077-98.html

[SPY123]

شوف الموضوع دا هيفيدك كتير بامر الله
http://www.nilemotors.net/nile/341077-98.html

شوفتوا يا باشا تسلم ايدك والق شكر لاهتمامك بس انا بكلمك على البولو العيون 2001 بالطابلو الجديد واتوماتك

[hossamalsadik]

يابشا قلنا عربيتك موديل كام

[SPY123]

انا معايا كيا سيفيا بس هجيب ان شاء الله ابيزا 94 وعاوز اعمل فيها الشغل ده انا بحبها جدا من زمان والمنتدى هنا ما شاء الله عالمى شايف الناس موجوده وشارحه كل حاجه فى العربيه وفى خبره ربنا يجمعكو اكتر على الخير ان شاء الله فانا بدور على ابيزا تكون اساسيات سليمه مش مهم الموتور مش مهم العفشه مش مهم الكاوتش عاوز اجيب واحده فى حدود 25000 او اقل واشدها بنفسى فانا متابع وبدور لما يوقع قدامى حاجه بالسعر ده هنفذ على طول ان شاء الله بس هيه هتبقى ان شاء الله ابيزا 1994

[ehab_mansour]

اشمعنا ابيزا 94 ؟؟؟
لا فرق بين 94 حتي 2002 سوي بعض التعديلات في المواتير و التصميم و الشكل و لكن كأساسيات و شاسيه و قاعدة عجلات زي بعض بالضبط و بالتأكيد الجديد يكسب
فرأيي الشخصي انك تجيب ابيزا 2000 و حالتها شبه اللي بتقول عليها و تعمل فيها الشغل ده و طبعا اساسا شكلها افضل و تصميمها و تنسيقها داخليا و خارجيا افضل من 94 بكتييييييييييييير

موضوع التسقيط اللي بتتكلم فيه محتاج نص كامل بكل حاجته و تشيل كل حاجه و تنقلها في عربيتك لأنك هتغير موتور بفتيسه بعصايته بالمنطقة اللي حوالين العصاية جوه بكنتروله بعداداته بطقم تبريده بالضفيرة بالعفشة و ياريت يبقي بالفرامل

ابدأ الاول بشراء العربية و احنا معاك واحدة واحده باللي نقدر عليه ان شاء الله

[su35flanker]

بعد اذن صاحب الموضوع
مهندس ehab_mansour
حبيت بس اشكرك جدا على سيل المعلومات المفيده جدا اللى استفدت منها فى هذا الاقتباس
و خاصة معلوماتك عن ال 1400 سى سى 101 حصان

قدامك اختيارين :-
1- تختار محرك 1400 8 فالف شبه اللي عندك بالضبط من حيث التكنولوجيا و الضفيرة و ده اللي كوده في الصورة AKK / ANW / AUD و ده هيفرق معاك شويتين عن اللي عندك و لكن من وجهة نظري الفرق في العزم و القوة مش كبير و لكن ده تختاره لما تكون عايز تريح دماغك من تسقيط نص كامل في عربيتك لأنك مش هتحتاج ضفيرة و لكن هتشيل موتور و تحط اخر و هينفع عليه كل ادوات تغذية القديم و مكوناته حتي الفتيس و لكنه مش هيديك كل قوة و عزم الجديد و لكنه هيوفر عليك
2- الاختيار الثاني و ده انا برجحه في حالتك لأنك عايز تشتري نص و تفضيه و تغير كل حاجه حتي العفشة و التابلوه و العدادات و هو انك تشتري نص ال 1400 ال 16 فالف و ده شبه اللي عندك بنسبة كبيرة و لكنه 16 فالف بقوة أكبر قد القديم مرة و نصف يعني 75 حصان و عزمه 128 نيوتن متر و ده اللي كوده APE / AUA و ده أفضل بكتير من اللي قبله و من القديم لأنه عزمه كمان بيخرج بدري و بفتيسه هتاخد نسب غيارات و سرعات افضل بكتير من ال 8 فالف و عزم كمان و لكن ده هيحتاج تغيير شامل و كامل لكل حاجه و حتي الضفيرة يعني هتفضي النص كله و ده قطع غياره متوفره و موجوده كلها و منتشر بالاضافة ان نسب استهلاك البنزين له رائعه و متفرقش بكثير بينها و بين اللي معاك حاليا

ال 16 فالف هيفرق معاك كتير في السحب و الجري عن ال8 و هيفرق كتير في التكييف و الأداء معاه و السحب لكن انصحك يبقي النص كاملا بكل حاجه تفضيه عندك و يكون حد فاهم و عارف كويس بيعمل ايه عشان يخرج شغل نضيف

ملحوظة أخيرة :- المحركات ال 16 فالف المقرفة شويتين و اللي مبنصحش بيها في التسقيط و اللي يقصدها اخونا محمد سيد هو المحرك ال 16 فالف ال 101 حصان و عزمه 128 نيوتن متر بكود AFK / AUB و ده فعلا مقرف و هتلاقيه رخيص اساسا في التسقيط و عيوبه انه بيحتاج بنزين بأوكتان أعلي يعني محتاج 95 و ال 92 مش هيبقي مفضل لأنه نسبة انضغاطه عالية و كمان سير الكاتينة فيه طويل جدا و واخد كل حاجه علي سير واحد بعكس اللي قبله علي سيرين كاتينه و السير الطويل ده بيكون عليه شد جامد و بيتعرض لضغوط شديدة مع التشغيل و كمان الموتور ده بفتيسه بيركبله طقم دبرياج 20 بوصه تقريبا او 22 مش فاكر و ده طقم اكبر في الحجم من اللي بيركب لكل المحركات اللي قبله و قليل جدا كقطع غيار و مقرف عشان تلاقيه

المهم الاختيار الثاني ده نصيحتي ليك اللي هو 1400 16 فالف 75 حصان و 128 نيوتن متر بكل مشتملاته و فتيسه و عفشته

[SPY123]

ايهاب باشا الف شكر لاهتمام حضرتك بس صعب الاقى موديل 2000 ب 25000 ده فى ناس بتتكلم فى 94 ب 30 و32 وعربيه متستاهلش 10000 متبهدله ومتهانه عشان كده بدور على موديل 94 لان زى ما حضرتك قولت نفس الحوض ونفس الشاسيه ونفس كل حاجه بس الاختلاف فى الاكصدام والشنطه وجوا العربيه فرش الابواب وانا كده كده هغير فرش الابواب حضرتك فاهم قصدى يعنى انا محتاج القالب بس شاسيه نضيف وقوايم سليمه وحوض وكرتيرات وشنطه زى الفل وانا اصلا بدور على عربيه ان شاء الله وجارى التنفيذ بس انا بظبط من دلوقتى بعمل دراسه جدوى من حيث التكلفه والحاجات دى واشوف هبتدى من اين بالظبط وايه الاخطاء الى ممكن اقع فيها واركب النص فين موضوع مثلا زى الفرامل عاوز افهم كل نقطه بالتفصيل وايه ارخص مكان اقدر اجيب منه النص ده وتقريبا البوبو فرامل abs انا كده كده ان شاء الله هاخد 4 جناب بتوع العفشه هل ده كفايه ولا لازم اجيب العفشه كامله وطبعا الشكمان لازم يتغير هل ده موجود جديد ولا استيراد وبعدين انا كده هبقى راكب بولو فى شكل ابيزا طيب اسعار صيانه البولو كام سير كاتينه وسيور والسيرفيس والصيانه الدوريه تيل الفرامل وبالنسبه للموتور 1400 ولا 1600 مع العلم انى هسقط موتور اتوماتيك مش مانيوال انهى احسن ويدينى اداء معقول واستهلاك بنزبن قليل عاوز اظبط العربيه صح عشان متعطلش منى انا لو راكب 28 مبخليش فيها مسمار عشان معطلش وبالنسبه للضفيره هجيب الضفيره كلها لغايه الشنطه ولا لغايه الطابلوه بس وطرمبه البنزين هغيرها ولا اسيب بتاعت العربيه عاوزين بس نرتب الموضوع مع بعض عشان نعرف احنا هنبتدى من اين وانا ليا الشرف انى اتعرف على اعضاء ابيزا بجد انا شايفكو ما شاء الله حافظين العربيه بمشاكلها بحلولوها وده الى خلانى افكر فى الموضوع ده ان ليا اخوات يوقفو جنبى يعنى كان فى موضوع عن الزيت المناسب للعربيه ده موضوع رائع معلش هنتعب مع بعض شويه بس ان شاء الله هتبقى معرفه خير وتجربه جديده نستفاد كلنا منها

[su35flanker]

وبالنسبه للموتور 1400 ولا 1600 مع العلم انى هسقط موتور اتوماتيك مش مانيوال

ده ال 1400 16 صباب 75 حصان بجير اوتوماتيك من صفر ل 100 فى 14 ث و ال100 كيلو بياخدو 8 لتر بنزين
VW Polo 9N 1.4 75 hp Auto 0-130km/h - YouTube

[SPY123]

ده ال 1400 16 صباب 75 حصان بجير اوتوماتيك من صفر ل 100 فى 14 ث و ال100 كيلو بياخدو 8 لتر بنزين
vw polo 9n 1.4 75 hp auto 0-130km/h - youtube

جميل ما شاء الله ده واحد كامه برده ولا اتنين ؟؟

[su35flanker]

جميل ما شاء الله ده واحد كامه برده ولا اتنين ؟؟

انا مستجد تلموذ يعنى
لكن بعد الجوجله الموتور ده 2 كامه و ال 74 حصان بتوعه bhp مش hp
و دى صورة VW AUA 1.4 16V مو 2006

و ده ape

اكواد الموتور ده
AHW, AXP, AKQ, APE, AUA, BCA, BBY, BKY
و دى مواصفاته ps = hp و لكن بالالمانى
55 kilowatts (75 PS; 74 bhp) @ 5,000 rpm; 128 newton metres (94 lbf·ft) @ 3,300 rpm

List of Volkswagen Group petrol engines - Wikipedia, the free encyclopedia

[su35flanker]

test

[SPY123]

مش فاهم حاجه يعنى المتور الى فى الفيديو ده بولو موديل كام ؟؟؟ ويعنى ايه 74 bhb والاكواد دى يعنى ايه وموجوده فين على الموتور عشان اشوفها وانا بشترى ان شاء الله وتسلم يا بوب انا مستجد برده

[su35flanker]

مش فاهم حاجه يعنى المتور الى فى الفيديو ده بولو موديل كام ؟؟؟ ويعنى ايه 74 bhb والاكواد دى يعنى ايه وموجوده فين على الموتور عشان اشوفها وانا بشترى ان شاء الله وتسلم يا بوب انا مستجد برده

بولو 9 ان اللى فى الفيديو نزلت 2002 - 2005
باقى الاسئله شوف حد يفهمنا احنا الاتنين

[nesr6060]

انا انشاء الله نازل الاسبوع اللى جاى الحرفين علشان انا كمان عاوز اسقط مكنه 1400 سىسى بس بفكر فى 2 كامه زلز كدا هدور على 1600 كمان