عداد rpm واطي

[the magice]

شوف يا اخي الفاضل حسب كلامك من بداية الموضوع
انا شاكك في حاجتين :-
1- الاسبراتير علي بعضة (او الوش بس او الشاكوش بس هو اللي فيه المشكلة و عامل ضعف لكهرباء العربية ) او وضع الاسبراتير مش مضبوط لو تعرف تصور لنا الاسبراتير صورة نضيفة نحاول نفيدك تظبطه ازاي و لو تعرف تفكه و تصورلنا الشاكوش و الوش من الداخل يبقي فله
2- الموبينة اللي حضرتك غيرتها استيراد تكون هي السبب لأن العربية لو كانت مضبوطه قبلها و لما غيرتها باظت يبقي احتمال بنسبة كبيرة تكون السبب فجرب تجيب واحدة تانيه تجربها من نفس التاجر و قله ان اللي اخدتها منه فيها مشكلة

و اخيرا سلوك البوجيهات محتاجه تتفك و تبص عليها زي ما قال استاذ احمد في الاول
جرب و قلنا عملت ايه

مشكوووووور جدا ع المتابعه يا هندسه وانا تاعبك معايا والله
العربيه كانت مظبوطه قبل ما غير الموبينه وسلوك البوجيهات انا كشفت عليها وسليمة وهحاول ان شاء الله اصور الاسبراتير بس كنت عاوز اعرف ارفع الصور ازاى والوش والشاكوش دول فين بالضبط ومشكور للمرة التانيه

[ehab_mansour]

معندناش حساس ايدل .... عندنا بوابة بتفتح بسيرفو موتور صغير جدا بداخلها و كمان عربيته نصف انجيكشن = اعتقد انه عنده مسمار ايدل بيضبط هواء السلانسيه و لكن مش متأكد لأني متعاملتش قوي مع الماكينة النصف انجيكشن دي

[ehab_mansour]

مشكوووووور جدا ع المتابعه يا هندسه وانا تاعبك معايا والله
العربيه كانت مظبوطه قبل ما غير الموبينه وسلوك البوجيهات انا كشفت عليها وسليمة وهحاول ان شاء الله اصور الاسبراتير بس كنت عاوز اعرف ارفع الصور ازاى والوش والشاكوش دول فين بالضبط ومشكور للمرة التانيه

اولا رجع السلوك القديمة
ثانيا جرب موبينة اخري بدل دي

و بس عشان نرجع لقديمه حيث كانت مضبوطه

بخصوص رفع الصور فأنا عامل لي اكونت علي موقع اسمه imageshack اعمل بحث عنه في جوجل و اعملك اكونت و ارفع صورك عليه و فقط تنقل لينك الصورة اللي بيستخدم في المنتديات forums و تحطها هنا و بس

بخصوص و الوش فده الجزء من الاسبراتير اللي بيدخل فيه الاربع اسلاك بتوع البوجيهات و الشاكوش ده هو الجزء اللي جواه و بيكون راكب علي اكس عمود الصبابات و بيوزع الشرارة الرئيسيه علي الاربع بوجيهات

الاتنين دول هتوصلهم لو فكيت الاسبراتير نفسه عن طريق خلع الكلبسين الصاج اللي ماسكين الوش فهيخرج معاك الوش بالسلوك و هتلاقي داخلة الشاكوش

و بالتوفيق لك و للجميع

[the magice]

انا صورت الاسبراتير وحليت الوش وصورته من جوه وكمان الشاكوش يا رب الصور تطلع واضحة

ده الوش من جوه

وده الشاكوش بوضعين مختلفين

[the magice]

انا صورت الاسبراتير وحليت الوش وصورته من جوه وكمان الشاكوش يا رب الصور تطلع واضحة

ده الوش من جوه

وده الشاكوش بوضعين مختلفين


وده الاسبراتير
انا اسف الدنيا عكت مني وفي صور مكرره بس اوعدكم اني هظبطها

[ehab_mansour]

الملاحظات علي الصور :-
1- الشاكوش زي الفل
2- الوش عايزك تتأكد ان الصباع اللي في المنتصف من الداخل سوستته كويسه و بيطول انه يوصل الشاكوش (يعني تاكد ان فيه احتكاك بينهما لأن بيتهيئلي الصورة بتقول انهم مش واصلين بعض كويس و ده غلط و لكن مش واضحة قوي ) غير كده هو كويس
3- الاسبراتير نفسه مش مضبوط في المنتصف و دي نقطة تعلية الار بي ام او توطيته من هنا
هتلاقي عندك مسمارين الانكيه مقاس 5 بحلقة تحتيه (وردة للمسمار يعني) هو اللي بيثبت الاسبراتير و تحتيهم مشقبيه في الجسم تسمح بتقديم او تأخير الكهرباء لمسافة تقريبا 1 سم .. المسمارين دول المفروض تهويهم حاجه بسيطة لحد ما تعرف تحرك الاسبراتير نفسه لقدام و للخلف وتبدا في تحريك الاسبراتير نفسه قليلا قليلا (للامام و الخلف ) لحد ما الار بي ام يظبط معاك

ولو مظبطش و مش ده السبب يبقي ترجعه للمنتصف بالضبط و تسيبه

بعد التأكد و ضبط الاسبراتير .... لو متحلتش مشكلة الار بي ام يبقي تغير الموبينة باخري و تجرب

[ehab_mansour]

1- المفروض ان فيه صباع كربون بسوسته هنا في الوش في المكان المشار اليه في الصورة التالية و انا للامانه مش شايفه يمكن عشان التصوير عمودي عليه ؟؟؟؟ شوف و قلي



Uploaded with ImageShack.us

2- الصباع اللي في الصورة السابقه ده السوسته بتضغطه عشان يوصل الكهرباء و يحصل احتكاك بينه و بين النقطة المشار اليها هنا في الشاكوش في الصورة التالية دي



Uploaded with ImageShack.us

3- المسمارين الالانكيه اللي هتهويهم عشان تظبط منهم مشار اليهم في الصورة التالية دي



Uploaded with ImageShack.us

4- المشقبيه المقصوده مشار اليها في الصورة التالية دي و المفروض عشان الاسبراتير يكون في المنتصف (كوضع اوريجينال كما موصي به ) تكون الجزء 1 و 2 كما هو مشار متساويين و لكن طبعا كما واضح في الصورة ان 2 اكبر بكتير من 1



Uploaded with ImageShack.us

[the magice]

السلام عليكم ورحمة الله وبركاته
اولا انا اسف جدا ع التاخير وده كان بسبب شويه ظروف كده
ثانيا انا عملت زي ما حضرتك قلتلي يا ايهاب بيه ولقيت حاجة غريبة في الوش

يا تري ده عادي ولا ايه
الصباع عليه سواد بس السوسته شغاله وبيتحرك عادي

[the magice]

الحقوني الرجه بقي معاها صفاره

[ehab_mansour]

السلام عليكم ورحمة الله وبركاته
اولا انا اسف جدا ع التاخير وده كان بسبب شويه ظروف كده
ثانيا انا عملت زي ما حضرتك قلتلي يا ايهاب بيه ولقيت حاجة غريبة في الوش

يا تري ده عادي ولا ايه
الصباع عليه سواد بس السوسته شغاله وبيتحرك عادي

و عليكم السلام
الوش ده لازم يتغير لأنه حسب الصورة دي الصباع اساسا مكسور و مش بيوصل للشاكوش و ده بيضعف الكهرباء و بيزيد المقاومة قدامها

الصباع المفروض بيكون بارز من الوش حوالي 1 سم تقريبا و لما تضغط عليه تلاقيه بينزل و يطلع معاك و لكن اللي شايفه بيقول انه مش موجود او مكسور

[the magice]

و عليكم السلام
الوش ده لازم يتغير لأنه حسب الصورة دي الصباع اساسا مكسور و مش بيوصل للشاكوش و ده بيضعف الكهرباء و بيزيد المقاومة قدامها

الصباع المفروض بيكون بارز من الوش حوالي 1 سم تقريبا و لما تضغط عليه تلاقيه بينزل و يطلع معاك و لكن اللي شايفه بيقول انه مش موجود او مكسور

و يا تري هلاقي وش لوحده ولا هحتاج اغير اسبراتير كامل وهيكون في حدود كام. وهل ده بياثر على سحب العربية لانها مخنوقه جدا ومش بتسحب خالص

[ehab_mansour]

و يا تري هلاقي وش لوحده ولا هحتاج اغير اسبراتير كامل وهيكون في حدود كام. وهل ده بياثر على سحب العربية لانها مخنوقه جدا ومش بتسحب خالص

موجود لوحده و انا كنت اخر مره شاريه ب 35 جنيه
انزل الحرفيين او اي مكان بيبيع قطع غيار فولكس هتلاقيه ان شاء الله بس ياريت تفك القديم و تشتري زيه عشان فيه منه مقاسات تقريبا و لو لقيت الاسود اللي ب cover اشتريه لأن ده افضل بس المهم يركب مرتاح و مضبوط

لما تغيره هتعرف ... و نتمني يكون هو المشكلة فقط و ميكنش فيه حاجه تانيه

[the magice]

انا جبت وش جديد بغطاء اسود وبيتهألي انه غالي جدا والراجل قالي انه الماني تقليد الاصلي ماركة اسمها بيرو ب65جنيه وسألت ع الاستيراد لقيته ب100جنيه بس لقيته محفور عليه انه ماركة بوش بس بصراحة استغليته المهم ركبت الوش والحمد لله الرجة خفت شوية بس ماراحتش خالص وال ار بي ام لسة واطي بس لقيت حاجة غريبة الشاكوش كان مكسور منه حته ووضعه اتغير من عمودي لأفقي وطبعا صوت الصفارة لسة موجود ع السلانسيه وفي رجه خفيفة مع التهدية في السرعة فهل دة ترصيص بس ولا اشوف قواعد الموتور

[ehab_mansour]

انا جبت وش جديد بغطاء اسود وبيتهألي انه غالي جدا والراجل قالي انه الماني تقليد الاصلي ماركة اسمها بيرو ب65جنيه وسألت ع الاستيراد لقيته ب100جنيه بس لقيته محفور عليه انه ماركة بوش بس بصراحة استغليته المهم ركبت الوش والحمد لله الرجة خفت شوية بس ماراحتش خالص وال ار بي ام لسة واطي بس لقيت حاجة غريبة الشاكوش كان مكسور منه حته ووضعه اتغير من عمودي لأفقي وطبعا صوت الصفارة لسة موجود ع السلانسيه وفي رجه خفيفة مع التهدية في السرعة فهل دة ترصيص بس ولا اشوف قواعد الموتور

الحمد لله انك وصلت لكده و يتبقي الاتي و احنا مع بعض واحدة واحده
1- ياريت تصور الار بي ام علي السلانسيه بيكون كام بالضبط و ثابت ولا بيلعب
2- صورلنا ايه الكسر اللي في الشاكوش و هل انت شايف انه في جسم الشاكوش الفبر ولا في النحاس اللي بينقل شرارة الاشعال
3- الرجة الخفيفة مع التهدئة دي بتيجي مع دوس الفرامل ولا موجوده سواء دوست فرامل او سبت العربية تهدي بنفسها حره بدون فرامل ؟؟؟؟
لو مع الفرامل يبقي حاجتين احتمال التيل خلصان + الطنابير مخططة او فيها تعريج و ريجه و سطحها غير مستوي و محتاجه خرط او تغيير
لو من غير فرامل احتمال ترصيص
قواعد الموتور بيبان رجتها و مشاكلها مع السحب و مع زيادة السرعه و مع الطلعه

هل لاحظت الفرق بين الوش القديم و الجديد ؟؟؟

[the magice]

الحمد لله انك وصلت لكده و يتبقي الاتي و احنا مع بعض واحدة واحده
1- ياريت تصور الار بي ام علي السلانسيه بيكون كام بالضبط و ثابت ولا بيلعب
ان شاءالله هصوره بس هو بيكون ثابت تقريبا يعني اهتزاز بسيط جدا
2- صورلنا ايه الكسر اللي في الشاكوش و هل انت شايف انه في جسم الشاكوش الفبر ولا في النحاس اللي بينقل شرارة الاشعال
لا الكسر في الفبر من الناحية المواجهة للنحاس وهصوره ان شاءالله عشان التوضيح
3- الرجة الخفيفة مع التهدئة دي بتيجي مع دوس الفرامل ولا موجوده سواء دوست فرامل او سبت العربية تهدي بنفسها حره بدون فرامل ؟؟؟؟
لا هي اكتر مع الفرامل بس هتاكد الاول
لو مع الفرامل يبقي حاجتين احتمال التيل خلصان + الطنابير مخططة او فيها تعريج و ريجه و سطحها غير مستوي و محتاجه خرط او تغيير
لو من غير فرامل احتمال ترصيص
قواعد الموتور بيبان رجتها و مشاكلها مع السحب و مع زيادة السرعه و مع الطلعه

هل لاحظت الفرق بين الوش القديم و الجديد ؟؟؟
طبعا الفرق كبير ده الوش القديم كان مضروب بالنار

بالنسبة لوضع الشاكوش اللي اتغير من عمودي لافقي عادي ولا ايه. والسعر كويس ولا اتضحك عليا