استفسار هي اسعار الابيزا 94 رفعت ولا اللي عالنت ده تهيؤات؟؟؟؟

[ViLMoS]

السلام عليكم ورحمة الله وبركاته
انا بفكر ان شاء الله اجيب عربية ابيزا 94 وطبعا زي الناس كلها اللي بتدور علي النت دورت
المفرود ان سعر العربية ما بين 23 ل 27 الف ( علي حد علمي ) واللي بشوفه ان اقل واحد حاطت سعر 25 والعربية عاوزة مصاريف كتير واللي حاطت 35 واللي حاطت 42 طبعا المفروض اني هفاصل في السعر بس هفاصل لغاية كام يعني الف الفين ثلاثة مش هفاصل في 7 ولا 10 طبعا بتتسد نفسي اصلا ان اكلم حد من اللي حاطين الاعلانات
ممكن حد يقوللي هي الاسعار رفعت ولا الناس بتحط سعر فوق قوي واهو اي رقم وخلاص وما عليهوش جمرج
ارجو الافادة

[ahmedalaahosny]

هو قصد حضرتك علي 92 ولا 94 اصل 94 اغلبها ف الثلاثينات ماسمعتش قبل كده اواخر عشرينات غير للعربيات اللي لسة فيها مصاريف

[شادى عبدالمنعم]

رينج سعرها من 25 حتى 30على حسب الحاله

[احمد عبد الغني]

يفندم كل الاعلانات بتعت النت كله بيبلغ فى السعر لاان معظم الي حطين الاعلانات دي ياناس بتشوف العربية هتجيب كام او واحد مش مستعجل على البيع السوق نازل عاوز يبيع ويخلص انزل السوق وشوف تقبل تحياتي

[ViLMoS]

هو قصد حضرتك علي 92 ولا 94 اصل 94 اغلبها ف الثلاثينات ماسمعتش قبل كده اواخر عشرينات غير للعربيات اللي لسة فيها مصاريف

شكرا لمرورك يا بشمهندس احمد لكن هو ده الرينج اللي انا سالت عليه بس الكلام ده كان في شهر 11 اللي فات وانا معرفش الاسعار دلوقتي

رينج سعرها من 25 حتى 30على حسب الحاله

شكرا لمرورك بشمهندس خالد وشكرا لاهتمامك

يفندم كل الاعلانات بتعت النت كله بيبلغ فى السعر لاان معظم الي حطين الاعلانات دي ياناس بتشوف العربية هتجيب كام او واحد مش مستعجل على البيع السوق نازل عاوز يبيع ويخلص انزل السوق وشوف تقبل تحياتي

شكرا لمرورك
انا حسيت كده بس كان نفسي في حد ياكد كلامي بس انا قلقان من السوق بسبب التجار وبصراحة قلقان اخد عربية ضايعة وتروح عليا فلوسي وكمان انا كنت بدور دلوقتي علي النت علشان انا الفلوس هتبقي جاهزة معاية اخر الشهر ان شاء الله

[احمد عبد الغني]

عندك حق بنزبل التجار وكدة معظمهم نصبين بس فى منهم بيبقا معهم عربيات نضيفا على العموم حضرتك لازم تخود معاك ميكانيكي يكون شاطر وتكون واثق فيه جدا وفاصل لان معظم الميكانيكية مبيفصلوش وربنا يوفقك للخير

[night_angel0007]

الى عالنت يا اما حاطط رنج تلت الاف زياده علشان عامل حساب الى هيفاصلوا بعد المعانيه يا اما فعلا حاطط يشوف عربيته هتجيب كام ومش فارقه معاه البيع دلوقتى او مش عايز يبيع اصلا فحط فى دماغك ان فى عالنت غالبا زياده تلت الاف على الاقل عن سعر السوق الفعلى

[Mahmoudelsayed]

انزل واتفرج ومتستعجلش

وربنا ان شاء الله هيرزقك بحاجة نضيفه بس اتعب شوية هتلاقى

[ViLMoS]

شكرا لمروركم واهتمامكم بالرد

[nesr6060]

انا عن حد علمى هى فعلا الابيزا سعرها زاد من 3 ل 7 الاف حسب الحاله ومبقاش العشرينات دى خلاص راحت

سعر الابيزا دلوقتى الطبيعى بموتورها الاستوك من 30 ل 35
اكتر من كدا بيبقى حسب الاضافات و التعديلات عليها انما حوار العشرينات ده هتبقى تعبانه وعاوزه مصاريف كتير

وبعدين اشمعنا دى اللى زعلانين عليها ما كل حاجه بتغلى ده سعر الجولف2 دبوقتى بقى فوق ال 35 ل 45 الف

[SYD]

بالظبط كدة
اللي خلي الجولف 2 سعرها شادد لحد فوق ال35 مابالك بالأبيزا
للأسف الشديد دة سعر السوق حالياً
بس انا هفهمك الزتونة
للأسف الشديد اليومين دوول شوفت جولف 2 كتير اوي مع تجار وصنايعية - بيشدوها شد زبالة من ابو مليمين ويبعوها علي انها عربية حالة وكأنها gti
وبأعتبار ان الابيزا بنت عم الجولف فهتلاقي سعرها رفع معاها
زي بالظبط لما جه وقت وال133 رفعت بسبب ان الصنايعية والتجار اشتغلوا عليها شوية لكن بعد كدة سعرها ريح تاني وهدي
وكذلك ال28
فدة حال السوق اليومين دوول
اصبر شوية علي الأبيزا وسعرها هينزل اكتر من كدة كمان - لأن بصراحة قطع غيارها بدأت تقل شوية في الأستيراد

تحياتي

[night_angel0007]

ديه حقيقه فعلا يا استاذ سيد بس داه ميمنعش ان على النت بيحط تلت اربع الاف زياده مراعاه للفصال وفعلا اكمنى مهتم انى اشترى ابيزا 98 او 99 الايام ديه فملاحظ ان اسعار قطع الغيار الاستيراد بتاعه الابيزا كل مدى بتنزل وانا شوفت مواضيع اسعار قطع غيار ونزلت الحرفيين لقيت اسعار قطع الغيار نزلت كتير عن من سنتين مقارنه بالاسعار الى كانت فى المواضيع فى القسم بس فى نفس الوقت زى ما قولت القطع نفسها بدات تقل تواجدها

[ViLMoS]

بالظبط كدة
اللي خلي الجولف 2 سعرها شادد لحد فوق ال35 مابالك بالأبيزا
للأسف الشديد دة سعر السوق حالياً
بس انا هفهمك الزتونة
للأسف الشديد اليومين دوول شوفت جولف 2 كتير اوي مع تجار وصنايعية - بيشدوها شد زبالة من ابو مليمين ويبعوها علي انها عربية حالة وكأنها gti
وبأعتبار ان الابيزا بنت عم الجولف فهتلاقي سعرها رفع معاها
زي بالظبط لما جه وقت وال133 رفعت بسبب ان الصنايعية والتجار اشتغلوا عليها شوية لكن بعد كدة سعرها ريح تاني وهدي
وكذلك ال28
فدة حال السوق اليومين دوول
اصبر شوية علي الأبيزا وسعرها هينزل اكتر من كدة كمان - لأن بصراحة قطع غيارها بدأت تقل شوية في الأستيراد

تحياتي

شرفتنا بمرورك يا باشمهندس
طيب لو استني استني شهر شهرين كده ولا استني اد ايه؟

[ViLMoS]

ديه حقيقه فعلا يا استاذ سيد بس داه ميمنعش ان على النت بيحط تلت اربع الاف زياده مراعاه للفصال وفعلا اكمنى مهتم انى اشترى ابيزا 98 او 99 الايام ديه فملاحظ ان اسعار قطع الغيار الاستيراد بتاعه الابيزا كل مدى بتنزل وانا شوفت مواضيع اسعار قطع غيار ونزلت الحرفيين لقيت اسعار قطع الغيار نزلت كتير عن من سنتين مقارنه بالاسعار الى كانت فى المواضيع فى القسم بس فى نفس الوقت زى ما قولت القطع نفسها بدات تقل تواجدها

عندك حق والله انا لاحظت كده فعلا

[nesr6060]

نصيحه متستناش البلد دى اللى بيغلى فيها مبيرخصشى خاصه احنا داخلين على حوار كارت البنزين و الميكروباصات اللى مش مرخصه مش هتلاقى بنزين و هيغلوا الاجره والتكاتك كمان