سؤال عن تعديلات فى ابيزا 94

[Dr_Mido]

السلام عليكم ورحمه الله
اخوانى الاعزاء
انا فى صديق ليا عندة ابيزا 94 كوبيه حمرا
هو كان سئلنى على حاجات وانا قلتله معرفش وقلتله هسئلك
المطلوب بقى هو عايز يخليها شبهه ال 98 من برة وانا بصراحه مش عارف ازاى
من ناحيه الوش والضهر و كدة
و عايز يسقطلها موتور اكبر
مفيهاش تكييف وهو عايز يركب واحد
انهى افضل موتور يركب لها وميعملش مشاكل فى تركيبه
فى المساعد اليمين بتاعه تعبان قوى يجيب ايه وبكام
و عايز يجيب جنوط و يعمل فيها شغل فيبر من برة حد يقلنا بس تكلفه مبدئيه كام
فياريت حد من الخبراء يرد علينا
واسف على الازعاج

-------
حاجه على جنب صندوق التعديل مش شغال نهائى مع الفايرفوكس

[PASST2000]

اعتقد ان الابيزا 94 و 98 زي بعض

[Dr_Mido]

مستنينه سوا

[iBiZa]

المطلوب بقى هو عايز يخليها شبهه ال 98 من برة وانا

اكصدام امامى كامل + اكصدام خلفى + شبكة امامية.

مش عرف نفس الفوانيس الامامية ولا لأ.

و عايز يسقطلها موتور اكبر

عندك 1400 و 1600 و 1800 و 2000.

مفيهاش تكييف وهو عايز يركب واحد

يجيبة كامل مع الموتور و كمان يجيب البور كامل.

انهى افضل موتور يركب لها وميعملش مشاكل فى تركيبه

1600

فى المساعد اليمين بتاعه تعبان قوى يجيب ايه وبكام

مع الموتور يجيب عفشة كاملة قدام و يفضل دنجل سكاكين ورا كمان.

و عايز يجيب جنوط و يعمل فيها شغل فيبر من برة حد يقلنا بس تكلفه مبدئيه كام

جنوط ممكن تشوف المستعمل حاجة كويسة و سعرها حنين. بس متجيبش اقل من 15 عشان الفرامل الجديدة هتبقى اكبر.

احسن ناس فى الفيبر فى الحرفيين هما بسام و بعدين حواجب, و السعر على حسب اللى هتعملة.

[ehab_mansour]

الله ينور عليك يا ابيزا باشا لكن منين يشتري الحاجات دي عشان انا بدور علي شبكة بالعلامة لعربيتي ابيزا 98 من فترة ومش لاقي ولو تعرف حد قلي
نزلت الحرفيين ورحت شارع دمشق برده مش لاقي ولا حتي لاقي العلامة بس
ارجو الرد

[iBiZa]

فى الحرفيين, فى شارع المرسيدس, فية محل اسم الالمانية كان عندة و اخر الشارع فى المنزل شمال واحد مش فاكر اسمة اية (تقريبا ابو يوسف) كان عندة بردة.

[ehab_mansour]

فى الحرفيين, فى شارع المرسيدس, فية محل اسم الالمانية كان عندة و اخر الشارع فى المنزل شمال واحد مش فاكر اسمة اية (تقريبا ابو يوسف) كان عندة بردة.

شكرا علي الرد وجزاك الله خيرا علي تعاونك وبجد انت من اول ما دخلت نايل موتورز وانت معايا في كل حاجه وكمان محمد ابيزا لكن ياتري محمد ابيزا راح فين لأنه مختفي من فترة ؟؟؟؟؟؟؟

[fadynabil]

الإكصدام الأمامي عشان يتعدل هو والشبكه لشكل الــ ٩٨ محتاج طقم فوانيس كامل وأعتقد هيعمل ٤٠٠ جنيه بالإشارات .. عشان شبكه ال فوانيس ال٩٤ مش هتركب علي شبكة ال ٩٨

بالنسبه للشبكة هتلاقيها عند أي محل في التوفيقية شغال في السيات
بس بالنسبة للإكصدام يفضل يكون إستيراد ... وإسإل مجرب .. فعلا فرق السما والأرض أنا عملت حادثه والإكصدام إتفعص لجوه .. ورديته تاني عند واحد بتاع فيبر .. بالنسبه للإكصدام الجديد مجرد ترييحة بيتكسر لأنه خامه رديئة جداً

وعلي فكرة أنا منت جايب الإكصدام الإستيراد بـ ٣٠٠ جنيه والشبكه بالعلامة بــ ١٩٠ جنيه من عند واحد إسمه الفيومي في مكان إسمه عزبة شلبي .. بس كان راجل غتت وخنيق ومحسسني إنه بيبيع دهب فمنصحش حد يروحلة

.. وأي إستفسار أنا في الخدمة

[iBiZa]

شكرا علي الرد وجزاك الله خيرا علي تعاونك وبجد انت من اول ما دخلت نايل موتورز وانت معايا في كل حاجه وكمان محمد ابيزا لكن ياتري محمد ابيزا راح فين لأنه مختفي من فترة ؟؟؟؟؟؟؟

يا باش انا تحت امرك. و بالنسبة لمحمد ابيزا, حصلت شوية ظروف مؤسفة و غالبا ساب الموقع.

[kojy]

السلام عليكم .
بص يا باشا انا عملت نفس الى انت عايز تعمله بالضبط , او الى صحبك عايز يعمله , انا معايا 94 وغيرت كل حاجة من بره الى 98 وحتى الموتور سقط 1600 وهو فعلا ماشاء الله ممتاز وخصوصا مع الشكمان الديفل , وطبعا حتحتاج تغير المساعدين ونصيحة مني عن تجربة يفضل تجبهم استيراد الماني وتجيب الجوز مع بعض لأنك لو ركبت واحدة يمين مثلا بس كده هتحمل التعبانة عليها وممكن تبوظ بسرعة , عموما انا إن شاء الله هحاول أحمل الصور بتاعت العربية بتعتي قريب عشان تشوف التغيير الى فيها , وربنا يوفئك .

[kojy]

اه متنساش لما تطلب الاكصدام الامامي والخلفي تطلبو عريض لأن احيانا الصنايعية او بتوع الاستيراد بيتلغبطو في الموديل , يعني تأكد عليه انه العريض امامي وخلفي وتتأكد انه راكب فيه الضفاير بتاعته تمام , وهو بييجي فاضي لو جديد يعني من غير اي شبك او طباط فوانيس , وانصحك تبقى تشتري فوانيس شبورة انا جبتهم بحوالي 240 بخلوا شكل العربية 100 100

[iBiZa]

السلام عليكم .
بص يا باشا انا عملت نفس الى انت عايز تعمله بالضبط , او الى صحبك عايز يعمله , انا معايا 94 وغيرت كل حاجة من بره الى 98 وحتى الموتور سقط 1600 وهو فعلا ماشاء الله ممتاز وخصوصا مع الشكمان الديفل , وطبعا حتحتاج تغير المساعدين ونصيحة مني عن تجربة يفضل تجبهم استيراد الماني وتجيب الجوز مع بعض لأنك لو ركبت واحدة يمين مثلا بس كده هتحمل التعبانة عليها وممكن تبوظ بسرعة , عموما انا إن شاء الله هحاول أحمل الصور بتاعت العربية بتعتي قريب عشان تشوف التغيير الى فيها , وربنا يوفئك .

الله ينور عليك, انت كدة عامل كل حاجة بالعقل و ربنا يباركلك فيها.

[fadynabil]

اه متنساش لما تطلب الاكصدام الامامي والخلفي تطلبو عريض لأن احيانا الصنايعية او بتوع الاستيراد بيتلغبطو في الموديل , يعني تأكد عليه انه العريض امامي وخلفي وتتأكد انه راكب فيه الضفاير بتاعته تمام , وهو بييجي فاضي لو جديد يعني من غير اي شبك او طباط فوانيس , وانصحك تبقى تشتري فوانيس شبورة انا جبتهم بحوالي 240 بخلوا شكل العربية 100 100

هوه إيه قصدك بالعريض يعني ال٩٨ ولا قصدك إيه

[SOBKY]

و الله العظيم انتوا شباب زي العسل لانكم بتتكلموا في الصح .. و في احلى عربية بالنسبه لي ..
بس عندي سؤال رفيع لـ iBiZa حبيب الكل..
مش المفروض ان البولو و الابيزا نازلين يمسكو سوق واحد..؟؟ و المفروض انهم نفس المواتير و يمكن كمان نفس الشاسيهات ..؟؟
الكلام ده صح و لا انا كده باهجص..؟؟؟!!!
طيب و سؤال ارفع منه .. انت اكيد ركبت الاتنين.. بذمتك مين فيهم احسن .. و لو فيه لينك لمقارنة بينهم.. لاغيني بيه ..و تسلملي يا غالي.
تقلت عليك معلش .

[iBiZa]

هوه إيه قصدك بالعريض يعني ال٩٨ ولا قصدك إيه

ايوة, بس هما عارفينة باسم الاكصدام العريض.

بس عندي سؤال رفيع لـ iBiZa حبيب الكل..
مش المفروض ان البولو و الابيزا نازلين يمسكو سوق واحد..؟؟

المفروض.

بس دية كانت بتنزل فى دول و دية فى دول تانية و فية دول كان بينزل فيها الموديلين.

دور على حاجة اسمها الPolo Playa هى Ibiza بس Seat مكانتش نازلة فى الدول دية فا نزلوها بالاسم دة تبع VW

و المفروض انهم نفس المواتير و يمكن كمان نفس الشاسيهات ..؟؟

بالظبط كدة.

الكلام ده صح و لا انا كده باهجص..؟؟؟!!!

صح كدة.

طيب و سؤال ارفع منه .. انت اكيد ركبت الاتنين.. بذمتك مين فيهم احسن .. و لو فيه لينك لمقارنة بينهم.. لاغيني بيه ..و تسلملي يا غالي.
تقلت عليك معلش

http://www.nilemotors.net/Nile/showthread.php?t=34140

http://www.nilemotors.net/Nile/showthread.php?t=42579

بالمناسبة, انا معايا Polo 2001 و اختى معاها Polo 1999 و اختى التانية معاها Ibiza 1994