كل مــا تريــــد معرفته عن الأوكتـــافيــــا A4

[د.محمد الشيخ]

تقييم رائع فعلا ربنا يباركلك يا رامى

انا من عشاق سكودا وناوى اشتريها باذن الله فلو تقدر يا أخ رامى تفيدنا اكتر وأكتر عن كل ما يخص السيارة يبقى كتر خيرك اوى .
يعنى جدول الصيانات الدورية وقطع الغيار وأسعارها

والاهم الحقيقة أخبار التوكيل معاك ايه ....هل انت راضى عن أداؤهم وعن معاملتهم .....يا ليت تفيدنا اكتر
وربنا يجعله فى ميزان حسناتك.

اخوك د.محمد الشيخ

[KHALED AYMAN]

بصراحه يا جماعه انا كل المعلومات الى اعرفها عن العربيه الرجاله هنا قالوها بجد ما شاء الله شدو حيلكو بقى عشان الموضوع يبقى مرجع لملاك ال a4 .

[mido_919]

الف شكر يا جماعة علي المعلومات ديه انا معايا اوكتافيا a4 وبصراحة بيعجبني فيها اوي ثباتها انا كنت جايب بيها 200 علي مصر الاسماعيلية ومقضيها غرز وبجد انبهرت بثبات العربية العربية فعلا محترمة هي كل عيبها انها محتاجة شوية اوبشنز

[spider6666]

انا مع العضو aleshath بخصوص رفع الكتالوج بتاع العربية A4 وشرح الاساسيات التقيلة اللي هيا الزيوت وانواعها واماكن تغييرها واماكن قطع الغيار
ياريت والله يا جماعة خلينا نستفاد كلنا من الموضوع ده
انا بقة عندي سؤال
انا عربيتي موديل 98 وفيها من تحت الاكصدام الامامي هوايات شبكية عاوز اشيلها واركب فوجات من تحت لو ينفع قولولي اعملها فين وعند مين وبكام التكلفة وشكرا

[ramylanos]

متشكر جدا يا جماعه

بالنسبه لي د/اليشع ثابت

بالنسبه لتغير زيت الموتور انا بغيره بره التوكيل علشان اجيب زيت علي مذاجي
انا بجيب موبيل 1 واسيبه 10,000 كيلو متر وبفكر اغير لشيل الترا
العربيه بتأخد زيت مع تغير الفلتر اكتر من 4 لتر يعني لازم تجيب جركن لتر من نفس نوع الزيت الي انت جبته وتزوده علشان الزيت يبقه مظبوط طبعا ما تزودش اللتر كله حد ربعه او نصفه حسب المقاس
طبعا لازم تغير الزيت بالشفط عند اي حد من بتوع الزيت علشان المتور والفتيس متغطين بفولاذ من تحت فا مش هتعرف توصل للطبه بتاعت الزيت لازم تفك الفولاذ الي تحت وده مستحيل
والفلتر بتفك جزء من الفبره الي علي وش الماتور علشان تقدر توصله بسهوله

بالنسبه لزيت الفتيس الاوتوماتك انا غيرته مره في صيانه 65,000 الف مع سير الكاتينه ومش عارف نوعه ايه بصراحه بس بعد ما اتغير الفتيس نعم جامد

بالمره اقولكم ايه الي حصل في صيانه ال 65,000 الف هيا مكلفه علشان بتغير فيها حاجات كتير وبما فيهم سير الكاتينه وحجزت قبليها بكتير, علشان سير الكاتينه بالذات بالحجز علشان بيأخد اليوم كله شغل

سير الكاتينه 104 جنيه
بليه شداد الكاتينه 218 جنيه
شداد سير دينمو 252 جنيه
بوجيهات 3 شمعه 104 جنيه
فلتر بنزين 38 جنيه
زيت فتيس اوتوماتك 280 جنيه
فلتر زيت فتيس اوتوماتك 151 جنيه
وقلي اغيرك طلمبه مياه بالمره علشان مستخبيه تحت سير الكاتينه ولو باظت بعد كده هتفك سير الكاتينه تاني وحوار (مش عارف ليه مش مقتنع)وديه سعرها 493 جنيه
مياه حمراء 47 جنيه
مع مصنعيات 610 جنيه
وضريبه مبيعات 245 جنيه

يبقه الاجمالي 2542 جنيه

الاسعار ديه من سنه ونص تقريبا لما كنت في التوكيل

بس فعلن من ساعت ما جبت العربيه لحد 65,000 ما احتجتش غير تيل وتغير زيت

انا سمعت ان في مركز في جسر السويس شغال في سكودا وفولكس عايز اروح اشوف ايه نظامه

انا العادي اني ما برحوش التوكيل خالص بعد ما الضمان خلص انا مش بستريحلهم خالص بس انا رحتلهم في صيانه الي 65,000 الف علشان سير الكاتينه ومش عايز اركبه بره ليركب غلط ولا حاجه تبقه نصيبه بكل المقايس

بالنسبه لموضوع تيل الفرامل انا غيرت لنوع تاني بعد ما الي جاي في العربيه خلص وماكنش اصلي
والنتيجه حصل في الطانبير ريجه وديه بتبان اوي وانت ماشي علي السرعات العاليه اول ما تلمس الفرامل تلاقي الدريكسون بيلعب جامد في ايدك
رحت التوكيل قلي اغيرلك طنابر ب 600 جنيه مش فاكر الاتنين ولا واحد وتيل مش عارف بكام قلتله السلام عليكوا

رحت الحرفين خرط الطنابير وركبت نوع تاني ولاسف نفس النتيجه :k30::k30:

قلت بقه المره الجايه اجيب التيل الاصلي واركبه واريح دماغي علشان انا بجري جامد ومش هينفع تكون الفرامل ضعيفه

[ramylanos]

تقييم رائع فعلا ربنا يباركلك يا رامى

انا من عشاق سكودا وناوى اشتريها باذن الله فلو تقدر يا أخ رامى تفيدنا اكتر وأكتر عن كل ما يخص السيارة يبقى كتر خيرك اوى .
يعنى جدول الصيانات الدورية وقطع الغيار وأسعارها

والاهم الحقيقة أخبار التوكيل معاك ايه ....هل انت راضى عن أداؤهم وعن معاملتهم .....يا ليت تفيدنا اكتر
وربنا يجعله فى ميزان حسناتك.

اخوك د.محمد الشيخ

ربنا يخليك د/ محمد

التوكيل مش بستريح معاهم بحس انهم نصابين ده رأي الشخصي
بس لو تروحلهم علي قد مره كل فتره كبيره مفيش مشكله وممكن نشوف حد معتمد بره نعمل عنده صيانه اذا احتاجت العربيه وسمعت عن ناس في المنتدي بتقول علي ناس شغلين في النوكيل فاتحين بره بس انا لسه ما جربتش حد منهم وهيا ان شاء الله مش هتحتاج

هيا قطعه غيرها ممكن تكون غاليه بس معمره يعني دلوقتي وانا داخل علي 100,000 الف ما عملتش غير الي انا كتبته فوق في موضوع صيانه 65,000 الف
طبعا مع تغير تيل وزيت

هتها وتوكل علي الله وهيا انا علي رأي الشخصي وبكررها علي رأي الشخصي علشان في ناس بتزعل انا شايفها احسن من العربيه الي في نفس سعرها زي الانسر الشارك والمازدا 3

[ramylanos]

في ميزا جمده ان التوكيل في منفذ بيع بره لقطع الغيار يعني تجيب وتمشي مش لازم تركب عندهم
وده طبعا هيرحمنا من النصبين الي تروحلهم ويوقلك ده اصلي وده مش عارف ايه وكله زفت في الاخر

وفي حاجات والله لاقيتها ارخص في التوكيل من بره واصليه طبعا

العربيه نزلها فوانيس مش اصليه بره في شارع دمشق
انا علي ما افتكر بس الكلام ده من فتره يعني اكيد الاسعار اتغيرت
الفانوس الاصلي الامامي ب 1100 جنيه والخلفي 450 جنيه او 550 جنيه

الفانوس التاني الي في شارع دمشق مش فاكر حته صناعته ايه الامامي 350 جنيه والخلفي 250 جنيه

[د./اليشع ثابت]

انت باشااااااااااااااا يا رامى والله
الف شكر لذوقك و اخلاقك العالية واهتمامك بالجميع
بس يا با باشا انت كدة رامى اوكتافيا وليس رامى لانوس
لانك بجد كينج الاوكتافيا
ولك منى كل الحب

[د.محمد الشيخ]

الف الف شكر يا رامى على اهتمامك وعلى ردك والحقيقة انت انسان خدوم واتمنى اخدمك فى اى شىء اقدر عليه .
الحقيقة كلامك طمنى على التوكيل رغم انك مش بترتاحلهم اوى لكن اللى انت قلته يبين انهم احسن من توكيلات اخرى كثيرة ويكفى منفذ بيع قطع الغيار الذى اشرت اليه ويكفى انهم لا يشترطوا تركيب قطعة الغيار كنوع من الاحتكار .
وعموما جودة سياراتهم تشفع بعض هفواتهم

وربنا يباركلك فى عربيتك ويرزقك خيرها ويبعد عنك شرها ومتحتاجش للتوكيل فى اى شىء .

اخوك محمد الشيخ

[ramylanos]

لا شكرا علي واجب د/اليشع ثابت و د/محمد الشيخ

انا تحت امركم في اي حاجه عايزين تسألوا فيها عن العربيه وربنا يوفقكم في الاختيار

[د./اليشع ثابت]

لا شكرا علي واجب د/اليشع ثابت و د/محمد الشيخ

انا تحت امركم في اي حاجه عايزين تسألوا فيها عن العربيه وربنا يوفقكم في الاختيار

ربنا يخليك يا باشا
والله حضرتك محترم جداااا ربنا يكتر من امثالك
ياريت يا رامى تساعدنى بجد فى الموضوع دة
لانى عايز اغير عربيتى الانسر الى اوكتافيا 4 اوتوماتيك و بدور من فترة بس لسة النصيب محصلش لانى عايز حالة كسر زيرو
انا توفقت فى الانسر كدة برضة هى اخر 2006 وحالتها محترمة جداااا سوبر اكشن يارب اتوفق فى حاجة محترمة من الاوكتافيا

[ramylanos]

انا مفيش حاجه قدامي بصراحه
ممكن تدور في النت او في الوسيط

https://www.car100100.com

https://www.contactcars.com

دول موقعين فيهم مستعمل
وطبعا لو لاقيت حاجه قدامي هبلغك عالطول
بس الاوتوماتك اخره 2006 ديه كانت اخر سنه ينزل فيها تقريبا

[د./اليشع ثابت]

انا مفيش حاجه قدامي بصراحه
ممكن تدور في النت او في الوسيط

https://www.car100100.com

https://www.contactcars.com

دول موقعين فيهم مستعمل
وطبعا لو لاقيت حاجه قدامي هبلغك عالطول
بس الاوتوماتك اخره 2006 ديه كانت اخر سنه ينزل فيها تقريبا

لاء يا باشاااا
اول سنة مينزلش فيها اوتوماتيك
فقط عام 2009
اما الى 2008 فالاوتوماتيك موجود
وللعلم فى مصر بس منزلش اوتوماتيك لعام 2009 لكنم موجود على النت انة كمان فية لعام 2009 اوتوماتيك برضة
لكن مصر يا باشاااااااااا غيررررررررررررررر

[ramylanos]

شكرا علي المعلومه
اصل في ناس هنا في المنتدي هما الي قالولي المعلومه ديه

[mahmoudzaied]

فعلا العربية ممتازة جدا جدا
ووالدى نفسو يجيب واحدة زيها
بس سعرها غالى (موديل 98 حوالى 87 الف فى احسن الحالات)
عموما ربنا يبارك لكل للى راكب العربية دى
على فكرة
انا ليا واحد جارى معاه نوبيرا 2004 واشترى من شهر A4 موديل 98
بيقولى فيه فرق شاسع بينها وبين النوبيرا
الثبات والشنطة بحر حاسس انى راكب المانى
بس بيقولى ان الطلعة الاولى فى النوبيرا احسن يعنى النوبيرا تجميعها اسرع منها
عموما هيا عربية فوق الممتازة