هو ده الثبات

[KHALED AYMAN]

اولا حمدا لله على السلامه
ثانيا كلنا متاكدين انا الامانى ثباته عالى جدا ولا يقارن باى عربيات تانيه

بس انا حاحكى قصه حصلت لواحد معرفه للعظه

الشخص ده كان ماشى على دائرى المعادى بعربيه بى ام الفئه الخامسه موديل السنه

وهو ماشى فى اول نفق اللى عند التجمع الخامس و فاتح على 180 حصل ان عربيتن قدامه خبطوا فى بعض داخل النفق

فحاول هو يفرمل ويفاديهم وعينك ما تشوف الا النور لان السرعه الزياده خلت العربيه تتقلب و تدخل فى جانب النفق وتزحف على ضهرها مسافه 50 متر

رغم انها مجهزه ب اى بى اس واير باجز وكل شىء

المهم كانت النتيجه ان صديقى اللى كان راكب جنب السواق دماغه اتخبطت فى القايم لانه ما كنش لابس حزام امان ود عمله كسر فى الجمجمه و عينه راحت وقاعد فى المستشفى من شهور بدون امل الا فى رحمه ربنا سبحانه وتعالى

رغم وجود كافه سبل الامان الا ان التهور بيسبب مصايب ربنا يعافينا كلنا منها

الخلاصه مهما كانت العربيه لازم الناس ما تتهورش حفاظا على اروحنا وارواح كل اللى على الطريق

شكرا يا باشا ...
انا بطلت جرى قبل ما يحصلى حاجه ....
بس على فكره..
انا مكنش قصدى بالموضوع انى اظهر اعجابى بثبات العربيه اد ما كان قصدى اظهر تحذيرى لكل الى بيجرى ...
و ربنا يسترها معانا كلنا..

[M.Mostafa80]

طيب ماتقولنا الخطه عشان ندعيلك كويس

[KHALED AYMAN]

شوف يا مومو باشا ...
طبعا انت عارفنى المانى المانى ...
والدى و اخويه مصممين على النترا ..
شايفين انها رخيصه و كويسه و عربيه شغل و قطع غيارها كتير و كده ..
بس انا مش شايف كده او بمعنى اصح شايف كده بس مش موافق ..
حاولت اقنعم انها مش مناسبه ليا بس مفيش فايده ..
بعد محاورات كتير اقنعت اخويه ..
و قنعته بالاسترا السيدان او الفيكترا !!!
طبعا فى فرق سعر كبير
قلتله ندفع نص تمن الفيكترا و نقسط الباقى (قسط مباشر من منصور)
و بكده اقنعت اخويه ..
والدى بقى قلتله انا مش فاضى للموضوع ده و عندى امتحانات و كده
ناجله لبعد الامتحانات ..
قالى صح عندك حق
فى الفتره دى
اقنعته بحلاوه و جوده و تحمل الفيكترا ..
و انها هتمسك سعر لما الزيرو يخلص ..(دى حقيقه)..
و قلتله انت راجل اوبلاوى قديم و عارف الاوبل
ووافق الحمد لله مش فاضل غير التنفيذ ..
ان شاء الله هننفذ قبل الامتحانات بس دعواتكو معايا....
هى دى بقى الخطه يا سيدى ..
متعتبرش خطه يعنى ..
حاجه بسيطه كده ...
هى كمان فى عربيات كتير طفشته منها بس القائمه طويله و هتزهقو منى ..
عموما العربيات دى بدايه من الانسر بومه وصولا الى الييبرتى ..

[sakrquraish]

1000 1000 حمد الله ع السلامة

[albigboss]

اولاً حمد الله على سلامتك
ثانياً شكراً على مشاركتك الجميلة وانصحك تفضل في سكودا و سيبك من الالنترا

[LORD91]

اولا السلام عليكم ..... انا عضو جديد معاكوا واتمنى انى اقدر اشارك معاكو لكى استفيد وافيد
على فكرة انا مستغرب بالنسبة للى بيقول ان الاسكودا A5مش بتعدى 190 الكلام دى مش اول مره اسمعه
انا سمعت الكلام دى من ناس صحابى كتير عندهم A5 بس مستغرب .
انا عندى A5 موديل 2006 خليجى منزلها من الامارات .
والله العظيم انا جبت بالعربيه دى 200 وكانت ممكن تجيب اكتر بس الطريق كان مش مساعد وكانت ساعتها العربيه ماشيه 7000 كيلو .
وبالنسبه للملفات انا اول ما جبت العربيه حسيت انها ثابته جدااا على الطريق وانتوا عارفين الشيطان اما بيسيطر على الواحد وانت كمان تحت ايدك عربيه تشجعك على اى حاجه المهم دخلت على ملف 140 والملف دى كل العربيات بيدخلوه على 80 او 90 اخر حاجة ده بالنسبه للعربيات اليابانى والكورى وكمان انا داخل الملف دى عشان اختبر العربيه ودخلت الملف على الواسع ودى اكبر غلط طبعا بس انا حبيت اشوف ثبات العربيه بس دى كان غباء منى والحمد لله طلعت من الملف دى باعجوبه انا كسرت الدركسيون فى الملف وانا على الواسع والعربيه ماشيه يسرعة فطبعا انت المفروض تكون ايدك سابته فى الملف مش هينفع على السرعة دى تكسر اكتر من كده او حتى تدوس فرامل انا فضلت كاسر وانا بقرب على السور لغايه اما كان بينى وبين السور مسافه والله عباره عن ميليمترات وطبعا العجل بيصرخ على الارض وانا الصراحة كانت اعصابى بدات تسيب للامر الواقع وكان صاحبى قاعد جنبى بس ملقتهوش (كان فى الدواسه) بس بامانه حقة .
على فكرة صاحبى معاه لانوس وقالى دى لو كانت لانوس او لانسر او كرولا والله احنا كنا بقينى على الحاره التانيه وكمان هتبقى واخده الملف من الضيق للواسع .
بس بعد الموقف دى انا الحمد لله ربنا هدانى وبقيت اخد الملف على 60 مهما كان بس على الطريق السريع بجرى بس بصراحة مش بقيت بعدى الـــ180 .
ياريت محدش يسمح للشيطان انه يتحكم فيه او يغريه والموضوع دى باذات للى لسه مشترين عربيات المانى عشان هى بتغرى بجد لكل حاجه الملفات والسرعه .
ومعلش انا اول مشاركه ليه معاكوا كانت طويله كدا ياريت محدش يكون مل منى
وشكــــــــــراااا
والسلام عليكم ورحمه الله وبركاته