اول عطل للسياره باسات بفتيس DSG 7 shift

[SAiF3S]

بسم الله الرحمن الرحيم

مع ان القصه لسه ما كملتش لكن انا شايف ان لو الموضوع فضل اكتر من كده هيبقى شكله مش ظريف

مع العلم اننى لم اقم بعمل الموضوع الاخر للتشويق او اثاره الفضول او حتى جذب الانتباه من الاعضاء حتى و ان كان حدث

نبدء بالمسلمات و الحقائق

1. عربيتى باسات بموتور TSI و ناقل حركه حديث جدا من نوع DSG 7 shift

2. حتى تاريخه العربيه عامله 45,000 كم بدون اى مشاكل

3. العربيه مشتراه من الوكيل و بضمان الوكيل عامان من تاريخ الشراء و بدون حد اقصى للكيلومتر

4. عربيتى من اول عربيتين خرجوا من التوكيل بالمواصفات دى

5. العربيه و حتى تاريخ تسليم العربيه للتوكيل تمشى بدون زق و بدون قطر و بدون فصل الكهرباء

6. انا بحب العربيه دى جدا ومش لاقى نفسى غير فيها

يوم السبت 24/4

العربيه تعمل بكفاءه كامله لايوجد اى مشكله حتى الساعه 12 ليلا

يوم الاحد 25/4

العربيه اتغسلت فى الجراج الساعه 9 صباحا وتركت تتهوى بعد الغسيل لمده ساعه

الساعه 10 ص رايح مقابلات و مواعيد فى العاشر من رمضان خرجت العربيه من الجراج لم الحظ شىء غريب ركنت شويه قدام البيت لاخذ مج النسكافيه البيتى لزوم الطريق , بدور العربيه حسيت بشىء غريب و نور فى التابلوه

· لمبه المحرك منوره

· مكان النقلات على شاشه التابلوه بتنور و تطفيىء سواء على الاوتوماتيك او التبترونك

· عدم ظهور النقله او وضع الفتيس على بانل الكومبيوتر فى التابلوه على الوضع الاوتوماتيك P,R,N,D,S

· عدم ظهور النقله على بانل الكومبيوتر فى التابلوه على وضع التيبترونك 1=====>>> 7

· محاولات اطفاء العربيه و اعاده تدويرها عل وعسى ان يختفى العيب ده بدون فائده

بعد كده قلت اجرب امشى بالعربيه على وضع ال D العربيه بتمشى بدون مشاكل مع ثبات العيوب فوق , وصلت طريق اسرع شويه وعلى سرعه ال D ومحاوله الضغط المفاجىء على البنزين لتسقيط النقل اتوماتيك عاما بتسقط نقله او اتنين واحيانا 3 على حسب الضغط على الدواسه و السرعه الى انت عليها , المهم حسيت ببرجله فى النقل ولقيت انى لما بأشتغل مانيوال تيبترونك البرجله دى بتروح , و رحت راجع بالعربيه على البيت وركنت فى الجراج و الريفرس ايضا يعمل وجبت المانيوال وقعدت اشوف فيوزات الفتيس و المحرك كله سليم

فى خلال كل ده حاولت الاتصال بالوكيل لكن كان يوم اجازه مع الاسف

الاثنين 26/4

كان فى موعد لوالدى مع الدكتور المعالج فى مستشفى السلام الدولى خفت اخد سياره زوجتى علشان لو اتأخرت تعرف تجيب الاولاد من المدرسه , وقررت الذهاب بالباسات مع العيوب اللى فوق فيما عدا ان اليوم ده لم احس بأى برجله او شىء عند الضغط على البنزين او تجميع سرعه العربيه ماشيه طبيعى على الD مع وجود لمبه المحرك مضاءه و بانل الفتيس بينور و يطفى وعدم معرفه النقله اللى انا عليها 1====>7

[SAiF3S]

قمت بعمل هذا الفيديوا فى هذا اليوم على الكورنيش بالمعادى الساعه 4 ظهرا

http://www.youtube.com/watch?v=T72Uq7YEqFE

قمت بالاتصال بالوكيل لتحديد موعد لمعالجه العطل ده , والموظفه بتقولى يوم الخميس اقرب ميعاد , طبعا التون ابتدى يعلى منى قالت لى ممكن ميعاد بكره فى مركز شبرا طبعا التون بقى اعلى و قلت لها بكل ادب انا عمل صيانتى و مش طالب موعد صيانه علشان تدينى ميعاد بعيد انا عندى حاله طارئه و عاوز ميعاد عاجل بكره و يكون فى العبور مش حتى فى مركز ابورواش .

دقيقه يا فندم ها ارجع المركز و ارجع , طبعا رجعت لى وقالت الميعاد بكره فى العبور 10:30 صباحا

الثلاثاء 27/4

خرجت من البيت الساعه 9 بالعربيه على اساس انى ها امشى براحه لغايه العبور المهم وصلت الساعه 9:45 و لا يوجد اى مشاكل و لمبه المحرك طفت شويه وبقيت اقول يارب ماتكسفنى و انا رايح التوكيل

قمت بمقابله مهندس الصيانه وشرحت له الحاله بالضبط و حاولت استشف اذا كان موضوع فردى او شكوى عامه او يكون له علاقه بمشكله نفس الفتيس وحساس الحراره الخاص به فى عربيات الجيتا المورده لأمريكا العام الماضى , وقالى ان موضوع امريكا موضوع شبه عام وقامت الشركه بالاستدعاء لكن حتى الان فى مصر عبيتى ثانى او تالت حاله , المهندس ده علاقتى به كويسه يعنى مش هيشتغلنى , و اذا حسبتها بالعقل انا عربيتى من اول دفعه مورده من الوكيل للسوق فى شهر يناير 2009 و انا من الناس اللى نتمشى كتير بالعربيه مش بتركنها تحت البيت

قمت بطلب مهندس يعمل معى ليأتى لاخذى وقمنا بعمل زيارات للعملاء فى العبور حتى يتم الانتهاء من التصليح ,

فى الساعه الثالثه قام مهندس الصيانه بالتوكيل بالاتصال بى وقال لى العربيه لازم تفضل فى التوكيل اليوم ده وسيقوم بالرد غدا الاربعاء بحاله العربيه وما فيها و ما سيتم عمله وعرضوا على توصيلى لاى مكان فى القاهره لكن شكرتهم و خلاص وروحت مع مدير مصنع فى العبور ساكن جنبى

الاربعاء 28/4

ذهبت الاسكندريه فى زياره يومين مستخدما القطار بصحبه موظف معى وركبنا قطار الساعه 8 صباحا , اكتشفت قد ايه الواحد بيضيع وقته فى القياده بينما من الممكن استخدام القطار و توفير الكثير من الجهد و الوقت . كان فى استقبالنا مهندس مبيعات اسكندريه بسيارته من محطه سيدى جابر

نرجع لموضوعنا ,مهندس الصيانه بتوكيل فولكس قام بالاتصال بى و ابلغنى ان العربيه هتفضل فى مركز الخدمه حتى يوم الاتنين علشان يقولى فيها ايه بالضبط , قلت له يعنى انتم مش عارفين قولى اللى حصل بالضبط قالى ان العربيه بتتحط على جهاز الكشف عن الاعطال و بيقومو بعمل diagnosis report تقرير تشخيصى بحاله العربيه و بيقوموا بارساله الى مركز الخدمه الفنيه TECH support فى المانيا وهما اللى هيقررو هيعملوا ايه وقالى انه لو حساس او كنترول فتيس سيتم تغيرهم فورا وتسليمى العربيه يوم الاتنين ولو الفتيس سيتم تغيره بالكامل سيتم حجز العربيه مده 3 اسابيع لحين وصول فتيس جديد .

طبعا طلبت من المهندس سياره بديله وبدون قيمه خلال فتره التصليح وقالى ان ده النظام المتبع لو التصليح هيأخد فتره طويله كنوع من انواع خدمه عملاء التوكيل لكن طلب منة الانتظار لحين ورود التقرير بحاله العربيه من المانيا

وفى نفس اليوم قمت بكتابه الموضوع السابق

الاثنين 3/5

قمت بالاتصال صباحا بالتوكيل الساعه 9 لا يوجد اخبار

الساعه 12 ظهرا قاموا بالاتصال بى وانهم قاموا بالاتصال بمركز الدعم الفنى بالمانيا لاستعجال التقرير

الساعه 4 عصرا قمت بالاتصال بالتوكيل و اخبرونى ان رد مركز الدعم هو طلب مزيد من قراءات الفتيس وسيقومو بأرسالها اليوم وغدا الثلاثاء سيكون يوم الفصل فى حاله العربيه

[SAiF3S]

متهىء لى كده كله عرف ان لا بشوق حد و لا بستغل فضول حد لجذب الناس للموضوع

الانطباع عن التوكيل الاحترام المتناهى و الذوق فى خدمه العميل , مقارنه ببعض التوكيلات

النصيحه الاخيره و الاولى اللى دايما با أنصح بيها ما ينفعش ياجماعه تشترى عربيه بدون ضمان الوكيل (خليجى) الله لا يقدر , لا تعرف ماذ ستواجهه , و اعلم جيدا ان السياره الخليجى ارخص على اساس انها سياره مبتوره الضمان الذى يقابله فلوس , وصدقنى بتبقى حاسس انك انتصرت و جبت اعلى حاجه باقل سعر , لكن أعلم انك الخاسر الاكبر لا قدر الله فى حاله حدوث اى خلل

الوكيل مش صيانه و بس , الصيانه اى حد يعملها , لكن الضمان الوكيل و بس او جيبك انت

الضمان مهم لاى عربيه متوسطه او عاليه التكنولوجيا , سواء كورى ويابانى او اوربى

[ghazy12]

لاااااااااااااااااااااااااأ............ طلع الفتيس زي ما توقعت..... هكمل الموضوع و اتكلم بعدها...

بس مبدئياً حاسس بحزن شدييييييييييييد جداااااااااااا :((

كنت منتظر على احر من الجمر و انا قلقان لا يطلع الفتيس زي ماحسيت فعلا..

[معتز]

الحمد لله لا تحزن...حتى لو بدلو الفتيس ..تاخد واحد زيرو ان شاء الله..........ولا يهمك ياعزيزى الحمدلله وخير ان شاء الله.................بالمناسبة بقى ان اللى كسبت جايزة التوقع...شوف مدخلتى ...........

[M.Mostafa80]

لا حول ولا قوه الا بالله معلش يأستاذ سيف خير ان شاء الله
وعسى ان تكرهو شئ وهو خير لكم

[ehab_mansour]

الله المستعان ربنا ييسرلك الموضوع ويطلع حاجه بسيطة
وعادي جدا يا جماعه عايز أقلكم ان الكمال لله وحده ومش لازم عشان عربية ألماني وبأحدث تكونولوجيا ما يطلعش فيها عيوب

[crazylambada]

ان شاء الله يكون خير و مشكله في حساس او حاجه بس انا نفسي حضرتك تسال المهندس ليه ده حصل هل عيب صنع و لا ليه علاقه بغسيل العربيه و لا ايه بالظبط
و ان شاء الله

[modiabbas]

لا حول و لا قوه الا بالله و الله زعلت جدا جدا جدا

[M.Osman]

ان شاء الله هتكون بسيطة لا تقلق

[yoko]

الحمد لله على كل شئ ويا رب الموضوع يطلع بسيط والعيب ده منتشر بره وده عيب أي تكنولوجيا جديدة ولو إحتجت مني اي حاجة أنا تحت أمرك

[nab!l]

متقلقش
كله على حسابهم ان شاء الله

[ghazy12]

متهىء لى كده كله عرف ان لا بشوق حد و لا بستغل فضول حد لجذب الناس للموضوع

الانطباع عن التوكيل الاحترام المتناهى و الذوق فى خدمه العميل , مقارنه ببعض التوكيلات

النصيحه الاخيره و الاولى اللى دايما با أنصح بيها ما ينفعش ياجماعه تشترى عربيه بدون ضمان الوكيل (خليجى) الله لا يقدر , لا تعرف ماذ ستواجهه , و اعلم جيدا ان السياره الخليجى ارخص على اساس انها سياره مبتوره الضمان الذى يقابله فلوس , وصدقنى بتبقى حاسس انك انتصرت و جبت اعلى حاجه باقل سعر , لكن أعلم انك الخاسر الاكبر لا قدر الله فى حاله حدوث اى خلل

الوكيل مش صيانه و بس , الصيانه اى حد يعملها , لكن الضمان الوكيل و بس او جيبك انت

الضمان مهم لاى عربيه متوسطه او عاليه التكنولوجيا , سواء كورى ويابانى او اوربى

+1111111111111

معاك في كل كلمه بجد... و عندك حق يا استاذ عصام...

والله العظيم زعلتني جدا جداا, و ان شاء الله الموضوع يطلع بسيط و تتحل بسرعه

و اللي انا عرفته بردو زي ما قال مهندس الصيانه ان حصل شكوى من الفتيس في
الباسات بردو, لكن كانوا 4-5 عربيات, و ده اللي انا عرفته و الله اعلم

بس اللي عرفته بردو بس مش مقتنع بيه خاااالص مش عارف ليه, ان اللي بيحصل
ده في الباسات بس و ده نظراً لوزنها الثقيل, و اللي بيبقى حمل على الفتيس..!!!!

مش عارف مش مقتنع بالكلام ده خـــــــالص, لأنه رجع و قاللي ان المشكله اتحلت
في الدفعات الجديده..!!! طيب ازاي و هي هي نفس الوزن (لو هو ده السبب فعلا)!!

عموما ان شاء الله يطلع الموضوع بسيط, و انا شخصيا لو هجيب اي عربيه من
فولكس dsg او tsi مع dsg, لاااااااااازم هجيبها وكيل, مش خليجي ابداااا

و ان شاء الله تطمنا على التقرير و اللي هيقوله التوكيل بكره يا استاذ سيف...

تقبل تحياتي (مع حزني الشديد والله), و ربنا معاك...

[SAiF3S]

الحمد لله لا تحزن...حتى لو بدلو الفتيس ..تاخد واحد زيرو ان شاء الله..........ولا يهمك ياعزيزى الحمدلله وخير ان شاء الله.................بالمناسبة بقى ان اللى كسبت جايزة التوقع...شوف مدخلتى ...........

شكرا لك , وعلى فكره من قبل ما أنزل الموضوع ده كتبت فى الموضوع التانى انك اول واحد توقع صح , اختار الجايزه بقى فتيس ولا كونترول ولا حساس كله موجود
وعلى فكره المشاركه الثالثه هنا نصيحه لك , علشان بحس انك مقتنع بالخليجى جدا وانت على وش شراء

[mesho_kimi]

إن شاء الله بسيطه وربنا يعوضك خير إن شاء الله