لأصحاب بولو 99

[sherief_cso]

الأعضاء الكرام يمكن ده أول استفسار لي في المنتدي انا جديد علي البولو و فيها حاجة محيراني جدا العربية 1000 سي سي و بأحط ليها بنزين 92 و انا حسبت الاستهلاك لقيت الصفيحة بتعمل حوالي 220 كيلو علي أقصي تقدير و ده في الطوالي كمان و بصراحة انا حاسس ان كده قليل و سؤال كمان لو سمحتم أفضل نوع زيت موتور للبولو

[SYD]

اولا اهلا بحضرتك في منتدي نايل موتورز

احب اقول لحضرتك ان كدة طبعا الأستهلاك عالي بشكل مبالغ فيه

اول حاجة حضرتك يجب انك تعملها هي الصيانات بتاعة العربية
هجيب لحضرتك مشاركة ليا كنت كتبتها في موضوع تاني
اقراها وهكملك كلامي بعدها

اولا اهلا بحضرتك في قسم سيات
ومبروك عليك العربية ربنا يباركلك فيها ويديك خيرها ويكفيك شرها

طبعا المهندس ايهاب قال لحضرتك كل ما يمكن ان يقال ولكن لي بعض الأضافات الطفيفة علي كلامه كتعليق وليس تعديل

1- الزوايا لازم حضرتك تعيد عليها مرة تانية عند حد تاني والأحسن يكون عنده جهاز HUNTER الأمريكي
ولو حضرتك من القاهرة ممكن تروح لصفوت جرجس في المنيل عنده الجهاز الهانتر الأمريكي وبيعمل update لل software كل شهرين مما يضمن دائما انه عنده اخر نسخة من برنامج الجهاز ولأضافة اي موديل جديد
انا شخصيا كنت بروحله بعربية 128 موديل 81 وكان عنده مقاساتها والسوفت اتعرف عليها
وبروحله بعربيتي الأبيزا موديل 99 وبردو بيشتغل فيها
ولو هتعمل عنده شغل خلي تامر هو الي يشتغلك فيها
وطبعا بيعمل ترصيص وخليه يشوفلك الجنوط لو فيها عوجة ولا حاجة
وعلي فكرة الكاوتش ليه تأثير ضخم جدا علي ضبط الزوايا
يعني لو العربية عايزة تغير الفرد يبقي الأحتمال الأكبر ان الزوايا تمام والترصيص تمام بس الكاوتش متأكل من اتجاه اكثر من الأتجاه الأخر مما يسبب عدم اتزان اثناء السير

2- بالنسبة للصيانات
حضرتك هتعمل زي المهندس ايهاب ما قال لحضرتك
تغيير كافة الزيوت (زيت محرك - زيت فتيس "سواء عادة او اوتوماتيك" - زيت الباور - زيت الفرامل)
تغيير كافة الفلاتر (فلتر الزيت المحرك - فلتر الهواء - فلتر البنزين - فلتر الغبار او بيسموه فلتر التكييف - فلتر زيت الفتيس في حالة الأوتوماتيك)
تغيير كافة السيور (سير التقسيمة او بيسموه سير الكاتينة - سير الأدارة "دينمو وباور وتكييف" - سير الدينمو في حالة لو الدينمو علي سير لوحده وان كنت اشك لأن فولكس بتعتمد علي سير ادارة واحد لكل الطلمبات)
تغيير البوجيهات والكشف علي اسلاك البوجيهات وتغييرها ان لزم الأمر
تغيير سائل التبريد

Best Practice
التغيير وليس الأضافة بالنسبة للزيوت والسوائل والصيانة دي بيسموها صيانة مستويات
تسجيل كيلومتر التغيير لكل مكون من المكونات السابقة والألتزام بجدول الصيانات زي الكتالوج بمعني ان لو الكيلومتر 100,000 وحضرتك غيرت زيت محرك يبقي تغير الزيت تاني بناء علي توصيات كتالوج الصيانة لو بيقول كل 20,000 يبقي يتغير علي 120,000
وعموما طبعا زيت المحرك بيعتمد ميعاد تغييره علي نوعية الزيت وحالته داخل المحرك من لزوجه ولون ورائحة ولكن باقي الزيوت وسائل التبريد بتتغير بمواعيد ثابتة بحد اقصي سنتين وكيلومتر ثابت

3- زي ماقال المهندس ايهاب ان إن شاء الله بعد الصيانات السابقة العربية هتظبط معاك جدا ولو استمر العيب هتبقي بردو غالبا حاجة بسيطة إن شاء الله بس حضرتك تعملنا تقرير بعد الصيانات

4- الفرامل بتصفر
الفرامل حاجة من اتنين مالهمش تالت
يا التيل ودة امره سهل
يا الطنابير وبردو إن شاء الله امرها سهل
Best Practice
الكشف علي الطنابير وحالة التيل قبل التغيير لأن لو الطنابير حالتها سيئة يبقي هتبوظ التيل الجديد في اقل من 1000 كم
واعتقد انها هتظبط معاك نوعا ما لو فعلا خدت الهوا بتاعها ودة اجراء في غاية السهولة اي ميكانيكي بيعمله في ثانية وبردو لما تغير زيت الفرامل وطبعا إن شاء الله هيبقي Dot4 (دة رمز وليس نوع بيرمز لدرجات لزوجة وخصائص معينة للزيت وتقريبا كل عربيات فولكس متوافقة مع هذه الدرجة ابتداء من سنة 97)


5- الدريكسيون
احتمال يكون في اختناق في احد مواسير الزيت بتاعة ضغط زيت الباور
Best Practice
أكشف علي مستوي الزيت
اكشف عند اي عفشجي او ميكانيكي علي المواسير الضغط والخراطيم عموما
اكشف بردو عند الميكانيكي علي لاكور ماسورة ضغط الزيت
وبردو إن شاء الله هتظبط معاك لما تغير زيت الباور والأفضل تجيب زيت فولكس ب250 جنيه او تجيب الزيت الأبيض بتاع الباور ماركة جانك Junck (وليس الأحمر بتاع الفتيس الأوتوماتيك) ب55 العلبة الصغيرة "اعتقد 400 مل" وإن شاء الله هتكون كافيه جدا
ودي صورة العبوة





6- اعادة التكويد
اعتقد فعلا انها كابلات بطارية ويجب الأسراع في حل هذه المشكلة اولا
وتشحيمها بعد تركيبها علشان ماتملحش

والله المستعان
،
،

ثانيا
يجب تنظيف البوابة
انا شخصيا نظفت البوابة بتاعة عربيتي بمناديل ورقية ليس اكثر
في طرق كتير للتنظيف
ولكن أأمن حاجة بمناديل ورقية والعربية مبطلة
او تفكها برة العربية وتنظفها بالبنزين

http://www.nilemotors.net/Nile/267500-a.html#post3874060499

ثالثا
تنظيف الرشاشات ودورة البنزين بالكامل
ودي عن طريق الأضافات بتاعة البنزين
انا شخصيا استعملت stp وكانت النتائج رائعة

http://www.nilemotors.net/Nile/278279-stp.html#post3874184940

معدل الأستهلاك قبل استخدام المنظف

200 كم لكل 20 لتر بنزين 92
بمعدل 10 كم للتر الواحد

معدل الأستهلاك بعد استخدام المنظف

الحمد لله بفضل الله العربية دلوقتي مشيت حوالي 186 كم بما يعادل ال12 لتر بنزين 92
بمعدل 15 كم للتر الواحد


اعتقد فرق الأستهلاك يستحق تجربة منظف stp وتكراره إن شاء الله كل تغيير زيت او كل 6000 كم زي ماهما قايلين علي الموقع

والله المستعان
،
،

جرب الحلول دي وانشاء الله مش هتشتكي مرة تانية من الأستهلاك وهتدعيلي لما تلاقي الناس بتشتكي من المحطات والأزمة وانت لو فارم العربية بتفولها كل اسبوع مرة

والله المستعان
،
،

[SYD]

طبعا الصيانات في المشاركة الي فاتت يجب انك تعملها كلها لأنك لسة شاري العربية وماتعرفش الي قبلك كان بيعمل ايه

بالنسبة للزيت
حسب الراحة وموضوع الزيوت قتل بحثا هنا في المنتدي علي المنتدي العام
اشهر انواع الزيوت (ليكوي مولي - فالفولين - فيسكو - كاسترول) انصحك بالمستورد لأن معظم المصري مضروب
الزيت من احد اهم العوامل في استهلاك البنزين

بالنسبة لأستهلاك عربيتي
انا عربيتي 1400 انجيكشن
انت المفروض لو عربيتك مظبوطة 100% الصفيحة تعمل معاك من 300 ل 330 كم

ربنا يوفقك

والله المستعان
،
،

[SYD]

اه
بالنسبة للتفويل
نسيت اقولك

تانك عربيتك 40 لتر اساسي
وفي تانك اضافي (بيقولوا عليه احتياطي) سعة 10 لتر

يعني اجمالي 50 لتر 40 اساسي و10 اضافي

ليه اضافي وليس احتياطي
لأن العربية بتبدأ تسحب من الأضافي قبل الأساسي

لكن لو كان احتياطي كانت سحبت منه بعد ماتخلص الأساسي

لك تحياتي

والله المستعان
،
،

[sherief_cso]

متشكر جداً لإهتمام حضرتك syd و آسف للتأخر في الرد و إن شاء الله هأرد تاني بعد إضافة stp