خايف اشتري الباسات 2014

[shakmak]

السلام عليكم اعضاء المنتدي الكريم

انا معايا في حدود 250,000 جنية كان نفسي في رانجلر بس العين بصيرة واليد قصيرة
وخفت من المستعمل
فقررت اجيب عربية جديدة بتحويشة العمر
عندي كام سؤال:
1-اتكل علي الله اجيب باسات 2014 ولا لسة مشكلة الفتيس موجودة dsg؟
2-حد عندة معلومة باسات 2015 حتنزل امتي علشان مجبش الشكل دة والاقي الجديد نازل عالطول؟
3-لو في اي اقتراحات من حضراتكم لاي عربية تانية في نفس القيمة المادية ياريت تفيدوني؟

شكرا

[Mohamedjetta]

بص حضرتك هي مشاكل الفتيس مش بتظهر ابدا طول ما انت بتسخدمه مانويل او تستخدم s مود و في الاشارات تجيب n وبكده بنسبه 90% مش هتظهر معاك مشاكل
اه بيقولو شكل جديد نازل 2015
انا لو مكانك هبص بصه علي اوبل انسيجنا بس معرفش فيها مشاكل ولا لا وبرضو عندك الجولف 7 روعه روعه
عمتا انا واحد من الناس اللي عندهم عربيه فتيس dsg وعربيتنا ماشيه 109 الف وبدون مشاكل بس تم تغير الكلتشات ع 60 الف فقط ماشاء الله والله واكبر وفيه صاحب منسق قسم فولكس عربيته جيتا 2010 ماشيه 60 الف بدون مشاكل بس بيستخدمه مانويل ماشاء الله والله واكبر
وفيه عضو اسمه كرولا ديستروير عنده جولف 7 2013 ماشيه 27 او 28 الف بدون مشاكل ماشاء الله والله واكبر
اديني قلتلك تجربتي مع الفتيس وتجارب بعض الاعضاء عشان ميجيش حد يلعب في دماغك D:
وفيه عضو تالت عنده باسات 2014 او 2013 وكان هيعمل تقرير عن dsg وكان ماشي بعربيته 30 الف بس هو عمل حادثه واختفي ومش عارفين مش بيظهر ليه

[J A G U A R]

يا باشا بالمبلغ ده متركبش باسات
شوف انسيجنيا او 508

[Ahmed Saad]

بص بلاش الباسات 2014 لأن الشكل الجديد نزل في أوروبا فهينزل إن اجلا اام عاجلا فبكده هتبقى العربيه اتضربت في مقتل من ناحيه السعر وهتبقي العربيه شكل قديم من رأيي شوف الاوكتافيا a7 أعلى فئه وبرضه الاوكتافيا من نفس العائله +أنها سوقها حلو في البيع ومطلوبه والشكل لسه جديد فمش قبل 5 سنين على الأقل انها يتغير شكلها ده غير ان الباسات الجديده لو نزلت هتنزل غاليه لأنها أكبر حجما من 2014 ومتطوره عنها وشكلها من جوه وبره مختلفه فهتبقي أغلى بمبلغ مش قليل وهذا رأيي الشخصي المتواضع وننتظر رأى باقي الأعضاء لأخذ الآراء لتبقى الصوره واضحه أمامك

[mostafa3000]

رايئ تبعد عن الفتيس dsg
ولو تلاحظ هتلاقي كل اللي معاة الفتيس دة يقول لك أنا عامل كام الف والمشكلة ماظهرتش
يبقي اية اللي يخلي الواحد يفضل عايش في قلق ومستني مصيبة
او يبقي مضطر يسوق علي الموود المانيول
ادامك البيجو 508
او الاوكتافيا الفئة التانية

[Mohamedjetta]

رايئ تبعد عن الفتيس dsg
ولو تلاحظ هتلاقي كل اللي معاة الفتيس دة يقول لك أنا عامل كام الف والمشكلة ماظهرتش
يبقي اية اللي يخلي الواحد يفضل عايش في قلق ومستني مصيبة
او يبقي مضطر يسوق علي الموود المانيول
ادامك البيجو 508
او الاوكتافيا الفئة التانية

ههههههههه ما الواحد بيقول عشان يثبت ان الفتيس مفهوش مشاكل امال ايه اللي هيثبت ان الفتيس ده مفهوش مشاكل
انا برضو لو كلمت الراجل قولتلو عندك انسيجنا بس مردتش اقولو علي البيجو عشان مقرف في كهربته

[hany63]

لو ركبت بيجو ٥٠٨ مش هتعرف تركب عربيه تانيه
كان معايا باسات Tsi و بصرف النظر عن الفتيس البيجو تتفوق كثبات في الملفات و عفشه انعم و افخم و اوسع و موتور اقوى و فتيس ناعم و ذكي
و امكانيات اعلى في فئه البيزلاين

[Mohamedjetta]

لو ركبت بيجو ٥٠٨ مش هتعرف تركب عربيه تانيه
كان معايا باسات Tsi و بصرف النظر عن الفتيس البيجو تتفوق كثبات في الملفات و عفشه انعم و افخم و اوسع و موتور اقوى و فتيس ناعم و ذكي
و امكانيات اعلى في فئه البيزلاين

مفيش تقرير يا استاذ هاني وايه عيوب العربيه ؟ وهل فعلا البيجو مقرف زي ما اعرف لان كنت اعرف واحد معاه c4 وطلعت عينه في الكهربا

[Land_Cruiser]

ال 508 ما شاء الله جميله قلبا و قالبا يعني من العربيات ال قليله اللي امكانياتها عاليه ميكانيكا و كمالياتها كتير و شكلها الخارجي تحفه فنيه كمان و ارشحها اكيد لو مش ناوي تبيع قريب اما الاوكتافيا فهي تعتبر الاختيار ال مضمون يعني امكانياتها معروفه و ماسكه سعر عند البيع و الجديده فتيسها مش DSG . انا لو باختار لنفسي هاروح للبيجو 508 و ممكن تجرب تقعد فيها باختصار و انت هتفهم قصدي ثم يليها ال اوكتافيا.

الباسات موضوع الشكل اللي هيتغير ده امر وارد زي ما الزملاء قالوا لحضرتك و موضوع الفتيس يخلونا نفكر الف مره يعني ايه اللي يجبرني أراهن بالفلوس علي عربيه و افضل كل ما أجي أركبها ابقي قلقان و متوتر و حاطط أيدي علي قلبي لحسن تعملها معايا و لو ما عملتهاش يبقي ده اللي مش طبيعي و اقعد اخبي علي الناس ل تتحسد و لا حاجه و أشيل هم العربيه لما تخرج من الضمان هابقي أتصرف ازاي. يعني في الاخر كأني اشتريت مستعمل قديم كمان مش مضمون و لا يمكن الاعتماد عليه طيب علي ايه وجع القلب ده كله ؟

[hany63]

مفيش تقرير يا استاذ هاني وايه عيوب العربيه ؟ وهل فعلا البيجو مقرف زي ما اعرف لان كنت اعرف واحد معاه c4 وطلعت عينه في الكهربا

واضح ان حضرتك مش بتقلب كويس في الاقسام التانيه
ده تقرير متثبت عنها بقاله حوالي سنتين و بيني و بينك فكرته بيبالغ شويه بس فعلا كل كلمه فيه في محلها
مع الاخذ في الاعتبار ان الموتور من ٢٠١٤ بقت قوته ١٦٣ حصان

http://www.nilemotors.net/Nile/291613-508.html

و العربيه تقدر تقول انها شياكة الفرنساوي بنكهه المانيه موتور انتاج مشترك مع بي ام و فتيس سيستم بورش

و عندك حق ان معظم الفرنساوي اقل من الالماني بس البيجو تحديدا عندها موديلات كويسه زي ال ٤٠٦ و حاليا ال ٥٠٨
زي برضه ما فولكس كان عندها الباراتي و البيونتر اللي في رائيي ملهومش علاقه بالالماني

[Astra200]

بيجو 508 -------- وانسي الكلام اللي بيتقال عن بيجو ---- مع البيجو الجديد في نقلة لايام بيجو زمان (504 ---505 )

انسي الباسات الفتيس حيعطل حيعطل --- ممكن وانت خارج من المعرض أو بعد 100000 ما حدش عارفله حاجة

البيجو هي أكتر عربية تمنها ارتفع في 2014 ---الباسات زي ما هي

[shakmak]

بجد انا مش عارف اشكركم ازاي على الاهتمام و الردود دي كلها الواحد حاسس انة بجد وسط اخواتة اللي خايفين علي مصلحتة
ربنا يباركلكم
انا حنزل ابص على الاوكتافيا والبيجو و باردو حصلي استخارة و اكيد حكتبلكم عملت اية انشاالله

[amr salah eldin]

لاشيء يتفوق علي الالماني ودة عن تجربة (من حيث الشكل و المضمون) و عموما الباسات 2014 بتنزل حاليا الفئة ال standard ب 239000 ودى تعتبر فاضية تماما وبدون جنوط , علشان الشكل الجديد هينزل مصر غالبا في منتصف 2015 وهيكون سعره مقارب لل cc يعني 360000-370000 علي اقل تقدير .

[Mohamedjetta]

واضح ان حضرتك مش بتقلب كويس في الاقسام التانيه
ده تقرير متثبت عنها بقاله حوالي سنتين و بيني و بينك فكرته بيبالغ شويه بس فعلا كل كلمه فيه في محلها
مع الاخذ في الاعتبار ان الموتور من ٢٠١٤ بقت قوته ١٦٣ حصان

http://www.nilemotors.net/nile/291613-508.html

و العربيه تقدر تقول انها شياكة الفرنساوي بنكهه المانيه موتور انتاج مشترك مع بي ام و فتيس سيستم بورش

و عندك حق ان معظم الفرنساوي اقل من الالماني بس البيجو تحديدا عندها موديلات كويسه زي ال ٤٠٦ و حاليا ال ٥٠٨
زي برضه ما فولكس كان عندها الباراتي و البيونتر اللي في رائيي ملهومش علاقه بالالماني

بسم الله ماشاء الله عربيه روعه انا مرتين اشوفها في الاسكندريه والغريب ان بشوفها في نفس المكان اللي شفتها فيه اول مره ونفس العربيه !!!!!!
مره كنت ماشي في حالي راجع من العجمي ونازل البلد المهم انا وراجع في طريقي بالعربيه الالنترا في حته اسمها وادي القمر وهوب شفت صاروخ ناري طلقه وطلعت البيجو 508 طبعا حاولت اجري وراه بس ملحقتش لانه كان طاير
برضو في نفس المكان بنفس العربيه اللي شفتها بنفس اللون برضو كانت طايره شكلي مليش نصيب اشد ورا العربيه دي مع اني عارفه النتيجه لصالح مين بس يلا اديني اتسلي
نسيت اقول الحته دي عمتا كبير الواحد يمشي فيها ميه و لو ماشي 100 لازم يعمل غرز لان السكه زحمه وع فكره بتاع البيجو كان معدي 120 وعمال يفادي العربيات و الحفر بسم الله ماشاء الله

[hany63]

بسم الله ماشاء الله عربيه روعه انا مرتين اشوفها في الاسكندريه والغريب ان بشوفها في نفس المكان اللي شفتها فيه اول مره ونفس العربيه !!!!!!
مره كنت ماشي في حالي راجع من العجمي ونازل البلد المهم انا وراجع في طريقي بالعربيه الالنترا في حته اسمها وادي القمر وهوب شفت صاروخ ناري طلقه وطلعت البيجو 508 طبعا حاولت اجري وراه بس ملحقتش لانه كان طاير
برضو في نفس المكان بنفس العربيه اللي شفتها بنفس اللون برضو كانت طايره شكلي مليش نصيب اشد ورا العربيه دي مع اني عارفه النتيجه لصالح مين بس يلا اديني اتسلي
نسيت اقول الحته دي عمتا كبير الواحد يمشي فيها ميه و لو ماشي 100 لازم يعمل غرز لان السكه زحمه وع فكره بتاع البيجو كان معدي 120 وعمال يفادي العربيات و الحفر بسم الله ماشاء الله

انت فعلا اتكلمت عن اكتر ميزتين في العربيه قوتها و سحبها على الطريق و انها بتاخد الغرز بسهوله و رشاقه رغم ان ده مش المتوقع لعربيه بالحجم و الارتفاع ده و انا كنت فاكر ان الغرزه لازم تتاخد على مرحلتين لقيتها في منتهى السلاسه عشان حتة السحب و القدره على المناوره
كنت رايح مشوار مع اختي و بالمناسبه سواقتها عنيفه و بتشد جامد هيا معاها اوكتافيا a5 مانيوال و دي عربيه قويه على فكره و انا كنت بالبيجو المهم حبت توريني ان الاوكتافيا هتحط عليها و سبتها قدامي بمزاجي لحد ما الطريق بقى رايق في نفق الثوره و هيا قدامي بتجري بمسافه على الشمال و انا جاي من ورا في اليمين اول ما دوست زياده على البنزين حاجه بسيطه مفيش ثانيتين بالعدد البيجو عدت من جنبها زي الاعصار بعد ما وصلنا بتقول لي انت ولا ما تكون راكب صاروخ مع العلم ان الار بي ام معداش ال ٣٠٠٠ لفه