عايز اشتري الفاروميو 156 انصحوني

[negmfire]

بسم الله الرحمن الرحيم
عايز اشتري الفاروميو 156 و في واحدة قدامي نضيفة قوي موديل 2003
بس كل الناس بتحذرني من العربية دي بيقولو مالهاش قطع غيار
و اعطالها رخمة و كتيرة و محدش بيفهم فيها مع اني شايفها
جامدة جدا (( انصحوني ))

[ahmedbibo]

هيا قطع غيارها غاليه يا باشا بس ديه زى البى ام و المرسيدس متقلش عنهم ومين قال ان اعطالها رخمه غير لو متهانه ديه الفا روميو يا باشا

بس سعرها كام عشان سعرها هو الى بيحدد الحاله

بس سيبك من كلام التجار و الصنيعيه و الميكانيكيه

الى شغال فى هيونداى هيقولك اشترى هيونداى و بتاع عشان يصلحها والى بيشتغل فى الدايو هيقولك اشترى دايو

بس سيبك من الكلام ده كله لو هتقدر عليها يبقى كويسه جدا

لو مش هتقدر عليها ممكن تشترى اودى a3 نفس قطع الجولف

ديه العربيات المميزه

[abdelmessih67]

الاخ الفاضل نجم

الالفاروميو 156 عربية فوق فوق الممتازة و أنا دايما كنت باشوفها عند الميكانيكي بتاعي هي و ال 146 و كان نفسي فيها لكن لقيت سعرها بيعدي ال 60 الف فقلت أجيب ال 146 لقيتها نادرة جدا و مش منتشرة .

العربية قطع غيارها موجودة كلها عند الكيلاني و يوسف لكن اسعار قطع غيارها غالية جدا تقريبا زي اسعار الفيات الزيرو اللينيا و البرافو يعني على ما اتذكر كان المساعد الواحد الامامي بحوالي 700 جنيه و الرادياتير ب 1600 جنيه و طقم التيل الامامي ب 350 جنيه و دي مثلا حوالي من ضعف الى ثلاثة اضعاف الفيات تمبرا فأخترت التمبرا لانها على قدر امكانياتي .

عارف يا أخ نجم مشكلة الالفاروميو الوحيدة برأيي ليس في غلو قطع غيارها لانها معمرة و ثمنها فيها يعني تركب القطع و تنساها مش كل شوية تقعد تغير و لكن مشكلتها في عدم انتشارها و في صعوبة بيعها مستقبلا .

يعني هي عربية روعة و اعتمادية و فاخرة بكل معنى الكلمة لكن هل لو قعدت معاك 15 أو 20 سنة ربنا يديك الصحة و أصبح عمر العربية 25 سنة أو 30 سنة و مش منتشرة و ما حدش بيجيبها كثير هل هتعرف تبيعها بسهولة و ثمن كويس لو حبيت تحدثها ؟؟؟؟؟؟؟؟؟؟؟؟؟؟؟؟؟؟؟؟

يعني لو رحت سوق المستعمل كام عربية الفاروميو بتشوفهم من السبعينيات و الثمانينيات ؟؟؟؟؟؟؟؟؟؟؟؟؟؟؟؟؟؟

[heshamzaky]

أزيك يا باشا طبعا الاستاذ عبد المسيح رد و طبعا كلامة فوق الممتاز بص انا معايا تمبرا و سألت عن قطع غيار الافا روميو الاستيراد الراجل الى بتعامل معاة امين و انا شوفت قطع غيار الالفا عندة و سألتة قالى خليك فى التمبرا قطع غيارها عزيزة شوية و انت حا تبقى مزنوق فى قطعة الغيار فممكن ان تدفع كتير علشان تخلص بس هية كعربية لا غبار عليها بس صيانتها متعبة دة كلام الصنايعية و مش بيحبو يشتغلو فيها بتاخد و قت شوية فى الاصلاح كل حاجة مخدمة مع قطعة أخرى

[negmfire]

بجد ربنا يخليكم علي الافادة و هي معروضة علي ب62000 و ماشية 84000 كم ىاية رايكم اتوكل علي الله

[ahmedbibo]

لو هتقدر على قطع غيارها و مصريفها يبقى طبعا اكشف عليها كويس جدا عشان الى بيبع عربيه زى ديه ممكن يكون فيها حاجه
ثانيا زى ما بقولك العربيه زى المرسيدس و البى ام و الاودى متقلش عنهم فى حكايه الصيانه و قطع الغيار فى الاسعار بس اكتر من ممتازه بصراحه و تحط فيها الحاجه وتنساها وعلى فكره هيا سعرها قليل شويه بس زى ما بقولك اكشف كويس جدا و خد ميكانيكى متخصص ذات ثقه عشان الحاجات ديه بتبقى حاجاتها غاليه يا تجيب حاجه نضيفه يا متجبش خالص

[احمد فهمى]

بسم الله الرحمن الرحيم
عايز اشتري الفاروميو 156 و في واحدة قدامي نضيفة قوي موديل 2003
بس كل الناس بتحذرني من العربية دي بيقولو مالهاش قطع غيار
و اعطالها رخمة و كتيرة و محدش بيفهم فيها مع اني شايفها
جامدة جدا (( انصحوني ))

سعر هايل على الكيلومتر ده توكل على الله قطع غيار غاليه نعم بس ايه من الجديد قطع غيارو رغيص؟؟ اسأل على قطع غيار الياريس او الكورولا هتشترى الفا مع العلم هى تتقارن بمرسيدس وبى ام وكفايه التميز ده لى تمن وملهاش اعطال عكس الأمانى كمان توكل على الله

[sonybony]

لو في حد معاه العربيه ده في المنتدي يا ريت يفيد اللي عايز يشتري والله الموفق بس هي عربيه حلم بس حط في دماغك ان اللي بيشتريها هو اللي غاويها يعني زبونها مش كتير للاسف بس هتعمل ايه السوق المصري اقل ما يوصف انه سوق غبي اللي ينجح الصيني والكوري علي حساب ماركات محترمه جداااا

[damasry]

http://www.nilemotors.net/Nile/53691-a.html