خلى بالكم 128 بتغيرررررررررررر!!!!!!

[memononos]

السلام عليكم ورحمه الله

ندحل فى المهم انا خطوبتى كانت امبارح عقبال عندكم المهم روحنا على بيت العروسه و كنا الوالد والوالده و انا طبعا +عربيتى 128
المهم كان المشوار من عين شمس للمهندسين طبعا ركبنا عربيتى 128 والطريق كان ذحمه جدا المهم المشاور خد مننا حوالى ساعه ونص تقريبا لحد بيت العروسه
وصلنا الساعه 9.15 تقريبا اعدنا مع اهل العروسه نقرا الفاتحه لحد الساعه 11.30 تقريبا
بعد ما اتفقنا ونازلين بقى ركبنا العربيه بسم الله الرحمن الرحيم
هات مرشدين تمام هات الاول مفيش مور هات الاول مفيشهات الاول ابدا وطبعا العربيه لازم تحينى فى يوم زى ده
المهم انا علشان الم الموقف قدام اهل العروسه قمت قارص بنزين وطلعت على الغيار الثالث امشى بس من قدام البيت وبعد كده اولع فيها بس امشى
المهم مشيت على الثالث وصلت لحد شارع جامعه الدول
وكانت الساعه بقت 12
المهم نسال على ميكانيكى يجى ينجدنا من الموقف الزفت ده مفيش ....
اعمل ايه اعمل ايه قمت ندهت لسواق ميكروباص كان وقف المهم جيه اعد يبص كده ويقولى هات غيار ومور المهم فى الاخر قالى انا اكتشفت المشكله منين قلنا له ها منين
قام قالى تعالى كده يا استاذ قلت له ها قالى بص وشاورى على عمود الكوبلن وقالى بوص كده بيض الفتيس فقص
قصدى بيض الفتيس ملص قلت يادى ا لليله الطين

[memononos]

المهم انا اتخنقت ودمى فار قمت قلعت القميص
وقمت رفعت العربيه ونزلت تحتها وطلعت الزراديه و الولاعه ام كشاف مهمه جدا جدا جدا نصيحه منى الولاعه دى رغم انها ثمنها 2 جنيه بس لاكن بجد لا تقل عن الطفايه اهميه
المهم اعدت ابص على عمود الفتيس من تحت من اول العصايه لحد الفتيس ملقتش حاجه قمت قلت لوالدى ادى غيار ادى غيار تمام مور تمام لاحظت حاجه بقى لاحظت ان عصايه الفتيس من تحت متوصله فى الفتيس بحاجه كده شبه معلقه الاكل بس كان فى بقى زى معلقتين كده راكبين فوق بعض وفى بينهم حته جلبه وملحومين فى بعض المهم انا لاحظت ان لما والدى كان بيدى الغيار الاول المعلقه دى كانت متفسخه من بعضها بس كان مربوطه على شعره المهم طلعت من تحت العربيه ببص فى الساعه لقيتها بقت 1 وطبعا اعدت افكر افكر اربطها ازاى مفيش حل غير سلك وانا كنت راكن تحت الكوبرى المهم اعدت ادور فى الزباله الى تحت الكوبرى سورى فى الاخر لقيت قفص فاكه قمت خدت منه السلك الى فيه كله وبرمته فى بعضه وقمت نزلت تحت العربيه واعدت الف على المعلقتين علشان اربطهم فى بعض المهم بقت الساعه حوالى 1.40 دقيقه
دور هات الاول جابت الاول طبعا انا كن هطير من الفرحه ركبنا هوب يلا طير على البيت
وصلنا لحد شارع رمسيس جنب نادى الشبان المسلمين وطبعا كنا عطشانين جدا نزلت املى ازازه ميه بعد ما مليت الازازه وشربنا وغسلت ايدى ووشى
المهم جى بدى الاول مفيش اول مور ادى الثانى مفيش تانى طب الثالت مفيش ... قمت شديت عصايه الفتيس كده بايدى لقيت الفتيس كله طلع فى ايدى
نزلت ببص تحت لقيت نص عمود الفتيس من تحت مدلدل على الارض
طبعا والدى نزل وراح بص على اى جنب او جراج نسيب العربيه فيه ونبقى نرجعلها الصبح بعد ما ظرهت علامات الياس على وشه هو وامى
طبعا انا اتخنقت جدا وقلت ابدا هنروح بالعربيه يعنى هنروح بيها وقمت دورت على اى حاجه اربط بيها الفتيس ببعضه من تحت ملقتش غير حته دوبارا بتاعه شوال على جنب قمت رفعت العربيه نزلت تحتها وقمت اعدت الف الف الف الف الدوبارا مع حته السلك المه الساعه وصلت 2.30 دور هات اول مفيش طب ثانى مفيش طب ثالث فيه
فضلت ماشى على الثالث من رمسيس لحد دير الملاك وصولنا لشارع الخليج المصرى وصولا للبيت والحمد لله اخيرا الساعه 3بعد نص الليل
ادى قصتى فى ليله خطوبتى مع 128
وعقبال عندكم بس نصيحه منى اى حد كان اعزب ومعاه عربيه 128 ميخدهاش معاه وهو رايح يخطب لحسن اتضحلى ان العربيه دى بتغير
وكل سنه وانتو طيبين ورمضان كريم

[nab!l]

ههههههههههههههههههههههههههههههههههههههههههههههههه
والله انت خلتنى اضحك بصوت
يسعدنى اكون اول المهنئين ع الخطوبه
ورمضان كريم
بس انا لو مكانك كنت سبتها ومشيت من الاول

[hugan]

مش مهم الف عربيه 28
مبروك الخطوبه
اظن ده اسمه حشو الاتياش لانه حصل معايا نفس الموقف بعربيه 27 والعصايه خرجت في ايدي وسواق تاكسي ربطها بسلكه لحد ما رحت للميكانيكي بتاعي وعرفت بعد كده ان الحشو ده هو اللي ماسك العصايه بالتيش اللي بينقل الغيار للفتيس
وفي الاخير مش مهم العربيه
مبوك الخطوبه

[ahmdmagdy]

مبروك ع الخطوبه و كويس معملتهاش معاك و انت رايح للعروسه

[yoko]

مبروك يا باشا على الخطوبة وهي ال128 كده زي الفل في المشاوير الي مش مهمة وتيجي في المهم وتقل بأصلها!!!
أنا عملت حاجة فيه وعمري ما هنساها جابت مستر فرامل وأنا في حلوان ورجعت بيها لحد الحرفين (جسر السويس) من غير فرامل
وقبل ما أسافر بكام يوم ذراع الأكسيراتير إتكسر الساعة 1 بليل في روكسي وعملته بسلكه حديد ووصلت بيها للبيت وميحللهاش تقطع سلك الدبرياج غير الساعة 2 بليل

[SeiffoZ]

مبرووووووووووووك ...

الحقيقة موقف كوميدى جدا جدا جدا ... معلش ...

بس إوعى تأخدها يوم الفرح ... هههه

[blazer]

ألف مبروووووووووك على الخطوبه
فدا العروسه يعم 1000 عربيه 128 :d:d
المهم اوعى تقولها على اللى حصل لتقوللك العربيه دى نحس و بيعها

[Eng_Mostafa_89]

ههههههههههههههههههههههههههههههههههههههه
ال128 طول عمرها اصيلة فى المشاوير دى
واحد قريبى عنده عربية لنسر 2007 ووالدة عندة عربية 128 يوم فرحة قفلت معاه يوجب مع ابوة وهو بياخد العروسة من الكوفير وقلة خد انت ماما وخد العربية اللنسر وانا هاخد العروسة واخد ال128 علشان افتكر فيها الذكريات
الناس كلها تقنعة يا ابنى بلاش خليك فى عربيتك ودة لا دى عشرة عمر ولازم اروح بيها الفرح وخلاص قفلت
وقد كان ركب ال128 وطالع فرحان وفى شارع فيصل هووووووووووووووووووووووووووووووووووووووووووب شداد الموتور اللى فوق اتكسر

والف مبروك على الخطوبة

[memononos]

ههههههه الله يبارك فيكم وعقبالكم كلكم الى لسه متجوزش وربنا يعين الى اتجوز ههههههههه
فعلا 128 ماشيه بمزاجها يعنى مثلا الاسبوع الى فات فى عز الحر الصبح خدتها من عين شمس لوسط البلد ومن وسط البلد للمهندسين للسيده عائشه ومن مصر القديمه لكارفوروبعد ما اشترينا شويه عروض من هناك وحملنا مشينا من كارفور للقصر العينى وبعدين للمهندسين
وطول ما انا ماشى فى الطريق عربيات عطلانه بالهبل وحديثه لانسر وكرولا على الدائرى وكانت شغاله زى الفل
معرفش ليه بقى فى المشوار ده بالزات تعمل عملتها السوده دى ...

[Ahmed Anwer]

أنا بقه عكسكم تماما

كان عندي 128 ،،، و مقالبها كتير جدا

بس الصراحة عمرها مكسفتني في موقف محرج أو مشوار مهم

دايما أصيلة في المواقف المهمة ،،،

بس للأمانة و أنا رايح أشتري الشبكة دخلت بيها في عربية شرطة البيجو

و حمايا الله يرحمه خد عربية الشرطة يصلحهالهم عشان يسكت العساكر

و ال 128 كملت مشوارها زي الفل

[Khaled_Nowaihy]

أولاً ألف مبروك على الخطوبة وربنا يتمم بخير ان شاء الله
حكاية ملعقة الفيتيس دى حصلت معايا ... بس لازم يكون لها مقدمات من أول ما تتشرخ ... تلاقى الغيارات والفيتس بتعاكس
يمكن كانت بتعمل كده وانت ما اخدتش بالك
معلهش هى ال 128 اصيلة وبتستحمل برغم اننا بنفترى عليها كتير

[memononos]

أولاً ألف مبروك على الخطوبة وربنا يتمم بخير ان شاء الله
حكاية ملعقة الفيتيس دى حصلت معايا ... بس لازم يكون لها مقدمات من أول ما تتشرخ ... تلاقى الغيارات والفيتس بتعاكس
يمكن كانت بتعمل كده وانت ما اخدتش بالك
معلهش هى ال 128 اصيلة وبتستحمل برغم اننا بنفترى عليها كتير

الله يبارك فيك يا باشا وعقبالك
فعلا المقدمات دى كانت بتظهر كتير بس انا علشان اول عربيه ليا بقالها يدوبك سنه مكنتش عارف موضوع المعلقه ده بس عموما دلوقت انا جبت واحده جديده وديتها خورمين 10 وربطها بمسمارين 10 كنوع من الاحتياط علشان متحصلش تانى
وادينا بنتعلم

[ahmed2y]

الف مبروك على الخطوبة وذكريات بتبقى جميلة لما تفتكرها بعدين

[amrseba]

اولا مبروك الخطوبه

بص كويس اصلا ان العربيه ماشيه ديه بقالها 40 سنه يا باشا شغل تستنى منها ايه انت كنت تأجر عربيه فى المشوار ده او اى مشاوير مع العروسه ولما تتجوز تبقى تصرحها بالواقع المرير هههههههههههههههههههه كل سنه وانت طيب رمضاااااااااااان كريم