قول الحقيقه أشتريت فيات تمبرا ليه؟؟؟

[zago]

السلام عليكم
بعد ما جبت التمبرا بتاعتي واتعرفت على التمبراويه وكبير التمبراويه ( تصفيق حاد للكبير )

وفيه سؤال كان في بالي كنت عايز أسأله ايه اللي خلاكم تشترو عربيه تمبرا؟؟؟؟
و لاقيت موضوع حلو وعجبني عن العربيه النيسان صاحبها بيسأل نفس السؤال
قلت خلاص بقى اعملي موضوع ونشوف الرجاله حيقولو ايه
أبتدي بنفسي..
انا اشتريتها لاني بحبها من لما كنت في 2 ثانوي عشان المدرس اللي كان بيدرسلي كيمياء كان دكتور في الجامعه ومعاه واحده ماشاء الله عليها
ومن فتره كان قدامي (تيبو )زي الفل ومحصلش نصيب للأسف عشان مكنتش عايز ابيع الجيب بتاعتي وكنت عايز التيبو مع الجيب( طبعا بابا قاللي انت بتستهبل )
عشان كده لما لاقيت التمبرا دي للبيع بالسعر ده أشتريتها

كل واحد بقى يقول اشمعنى اختار يشتري فيات تمبرا؟؟؟؟؟؟؟؟؟؟؟؟؟؟

[heshamzaky]

حلو الموضوع يا زاجو هههههههههههههه بص أنا اول ما شفت التمبرا كان معايا ال سوبر فيورا كان وقتها ال سوبر فيورا من 15 الى 17 الف بالكتير جدا و كان ليا واحد قريبى معاة 127 و باعها و جاب التمبرا زيرو سنة 94 تقريبا و كانت ب 85000 جنية عدا و نقدا و ايطالى مش مصرى ايوة 85 الف جنية طبعا لما سوقتها تمردت على ال سوبر فيورا بس فرق السعر دة يا باشا وقتها كان تشترى بية شقة فى مدينة نصر فى الحى العاشر و فضلت العربية دى بالنسبة لى حلم جميل و لما سعرها نزل كانت شركة النصر للسيارات بتبيعها تقريبا ب 64 الف و على فكرة الاكسيل اول ما نزلت كانت تقريبا ب 50 الف جنية زيرو طبعا و لو قعدت أقولك لية فكرت أشريها مش حا تخلص منى ههههههههههههه عموما على السريع كانت العربية بتجيب 170 و 180 كيلو سرعة و تكيف تاتش و عربية ثابتة جدا جدا و وسع ممتاز فى الصالون و الشنطة و لة قلت لك انة مرة الفتيس عندة ترس النقلة التانى باظ قالو لة فى التوكيل الفتيس ب 5000 جنية راح جاب الترس من برة و صلحها ب 100 جنية بس وقتها

[amrseba]

بص انا اشتريت التمبرا

ثبات ممتاز جدا جدا جدا
الاوبشن و العدادات الديجيتال و التكييف التاتش و خلافه
عربيه واسعه جميله و ركوبتها رائعه فيها متعه فى السواقه
عربيه خاماتها الداخليه رائع و اكتر من رائعه
صاجها جااااااامد
و بتمتاز بقوه و صلابه القديم و تكنولوجيا و راحه و نعومه الحديث
عربيه شكلها حلو فى وجهه نظرى
قعدتها مريحه جدا و قليله الاعطال معايا لاحد الان كان فيه فتره بيحصل فيها سخونه كده بس اتحلت و مفيش اى مشكله اخرى العربيه مع الصيانه الدوريه المنتظمه و قطع الغيار النضيفه معمره و قليله الاعطال
و ماتورها قوى و عربيه بتاعت شغل و حماله اسيه و مبتقولش لا ابدا

و فعلا لكا نزلها النصر كانت ب 62 تقريبا و كان ساعتها الانوس انا فاكر عامله 39 الف و الاكسنت 1300 كانت عامله34 الف تقريبا و ال 1500 كان سعرها 50 تقريبا

العربيتين الكورى الى كان اعلى منها فى السعر هما الكيا شوما انا فاكر كانت ب 71 الف و الليجانزا مش فاكر بقى

[reemnabel]

انا اشتريتها عشان واسعه وسعرها مناسب جدا وكل الناس قالت لى بما ان دى اول عربيه اشتريها لازم اشترى حاجه جامده تستحمل انى اتعلم عليها ووكمان شكلها حلو جدا وقطع غيرها نسبيا اسعارها كويسه

[heshamzaky]

و فعلا لكا نزلها النصر كانت ب 62 تقريبا و كان ساعتها الانوس انا فاكر عامله 39 الف و الاكسنت 1300 كانت عامله34 الف تقريبا و ال 1500 كان سعرها 50 تقريبا

العربيتين الكورى الى كان اعلى منها فى السعر هما الكيا شوما انا فاكر كانت ب 71 الف و الليجانزا مش فاكر بقى

عمرو بص يا سيدى الاكسنت لما نزلت كانت ب 39500 بالظبط الاكسنت 1500 سى سى ال 1300 دى ما كانتش لسة نزلت و الانوس برضو ب 40000 جنية و الجوليت كانت ب 44000 و الماتيز كانت ب 29000 و اللوجانزا هههههههههه 950000 جنية و الكيا السيفيا ب 42000 و الشوما كانت ب 55000 جنية دى الاسعار الى انا فاكرها اول 127 نصر اشتراها ابى ل أخويا كانت ب 4300 جنية و الله سنة 83 و كانت بالحجز

[amrseba]

اصل انا عندى مجله اخبار السيارات سنه 98 هدور عليها و اقولك الاسعار

[sohagy]

بصراحة أنا لسة ما اشتريتش بس كلامكم يشجع

[Bonanza]

موضوع حلو يا زاجو

انا اشتريت التمبرا عشان هي كانت افضل الخيارات في رينج السعر ده
كان نفس السعر يجيب اكسنت او اكسيل او سكودا فليشيا او تمبرا
و انا كان اهم حاجة عندي عربية واسعة و باور و تكييف
و عشان هي احسن حاجة في الحاجات دي جبتها
بس بعديها بشهر اخويا جاب فيكترا 94 بنفس رينج السعر تقريبا
لما تيجي تقارن بين التمبرا و الفيكترا 94 من حيث اداء العربية و موتورها و سرعتها و ثباتها
هاتحس انك راكب تكتك جنب الفيكترا
بسم الله ماشاء الله عليها
بس ده لا يمنع ان التمبرا عربية ممتازة بس اقل طبعا من الفيكترا

[JUVENTUS]

اشتريتها لان التمبرا من العربيات النادرة اللي حققت اللي كنت بفكر فيه
1 عاوز عربية ناعمة و مريحة و فيها تكييف و باور و سنتر لوك و ازاز كهربة
2 حمالة قسية و صاجها قوي و صيانتها غير مكلفة
3 سعرها يكون مناسب
لو شفنا رقم 1 متوفر في العربيات الجديدة و لكن مفيهاش 2 و 3
لو شفنا رقو 2 متوفر في العربيات القديمة و لكن مفيهاش 1
لو شفنا رقم 3 متوفر في العربيات القديمة و لكن مفيهاش 1
و انا صراحة كمان شايف ان العربية الوحيدة اللي تستاهل سعرها في مصر هي الفيات تمبرا اما الباقي سعره مبالغ فيه و خاصة الكوري

[heshamzaky]

اسامة ازيك يا باشا بص ب النسبة للفيكترا واحد صديقى جاب فيكترا ال 2000 سى سى و كان طاير بيها و هى عربية حلوة بس عارف هو لما اشتراها كانت ب 45 الف او اكتر شوية عارف بعد كذا سنة قالى اية انة ندم برغم كل التحذيرات من مصاريف العربية لانة بيشترى كلة جديد فى جديد و باعها ب 30 الف جنية و كان صارف عليها فى الفترة الى ركبها فيها اكتر من 15 الف جنية هههههههههههه

[Bonanza]

يا اتش انا عاوز اقولك اني راشق مع اخويا في اي مشوار تصليح لعربيتة
هو بيروح الحرفيين علي طول
والله العظيم و انا صايم اهو
قطع الغيار اللي هو بيجيبها استيراد ارخص من اللي احنا بنجيبها للتمبرا
لا وايه كمان
الحرفيين فيها محلات قطع غيار استيراد بالهبل للاوبل
و عمره ما دور علي حاجة و مالقاهاش هناك
انا كنت بقوله نفس الكلام بتاع قطع غيار الالماني غالي و محدش بيفهم فيه و مش موجود و الكلام ده
بس بعد التجربة ... انسي
الحرفين فاهمين اوي فيها و قطع الغيار الاستيراد فيها حاجات ارخص من عندنا
و بعيدن حتي لو صرف عليها اكتر شوية
الالماني بصراحة فرق كبير

[heshamzaky]

يا اتش انا عاوز اقولك اني راشق مع اخويا في اي مشوار تصليح لعربيتة
هو بيروح الحرفيين علي طول
والله العظيم و انا صايم اهو
قطع الغيار اللي هو بيجيبها استيراد ارخص من اللي احنا بنجيبها للتمبرا
لا وايه كمان
الحرفيين فيها محلات قطع غيار استيراد بالهبل للاوبل
و عمره ما دور علي حاجة و مالقاهاش هناك
انا كنت بقوله نفس الكلام بتاع قطع غيار الالماني غالي و محدش بيفهم فيه و مش موجود و الكلام ده
بس بعد التجربة ... انسي
الحرفين فاهمين اوي فيها و قطع الغيار الاستيراد فيها حاجات ارخص من عندنا
و بعيدن حتي لو صرف عليها اكتر شوية
الالماني بصراحة فرق كبير

واثق تماما فى كلامك و بجد ممكن نتعام حاجة جديدة لية لآ يعنى يا اسامة العربية ب 30 الف تقريبا و قطع غيارها زى التمبرا كدة برجاء الافادة يا معلمى

[ZALABANY]

أنا بأه عمري ما فكرت في التمبرا بس كنت بحب شكل الشاهين جدا وكنت بدور على لانوس
تركيبه غريبه اوي
المهم دوت كتير على لانوس حلوه لحد ما دفعت عربون 500 جنيه في عربية وراحو عليا لأني اكتشفت فيها عيب بعد ما كنت وعدت صاحبتها اني هاشتري المهم لقيت اعلان في الوسيط عده عليه بتاع 3 اسابيع اتصلت بالراجل وحددت معاه ميعاد وبدأت ادور على معلومات عن العربية
وكان للمنتدى الفضل في اختياري للتمبرا وقلت ازاي ما فكرتش فيها وكنت بدور على لانوس واكسيل
والحمد لله عمري ما ندمت على اختياري وحاسس انها افضل اختيار باقل سعر فعلا
تكييف باور زجاج كهرباء ثبات ما شاء الله ركوبه مريحة سفر ما بتقولش لا عربية ما شاء الله عليها ربنا يحفظها ويبارك فيها ويبارك لكل واحد في عربيته

[heshamzaky]

برافو يا زلبانى ههههههههههههههههههههههههههههه

[Bonanza]

هشام باشا هي مش بـ 30000 طبعا هاتبقي مشنشة علي الاخر و محتاج شغل كتير
انت ممكن تستلقطلك واحده حلوة من اول 34 او 35
بس ادفع بقي و انت مطمن والله
باور و سنتر و زجاج كهرباء و تكييف و تابلوة انيق و العربية واسعة من جوة ( بس مش اوسع من التمبرا )
بس تعالي بقي علي الطريق و حدث ولا حرج
ماشاء الله
اخويا كان بعربيته و واحد صاحبي بعربيته اوكتافيا a 5 2009 و الله اخويا سحله وراه 190 يا معلم و الاوكتافيا مش عارف يخرج و الفيكترا ثبات التنين و اهو اتنين الماني مع بعض
اه في فرق ان الفيكترا 2000 سي سي و الاوكتافيا 1600 ، بس في فرق الزمن بردو لصالح الاوكتافيا
قولي بقي التمبرا تقدر تعمل ايه جنب الوحش ده
(بالنوسبة ) لقطع الغيار بقي للفيكترا
اخويا ركب طقم دبرياج كامل و جديد ب 700 جنيه الماني
علبة دركسيون استيراد 300 جنيه
ده غير الحاجات اللي انا مش فاكرها