صرفت على سيارتى فوق تمنها 11 ألف ج هل انا مجنون ؟رأيك مطلوب

[misoalex]

انا رأى اعملها سمكره ودوكو بس فى الحنين

روح للعقيد خالد فى الحرفين ولبتاع الدوكو الى قالك عليه يوكو وهما حيعملولك الموضوع بنضافه وبتكلفه معقوله جدا

وساعتها حيبقى رجعت العربيه زيرو مش حتفكر تبيعها

على فكره انا صرفت على عرببيتى الى يركبنى عرببيه تانيه بس المهم مش صرفت كام المهم انت مرتاح ولالا ومبسوط بأداء العربيه ولالا

الفلوس حتتصرف حتتصرف ولو متصرفتش فى العربيه حتتصرف فى حاجه تانيه

[magid1010]

يا باشا ربنا يباركلك فيها و الله انا جبت واحده اكسيل ب28 و صارف عليها 3000 فى شويه حاجات مساعدي بطاريه سنتر وفرش و حاجات تانيه و برضه بضايق بعد ده كله لما حاجه تبوظ زى السنتلر غيرته عده منه و باظ تانى ما فيش احسن من الجديد لكن اسعار نااااااااااااااااار

[ahmed_belta]

العجوزة عجوزة
في عواجيز بيحوطوا مكياج و ده بروح آخر اليوم
وفي عواجيز بيعملوا عملية تجميل ودي بتعد شويه 6 اشهر سنه ( اللي إنتا عملتو )
بس في الآخر العجوزة عجوزة
مافيش أمل يا ريس
أنا زيك بالظبط كل سنة أصرف مصاريف و العجوزة تبقى سنيوره (( بس للأسف في نظري أنا بس )) بس عجوزة في نظر اللي حواليا
معلش كلام رخم شويا
بس كان لازم أقوله الصراحه العربية تبقة متجدده و زي الفل يجي الشتا و يظهر فيها عيوب كتيره جداً
مش ليك إنتا الكلام بس لناس كتير بتفكر في المستعمل
يعني الواحد يبقى صارف على العربية و ماشي بيها فاكر مافيش زيها في الدنيا ويقابلك واحد يقولك العربية بسم الله ماشاء الله تبيع أقوله افصل يقولي عشرة اتناشر الف جنيه ولا كأنك عملت حاجة
ده كفاية قرف الصنايعية يا راجل

بالنسبة ليك نصيحة مادام صرفت ده كله يبقى كمل عشان تبقى مبسوط
بس عشان تبقة انتا مبسوط
ماحدش هيحس باللي انتا عملته ده كله
أسأل مجرب

[semsem_uno]

معلش انا هقول كلام
انا قلت رأيي و هقول تاني
الجنان هو انه يبيع بعد كل اللي صرفو ده
و يعني ايه كان يجيب عربية تانية ؟؟؟؟؟؟ ماهو بردو كان هيصرف! بتحسسوني انه صارف كل ده 126!!! ديه فيات ريجاتا!!
و يعني ايه في الشتاء العربية هتفرق و هتبقي مقرفة ؟؟ انا الحمد لله عربيتي اونو موديل 93 صيف شتا دوستين بنزين قبل التدوير بعد ركنة تدوم بال5 و 6 ايام تدور من اول تكة! و متنسوش ان الفيات اوروبي يعني بلدهم اصلا بتمطر تلج و العربيات معمولة اساسا عالجو ده !
و لو بتقولو ان برده بعد كل ده ان العربيات القديمة بردة قديمة يبقي ياريت تشوفو الفيديوهات ديه و اتعلمو

YouTube - Fiat 131 Mirafiori Sport

YouTube - Reunion Club del Regatta, mi ex regattin

YouTube - Uno Turbo Club Italia.mp4

العربية زي الفل للي يهتم بيها مش يستهلكها و خلاص يرميها لغيره يجددها

[ainshouka]

نفس اللى انت مريت بيه مر بيه والدى من قبلك
العربية كانت ارجنتا
وكل الحاجات اللى انت غيرتها هو كمان مغيرها بس على فترات انت غيرتها تقريبا مرة واحدة

العربية اتحسنت كتير عن زمان وحتحس بالفرق فعلا

والحاجات اللى انت عملتها دى حتخليها تعيش معاك خمس او ست سنين مثلا ان شاء الله بس يوم ماتفتح بقها بعد كده افضل شئ انك تبيعها لان خلاص كفاية جدا على عربيات بقالها ماشية 30 سنة انها تكمل تانى حتى لو كانت صاج فابريكة

لان العربيات دى عجزت دا غير قطع غيارها اللى بقى يقل والمضروب بقى مالى البلد

[thedeveloper87]

العجوزة عجوزة
في عواجيز بيحوطوا مكياج و ده بروح آخر اليوم
وفي عواجيز بيعملوا عملية تجميل ودي بتعد شويه 6 اشهر سنه ( اللي إنتا عملتو )
بس في الآخر العجوزة عجوزة

كلام 10/10 ، فعلا دي الحقيقة

هحكيلكم على تجربتي مع المازدا

للأسف لما جيت أشتري عربية كنت عايز أي عربية تحميني من لاآدمية المواصلات ، لأن كان مواصلاتي لشغلي القديم عايز 3 مواصلات رايح ومواصلتين جاي غير إني بمشي شوية حلوين لحد ماوصل للشغل ، فاستعجلت قوي قوي ....

ولما حددت أنا هاخد ايه ، ألا وهي المازدا 323 بناءا على تجربتي ليها قبل ما شتريها ، العربية نفسها زي الفل وناعمة وتمام التمام ، وقلت هتوكل على الله واجيبها

رحت مع صاحبي لميكانيكي مازدا بيقوللي أبويا بيتعامل مع الميكانيكي ده بقاله 25 سنة وراجل أمين وسمعته كويسة ، إلخ.... المهم قلتله عايز عربية حالة كويسة للبيع ودلني على واحد وقال لي العربية دي عشرة على عشرة بس الموتور عايز طقم شنبر بعد سنة... قلتله بكام طقم الشنبر ده ، قال لي ب 400 جنيه ، قلتله زي الفل هتوكل على الله واخدها منه ، واتكلمت مع الراجل والراجل الصراحة قال لي لو عايز ترفعها ارفعها ، قلت له لأ أنا واثق في كلام الميكانيكي (الصراحة أنا مستعجل وعايز أخلص) ... والحمدلله تم البيع وخدتها وكنت طاير بيها من الفرحة...

أول يوم لقيت البطارية نامت ، رحت لبتاع البطاريات قال لي البطارية دي جابت ربع ، قلت له يعني ايه ربع ، قال لي يعني باظت.. رحت جبت بطارية جديدة وعملت عمرة للمارش عند الكهربائي علشان كان صوته مش كويس ، والواد بيفكلي المارش وقعلي خرطوم مياه وخرملي خرطوم بنزين (مش عارف عملها ازاي والله) وطبعا العربية سخنت مني والحمدلله عديت الموقف ده وصلحت العك اللي عمله الواد ده..

تاني أسبوع البوبينة ضربت ، والعربية وقفت بيا في الشارع وغيرتها والميكانيكي جالي وكانت ليلة ....

المهم أول شهر لقيت الحسبة ، بسم الله الرحمن الرحيم 1000 جنيه

مش هطول عليكم ، عانيت من عك الميكانيكية والكهربائية وعانيت من قطع الغيار المضروبة ، وابص ألاقي دافع في العربية بعد سنة ونص 7000 جنيه والعربية ما تجيبش 20 ألف دلوقتي ... طبعا غيرت 3/4 العفشة ، عمرت الموتور ، كاوتشات جديدة ، إلخ...

وبعد كل ده لسه عايزة حاجات كتيير قوي زي طقم دبرياج ، فتيس جديد ، مساعدين ورا ، إلخ

ده غير إن ألاقي الدهان فرقع وألاقي خرابيش كتير ظهرت لوحدها ، بسأل على تكلفة السمكرة والدهان ، ألاقيها هتوصل معايا ل 6000 جنيه :(

ده غير الصالون عايزله 1000 هو كمان :(

عاهدت نفسي ما صرف عليها جنيه كمان وأركنها وأستعمل المواصلات لحد ما ربنا يكرمني وأبعها بحالها كده وخلاص

أبص ألاقي طلع باومة من تحت من عند المقصات ودي لازم تتعمل بأقصى سرعة :(((((


لا إله إلا أنت سبحانك ، إني كنت من الظالمين

[behman]

كنت جايبها بـ 19 الف .. وتمنها بعد الدوكو والسمكرة وكافة المصروفات : 37 الف .
انا حبيت اوضح نقطة الزيرو لسبب .. ان المصاريف دى محاولة منى لتقريب حالتها لحالة ترضينى عنها . احط المفتاح وامشى
وللعلم الحمد لله راضى عنها وهي راضية عنى .. ولله الحمد من قبل ومن بعد .. رأيكم اعمل دوكو وسمكرة وسـروجى ولا اتجاهل الامر
واوفر 7 الالاف ج وتبقى وقعت عليا بـ 30 الف بس " الـ 11 الف اللى صرفتهم + 19 الف تمنها " = 30
حتى وقتنا هذا ؟

اولا المبلغ كتييييييييير علي دوكو و سمكره و سروجي .... بالكتير 3000
ثانيا لما تحب تبيعها تفتكر هاتجيب كام ؟؟
عموما ربنا يوفقك و يباركلك فيها

[mohamedmmm2]

انا عاوز اوضحلك وجهه نظر والله اعلم يعنى... انا كان معايا سيينا موديل 2001 وكانت عامله 211000 كيلو وبعتها من سنتين كدة ب 35000 جنيه (كانت 1400) وكان دهانها تمام وماكانتش محتاجه شلن مصاريف.. دانا حتى كنت عامل السرفيس (تيل وفلاتر وزيت وخلافه)
يعنى انت اشتريت عربيه موديل كام وتمانين وصرفت عليها صرف يخليك تركب حاجه مش هاقول تسعينات يا عم هاقوللك الفينات زى الفيات برافا والسيينا والستروين اكسارا والبيجو 206 و البولو وخلافه.. وكل العربيات اللى انا قلتهالك دى عربيات محترمه وفعلا كويسه..
بس انا ممكن ابقى زيك لو بعمل الحاجات واحدة واحدة يعنى مش معايا كل المبلغ... بس واضح انك صرفت كله مرة واحدة.. وانا رايى انك استغليت اوى و بصراحه من غير زعل العربيه ماتساويش كل دة انت غيرت كل حاجه فيها فعلا... الريجاتا عربيه ممتازة وانا بحبها من وانا عيل صغير.. بس انت دلوقتى صرفت كتير جدا فعلا واتجاهلت ان العربيه برضه سعرها مايساويش اللى انت عملته...
وانا لما كان معايا السيينا انا كنت بعرف ازاى اصرف نفسى واجيب احسن حاجه منين يعنى مثلا كنت محتاج اكصدام قبل كدة نزلت الوكاله وجبت واحد ميه ميه ب 100 جنيه وجوز كشافات ب 250 جنيه والله كانوا احلى من الجداد لانى متاكد ان الاكصدام دة الاصلى(بيبان من الليونه)
انا كل قصدى بس انت بتدفع كتير اوى بجد انا لو جبتلى عربيه ريجاتا كهنه و مفحوته انا ممكن اعمل اللى انت عملته وارجعها جديدة بااقل 50%
ملحوظه انا بسوق من 10 سنين وعديت على ال128 واللادا وبنزل مع والدى للصنايعيه من ييجى 15 سنه والناس كلها تعرفنى فى حرفيين حلوان...
وبجد لو محتاج اى مساعدة من اى نوع - بذات فى موضوع الدهان والبارومه دة - قوللى انا ممكن اعلمللك الموضوع دة بتمن اقل كتير من غير ما حد يعمل معايا واجب اصلا..
فكر ولو احتجت مساعدة انا معاك يا كبير

[ahmed4ever29]

la2 la2 dah ktir awy awy awy w malh el golf 3 b 40 alf genaih w zay el foll

[ahmed_mido1889]

نفس الي عملت في عربيتي الفولكس من سنه
والله واحد جاي بيقولي تبيع قولتله لأ
سال الصنيعيه اللي شغالين فيها قالوله ده مش مخلي فيها حاجه متغيرتش
وعمرها ما خزلتني في مشوار ولا في جري

[sonkorzazoue]

شوف لو انته صرفت المصاريف ده علشان تجعلها صالحه لااستخدام الادمي فانته رجل راقي لان الرجاتا اختيار جيد وموفق اما التمبرا عربيه كويسه ووسعه لكن مش عمليه لانها بتسخن جدا لما تشغل التكيف ...فما قمت به خطوه جيده واشجعك عليها فالرجاتا افضل من عربيات كتيره جديده.مبروك عليك