الى الساده مالكى سيارات فيات سيينا

[topmido]

و الله يا حمو مشكلة الفيرنا بالنسبة لي اني مش متقبل شكلها
بس انا حاسس انها أكبر من الأفيو ، مش كدى ؟؟؟
بس و الله انا ممكن أغير رأيي و أفكر في الفيرنا لو هي زي ما انت بتقول كدى
بس الأوبترا ................. صعبة علي أوي :(
هي وصلت كام دلوقت ؟؟؟

[mana9wafaie]

والله يا ميدو انا مش عارف الاوبترا وصلت كام بس هى بصراحة كلو بيشكر فيها بس انا مجربتهاش الصراحة بس مشفتش حد عاب فيها اما عن الفيرنا فا الفيرنا عن تجربة عربية مريحة وال 1600 منها موتور النترا دة غير ان مشاكلها قليلة..وانا اعرف ناس جابت بيها 200 بالوضع الاستندارد يعنى من غير ما يغيرو فى العربية اى حاجة دة غير ان تسارعها رهيييييييييب ملوش حل عشان متورها عفى وجسمها قليل فممكن تشد مع اتخن تخين وانت مطمن....
ولو فكرت فيها بردو هات لون رمادى:p مع زينون فى الفوانيس وزينون فى الفوج لايت العربية هتبقى حاجة تانية :D
واى خدمة انا سهران للصبح او ابعتلى ايميلك ع الخاص
سلام يا باشا

[ESO_POP]

طيب يا شباب انا فيتاوى قديم اوى معايا 132 وعايز اغير وبفكر فى السيينا ال1400 وعايز اعرف ايه نظامها انا معروض عليا واحده كامله رشه بره ب39 كنت عايز اعرف ايه مشاكلها واستهلاكها فى البنزين لان كلنا طبعا عارفين موضوع البنزين
انا بصراحه كنت بفكر فى لانوس ولقيت قدامى السيينا قلت اشوف ايه نظامها يا ريت اى حد يفيدنى فى الموضوع ده لانى عايز انجز فيه بسرعه جدااااااااااا
وبصراحه انا ميال للفيات عن الدايو لانى فيتاوى من ايام 79 (ده الحاج)انما انا فيتاوى من 10 سنين بس
وشكرا جدا يا شباب

[ragab_moustafa]

السلام عليكم ورحمة الله
اولا احب ان اشكر جميع الاخوة على المعلومات القيمة
انا عندى فيات سيينا 1400 رصاصي شاريها من 5 شهور وكانت عاملة 150000 كيلو ومش رشة خوارج ولا دواخل موديل 2002
المهم من اسبوعين لقيت العربية بتدخن شوية وديتها لميكانيكى قالى الموتور خفيف سألت واحد صاحبي قالى بيعها لان العمرة عمرها ما بتظبط تانى مع ان حاجه العمرة بتاعتها رخيصة سألت عليها عند الكيلانى
وعاوز نصيحتكم اعمل العمرة ولا لاء على العلم ان الميكانيكى بيقولى احتمال تبقي طقم شنبر وبس

[Mostafa]

أولا انصحك الاول تروح لحد متخصص تعمل كبس للموتور بالكمبيوتر عشان تتأكد الاول اذا كان الموتور خفيف فعلا ولا لا ...
لان كوم الموتور بيدخن ممكن يكون لانه مش مظبوط .. وممكن يكون فعلا خفيف ...
لو موتور العربيه طلع خفيف ... انصحك تبيع احسن .. لانها فعلا مش هترجع زى ما كانت يا أما هات موتور استيراد كامل احسن
بس عموما .. بلاش تدخل فى موضوع العمره ده خالص ...
كمان انا انصح بالبيع لو كان الموتور خفيف لان لو طلع كده فعلا يبقى العربيه اكيد متهانه .. لان عربيتى السيينا ال1400 القديمه انا عملت بيها من الزيرو لغايه 188 ألف وكانت ما شاء الله زى الفل

[kouriem]

السلام عليكم
اولا احب اشكر كل الاخوه الافاضل علي المعلومات ديه انا عندي سيينا موديل 2000 1600 كنت من فتره فكرت ابيعها و بعدين رجعت في كلامي و قولت اشد العربيه شده تمام سمكره و دوكو و عفشه و فوانيس و كله المهم اني عندي مشكله ازليه و مافيش حد قادر يحلها ان العربيه بتسخن و الميه ما بتنقصش روحت لناس كتير و مافيش تقعد يومين كيويسه و بعدين ترجع تسخن تاني انا اساسا بركب العربيه كل 4 شهور لظروف شغلي بره مصر و كمان كنت الاول لما اشغل التكيف العربيه تبرد لاكن ديلوقتي العكس اشغله تسخن و انا نازل مصر كمان كام يوم إن شاء الله و بيقولوا مصر حر قوي فا لو حد ممكن يدلني علي ميكانيكي كيويس يكون بيفهم قوي بس ما يشتغلنيش علشان انا مابفهمش قوي يبقي كتر خيره
و اسف علي الاطاله
و سلام عليكم

[ahmed1981]

سؤال من واحد كان في يوم من الأيام على وشك شراء سيينا موديل 2003 تقريباً
ولكن منعني من ذلك ما سمعته أن من أشد عيوبها هو ضيق الكنبة الخلفية مثل الشاهين
ولأنه من شروطي الأساسية في أي سيارة هو إتساع الصالون

فهل هذا الكلام عنها حقيقي؟؟؟؟؟؟؟؟؟؟؟؟؟؟؟

[Mostafa]

السلام عليكم..
بص يا كريم باشا .. غالبا المشكله عندك فى موضوع السخونه هوا ريلاى السرعه الثانيه .. دا اللى بيشغل المروحه على السرعه الاعلى لما تسخن او لما تشغل التكييف ...
الريلاى ده غالبا محتاج يتغير وتمنه حوالى 35 جنيه ....
بص .. عليك وعلى مركز فيات اللى عند المطار ... محطه التعاون اللى قدام مدخل المطار القديم .. شغالين فى فيات وألفا روميو بس وبيفهموا فى العربيه جدا ..

[Mostafa]

يعنى يا احمد باشا كنبتها قد كنبه اللانوس تقريبا .. هيا ديقه شويه بس مش للدرجه يعنى :)

[ahmed1981]

يعنى يا احمد باشا كنبتها قد كنبه اللانوس تقريبا .. هيا ديقه شويه بس مش للدرجه يعنى :)

أشكرك على الرد والإفادة
وربنا يباركلكم فيها

[sameh_egy1]

حيراااااااااااان و عاوز رأيكم
الكلام كتير و مش عارف اعمل ايه ؟؟
انا نويت بإذن الله اشتري فيات سينا 2001 - 1400 سي سي ، كاملة بس مانيوال
عامله 89 الف و كانت صيانتها و الكشف في التوكيل

ايه رايكم ؟؟

اخدها و لا بلاش النوع و الموديل ده
ناس تشتكي
وناس مبسوطه و مش عاوزه تفرط فيها !!

عاوز رايكم و بسرعه الله يكرمكم

وطلب اخير عاوز اكتر مميزات فيها و اكتر عيوبها و اسعار الوكيل فيها ايه ؟؟

انا ها خدها بإذن الله علي 41 الف جم ، ايه رايكم ؟؟

[mana9wafaie]

بص يا باشا من الاخر كدة هى العرابية ناعمة وباور جامد وصاج ناشف بس عيوب كتير قدام كدة..
العربية مش معزولة ودة بيخلها تسخن داخل المدينة وتكةون باردة على الطريق ودى مش حلوة لان جوة المدينة ممكن تعدى النص ولو مشغل التكييف بتعلى اوى والتكيف بيكون ضايع والعربية بتهييس وعلى الطريق الطوالى العربية بتبرد اوى والموتور مبيكونش فى درجة الكفائة المطلوبة.
التكيف مش زى الكورى ولا اليابانى خالص يعنى على قدة
ال 1400 مع التكييف بتتكتم بشكل ملحوظ
قطع غيار غالية نسبيا اقصد الحاجات اللى خاصة بيها زى الفوانيس وكدة لاكن الحاجات المشتركة مع الفيات عموما زى الكبالن مثلا فى منها جميع الاسعار ودى ميزة جامدة
عفشتها جامدة وتستحمل الشوارع المكسرة
خد بالك من البرومة عشان العربية مش معالجة ضد الصدأ وكتير منها بتكون البرومة وكلاها
ثباتها حلو مش وحش بس مع السرعات العليا مش قد كدة عشان العربية عليا من الارض ودى ميزة رهيبة يعنى مهما كنت محمل معاك ومالى العربية ع الاخر عمرك متحك فى اى مطب مهما كان بس قدام كدة بتخسر الثبات ع السرعات العالية
العربية حلوة فى السفر اوى يعنى بتكون ناعمة وتكيفها بيكون فى افضل حال وشنطتها كبييرة جدااااااااا بدون مبالغة تقريبا ضعف شنطة الانوس
دى تقريبا الحاجات المهمة عن العربية لو فى استفسار انا تحت امرك بس خد بالك من موضوع الحرارة عشان مع ناس كتير جابت وش سلندر بسبب القصة دى..
بس ارجع واقلك ان فى السعر دة هى احسن من غيرها لانها عربية قوية فعلا..
وربنا يوفقك ع الخير ان شاء الله
اخوك محمد

[sameh_egy1]

شكرا يا محمد انا مش عارف حيران بردوا انا معجب بحالتها بس موضوع السخونه و البرومه و التكيف دول مضايقني اوووي :(

طيب رأيكم هي و لا أوبل كورسا 94 من غير كماليات و منيوال

[kouriem]

متشكر يا مصطفي باشا علي الرد بس ممكن تقولي فين بالظبط المكان ده
و متشكر مره تانيه

[emadfk]

بص يا باشا من الاخر كدة هى العربية ناعمة وباور جامد وصاج ناشف
التكيف مش زى الكورى ولا اليابانى لكن مش وحش اهو بيخفف من الحرارة داخل السيارة
ال 1400 مع التكييف بتتكتم بشكل ملحوظ فى الاول و الثانى فقط لكن مع الثالث و الرابع فلة
العربية حلوة فى السفر اوى يعنى بتكون ناعمة وتكيفها بيكون فى افضل حال وشنطتها كبييرة جد جداا
بالنسبة لموضوع الحرارة فهى لم تسخن مطلقا معى من ساعة ما استلمتها فى اغسطس 2000 حتى الان
وذلك لان فى التوكيل قالولى حاجة مهمة جدا و هى لا تفتح قربة المبة الا فى حالة لاحظت ان منسوب المياه قد قل عن المنسوب المطلوب وفى هذه الحالة يفتح فى الصباح الباكر قبل دوران العربية وزيادته بالمياة الخضراء وقفلة كويس ثم تدويرالعربية
ثباتها حلو مش وحش انا سافرت بيها الغردقة على 120 زى الفل
عفشتها جامدة وتستحمل الشوارع المكسرة و العربية عليا عن الارض ودى ميزة رهيبة يعنى مهما كنت محمل معاك ومالى العربية ع الاخر عمرك متحك فى اى مطب مهما كان