اوماترا بتقفل فروعها

[Medo.Malek]

ايوه الحكم للسادة الأعضاء المدير اترفد والمدير اللى فوق اللى فوقه وكذا مدير فى فروع تانية والفروع مقفولة ومش هنصدق الا لما تبقى تتفتح فى نفس الأماكن وبمديرين جدد يبقى ساعتها ممكن نقول ان المديرين الأكبر ضحكوا عليهم بالحجة دى ومشوهم عشان مش عاجبهم شغلهم بدل ما يقولها لهم كده وش وميقتنعوش يستقيلوا
مع ان ا/عزت اللى استاذ غمراوى بيقول عليه ده بقى انا برضه اعرفه شخصيا وشغله خلاهم يرقوه كذا ترقية فجأة بقى وحش وبيترفد وبيجى غيره بعد الترقية بأقل من 3 شهور !!!!

وسمعة التوكيل اللى حضرتك خايف عليها دى لا مؤاخذة بقى يعنى فى ناس اولى تخاف عليها وتبذل مجهود وتسعى فى انقاذ ما يمكن انقاذه !!!



وانا من هنا بقول ياااااااجماااااااااااعة اللى بيفكر يشترى فيات ببساطة جدا مش هقو ل اسألوا حد من هنا !!! روحوا اى مركز صيانة واطلعوا اشربوا قرفة باللبن (اصل دى الحاجة الوحيدة العدلة اللى هناك ) واسألوا الناس اللى موجودة عن رأيهم فى العربية ومش شرط خااااالص تكون معدية 10 الاف ولا 20 الف لا وحياتكو اسألو من قبل 5 الاف كمان عادشى عادشى
واحكموا بنفسكو اظن عدانى العيب وابقوا قابلونى فى المشمش (ولا بلاش المشمش احسن ده بيجى ) لو حد اشترى بعد الفضايح اللى هيعرفها

وبعدين لما حد يشترى عربية بالشىء الفلانى وعادة هيكون مقسطها وسالف عشان يجيبها لو استثنينا بتوع دادى ومامى والمعلقة الدهب يعنى وبياخد قر قد كده على شكلها الخارجى والآخربيتعامل كأنه واقف فى فرن العيش المدعم وكمان المفروض ان لها ضمان هاهاى قال 3 سنين والضمان وهمى اكتبوا كده فى السيرش هنا عالمنتدى ولا اسألوا اى حد معاه العربية ومواقفه على ارض الواقع هو يعنى ايه ضمان ويعنى ايه يمنعك تروح لأى صنايعى بره لحسن تنطرد من جنة الضمان وهو مشغل مهندسين يا مولاى كما خلقتنى ما يجيب مهندسين من ايطاليا معلش بقى


يعنى ايه المهندس بعضمة لسانه يقولك انا اول مرة اشوف كده ومش عارف ده ايه بيتوها بقى كام يوم لما ادور ويقعد يجرب حاجات تبوظ حاجات تانية

ويعنى ايه واحدة عندها اطفال وعربيتها مكملتش 5000 وتانك البنزين مخروم لو حد رمى سجارة تحت العربية تولع هى وعيالها ولفت على مراكز الصيانة كلها اكتر من 3 مرات محدش عارف يحل لها مشكلتها هو ده الضمان ويعنى ايه اصلكو فى مصر مفيش تغيير عربيات لو طلع فيها عيب صناعة الا بطلوع الروح وبعيوب قاتلة هو ده الضمان ويعنى ايه بيقعدوا الناس من 8 ص ل بعد 5 م وعاملين قزاز يبصوا منه عشان يحرقوا دم الناس اللى شايفة ان محدش بيشتغل فى عربياتها والآخر يشتغلوا نص ساعة والناس دى مسافرة من اخر الدنيا ويبيتوهم يصرفوا فنادق عشان ناس بتهرج
والنبى حد يدشدش لهم القزاز ده !!
ويعنى ايه يقول لبنت جاية لوحدها عاملة حادثة هتستلمى 1 ظ وهى جاية من 8 ص هو الموعد ده قرآن عشان ميشتغلش فى عربيتها غير 12.30 يا واد يا دقيق ويسلمها لها 1.30 ومش وراهم زحمة ولا حاجة بس المدير مش موجود وان غاب القط العب يا فار
ويعنى ايه ياخد العربية يجربها من غيرك ويفضل بيها بره ساعتين !!!كان وراه مشوار بقى وبسواقتهم الذفت وكلنا عارفين ان عربية يوكو خبطوها له

وكل ده ولسه مقلتش كل اللى عندى وكفاية عشان بجد جالى غثيان جامد

سمعة ايه يا عم لو خايف عليها متفتحش احسن

لا اله الا الله و لا حول ولا قوة الا بالله

[icehearted girl]

يعنى ايه المهندس بعضمة لسانه يقولك انا اول مرة اشوف كده ومش عارف ده ايه بيتوها بقى كام يوم لما ادور ويقعد يجرب حاجات تبوظ حاجات تانية

ايوا كل محد يحصله مشكله يصوروهاله انه الوحيد من نوعه اللي بيشتكي من الحاجة دي وانها اكسكلوسيف ليه

وكأن فيات دي نزلة مصر اول امبارح بلليل بس

[A.Saad]

مش للدرجة دي .. قرص موديوريتيك كفاية ههههههه
لأ بجد مش للدرجة دي .. أنا عارف ان غبور في منه بلاوي بس بالنسبة لي أنا أتمني انه يروح لغبور برغم مصايبه عمرها ما هتبقي زي أوماترا اللي أنا لسه ماتعاملتش معاهم أصلا بس كرهت اسمها من كلامكو ..... علي الأقل قوي قوي يعني أولا مبيعات العربية هتزيد جدا ثانيا توافر قطع الغيار هيبقي أحسن أكيد ثالثا الأسعار غير أوماترا طبعا والمصنعية عند غبور مش بلأسعار المجنونة بتاعة أوماترا

شوفه عامل ايه فى المازدا

[popcorn2011]

انا واحد من الناس اللي فعلا كانت مخنوقه من اوماترا بخصوص مشاكل موجوده كتير في الصيانه والمشاكل اللي ممكن تحصل لكن انا حسيت باختلاف تام في الكام شهر اللي فاتوا

الناس بقت مهتمه جدا انها تدي احسن شغل للعميل ، وترضيه وفيه ناس بتكلمهم من هناك كل فتره تشوف لو فيه حاجه تعباك في العربيه وتحددلك ميعاد تروح تصلحها

وفيه ناس هناك متعاونه جدا امثال "الاستاذ احمد سعد " انا بحس اني لما بروح هناك انه ناقص يعملك العربيه بنفسه من كتر ما بيبقي مديك اهتمام


انا لسه واخد عربيتي انبارح كنت عامل حادثه بسيطه (الحمد لله)
ماشاء الله علي الدهان والسمكره كان الحاجات خارجه من المصنع


انا اكتر حاجه كنت بحبها في اوماترا هيا ان كل او معظم قطع الغيار اصلي (يعني تحس ان لما حاجه تبوظ انك ممكن تجيب زيها بالظبط بنفس الكفاءه من غير ماتزعل)


دلوقتي انا اشهد ان اسؤء قسم في التوكيل ( السمكره والدهان ) بقي احسن قسم بناء علي تجربه شخصيه

[Samah AbdAllah]

هو حضرتك داخل ترفع موضوعات قديمة
وتعمل اغراق بتكرار نفس الشماركة
بهدف الدفاع عن اوماترا ؟
ياريت حضرتك تراجع القواعد اللى بتمنع الاغراق والدعاية

[ayman2]

هو حضرتك داخل ترفع موضوعات قديمة
وتعمل اغراق بتكرار نفس الشماركة
بهدف الدفاع عن اوماترا ؟
ياريت حضرتك تراجع القواعد اللى بتمنع الاغراق والدعاية

+1
أكيد وراه حاجه وخصوصا ان اوماترا الغت التعاقد مع المنتدى