اشتريت عربية 128 وعايزة أسأل عن صيانتها وترويشها

[R A N A]

انا ياجماعة لسة شارية عربية 128 موديل 87 هي حالتها كويسة والحمد لله على حسب كلام الميكانيكي اللي شافهالي.

أنا دلوقتي لسة جديدة في السواقة ولسة مطلعتش بالعربية بس هاضبط سواقتي واطلع بيها ان شاء الله قريب بس ممكن تقولولي على ميكانيكي كويس قريب من مصر الجديدة أو عين شمس عشان لو ظهرت فيها اي حاجة اخليه يشوفها وايه اللي اغيره في البداية مع العلم ان صاحبها لسة مغيرلها السيور وكل حاجة وبيقولي هي مش محتاجة اي حاجة بس قولولي برده علي ميكانيكي كويس ويكون أمين اضبط العربية عنده وميشتغلنيش عشان انا بنت وماليش في حوارات الصنايعية دي خالص.
وكمان قولولي ايه الاكسسورات والترويش والكماليات اللي بتنفع لل 128 عشان اخلي شكلها كويس بيها بما يتناسب مع بنت طبعا لإن في حاجات بتتعمل في العربية متنفعش غير لولد يعني واسامي الحاجات دي ايه وبتتباع فين وبكام لو تكرمتم يعني.
ولو حد عنده صور لعربيته يوريهالنا برده ويقولنا ضبطها منين وبكام؟
انا ركبتلها فرش جديد عشان فرشها القديم كان معفن جدا معرفش صاحبها كان بيركبها ازاي بس هما طبعا اشتغلوني في سعر الفرش بس مش مهم لاني كنت مستعجلة عشان مكنتش طايقة شكل العربية بفرشها القديم ده.

[YaSSerwIN]

عامتا بالنسبة للميكانيكى فيه ميكانيكى انا بتعامل معاه راجل كويس وأمين فى الشارع الجديد فى عين شمس أسمه محمود .. بعد ناصية السيد أحمد علطول ...

بالنسبة للترويش طبعا ً لو مافيش كاسيت او سماعات هتحتاجى تركبى حاجة
وطبعا ً أستيكرات فيه أبراهيم أستيكر فى شارع دمشق - مصر الجديدة

وتحطى فواحه وفيه أستيكر بينور بيتحط على الأزاز الورانى بيبقا شكله حلو بردك

[iBiZa]

بالنسبة لل128 موديل 1987 ممكن تعملى الاتى:
طقم الدواير و العتب من التوفيقية
السبويلر الخلفى
هوايات الكبوت
لو النور مش كويس فى الكشافات الى قدام, غير اللمبات و هاتى 100w ها تبقى كويسة اوى.
و طبعا لو هتركبى كاسيت و سماعات جداد يبقى لازم انذار علاشان ال128 بتتفتح باى حاجة.

[R A N A]

بالنسبة لل128 موديل 1987 ممكن تعملى الاتى:
طقم الدواير و العتب من التوفيقية
السبويلر الخلفى
هوايات الكبوت
لو النور مش كويس فى الكشافات الى قدام, غير اللمبات و هاتى 100w ها تبقى كويسة اوى.
و طبعا لو هتركبى كاسيت و سماعات جداد يبقى لازم انذار علاشان ال128 بتتفتح باى حاجة.

هي فيها كاسيت بس اعتقد انه عادي يعني مش نوع عالي اوي صاحبها ادهاني بالكاسيت ده واعتقد سماعاته عادية كمان بس مش مهم اهي حاجة مؤقتة.
بالنسبة للإنذار بقي اركبه عند مين وبكام تقريبا ومعلش سؤال عبيط شوية هو الإنذار هايخليها متفتحش بأي مفتاح خلاص ولا إيه؟ معلش ياجماعة انا ماليش خبرة خالص في الموضوع ده دي اول عربية ليا

[R A N A]

ممكن طلب رخم شوية انا سمعت مسميات كتير انتوا قولتوها بس لو توروني صور الحاجات دي ايه يبقي كتر خيركم اوي.
يعني السبويلر ده شكله ايه وايه دواير العتب والحاجات دي معلش مبتدئة بقي

[iBiZa]

بالنسبة للإنذار بقي اركبه عند مين وبكام تقريبا ومعلش سؤال عبيط شوية هو الإنذار هايخليها متفتحش بأي مفتاح خلاص ولا إيه؟

لا هو بس لما هاتتفتح هاتعمل فضيحة :)

معلش ياجماعة انا ماليش خبرة خالص في الموضوع ده دي اول عربية ليا

يا ستى بكرة ربنا يديكى و تغيريها باحسن منها و كلنا ابتدينا ب128 علاشان تبقى عارفة.

ممكن طلب رخم شوية انا سمعت مسميات كتير انتوا قولتوها بس لو توروني صور الحاجات دي ايه يبقي كتر خيركم اوي.
يعني السبويلر ده شكله ايه وايه دواير العتب والحاجات دي معلش مبتدئة بقي

انا معيش صور دلوقتى بس هاحاول اشرحلك:
سبويلر: هو جزء بلاستيك او فيبر يوجد على طرف الشنطة و عادة يكون اسود
دواير: هى حلية سوداء تلاقيها على داير الرفرف فوق العجل
عتب: تلاقيها غالبا من أخر الرفرف الى قدام لحد الرفرف الى ورا و بتبقى ماشية تحت الابواب.

انتى لو بصيتى على ال128 هتلاقى ناس كتير عاملة الحاجات دية

[R A N A]

لا هو بس لما هاتتفتح هاتعمل فضيحة :)




يا ستى بكرة ربنا يديكى و تغيريها باحسن منها و كلنا ابتدينا ب128 علاشان تبقى عارفة.



انا معيش صور دلوقتى بس هاحاول اشرحلك:
سبويلر: هو جزء بلاستيك او فيبر يوجد على طرف الشنطة و عادة يكون اسود
دواير: هى حلية سوداء تلاقيها على داير الرفرف فوق العجل
عتب: تلاقيها غالبا من أخر الرفرف الى قدام لحد الرفرف الى ورا و بتبقى ماشية تحت الابواب.

انتى لو بصيتى على ال128 هتلاقى ناس كتير عاملة الحاجات دية

ميرسي جدا جدا لردك واهتمامك وانا عرفت قصدك فعلا واخدت بالي من الحاجات دي وكنت عايزة اركبها فعلا بس مكنتش عارفة اسمها بس ميرسي انك عرفتني اسمائها وربنا يكرمك يارب.
بس لو تكرمت ممكن تقولي هل التوفيقية افضل ولا شارع دمشق ولا ايه في موضوع الاكسسورارت ده من حيث الأسعار والجودة برده.

[iBiZa]

التوفيقية احسن فى الاسعار كتير من شارع دمشق و كمان تفاصلى معاهم براحتك و انتى و شطارتك.

الدواير و العتب و السبويلر و الهوايات كلهم مصرى و فى عادى او استثمارى و الاستثمارى انضف بس طبعا هتاخديهم بعد كدة لسمكرى علاشان يركبهملك فى ربع ساعة.

الانذار من 150 الى 500 جنية و حسب الOptions طبعا و كلة ما بين صينى و ماليزى و تايوانى و بردة كلة فى التوفيقية و احسن واحد هناك انا اتعاملت معاة هو هشام لهيطة, و ممكن بالمرة تركبى سنتر علاشان يريحك و دة من 75 الى 125 على ما اذكر.

و كل الى فى التوفيقية فى دمشق و العكس صحيح.

[R A N A]

التوفيقية احسن فى الاسعار كتير من شارع دمشق و كمان تفاصلى معاهم براحتك و انتى و شطارتك.

الدواير و العتب و السبويلر و الهوايات كلهم مصرى و فى عادى او استثمارى و الاستثمارى انضف بس طبعا هتاخديهم بعد كدة لسمكرى علاشان يركبهملك فى ربع ساعة.

الانذار من 150 الى 500 جنية و حسب الOptions طبعا و كلة ما بين صينى و ماليزى و تايوانى و بردة كلة فى التوفيقية و احسن واحد هناك انا اتعاملت معاة هو هشام لهيطة, و ممكن بالمرة تركبى سنتر علاشان يريحك و دة من 75 الى 125 على ما اذكر.

و كل الى فى التوفيقية فى دمشق و العكس صحيح.

ميرسي جدا جدا لردك السريع واهتمامك وان شاء الله انا هانزل التوفيقية قريب اشوف ايه النظام هناك :)

[R A N A]

عامتا بالنسبة للميكانيكى فيه ميكانيكى انا بتعامل معاه راجل كويس وأمين فى الشارع الجديد فى عين شمس أسمه محمود .. بعد ناصية السيد أحمد علطول ...

بالنسبة للترويش طبعا ً لو مافيش كاسيت او سماعات هتحتاجى تركبى حاجة
وطبعا ً أستيكرات فيه أبراهيم أستيكر فى شارع دمشق - مصر الجديدة

وتحطى فواحه وفيه أستيكر بينور بيتحط على الأزاز الورانى بيبقا شكله حلو بردك

ميرسي اوي لرد حضرتك بس ياريت توصفلي عنوان الميكانيكي ده تفصيلا شوية لو هاروحله كده من عند مزلقان عين شمس امشي ازاي؟

[أبومعاذ]

في ميكانيكي في شارع منشية التحرير (لو حضرتك جاية من عند المزلقان و مشيتي في شارع عين شمس هتلاقي على شمالك محل شيخ البلد بتاع الكباب و الكفتة هو الشارع اللي على ناصيته شيخ البلد اسمه منشية التحرير) 200 متر من ناصية الشارع هتلاقي على يمينك ميكانيكي اسمه حسن و حسين ممتاز جدا و مش بيشتغل حد بس هو على طول زحمة و الميزة اللي فيه انه بياخد العربية يجربها و يعرف ايه اللي فيها بالنسبة للمبتدئين

[YaSSerwIN]

بصى يا ستى

انتى هاتمشى فى شارع عين شمس علطول لغاية المزلقان هتلاقى فى شارع على يمينك أسمو الشارع الجديد على نصيته سنترال عين شمس
هاتفضلى ماشية فيه أسألى اى حد على شارع السيد أحمد هتلاقيه على نصيته هناك بعد محل عصير القصب أسألى اى حد عن محمود الميكانكى هتلاقى قبل بتاع الكاوتش علطول

قوليله انا جايه من طرف ياسر بتاع ال 127 .. وبأذن الله هايعملك فحص للعربية ويشوف اية الى محتاج يتظبط ويعمله وعلى فكرة أسعاره كويسة جدا ً فى المصنعية

[sab3aawy]

انا ماليش فى موضوع الترويش اوى وكل اللى عرفه فى هذا الصدد هو الجنوط السبور، لكن هقترح عليكى زى ما بقترح على كل مالك جديد لل128 انك تقرى الموضوع ده:

http://www.nilemotors.net/Nile/showthread.php?t=675

لأن ممكن يفيدك فى تجنب مشاكل عبيطة ومالهاش لازمة

وده موضوع عامله صديقنا احمد 1981 عن اسعار قطع غيار ال 128

http://www.nilemotors.net/Nile/showthread.php?t=4804

وده موضوع آخر عامله صديقنا محمد عيسى عن تظبيط ال128، بس ده ممكن تستفيدى منه قدام شوية لما تحبى تعلى جامد بمستوى العربية

http://www.nilemotors.net/Nile/showthread.php?t=6652

[R A N A]

ميرسي اوي ياجماعة علي الردود السريعة والاهتمام الهايل ده والله مش عارفة من غيركم كنت هاعمل ايه.
بجد انا استفدت اوي من الموضوعات اللي بعتوها. :)

وبالنسبة للميكانيكي انا فهمت الوصف تقريبي كده وان شاء الله هاروحله قريب

[leopard00]

تكيف 128

السلام عليكم
انا اشتريت عربيه 128 موديل 2001و 1300 سىسى وعايز اعرف ايه رايكم فيها دا اولا
ثانيا عايز اعرف هل يمكن يتركبلها تكييف وفين وبكام؟
وشكرا