بفكر في برافو وعايز مساعدة رجاله فيات ...

[Kim0]

السلام عليكم
بداية عايز أشكر كل أعضاء نايل موتورز على الجهد الهايل والمعلومات القيمه اللي كلنا بنستفيد منها فعلا
علشان مطولش عليكو .. أنا معايا لانسر 1.6 موديل 2006 كنت جايبها زيرو وكنت عايز أغيرها بس طبعا زي ما انتو شايفيين أسعار العربيات بقت غاليه أوي عليا ومش لاقي حاجه أحسن من اللانسر بسعر معقول علشان أحس اني غيرت العربية
لحد ما قالولي هات مستعمل .. ولقيت عربيه برافو وجربتها و عجبتني أوي بصراحه ( عربيه حكاية )
هي موديل 2010 لونها أسود ماشيه حوالي 70 ألف كيلو مانيوال .. صاحبها بيقول انها توين تيربو و 150 حصان مع ان اللي اعرفه انها تي جيت 120 حصان
وده اول استفسار .. هل فعلا فيه منها 150 حصان ؟ وازاي افرق بين ال 120 و ال 150 حصان ؟
العربيه اعتقد انها اعلى فئه . هي فيها اوبشنز كتير أوي بس منغير فتحة سقف
كنت عايز اعرف عربيه بالمواصفات دي سعرها في حدود كام ؟

كمان استفسار معلش ... أنا من دمياط بس شغلي في اكتوبر وده بيخليني اسافر بالعربيه مرتين او تلاته في الاسبوع يعني العربيه بتطحن سفر معايا ... وانا سمعت ان البرافو العمر الافتراضي لموتورها قليل ... هل الكلام ده صحيح ؟

اخر سؤال .. مراكز الصيانه بتاعتها متوفره و لا لا ؟ و ظروفها ايه اسعار وكده ؟

مشكورين مقدما :)

[Mohab.Nabil]

هى مانيوال زى ما حضرتك كاتب تبقى 150 حصان فعلا مش 120 و ديه نسخة اقوى من الـ 120 و فعلا بتبقى مليانة اوبشنز فيها كل حاجة الا فتحة السقف .. الـ 120 مفيش منها مانيوال فى مصر ، بتبقى Dualogic

باقى النقط الاخوة فى قسم فيات يفيدوك فيها ان شاء الله

[Kim0]

يعني الموديلات كل المانيوال 150 حصان و الأوتوماتيك 120 حصان ؟

[MohammedAladel]

أيوة المانيوال ال tjet 150 حصان ... دوس فيها ... لانسر مين بس بعد العربية دى مش هتفكر تنزل منها أساسا

اللانسر فيها ميزة واحدة بس (لانسر بومة قصدى ) ... أعادة بيع كويسة ... لكن برافو دى أكيد عربية تانية مينفعش تتقارن بالبومة بتاااااااااااااااتا

يعنى لو حالتها كويسة وفعلا موتور tjet استخير ربنا واشتريها

[Kim0]

متشكر جدا على ردودكم بس أنا كنت عايز معلومات أكتر عن سعرها يوزد 2010 في حدود كام وايه عيوبها وكده يا ريت لأني معرفش أي حاجه عن فيات وأصلا مكانتش في دماغي خالص .. أنا كنت بدور على جولف أو ليون

[MohammedAladel]

مش هقدر أفيدك سعرها مستعمل كام ممكن تشوف متوسط اسعار المستعمل على مواقع البيع والشراء ... بالنسب لسعرها زيرو فى وقتها كان حوالى 160 ألف أو أزيد كام ألف تقريبا

يقال أن توكيل فيات خدماته مش كويسة وبيتعب زباينه والله أعلم
بس اللى بيشترى عربية زى دى بيعرف كويس أزاى يتعامل معاها وفين يوديها ومنين يجيب لها قطع غيار ( عن نفسى لو معايا عربية زيها مش هخلى ميكانيكى يحط إيديه فيها :) )

طبعا مينفعش الأسطة بلية اللى بيشتغل فى لانسر يتعامل معاها

[monamize4]

فعلا دى ال 150 حصان و بتنزل مانيوال فقط و دى مش توين تيربو و لا حاجة

و نصيحة ليك بلاش تشتريها لسببين :
-الاول ان اللى بيشترى العربية دى غالبا بتكون سواقته aggressive يعنى احتمال كبير تكون العربية مهلوكة و دا مش تعميم خلى الفكرة ف دماغك
- تانى سبب هو التوكيل اللى ناس كتير اشتكت منه و من معاملته الزفت

خلى بالك انك معاك لانسر يعنى قطع الغيار ماليه الدنيا و ناس كتير بتفهم ف تصليحها و ف اعادة بيع ماسكة سعرها اوى و تتباع بسهولة جدا و دى حاجات مش متوفرة ف البرافو

لو مش فارق معاك الكلام دا و العربية داخلة دماغك اوى اكشف عليها كويس و اسال على قطع الغيارمنتشرة برة التوكيل و لا لأ و شوف اسعار قطع غيارها عاملة ازاى و اسأل مين بيفهم ف تصليحها

مبروك مقدما

[aw2100]

ابعد عنها عموما الفيات الحديث قطع غيارة غالية ومش متوفرة ومش اى ميكانيكى يشتغل فيها خليك فى الألمانى افضل
عندك الجولف والبولو والفابيا عربيات قوية ومصفحة وثبات رهيب وقطع غيارها متوفرة ومبروك على العربية الجديدة !!

[aliabdo]

يا جدعان التوكيل مش بالسوء الى الناس ببتتكلم عليها ده
اكشف على العربيه فى التوكيل و صلى صلاه استخاره؛ توضيح مش اكتر دى تعتبر عربيه رياضيه غير اللانسر دى ركوبه و دى ركوبه تانيه خالص و احسن من الجولف و الفابيا و الكلام ده كله

[aliabdo]

الجولف نفس الموديل بكام ؟؟؟ و امكانيتها ايه
و مينفعش اساسااااااااااا نقارن فابيا و بولو بالبرافو ابدااااااااااااااااااااااااا دول ممكن يتقارنو بجراند بونتو مش برافو ابداااااااا الى هى ضعف السعر مره و نص للجراند بونتو

[Kim0]

ابعد عنها عموما الفيات الحديث قطع غيارة غالية ومش متوفرة ومش اى ميكانيكى يشتغل فيها خليك فى الألمانى افضل
عندك الجولف والبولو والفابيا عربيات قوية ومصفحة وثبات رهيب وقطع غيارها متوفرة ومبروك على العربية الجديدة !!

شكرا ليك يا باشا بس هو مفيش وجه مقارنه بين البولو والفابيا مقارنة بالبرافو دي حاجه ودي حاجه تانيه خالص
الجولف حلوة طبعا مفيش كلام بس فعلا فرق سعر رهيب بينها وبين البرافو خصوصا في اليوزد مع فرق امكانيات وكماليات لصالح البرافو
الله يبارك فيك يا باشا وربنا يقدم اللي فيه الخير

[Kim0]

مش هقدر أفيدك سعرها مستعمل كام ممكن تشوف متوسط اسعار المستعمل على مواقع البيع والشراء ... بالنسب لسعرها زيرو فى وقتها كان حوالى 160 ألف أو أزيد كام ألف تقريبا

يقال أن توكيل فيات خدماته مش كويسة وبيتعب زباينه والله أعلم
بس اللى بيشترى عربية زى دى بيعرف كويس أزاى يتعامل معاها وفين يوديها ومنين يجيب لها قطع غيار ( عن نفسى لو معايا عربية زيها مش هخلى ميكانيكى يحط إيديه فيها :) )

طبعا مينفعش الأسطة بلية اللى بيشتغل فى لانسر يتعامل معاها

هو سواء اللانسر او البرافو انا بفضل اتعامل مع التوكيل او مراكز خدمه معتمده لأن حتى اللانسر الأسطه بلية طلع عيني فيها قبل كده :d ... بس مدام التوكيل الناس بتشتكي منه يبقى الموضوع محتاج اعادة تفكير
شكرا يا ليك يا باشا :)

[Formulator]

فابيا؟!! وبولو؟؟!!! واللانسر أحسن؟؟؟!!!!!!

طيب
فينك ياعم أرسطو 322-284 ق.م.
وفينك يامحمد ممدوح؟!! فعلا بيقولوا هجص!

من الآخر
الـEquivalent للعربية دى فـ الأداء فقط هى الجولف TSI الـ160 حصان (مش البطة 1.6)!!
ودى كان ثمنها 245-255 ألف لما كانت البرافو 150 بتتباع بـ 173 ألف

النهاردة: البرافو 150 T-JET مانيوال لو بتنزل كانت هتكسر الـ200 ألف طبعا
(بس للأسف هى dropped from-the-range ونزل مكانها 140 حصان MultiAir تربو - حتى فـ أوروبا)

بالنسبة للتوكيل: ياريت مانشوفش أى مشاركات فيها ألش من أى حد مادخلش أصلا ورشة فيات-ألفا؟؟!!!
- التوكيل أسعاره معقولة جدا فـ قطع الغيار والمصنعيات! بالمقارنة بأوروبى ويابانى (وحتى كورى)؟!!
ومابيضربوش العملاء على فكرة!!

- قطع غيار: الكيلانى -محمد يوسف-فيات2000-الشيخ على: كل حاجة فـ التاريخ للعربية دى.
- إستيراد: مجدى البيومى-عمرو الأبيض.. عربيات برافو كاملة متقطعة :)

وكمان فتيس مانيوال: يعنى ممكن ماتحتجش أوماترا (التوكيل) فـ أى حاجة؟!!

بالنسبة لمواتير الفيات التربو: لاتعليق بصراحة على جزئية العمر-الإفتراضى؟!!
-بس مع إحترامى لمواتير اليابانى:

لا أعتقد ان فيه مواتير -فـ جنوب شرق آسيا كلها - يستحمل شحن توربينى High-Tune بتوربينات Garrett وميتسو Evolution لأرقام 200-215 حصان...
على Stock-internals....
وببنزين 92 المعفن بتاع مصر......

وماينفجرش فـ أول 100 مترsprint؟!!! ههههههههههههههههههه

(اليابانى التربو الأصلى كان زمان فـ الـSkyline والسوبرا، والـGT-R والإيفو دلوقتى)؟!!
لكن اليابانى اللى فـ مصر دى تكاتك!

وبردو لا أعتقد فيه حد فـ العالم -حاليا- بيعمل بلوكات Cast-iron بشحن تربو Overboost غير شركتين/موتورين: فيات T-JET وفولكس TSI
أى تربو غير كده ألومنيوم وبيشتغل low-boost؟!!

- إعمل صياناتك فـ ميعادها: ونزل الزيت قبل ميعاده.. الموتور ده (ستوك أو متون) يعدى 250-300 ألف كم قبل ماتفكر تعمل فيه حاجة غير الصيانات!

[fares_311]

هل فعلا فيه منها 150 حصان ؟

اه فيه 150 حصان

هي فيها اوبشنز كتير أوي بس منغير فتحة سقف

فيها اوبشنز كتير بدون فتحه سقف

كنت عايز اعرف عربيه بالمواصفات دي سعرها في حدود كام ؟

من 90-120 الف حسب الحاله

وانا سمعت ان البرافو العمر الافتراضي لموتورها قليل ... هل الكلام ده صحيح ؟

مستحيل طبعا

اخر سؤال .. مراكز الصيانه بتاعتها متوفره و لا لا ؟ و ظروفها ايه اسعار وكده ؟

Don't know

[aliabdo]

بالنسبه لقطع الغيار و الصيانه متوفره بس مش عارف اسعار انا عامل موضوع اسمه جدول صيانات جراند بونتو بالاسعار ممكن تاخده استرشاد لاسعار الصيانات عموما