FIAT 132 2000

[hazem_khidr]

بصراحه انا اول مره اخش المنتدي و اعجبت جدا بيه
عاوز اتكلم علي عربيه ممكن تكون قديمه بس بصراحه من اجمل العربيات اللي شفتها بحياتي رغم اني سافرت كتير و لفيت لكن العربيه دي هيا حبي الاول و الاخير انها 132 2000 !!!!!
طبعا الكل او المعظم حيستغرب من كلامي دا بس خليني اشرح لكم انا بقول كده ليه
العربيه دي انتجت في الفتره ما بين 1977 و 1981 و كانت ولا تزال في رايي صاحبه تصميم من احلي التصميمات
جر خلفي موتور 2000 سي سي بقوه 112 حصان و الرشاشات كانت 122 حصان
زجاج كهربائي و باور و جنوط سبور (اساسي) و اشدد علي كلمه اساسي في حين ان دي كماليات حتي الان في عربيات بتنزل من غيرها
تابلوه اكتر من رائع و كراسي مريحه جدا و فرش سقف غير مسبوق من قبل(قطيفه لبني او بيج) دا غير الشماسات العصريه جدا و المبتكره و مش موجوده في اي عربيه تانيه
لو قعدت اتكلم عنها مش حيكفيني فيها مجلدات و انا كان ليا ابن خالي معاه واحده موديل 81 كان جايبها معاه من السعوديه و كانا بيجيب بيها 200 لي الطريق!!ايوه 200 تخيل بقي عربيه اوائل التمانينات و تعمل كده دي تبقي ايه؟؟!!!
و سحب العربيه ان كانت نضيفه و موتورها بصحته لا تقارن بموديلات عصرها زي البيجو 504 و المرسيدس 200 كمان
يكفي انها اول سياره 4 باب في العالم توصل من الصفر ل 100 كم/ساعه في 10.5 او 11 ثانيه!!
ناس بتقول انها مش ثابته علي الطريق مع احترامي لكل وجهات النظر لكن العربيه دي لو بحالتها ثابته جدا و اقصد بحالتها ان تكون مش ملعوب فيها علشان في ناس كتير بتعلي العربيه علشان كارتير الزيت بيتخبط ف بيقومو بتعليه العربيه من قدام و دا اللي يخليها تعوم و ممكن تنقلب كمان في الملفات
غير كده ان العربيه دي علي شاسيهات و 90% من ضبط العفشه بتاعها معتمد ان الشاسيهات بتاعها لازم تكون سليمه اوي اوي اوي و الا مش حتظبط و تعرض العربيه لعدم الثبات
نزل من العربيه دي الماني و ايطالي و الايطلي هو الافضل بعكس كل الناس ما هيا متخيله و دا لعده اسباب
المانيا الايد العامله فيها غاليه و مستلزمات الانتاج غاليه و كانو عاوزين ينزلو عربيه منافسه فبيضطرو انهم يخفضو من تكاليف انتاجها بشكل معقول
ازاي نعرف اذا كانت الماني ولا ايطالي؟؟؟؟؟
1.اكره الباب الخارجي لو لو بتفتحها بايدك اليمين تبقي الماني و لو بايدك الشمال تبقي ايطالي(بتكلم هنا علي باب السائق او الجنب الشمال بمعني اصح علشان اليمين حيبقي العكس)
2.لون فرش السياره بالنسبه للايطالي كان بينزل يا اما ازرق او بيج حسب لون العربيه(سماوي.ابيض.فضي مثلا فرش ازرق
و دهبي.اخضر ميتالك.بصلي الفرش بيج) انما في الالماني كله بيبقي لونه بيج و مفيش الماني صالونها ازرق خالص
3.مروحه التكييف في الايطالي 3 سرعات انما في الالماني سرعتين بس
4.موتور الايطالي كان نازل معاه عمه زيت لتنقيه الهواء الداخل للموتور انما الالماني لاء
5.كورونه الايطالي دات تروس صغيره و بيكون سرعتها القصوي اعلي انما الالماني الكرونه تروسها كبيره ف سرعتها بتقل شويه عن الايطالي
دي حاجات واضحه و في فروق تانيه مش قادر افتكرها حالا
و اي حد له سؤال ممكن يبعت و انا حجاوبه علشان العربيه انا حاببها و فاهمها كويس
علي فكره انا معايا سوزوكي سويفت حاليا!!! بس لو الاقي 132 2000 بحالتها اشتريها فورا بس للاسف مفيش منها نضيف دلوقتي و انا اعتقد ان لو ابن بطوطه كان عايش لحد ما شافها كان زمانه ركبها في سفرياته :) !!!
ممكن اكون بحبها و دا اللي خلاني اكتب عنها دا كله بس انا ارحب بالنقد و افتح مجال للمناقشه
و اسف للاطله
دي الصور بتاعها
FIAT 132 2000






fiat 132 GLS

[hosam2222]

عربيه جامده و موضوع اجمد يا حازم باشا
باين من كلامك طبعا انك بتحبها وغير كده باين ان معلوماتك فى عالم السيارات جامده جدا
شكرا مره تانيه

[sab3aawy]

فكرتنى بالذى مضى

احنا كان عندنا عربية 123 بس مش 2000، كانت GLS 1800وكا فيها معظم الكامليات اللى انت بتقول عليها، كانت بتاعة والدى الله يرحمه ، وكانت موديل 1976، جبناها من بلجيكا ايام ما كانت السيارات استعمال الخارج بتدخل مصر وكانت علمة 16 الف كيلومتر يوم ما جت
العربية دى لسة موجودة معانا لحد ديلوقتى، بقالها معانا 25 سنة ، وعملت حوالى مليون كيلومتر، غيرنالها الموتور مرة بعد حوالى 300 الف كيلومتر ، واتعمل للموتور الجديد عمرة تانية بعد 300 اخرى

بس حاليا محدش بيركبها، هى جت ضمن نصيب شقيقى فى الميراث، هو عنده عربية تانية ربنو كليو بس مش عايز يتصرف نهائيا فى العربية دى

سبعاوى

[hanyfarrag]

عربية جميلة ومشاركة أجمل

والله بكلامك ده حبيبتنى فيها أكتر مما بحبها

[saied]

شكرا اخى حازم لمشاركتك الجيده
الفيات بوجهه عام والسياره ال 132 كان لها عصر ذهبى استمر لفتره طويله فى مصر
حتى دخل الكورى وابتداء يحتل نصيب الفيات فى السوق المصرى.

تحياتى


اخوك سعيد

[Abdallah]

موضوع جميل وواضح انك من عشاق السيارة يا صديقى ولكن لى بعض تعليقات نظرا لانى كنت من المعجبين بها يوما من الايام...
العربية دى بتاكل عفشة بطريقة غريبة يعنى انا اذكر ان كان فى واحد جارى معاه واحدة وكان لازم كل شهر او بالكتير شهرين يروح يغير فيها حاجة....
الموتور ال 2000 دة بيحرق بنزين كتير جدا ولما ركبت العربية محستش بفرق فى الطلعة ولكن فعلا فى فرق فى السحب...
زى ما حضرتك تفضلت وقلت ان العربية قليل لما تكون نظيفة انا فعلا كان قدامى من شهرين كدة واحدة تعتبر جديدة, جميع الكماليات اوتوماتيك كانت بتاتعت معاق وبعيد عنك صاحبها مات بعد ما جابها وركنوها ولما رحت اتفرج عليها لقيتها زيرو بس لقيت الشبكة الامامية مكسور فبالصدفة سالت عليها تعرف لقيتها بكام فى المنصورة ؟؟؟؟
900 جنيه يعنى اغلى من اكصدام عربيتى وعربيتك !!!!!

[hazem_khidr]

السلام عليكم و رحمه الله و بركاته اشكر كل من اعطي تعليق علي رسالتي و اتمني ان اكون صديقا لكل من في المنتدي و ربنا يوفقني و استطيع ان اساعد من يحتاج المساعده و اوجه شكري الي الباشمهندس سباعي الذي تعلمت منه الكثير بجد و أ.سيد و أ.هاني فرج و أ.عبد الله و اتمني قبولي صديق جديد

[hanyfarrag]

طبعا طبعا

قبل أن تتمنى أن تكون صديق جديد
فأنت بالفعل صديق
وكل الأعضاء هنا أصدقاء وأخوة
الحمد لله

[Abdallah]

يا صديقى نحن يشرفنا ان تكون صديقا لنا فى المنتدى ومرحبا بك فى اى وقت :)

[khaled nada]

انت راجل اكثر من رائع لانك بتحب اول حب ليا وانا معايا 132/2000 كانت بتاعت والدى رحمة اللة واحنا اوليد لها وانا معاك فى كل الى قلتة ويريت لوعرفت اى حاجة عنها تكتبه فى المنتدى وشكرا كثيرا

[hazem_khidr]

الله يخليك يا استاذ خالد انت بس اللي زوق و زي ما بقول انا لو حكتب عن العربيه دي حكتب مجلدات انت لو عاوز تسال اي سؤال عنها ان شاء الله حجاوبك عليه علشان العربيه دي انا حافظها بالمسمار

[besho art]

ليا طلب منك يا استاذ حازم
انا ناوى اشترى 132 بس معرفش انهى الاحسن 1600 ولا 1800 ولا 2000 سى سى وانهى احسنهم فى استهلاك البنزين
وعايز اعرف اسعار الباور ستيرينج فيها كام وتكلفته وايضا الزجاج الكهرباء وتكلفته
وعايز اعرف ممكن اركب تكييف ولا ايه وتكلفته
وعايز اعرف ياترى هاتستحمل معايا علما انى شاب عندى 21 سنة واول مرة اسوق عربية
يعنى هاتتعب معايا العربية فى الاول
يعنى انا عايز اعرف ايه التظبيطات بتاعتها كلها وكل حاجة عنها
معلش انا عارف انى هاتعبك معايا بس عارف انك مش هاتبخل عنى فى اى معلومة
وشكرا على الردود مقدما

[sokasoon]

استاذ بيشوو انا هعلق على حاجة واحدة بس وهسيب الباقى للاستاذ حازم

ان الكماليات بتكون فى العربية

يعنى التكيف موجود والباور موجود والزجاج الكهرباء موجود

قليل انك ماتلاقيهوش فى العربية ال132

[hazem_khidr]

انا ناوى اشترى 132 بس معرفش انهى الاحسن 1600 ولا 1800 ولا 2000 سى سى وانهى احسنهم فى استهلاك البنزين

الاحسن طبعا ال2000 تحفه في السحب و السرعه و الشكل بس استهلاك البنزين بتاعه كبير لما تبقي مضبوطه و موتورها فايق بتعمل حوالي 170 في الصفيحه!!ال1800 انا مش محبزه اوي علي اساس انه لا 1600 ولا 2000 انما ال1600 برضه حلو واستهلاكه في البنزين معقول مش وحش بس انا بتكلم علي عربيه نضيفه مش بتكلم علي مشنات من الموجوده في السوق لازم لو حتجيب تجيب عربيه نضيفه اوي و انا في الاخر حقولك تعرفها ازاي

وعايز اعرف اسعار الباور ستيرينج فيها كام وتكلفته وايضا الزجاج الكهرباء وتكلفته

البارو انا كنت مركبه استعمال سنه 94 كان متكلف حوالي 900 جنيه يعني دلوقتي تلاقيه عامل حوالي 1500 او 2000 بالكتير و انت كل اللي بتشتريه هو خزنه دركسيون باور و كمبريسور بتاعه استعمال برضه و علبه الزيت و بيركب في يوم و بيشتغل كويس و الزجاج الكهرباء بتجيب مكن الزجاج من الوكاله مش حيزيد عن 250 جنيه للبابين الامامي و ما تجيبش غير بتاع ال132 علشان م يعاكسك ش بعد كده و بعدين انت لو حتجيب 2000 حيبقي فيها زجاج و باور اساسي انما الGLS بتبقي فاضيه خالص

وعايز اعرف ممكن اركب تكييف ولا ايه وتكلفته

لو الموتور 2000 بيركب التكييف عادي بس حيستهلك بنزين كتير و غير كده مش بيبقي حلو اوي (تكييف الايطالي القديم ما بيبقاش قوي) بس ممكن يكون بيركب ماركات حديثه عليها او حاجه مش حقدر افيدك في الموضوع دا حاليا بس اسالك

وعايز اعرف ياترى هاتستحمل معايا علما انى شاب عندى 21 سنة واول مرة اسوق عربية

ال 132 عربيه قدمت و بقت مشاكلها كتيير بس لو لقيت واحده نضيفه مش حتتعبك و تعمل بيها اللي انت عاوزه و حتستحمل بس نضيفه انما لو مش نضيفه لو اتعفرت عليها شويه حتفتح بقها و مش حتعرف تلمها

يعنى انا عايز اعرف ايه التظبيطات بتاعتها كلها وكل حاجة عنها

بص يا سيدي انا حشرحلك ال132 كويس و حشرحلك تشتريها ازاي و حشرحلك التظبيطات اللي تعملها بس واحده واحده
اولا ال132 نزل منها تلات موديلات الS من موديل 72 الي 74 و دي كانت 1800 بس كان فيها مشاكل في الزوايا و غير قده قديمه اوي و شكلها مش حلوو بعدين GLS من 74 الي 77 و دي نزل منها 1600 و 1800 و بتعرفهم من بعض ان ال1600 كانت نازله التابلوه بتاعها 3 دواير بس فيهم العدادات و الفتيس بتاعها 4 غيار و ال1800 كان العدادات بتاعها 5 دواير و الفتيس بتاعها 5 غيار. و ال132 اللي نزلت بعد كده اتعرفت في مصر باسم 2000 و دي من سنه 77 الي 81 و دي كانت عربيه وهم اياميها زي ما انا شارح فوق بالضبط علشان لو مش بالسقف و الفرش و العدادات المربيع دي تبقي مش 2000 علشان محدش يغشك و نزل منها موتورين برضه 1600(بيسموها في مصر 2000 كداب علشان شكل ال 2000 من بره و مافيهاش كماليات خالص) و الموتور التاني ال2000 و دي كانت نازله بالباور و الزجاج الكهرباء اساسي و ال1600 لاء و كان التكييف كماليات ممكن تلاقيه و ممكن لاء
اقولك بقي تشتريها ازاي : لازم اول ما تشوف العربيه ترتاح لها يعني تحس انها كده واحد صاحبك او كده لو جالك الاحساس دا تعرف انها عربيه صح !!بتكلم بجد مش بهزر يعني تبص عليها كويس و ال132 عموما شكلها من بره بيدل عليها من جوه اول حاجه تشوف الجوانب بتاعها لازم تكون كلها ميه واحده مافيهاش تعريجات و السوك بتاع الابواب مضبوطه و حاده و تحس فلا انها قاسمه الياب و الرفرف نصين مش تلاقيها ضايعه .و تاني حاجه من بره تبص علي نواكل الابواب لازم تكون كامله كلها علشان لو نيكل من اللي تحت الزجاج علي طول مش موجود يبقي مش حتعرف تجيبه و لو العربيه دي نضيفه بجد حتلاقي الضوافر البلاستيك السوده بتاع الفابريكه علي نوتاكل الابواب دي و بعدين افتح الباب بتاعها و اقفله و اسمع صوت الفتح و القفل يا تري بترزع ولا الباب مشخشخ ولا ايه بالضبط؟؟انا بفضل انك تجيب ال132 ال2000 او ال1600 اللي بيسموها ال2000 كداب دي(موديلها من 77 الي 81) اعلي و اشيك موديل فيهم
المهم تفتح الباب و اتفرج علي فرش الابواب بتاعها عامل ازاي لازم يكون لونه بني و مايكونش المقابض بتاعه ضايعه او الفرش متبهدل او مصري علشان الفرش دا ما بيتعدلش و غالي جدا لو اشتريته (انا سمعت ان طقم الابواب كامل ب 2500 جنيه!!!)و بعدين تبص علي التابلوه بتاعها تشوفه ولو عليه غطاء ولا حاجه شيل الغطا علشان ممكن يكون بايظ و التابلوه بتاعها غالي و تشوف الامبيرات بتاعها سليمه ولا لاء و الفتيس تشوف نقلاته كلها و الدبرايج بتاعها مريح ولا لاء و الباور تجربه و الفرامل و وصوت الموتور ناعم ولا لاء؟؟؟علشان صوت ال2 كامه و ال132 خصوصا ناعم جدا و بعدين افتح الكبود و سيبك من فكره دي رشه دواخل و دي مش راشه علشان طالما نزلت الرفارف بتاعها يبقي كده رشت دواخل اهم حاجه تبص عليها او تخلي حد يبصلك عليها الحته اللي حوالين المساعدين الاماميه علشان دايما بتتملي بارومه فخلي بالك منها كويس و كمان الشاسيهات بتاعها خلي حد يكشف عليها و علي ركب الموتور علشان دي البارومه مشهوره اوي فيها و فرده الشاسيه بتاعها بتبقي ورا العجله الاماميه و بيبقا فيها تلات دواير كده كبار لو لقيت الدواير دي عليها كاوتش او حاجه تعرف ان العربيه دي فابريكه و اشتريها و انت مغمض و تبص علي الوش بتاعها و شوفه راكب علي بعضه ولا مخاصم بعضه و العربيه لازم تكون كلها ارتفاع واحد مش عاليه اوي عن الارض و فرش الشنطه لازمم تتاكد انه بتاع بلادها (صوف بني في ال2000 و مشمع في الGLSو مكتوب عليه 132 GLS)و لازم موتورها ما يكونش طالع منه اي صوت غريب لا تخبيط ولا ترزيع ولا اي حاجه من دي و اهم حاجه ان العربيه النضيفه الواحد بيرتاح لها علي طول و الكلام دا حيفيدك
بالنسبه لتظبيطها ال132 و خصوصا ال2000 اللي برشحها ليك مش محتاجه اي تبيط العربيه لما بتبقي نضيفه بتلاقيها ماشيه كده و بتدلع و عموما في شويه حاجات ممكن تعملها يعني هيا بتنزل اصلا بجنوط اسمها جنوط مروحه و دي الجنوط الوحيده اللي بتليق عليها و الاحسن تسيبها بس تجيب لها طقم اطواق نيكل بيخلي شكلها تحفه و الفوانيس الاماميه تخليها لونها اصفر زي الشبوره برضه بتديها منظر و تجيب لها سبويلر رقيق و خفيف و بسيط جدا تحطه علي الشنطه و النواكل بتاع الدواير الرفارف كلها تركبها و ما تركبش البلاستيك ابدا ال132 ما تبقاش 132 غير بالنواكل دي لو مالقيتهاش في العربيه ما تشتريهاش و ممكن تركب لها قاطره ورا الاكصدام الخلفي بتيجي استعمال برضه و بتقولهم في الوكاله او بورسعيد عاوز قطره بتاع 132 بتيجي جاهزه علي مقاس العربيه و الف رش بتاعها لو موجود سيبه ولو مش موجود هات خامه قريبه منه و روح لسروجي نضيف يعملهولك نفس الرسمه و نفس اللون بيبقي تحفه برضه و ول ما انت ماشي ابقي نزل الشماسات بتاعها كلها (شماستها فيميه و شكلها حلو و بتدي العربيه منظر) بس انا طولت عليك اوي بس انا فعلا بموووت في العربيه دي و لو انت ساكن قريب من المحله و لقيت عربيه ممكن اجي ابصلك عليها مفيش مشاكل

[besho art]

بجد شكرا يا استاذ hazem_khidr
مش عارف اقولك ايه على نصايحك الجميلة جدا دى واهتمامك بموضوعى
وربنا يسهل والاقى حاجة كويسة