بونتو نوفا2009-2008 ؟؟؟specificaions

[princex1]

شكلها عاجبني بس مفيش حد كاتب تقييم ليها الرجاء بعض المواصفات من السادة الأعضاء مثل استهلاك البنزين و التسارع و ارتفاعها عن الأرض... ولكم الشكر
دي معلوماتي عنها 1300cc
60 @5000القدرة
Nm102@2500 عزم
9.5 نسبة الإنضغاط
3.835طول 1.66عرض ارتفاع 1.48
قاعدة العجلات2460
وسعة الشنطة 297

وهل الفرق بينها و الباليو 1500ccيستاهل عشرة الاف؟

[amir]

البونتو
عربيه جميله جدا محترمه جدا
ميال ليها قوي قوي
بس للاسف مفيش اخبار عنها كتير في قسم الفيات زي بقيه العربيات لانسر لانوس فيرنا........
بس لو دورت في قسم الفيات كويس هتلاقي ناس محترمه كاتبه تقييمات ليها
علي فكره الباليو صيني و البونتو ايطالي

[princex1]

thanks

هو ده بالذات اللي محيرني وعلى الرغم من ندرة المعلومات المتوفرة عنها لاحظت عدم تعاون ملاكها مع استفسارات الأعضاء ويمكن دي صفة وراثية لمالكيها

[mohamed2002]

البونتو
عربيه جميله جدا محترمه جدا
ميال ليها قوي قوي
بس للاسف مفيش اخبار عنها كتير في قسم الفيات زي بقيه العربيات لانسر لانوس فيرنا........
بس لو دورت في قسم الفيات كويس هتلاقي ناس محترمه كاتبه تقييمات ليها
علي فكره الباليو صيني و البونتو ايطالي

اللي اعرفه ان البونتو ايطالي
الباليو تقفيل برازيلي
الاونو برازيلي
السينيا صيني
اللينيا تقفيل تركي

[ahmedali]

انا النهارده روحت اومترا اللى في شارع وزارة الزراعة في الدقي وشوفت العربية العربية بجد جميله شكلا وكمان خامتها محترمه انا ما اعرفش في العربيات بس باين الفرق بينها وبين الكوري اوى في التقفيل والخامات وشوفت الباليو تقفيلها مش زى البونتو خالص وكمان مختلفه جدا البونتو في الصاج جميل وجوه العربيه الصالون مش ضيق كويس اوى الشنطة واسعة العربية فيها تكييف وباور وكمبيوتر اعطال و2 اير باج وفوج لايت امامي وخلفي وجنوط اسبور 14 وزجاج كهربا امامى العربية من غير كاسيت بس في اومترا قالو هنركبلك الكاسيت مجانا مع العربية بس العربية والله بجد جميلة اوى وان شاء الله هشتريها

[SharpArrow]

بونتو طبعا

السلام عليكم
انا احد مالكي بونتو 1300
لسه جايبها من 3 ايام بالضبط
العربية فعلا تقفيل ايطالي و بصراحة انا مبسوط بيها اوي ما شاء الله عليها جميلة جدا في كل حاجة
هي بصراحة في رأيي انها تستحق 70000 جنيه سعر ليها
و كنت بفكر في اللوجان و صرفت نظر عنها لم اعرفت مشاكلها
انما البونتو من ساعة ما اتخلقت و محدش اشتكى منها نهائي ده غير انها تقفيل بلد الصنع فا لازم تبقى اغلى لانها انضف

كماليات العربية:
موتور 1300 سي سي
جنوط سبور
فوج لايت
نظام قيادة سيتي (بمعنى ان الباور بيتقل مع زيادة السرعة)
زجاج كهرباء (امامي فقط)
4 سماعات (لكن بدون كاسيت)
فتح الشنطة من الداخل
سنتر لوك (بدون ريموت و انذار)

كمالياتها مش رهيبة بس جميلة و خصوصا نظام قيادة سيتي الموجودة فيها
و اتزان العربية ما شاء الله رهيب جميلة اوي و رغم ان اللانسر 1300 ياباني و اغلى منها(هي مع اخويا) الا ان اتزان البونتو احسن منها بكتير جدا ماشاء الله

بصراحة انا كان قدامي الاختيار فعلا بين بونتو و باليو و سيينا و لوجان بس اخترت البونتو و انا مستريح جدا و عارف اني حطيت فلوسي في حاجة محترمة
و انا سألت عنها كتير و كان الاختيار عليها و انها احسن من العربيات اللى انا ذكرتهم

توكل على الله و جيبها بجد مش هتندم ان شاء الله
و ربنا يباركلك في فلوسك و يهديك للى فيه الخير ان شاء الله

[amir]

طيب فرصه بقي تتكلم عن استهلاك البنزين و كافه الامور الخاصه بالعربيه بالتفصيل و هاتلنا شويه صور كده

[SharpArrow]

بالمناسبة العربية اصلا بـ 73000 بس شركة المصرية عالمه عرض بـ 70000 جنيه فقط و ده لفترة محدودة
لو عايز اشتريها قبل نفاذ الكمية زي ما بيقولو :)
مش عارف ان كان مصرح اكتب اسماء شركات ولا لا بس فعلا نيتي سليمة ولا اقصد اني اعلن و نيتي لصالح اللى عايز يشتريها مش اكتر, وشكرا

و ان شاء الله هديكو امكانيات موتورها و السحب بعد التليين
بس مبدئيا انا لما بدوس بنزين زيادة شوية العربية بتسحب حلو اوي ما شاء الله

[amir]

ربنا يباركلك فيها و يديك خيرها و يكفيك شرها
المنتدي منتدي للسيارات و عادي انك تتكلم عن كل حاجه عنها
اللهم الا لو عايز تعمل اعلان لمحل اكسسوارات بعينه او كده لازم تبعت للاداره الاول

[SharpArrow]

بالنسبة للاستهلاك هي ما شاء الله انا خدتها يوم الاحد 1 فبراير و فولتها
ملاحظة: التنك بتاعها 50 لتر
فولت في المعادي و انا ساكن في اكتوبر
مشيت لحد دلوقتى حوالي 130 كيلو متر و استهلكت تقريبا من 3 لـ 4 لتر بالكتير لان المؤشر كان على شرطة الـ Full و نزل ما يعادل سمك شرطة الـ Full يعني حاجة لا تذكر تقريبا
فا استهلاكها ما شاء الله ولا حاجة رغم ان عزمها محترم جدا ما شاء الله
و نسيت اقول ان فيها حاجة ان انت عندك امكانية حساب المشوار طوله كام كيلو و استهلاك البنزين فيه قد ايه بس انا لسه مستخدمتوش صراحة.

و انا لاحظت يا استاذ امير انك معاك صني
انا كمان حمايا معاه صني و سوقتها و بجد و انت بتسوق البونتو تحس انك سايق صني بس على صغير سنة و ده كان تعليقي انا وواحد صاحبي لما جربها برضه
بنفس السلاسة و السهولة و النعومة و تقريبا حتى نفس صوت الموتور

هي بس فيها عيب صغير معرفش العيب ده موجود في الباليو ولا لا
ان العزل بتاعها عن العالم الخارجي مش متقن
يعني تحس بالمطبات شوية بس مش اوي مش زي الشاهين مثلا (انا كان عندي شاهين زمان) بس اقل من الصني شوية
قول الصني مثلا عزلها 95%
البونتو يمكن 80% او 75% تقديريا
بس هو ده العيب الوحيد اللى انا شايفه لحد دلوقتى

طبعا زي اي هاتش باك: الكنبة بتتني لقدام عشان الشنطة توسع
انا طولي حوالي 180 سم
رجعت الكرسي الامامي للخلف للأخر خالص و قعدت في الكنبة وراه كنت مستريح
رجلي كانت لامسه الكرسي من ورا بس مكنتش مزنوقة او محشورة انما مستريحة
و انا من محبي اني ارجع الكرسي لورا بحيث اسوق و انا فارد دراعي تماما
و كان معايا لادا قبل كده كنت بحتاج ارجع الكرسي لورا تماما عشان اعد مستريح انما البونتو مبحتاجش ارجعه لورا تماما (بمعنى انها اوسع من اللادا و الشاهين كتير) انما اصغر من الصنى بنفس نسبة العزل تقريبا.

الجنوط 14 بوصة ماركة بريللي
امكانية رفع و تنزيل مستوي الاضاءة الامامية.
غير ان الباور بيتقل مع السرعات العالية الا انك عندك زرار 'City' لو طفيته الباور يفضل تقيل على طول سواء سرعة عالية او منخفضة.

و دي شوية صور عندي

http://up.arabseyes.com/upfiles/GAb66020.jpg

http://up.arabseyes.com/upfiles/X4O66161.jpg

http://up.arabseyes.com/upfiles/5gD66248.jpg

http://up.arabseyes.com/upfiles/IKP66315.jpg

و اي اسئلة ابعتولي و انا ربنا يقدرني و ارد عليها ان شاء الله

[amir]

لحساب استهلاك البنزين لازم تعمل الاتي:
1-فول العربيه و صفر العداد
2-امشي زي ما انت عايز لاي مسافه بس حاول تثبت مثلا طريق سفر او داخل المدينه
3-ارجع فول تاني و شوف العربيه اخدت كام لتر
4-من قراءه الكيلومتر و بوجود عدد اللترات التي فولت بها في المره الثانيه تقدر تحسب معادله و تطلع العربيه بتعمل كام لتر في الصفيحه

متحاولش تعتمد علي شرط تانك البنزين في حساب الاستهلاك
انا فرحان ان الناس نشيطه و بتتفاعل

[SharpArrow]

اوكي اول ما اعمل الموضوع ده هحسبها و ارد على طول ان شاء الله
بس مجملا هي استهلاكها حلو جدا جدا
انا قعدت فترة اسوق اللانسر عشان مكناش معايا عربية لمدة شهرين قبل ما اشتري البونتو
يمكن البونتو اقل استهلاكا
بس ان شاء الله هجيبهالكو بالارقام

اي اوامر :)

[fahd_628]

انا ركبتها مع واحد صاحبى و بجد كنت فاكرها حتبقى ضعيفة و كدة لكنها ما شاء الله عليها بتسحب كويس اوى و جميلة جدا

و زرار السيتى دة بيخلى الدريكسيون خفيف بجد

و استهلاكها للبنزين حلو اوى

[amir]

شاكرين مهللين
و بالنيابه عن اعضاء المنتدي بشكرك جدا و اتمني ان تتوسع في ابداء رائيك عن البونتو لأن ناس كتيره بتسأل علي كل حاجه فيها و محتاجين معلومات اكتر

[SharpArrow]

السلام عليكم
انا بس احب اطمن اللى عايز يشتري العربية البونتو
انا قبل ما اشتري كنت برضه محتار شوية بس بعد كده ادركت ان البونتو احسن من الباليو بكتير جدا جدا و تستحق كل قرش ادفع فيها فعلا
انا مش متحيز للبونتو بدليل ان محدش اعرفه جابها
بس انا جبتها عشان هي تقفيل ايطالي ده غير سمعتها من اول موديل ليها و الناس بتحبها و تعتبرها عربية محترمة
كل الفكرة ان المستهلكين في مصر معظمهم مبيحبوش الهاتش باك و يقولك طب بدل ما ادفع 70000 في عربية هاتش باك ما اجيب لانوس او فيرنا او سيينا و يبقى معايا عربية سيدان
عشان كده العربيات دي منتشرة جدا
و لو تلاحظو وجودهم دايما عند الميكانيكي و خصوصا اللانوس و الفيرنا
و البونتو نادر جدا انك تلاقيها حتى الموديلات القديمة منها عند الميكانيكي
كل الموضوع ان البونتو ملهاش شعبية بسبب انها هاتش باك انما هي طبعا انضف و اقوي من اللانوس و الفيرنا والسيينا و الباليو و اولهم بسبب التقفيل
و مفيش حاجة غالية على الفاضي - الغالي تمنه فيه.
و مع نفس الوقت قطع الغيار زي اللانوس و الفيرنا تقريبا و منتشرة يعني مش هتفرق في حاجة بالنسبة للمصاريف
يمكن في سعر اعادة البيع هتفرق شوية مع ان البونتو بياعة بس مش زي اللانوس والفيرنا و ده بسبب انتشارهم فا كل الناس عرفاهم اكتر من البونتو زي هنا في المنتدي مش ناس كتير عارفة عنها حاجة و هكذا
اتمنى ان المعني اللى اقصده يكون وصلك و في الاخر ده قرارك انت تشتري الحاجة المناسبة و اللى انت مستريح نفسيا ليها.
و ربنا يوفقك مرة تانية :)