بونتو نوفا2009-2008 ؟؟؟specificaions

[princex1]

الله يباركلك فيها و عقبال الليون و بعدها البورش بس ماتنساش تقيمهم و تكسب فينا ثواب

[Kate]

بالنسبة للاستهلاك هي ما شاء الله انا خدتها يوم الاحد 1 فبراير و فولتها
ملاحظة: التنك بتاعها 50 لتر
فولت في المعادي و انا ساكن في اكتوبر
مشيت لحد دلوقتى حوالي 130 كيلو متر و استهلكت تقريبا من 3 لـ 4 لتر بالكتير لان المؤشر كان على شرطة الـ Full و نزل ما يعادل سمك شرطة الـ Full يعني حاجة لا تذكر تقريبا
فا استهلاكها ما شاء الله ولا حاجة رغم ان عزمها محترم جدا ما شاء الله
و نسيت اقول ان فيها حاجة ان انت عندك امكانية حساب المشوار طوله كام كيلو و استهلاك البنزين فيه قد ايه بس انا لسه مستخدمتوش صراحة.

و انا لاحظت يا استاذ امير انك معاك صني
انا كمان حمايا معاه صني و سوقتها و بجد و انت بتسوق البونتو تحس انك سايق صني بس على صغير سنة و ده كان تعليقي انا وواحد صاحبي لما جربها برضه
بنفس السلاسة و السهولة و النعومة و تقريبا حتى نفس صوت الموتور

هي بس فيها عيب صغير معرفش العيب ده موجود في الباليو ولا لا
ان العزل بتاعها عن العالم الخارجي مش متقن
يعني تحس بالمطبات شوية بس مش اوي مش زي الشاهين مثلا (انا كان عندي شاهين زمان) بس اقل من الصني شوية
قول الصني مثلا عزلها 95%
البونتو يمكن 80% او 75% تقديريا
بس هو ده العيب الوحيد اللى انا شايفه لحد دلوقتى

طبعا زي اي هاتش باك: الكنبة بتتني لقدام عشان الشنطة توسع
انا طولي حوالي 180 سم
رجعت الكرسي الامامي للخلف للأخر خالص و قعدت في الكنبة وراه كنت مستريح
رجلي كانت لامسه الكرسي من ورا بس مكنتش مزنوقة او محشورة انما مستريحة
و انا من محبي اني ارجع الكرسي لورا بحيث اسوق و انا فارد دراعي تماما
و كان معايا لادا قبل كده كنت بحتاج ارجع الكرسي لورا تماما عشان اعد مستريح انما البونتو مبحتاجش ارجعه لورا تماما (بمعنى انها اوسع من اللادا و الشاهين كتير) انما اصغر من الصنى بنفس نسبة العزل تقريبا.

الجنوط 14 بوصة ماركة بريللي
امكانية رفع و تنزيل مستوي الاضاءة الامامية.
غير ان الباور بيتقل مع السرعات العالية الا انك عندك زرار 'City' لو طفيته الباور يفضل تقيل على طول سواء سرعة عالية او منخفضة.

و دي شوية صور عندي

http://up.arabseyes.com/upfiles/GAb66020.jpg

http://up.arabseyes.com/upfiles/X4O66161.jpg

http://up.arabseyes.com/upfiles/5gD66248.jpg

http://up.arabseyes.com/upfiles/IKP66315.jpg

و اي اسئلة ابعتولي و انا ربنا يقدرني و ارد عليها ان شاء الله

انا بس كان ليا استفسار صغير عن التانك هو 40 ولا 50؟؟ اصلى على طول بفول 40 و ده بيكون نهايته !

[nnff909909]

ربنا يبارك للي اشتراها
لكن أنا سؤالي ... هل يوجد بها airbags

[SharpArrow]

السلام عليكم
ااسف على التأخير في الرد
هو انا خدتها من الاجانس و كان فيها تقريبا من 3 ل 4 لتر بالكتير لانها كانت على الزيرو تقريبا
و لما رحت فولت عملت 47 لتر ده غير اللى كان فيها
هو انت معاك الموديل الاخير ولا موديل اقدم

و بالنسبة للايرباج فهي فيها 2 ايرباج

و بالنسبة لاستهلاك البنزين انا لسه معملتش التجربة لحد دلوقتى لاني مطلعتش لطريق طويل بيها لحد دلوقتى
بس انا هقولكو تقريبيا حسب اللى عندي
الحمد لله موشر البنزين في اللحظة اللى كتبت فيها الكلام ده كان على النص بالضبط يعني استهلك 25 لتر و انا حاليا عامل 364 كيلو متر و كل ده جوه المدينة مش على طريق سريع.
ملحوظة: 364 كم دول غير الكيلو مترات اللى كانت عملاها و انا واخدها من الاجانس, عشان متفتكروش اني مزود ولا حاجة
و اوعدكو اول ما اعمل التجربة دي هباشركو بالاخبار ان شاء الله

سلام عليكم

[amir]

مش لازم تطلع طريق طوالي
انت بس فول التانك و صفر العداد و بعدين امشي جوا البلد طريقك العادي بدون تكييف و بعد ما تعمل 150-200 كيلو كده روح فول التانك تاني و هات رقم الكيلومتري اللي قطعته و خدت قد ايه بنزين
الموضوع ده مرتين تلاته و يبقي عندك متوسط الاستهلاك جوا البلدبدون تكييف (بس حدد نوع قيادتك عنيفه او هادئه) و هكذا

و متنساش الصور بقي
و ربنا يكرمك

[dodyrisk]

هذة أول أيامى فى هذا المنتدى
وسعيد جدا بردودكم الجميلى التى هى دافع قوى لنا قبل شراء اى سيارة

بخصوص البونتو انا أفاضل بينها وبين البرلينس Frv ؟
ياريت تردوا علينا يا شباب واللى معاة العربية يقولنا سعرها الحالى ومكان وجدها فى القاهرة لانى رحت المصرية وسمير ريان مشفتهاش

[SharpArrow]

السلام عليكم
انا شفت البريليانس Frv عربية تحفة جدا ما شاء الله
بس اراء الناس متضاربة
شوية يقولو انها تقفيل الشركة البافارية و شوية يقولو انها تقفيل صيني
انا قلقت بصراحة و عشان ضامن البونتو جبتها
بس لو الـ Frv تقفيل البافارية يبقى عربية جامدة و ممكن تجيبها
انما لو تقفيل صيني يبقى اصرف نظر عنها و بص للبونتو
ده رأيي
و ياريت حد يفيدنا عن تقفيل العربية دي لو هو متأكد 100%

[amir]

ياريت تردوا علينا يا شباب واللى معاة العربية يقولنا سعرها الحالى ومكان وجدها فى القاهرة لانى رحت المصرية وسمير ريان مشفتهاش

العربيه frv موجوده عند سمير الريان
لسه شايفها من يومين باليل
و فعلا شكلها رائع

[nnff909909]

سؤال آخر معليش
الضمان كام ؟؟
وهل من الاجانس مديك ضمان اوماترا ؟؟
العربية مكتوب عليها اوماترا ولا لأ ؟؟
وشكراااا

[dodyrisk]

العربيه frv موجوده عند سمير الريان
لسه شايفها من يومين باليل
و فعلا شكلها رائع

شكرا لردك يا غالى
وانا كمان لسة شايفة من أسبوع هناك وأظن انها نفس العربية .
بس خايف أجيبها أوى ودلوقتى أتجهت أتجاة تانى لــ الفيات أو ستروين

[SharpArrow]

الستروين

السلام عليكم
انا كمان كنت بفكر في الستروين C3 بس لقيت ناس كتير اوي بيقلولي ان العربية حلوة بس مشاكلها انها مش ثابتة على الارض و حوادثها كتير و خصوصا على السرعات العالية
انا سافرت اسكندرية يوم الثلاثاء اللى فات يوم 10 فبراير (يوم العاصفة و البهدلة) كانت العربية راسية جدا ما شاء الله و ماسكة في الارض كويس اوي
يعني بخلاف اللى بسمعه عن الستروين تماما
انا مش متأكد من موضوع الستروين بس ناس كتير قالولي الموضوع ده
عشان كده انا استقريت على البونتو و الحمد لله انا مستريح فيها اوي و بحب سواقتها جدا.

[SharpArrow]

استهلاك البنزين

السلام عليكم
اسف على التأخير
انا عملت تجربة قياس استهلاك البنزين اللى استاذ امير اقترحها
انا قبل ما افول اول مرة كان الكيلو مترات 892
و لما فولت تاني مرة كانت 1380
و التفويلة التانية عملت 30 لتر
و كان مشيي معظمه عادى نسبيا مع حرق بسيط

1380 - 892 = 488

488 / 30 = 16.3 كيلو/لتر

و دي اول مرة ان شاء الله هجرب تاني و ابلغكو بالتفاصيل
و شكرا :k38:

[SharpArrow]

الضمان

السلام عليكم
بالنسبة للضمان انا اسف نسيت ارد على السؤال ده
هي ضمان اوماترا فعلا و لو اشتريتها من اي مكان هيكون فيها ضمان اوماترا, و العربية عليها بادج اوماترا.

[amir]

و كان مشيي معظمه عادى نسبيا مع حرق بسيط

1380 - 892 = 488

488 / 30 = 16.3 كيلو/لتر

و دي اول مرة ان شاء الله هجرب تاني و ابلغكو بالتفاصيل
و شكرا :k38:

شكرا ليك
16.3 كيلو لكل لتر داخل المدينه
يبقي 326 كيلو في الصفيحه داخل البلد بدون تكييف
بس لسه برضو لما تجيب قرايات تاني
و مننساش ان عربيتك لسه بتلين و ان شاء الله الاستهلاك يتحسن عن كده
و شكرا لاهتمامك

[Roka]

ana 3ayza agib 3arbya fi range 70000 ...agib punto walla FRV walla GETZ...7d y2oly 3shana ana m7tara gdn?