قطع غيار الفا روميو 156 استيراد

[mezoanwr]

السلام عليكم ...
اولا احب ارسل التحية لكل القائمين على ادارة المنتدى وايضا اعضاء المنتدى المحترمين ...
ثانيا انا حبيت اشارك بهذا الموضوع علشان ارفع الظلم عن السيارة الرائعة الفا روميو ... فى البداية انا ابتديت بسيارة 128 وبعدين كيا سيفيا وبعد كدة توالت السيارات من فيرنا الى افيو الى اوبترا كلة مستعمل ولكن فجاة حبيت اركب عربية!!! ايد دة هو كل دة مركبتش عربية الاجابة لا !!! لية بقى اقولكم علشان انا مصرى طيب يعنى اية ؟ قاعدة السوق عندنا بتقولك ( اركب ليك وللسوق ) طب يعنى اية المقولة دية يعنى لما تيجى تشترى عربية تشترى المعروف والمطلوب بغض النظر عنى انا اللى هركب العربية هل انا مرتاح ولا لأ مش مهم طيب العربية دية اعتمادية وفيها وسائل امان عالية واثق فيها -- مش مهم المهم انك تشترى ليك وللسوق .. المهم جمدت قلبى ونزلت بعت اخر عربية معايا وجبت الفا روميو 156 موديل 2000 كاملة مانيوال لونها فضى -- فى الأول كنت قلقلن من قطع الغيار والصنايعية اللى هيشتغلوا فيها بس اول ما شفت العربية وسوقتها اتعلقت جدا بيها وحسين انى فعلا اول مرة اركب بدات اسال عن قطع الغيار والورش ولقيت كله موجود جديد ومستعمل وصنايعية شاطرة جدا زى خالد امبابة فى فيص واخوه احمد والمهندس ماهر فى فيص بردة وناس فى الحفيين والوكالة واستفدت كتير من المنتدى وتجارب الاعضاء والحمد لله بقالها معايا 9 شهور مفيش اى مشكلة الا حاجات بسيطة واتحلت بسهولة اللى عايز اعرضة عليكم النهاردة هو اسعار قطع غيارها الاستيراد اللى بعد ما عرفتها اتصدمت وزاد اعجابى بيها وتعجبت على الناس اللى بيركبو عربيات منتشرة لمجرد ان اعادة بيعها سهلة طيب خدوا عندكم الاسعار وانتو بنفسكم هتحكموا : -
اسم التاجر أ / اشرف فريد من بور سعيد
موتور 1600 سىسى توين سبارك بقدرة 120 حصان السعر 3000 جنية
فتيس السعر 500 جنية
طقم دوارة عبارة عن ( كنترول + ايمولايزر + كونتاكت + 2 مفتاح اصلى ) السعر 1200 جنية
اكصدام امامى بالفوجات السعر 400 جنية
اكصدام خلفى السعر 300 جنية
عدد 2 رفرف السعر 300 جنية
شنطة السعر 200 جنية
كبوت السعر 250 جنية
فانوس أمامى السعر 150 ( للواحد )
فانوس خلفى السعر 75 جنية ( للواحد )
مراية كهرباء كاملة السعر 150 جنية
طارة الفا + ايرباج السعر 200 جنية
طرمبة بنزين 200 جنية
عدد 2 طنابير امامى 300
عدد 2 طنابير خلفى 200 جنية
عفشة كاملة امامى 1000 جنية
عفشة كاملة خلفى 800 جنية
عدد 4 باب كاملين بالفرش 800 جنية
ضفيرة كهرباء كاملة 500 جنية
عدد 4 جنوط اسبور اصلى الفا 1000
بوابة + حساس الهواء 250 جنية
شبكة امامية بالعلامة 250 جنية
علامة خلفية 200 جنية
دية معظم اسعار قطع الغيار الاستيراد اللى تحتاجه السيارة وعلى هذة الاسعار قيس باقى الحاجات وقد تختلف الاسعار فى القاهرة بالزيادة 50 الى 100 جنية والنظام انك بتتصل بالاستاذ اشرف ويبعتلك القطعة مع سواق بيجو وانت تراضى السواق ...
اللى عايز اقولة فى النهاية ان لية تركب كنبة مع انك ممكن تركب عربية بجد وبالاسعار دية بالمناسبة سعر العربية بيبتدى من 50000 الى 60000 حسب الحالة دة فى موديل من 98 الى 2000 ومن اول 2001 الى 2005 من 60000 الى 85000 مع الشكر لجميع الاعضاء والزوار وايضا الاعتذار عن اى خطا غير مقصود ... مع تحياتى

[momozozo]

بصراحة الالفا روميو عربية حكااااااية , مبروك عليك وربنا يبارك لك فيها دايما ويكفيك شرها , وعقبال ما تركبها زيرو 2015 . بالمناسبة شركة النيل الهندسية ( الوكيل الجديد لفيات والفا روميو ) فى مصر وعنوانه مدخل مدينة العبور امام كافور بجوار توكيل تويوتا , افتتح معرض ملاصق للتوكيل ونزل فيه موديلات فيات والفا روميو 2015 . بس للامانة كان فى الفا روميو موديل واحد بس وهو (جولييتا) , ونازل منها اربع فئات , بس طبعا مش عارف اقول ايه ولا ايه على جمال العربية , هى اكبر حاجة بسيطة من البرافو الاخيرة واسعار فئاتها على الاربعة على التوالى 270 - 285 - 300 - 320 , واتكلمت مع المهندسين والمسئول فى المعرض وقالولى الفترة اللى جاية خصوصا بداية من يناير 2015 هيكون فيه اهتمام بالفا روميو فى مصر من حيث التسويق والصيانات وتوافر قطع الغيار ..... ننتظر ونشوف ان شاء الله

[mezoanwr]

اشكرك على الرد وان شاء الله انا وانت نركبها زيرو ... بس انا لسة مستغرب شوية كل المشاهدات على الموضوع ومحدش علق على الاسعار المذكورة ولا حتى الناس اللى بتتجنى على العربية وتتهمها ان اسعار قطع غيارها غالية ... على العموم انا بس حبيت اوضح الصورة للناس وافيد من يريد معلومات واسعار مع تحياتى

[eng_amg]

أسعار مميزة جدااااا
وبالنسبة لسمعة السيارة فهي رائعة.

[fordpuma2000]

شكرا على المجهود و ممكن لو تعرف سعر قربة الميه كام و ياريت لو رقم استاذ اشرف و مكانو فى بورسعيد و هل عندو عفشجى و ميكانيكى كويس علشان لو حد راحلو هناك يركب الحاجه و هو واقف ؟؟

[wella3330]

ال الفا عربية محترمة بس اللي يقدرها و مايهنهاش .
مبروك و ربنا يبارك لك فيها

[mezoanwr]

اسف على التاخير دة رقم تليفون ا/اشرف (01223827648) بالنسبة للعنوان انا معرفهوش ﻻن معظم المعامﻻت عن طريق التليفون وهو بيبعت الحاجة مع سواق وانت تقابلة ... وربنا يوفق

[J A G U A R]

عربيه محترمه طبعا ومش اى حد يركبها

[tahafrg]

تسلم على الموضوع الشامل ده

الف شكر ياباشا على الموضوع ده , فعلا انت غطيت تقريبا كل حاجه وصراحه انا مكنتش فاكر الحاجه بتاعتها بالاسعار دى خالص انا , عمال ادور على واحده 2002 2003 ومتردد لكن كده اطمنت انى مش هحتاس فى قطع الغيار.


مشكووور

[pioneerahmed]

الف شكر ياباشا على الموضوع ده , فعلا انت غطيت تقريبا كل حاجه وصراحه انا مكنتش فاكر الحاجه بتاعتها بالاسعار دى خالص انا , عمال ادور على واحده 2002 2003 ومتردد لكن كده اطمنت انى مش هحتاس فى قطع الغيار.


مشكووور

حد يعرف رينج اسعارها اية الموديل دة عشان بدات تلعب في دماغي ؟

[fordpuma2000]

الف شكرا ياباشا تعبتك معايا انا هكلمو و هسالو على باقى الحاجات علشان عايز اشد العربية و هكتب اسعار الحاجات الى هسال عليها

[fordpuma2000]

انا سئلت على شويه حاجات و دى اسعارها عفشه امامية كامله شامله علبه الدركسيون 1400 عفشه خلفيه 800 بوابه الهواء والحساس ب 250 مكنه زجاج خلفى شمال 150 وان شاء الله لما اروح و اجيب الحاجات الى عايزها هجيب اسعار باقى الحجات بس انا عايز عفشجى الفا يكون كويس علشان انا ناوى اغير العفشه كلها اماميه و خلفيه بعلبه الدركسيون عايز صنايعى شاطر و المصنعيه هتبقى فى حدود كام ؟؟

[tahafrg]

حد يعرف رينج اسعارها اية الموديل دة عشان بدات تلعب في دماغي ؟

بص ياباشا انا عمال ادرس فى حوار الاسعار ده بقالى فتره , علشان لعبت فى دماغى زيك كده , ووصلت ل ان موديلات 1998 لحد 2001 من 40 الى 48 ده حسب الحاله ولو نضيفه
اوى ممكن 50

موديل 2002 لحد 2003 التابلوه الجديد من 52 لحد 60 والنظيفه اوى ممكن تكسر الرقم ده بالفين ولا تلاته وفى الغالب بيبقوا ال VIP بفتحه سقف

الاسعار دى ملخص سؤال ناس كتيير منهم واحد فى توكيل فيات والفا روميو وبتوع قطع غيار وناس بتبيع كمان.

اهه نسيت اقولك موديل بدايه من 2004 ال facelift غالى شويه عن الباقى يعنى من 75 لحد 85 وسعات بيكسر كمان بس انا شخصيا مبدورش على ده.

ربنا يوفقك وتلاقى حاجه نضيفه وانا كمان.

[pioneerahmed]

بص ياباشا انا عمال ادرس فى حوار الاسعار ده بقالى فتره , علشان لعبت فى دماغى زيك كده , ووصلت ل ان موديلات 1998 لحد 2001 من 40 الى 48 ده حسب الحاله ولو نضيفه
اوى ممكن 50

موديل 2002 لحد 2003 التابلوه الجديد من 52 لحد 60 والنظيفه اوى ممكن تكسر الرقم ده بالفين ولا تلاته وفى الغالب بيبقوا ال vip بفتحه سقف

الاسعار دى ملخص سؤال ناس كتيير منهم واحد فى توكيل فيات والفا روميو وبتوع قطع غيار وناس بتبيع كمان.

اهه نسيت اقولك موديل بدايه من 2004 ال facelift غالى شويه عن الباقى يعنى من 75 لحد 85 وسعات بيكسر كمان بس انا شخصيا مبدورش على ده.

ربنا يوفقك وتلاقى حاجه نضيفه وانا كمان.

اولا شكرا جدا على ردك الوافي المحترم
ثانيا الفرق بين ال 2002 و ال 2001 هو التابلوة بس ؟

[tahafrg]

اولا شكرا جدا على ردك الوافي المحترم
ثانيا الفرق بين ال 2002 و ال 2001 هو التابلوة بس ؟

بص ياسيدى الفرق بنهم التابلوه والتاره بها كنترولس وكمبيوتر الاعطال والرحلات واليرباج القديمه 4 وال 2002 تقريبا 8 وانظمه ثبات محسنه وطبعا سنسورس لكل حاجه علشان الكمبيوتر الى اضاف.

دى مميزات بس التكنولوجيا الزياده برده ليها عيوبها فى العربيات القديمه فى التصليح.