شوية مقارنات تخليك تقول فلتحيا اللادا

[maheralsisi]

انا معايا لادا موديل 82 روسى و بصراحة ما عملتش معايا اى حاجة رخمة يعنى يوم ما كانت تعطل عطل كبير جدا ( و نادرا ما يحدث )كنت باصلحها كلها ب 50 جنيه و مشكلة المقصات و البيض دى مش هاتظهر معاك لو بتعمل زيى يعنى كل شهر او شهر و نص اظبط و اربط و اكشف ب 20 جنيه المهم نرجع لموضوعنا :
حبيت يا سيدى ان ابيع اللادا و الله مش عشان المشاكل بس هى شكلها شوية مش شيك و قلت طيب ابيع و اجيب ايه؟؟؟؟؟ و قعدت اعمل شوية مقارنات بينها و بين بعض انواع السيارات الشهيرة و النتيجة كانت كالتالى :و هانبدا بالعيوب
1-بيض المقصات : يعنى ليه تسيبوا و ترجع تقول وحشة ده انت تقدر تبقى ماشى مطمن لو كل 3000 او 4000 كيلو تطمن عليهم ب 20 جنيه
2-عربية تقيلة : و خشنة و رخمة كمان لكن ساعة الركنة على الواقف بس انما و انت ماشى ما فيش اى فرق ده حتى عدم وجود الباور اكثر امانا على السرعات العالية و بعدين( يعنى لما تبقى طول النهار قاعد على مكتب اعتبر نفسك فى 5 رياضة و بالمرة باى و تراى و ترابيس)
3-شكلها رخم قوى : بس و الله حسبتها يعنى بدل ما اصرف مثلا 10 الاف او 15 الف علشان اغيرها ممكن قوى اصرف عليها 3000 او حتى 5000 و اللى يشوفها يتنح جنبها
انا عن نفسى شفت ناس راكبة لادا مش لادا خالص
دى اهم شكاوى الناس من اللادا صح ؟؟؟
طب تعالوا نشوف المميزات
1-وحش الطريق :يعنى اللادا و البيجو 504 ليهم هيبة خاصة على الطريق حتى من سواقين الميكروباصات (و اسالوا اللى ساكنين امبابة )فى حين انك لو راكب عربية من اياهم يبقى يعنى انت حر معاهم و ماحدش هايعمل لك حساب لانك هاتتعور لوحدك
2-برضه وحش الطريق :يعنى انا باسافر كتير جدا و عاوز اقولكوا انها بتجيب 140 مرتاح قوى (صحيح مش بتعدى 150 ) بس يعنى اهو برضه بتحميك من نفسك و لا ايه ؟؟
3-ما بتقولش لا :يعنى بنزين 80 شغال 90 شغال 95 ترقصلك فى السكة و لا ال bmw
رادياتير مية خضرة شغال مية حنفية برضه شغال زيت تعاون شغال موبيل شغال (بس المهم انت بتحب تحافظ عليها و لا لا)
4-واسعة من جوة :و ده طبعا بالمقارنة مع اقرب حاجة ليها و هى الشاهين( جرب قعدة الشاهين و قعدة اللادا ) يعنى لو متضايق مثلا من حماتك و مش عاوزها تركب معاك تانى قعدها فى الشاهين على الكنبة اللى ورا و شوف النتيجة انما فى اللادا هاتلزقلك
5-مصاريف الصيانة :مش مصدق اسال اللى راكبين يابانى و امريكانى و اوروبى كمان
6-قطع الغيار :عند البقال و اصلى و ال 5 بقرش
7-الميكانيكية :اى حد يفهم فيها و يشغلها زيها زى ال 128 بالضبط
8-جسمها جامد قوى:ما اقصدش طبعا انها مزة بس اسالو ركاب ال 128 عن عيوب الشروخات و الشاسيه
9-اماكن الصيانة :يعنى بفرض عملتها معاك فجاة فى اى مكان (الحمد لله ما حصلش معايا ابدا) و مش لاقى ميكانيكى اى سواق تاكسى يمشيها لك لحد ما تروح للميكانيكى و لو انت مفتح شوية ممكن بنفسك
10-السعر : يعنى اسال نفسك سؤال بسيط لو هى و الشاهين واحد (و ده بفرض ) ايه اللى يخلينى ادفع فرق على الاقل 10000 جنيه فى نفس العربية بس انعم شوية؟؟؟؟ ده 10000 جنيه لو شاهين يعنى مش يابانى و لا امريكانى !!!!!!

يعنى خلاصة الكلام ادى لكل ميزة من دول درجة و كل عيب درجة و قارن زى ما انت عايز
و شوف النتيجة بنفسك
و خلاصة الكلام معاك فلوس عاوز تضيعها عشان ركوبة مرتاحة و برستيج ممكن بس ما تشتكيش من انك مش لاقى قطع الغيار او الصيانة غالية او مش لاقى حد يفهم فيها
اما بقى لو انت زى حالاتى موظف و عاوز عربية اصيلة عائلية بتسافر تصونك و تحافظ عليك وواسعة و مريحة ليك و لاسرتك و عيالك (و لجيبك)


فلتحيا اللادا مليون مرة

[yahiahelaly]

مع احترامي لكلام حضرتك وموفقتي على لكن ده من وجه نظرك لكن فية وجه نظر بتقول اناعايز اركب واشتري دماغي مش ابقى ماشي ومقلق من البيض ولا يطقلي عرق وانا بلف الدركسيون عشان اركن وبحس بصراحه انها عربيه دكر كده حاجه نشفه اوي
وبرضه بلنسبه للشكل هتعمل فيها ايه هتجنط برضه هيه لادا انا مش مبحبش العربيه بس مش من وصفك تحس انها في السما
على فكره انا برضه لو اقنعتك بلاكسنت هحسسك اني راكب جاكوار اي حد كده طالما عربيته مرياحاه

[maheralsisi]

معلش ان بس نسيت اقول ان العربية ثابتة جدا على 140 مش خفيفة و لا بتعوم زى ما الناس بتقول بس اهم حاجة ما تاخدش ملفات جامدة على سرعة عالية قوى
من ضمن العيوب كمان ان قطر الدوران للعجل صغير علشان كده هى ملفاتها على الواسع
و يا ريت لو ناسى حاجة حد يفكرنى

[maheralsisi]

على فكرة ان مش باعيب فى اى عربية بس فكر كده بامانة و شوف فى شوارع مصر تنفع عربية واطية و لو حد ركب معاك تنزله عند كل مطب؟؟؟ انا قلت ان فيه عربيات كتيير كويسة لكن جمع النقط مع نفسك كده و شوف المميزات و العيوب و التكاليف و لاحظ انى فى اخر الرسالة قلت اللى معاه فلوس يجيب بس ما يرجعش يشتكى

[a7madramadan]

يـــــــــاعم الي في مصر وموش عاجباه اللادا يجيبلو هــــــامر و يريح دماغه :p

اللادا فعلا عربية أصيلة ومشكلة البيض دي الي بتحصل معاه الناس الي بتهمل عربيتاها من بداية الي راكبله 127 لحد مرسيدس شبح بيعملها صيانه دورية و بيخلي باله من كل حته فيها لو صاحب اللادا بص عليها و شاف كل شوية ناقصها اييييييه عمرها ما هتوقف معاه ولا حيقول بيض ولا اي حاجة انا اعرف والله سواق تاكسي معرفة معاه لادا 2005 كان جايبها زيرو و لحد النهاردة عمرها ما زعلته علشان بيعملها صيانه على طول بدون مبالغة بيحلفلي عمره ما اشتكى منها في اي حاجة خالص ...

[islamfathi]

انا معاكم فى الكلام ده فعلا البلد دى بجد مستهلش تركب فيها عربيه غاليا هيا الادا اللى تنفع

[waelfarid]

only LADA LADA LADA LADA LADA only

[elgentel]

كلام صح الصح

[أحمد علوان]

والله عندك حق انا معاكوهب اللادا
هاهاهاهاها
لادا لادا

[elamerstar]

على فكرة انا معايا لادا بردوا هى حمالة قسية واعطالها قليلة فى الشتاء وكثيرة فى الصيف
لكن عموما هى ليست مريحة ابدا فى السفر
وعلشان كده بافكر اغير بحاجة متينة بردوا ومكيفة وبسعر معقول ومش لاقى

[M.ABDEEN]

فعلا اللادا عربية حمالة قاسيه وبالذات القديم الواحد يخش بيها في الحيط ولا يهمه تاخد حفر ومطبات ماشي مفيش مشاكل وقطع غيار رخيصة ومتوفرة شغال واي ميكانيكي بيفهم فيها ويتعامل معاها برده تمام بس نقطة عدم توفر كماليات بسيطة زي تكييف وباور وخلافه وخاصة مع الزحمة والجو الحر بيكون مشكلة شوية لكن عربية فعلا عملية جدا

[sameh200005]

أنا عندي لادا 2107 موديل 92 روسي ..عايز أعرف لو حبيت أبيعها تجيب سعر كام ؟؟؟ أرجو الإفادة ... شكرا ،،

[ahymad]

واهم حاجة مفيهاش الطمع

[amrsharafedeen]

السلام عليكم؛ أنا متشكر جدا للأخ ماهر ووتوضيحه لمميزات اللادا و نصائحه للمحافظة عليهامما زاد ثقتى فى السيارة حيث اننى أشتريتها من 10 أيام فقط؛ وأن شخصيا عندى قناعة انها من أفضل السيارات ملائمة للطرق المصرية

[د.محمود صلاح]

موضوع هايل ومقارنة عملية جداً

التكييف فقط ما ينقصها وتبقى 100 100