ساعدوني في السواقة

[abear77]

انا عربيتي لادا 2107 و بتعلم السواقة جديد و عاوزة اقولكم اني خبطت العربية مرتين بس مضطرة ليها علشان اروح بيها شغلي و هاسافر بيها على الطريق السريع كل يوم بس المشكلة اني ببقى خايفة و باستمر في درس السواقة من 30 : 45 دقيقة و ببقى عاوزة ارجع بيها البيت علشان اعصابي بتتعب و بخاف اعمل حاجة غلط .
انا دلوقت باخد الدورانات كويس بس المشكلة ان اللي بيعلمني بيقولي لازم تدوسي على الفرامل عند كل دوران بس انا علشان لسة في الاول اصلا العربية بتكون متهدية لما بدوس على الفرامل بتقف مني و كذلك عند المطبات و بتلخبط علشان ارجع اقومها تاني ممكن تفيدوني .
و كمان في الاماكن الزحمة اعمل ايه لما العربيات كل شوية تمشي و تقف انا خايفة من الاحتكاك بالناس و عندي احساس اني دايما ها اخبط اللي امامي .

[dolly13]

اولا مبروك عليكى انك بتتعلمى السواقة
ثانيا اللى انتى بتقوليه ده معناه انك لسة ماتدربتيش كويس
صدقينى كلها كام مرة كمان فى العربية والمشاكل دى هاتنتهى
طبعا كلنا كنا كدة فى الاول وبعدين خلاص اتعلمنا وعرفنا نمشى فى السيرك بنجاح
وان شاء الله تتعلمى وتبقى احسن مننا كمان
المهم اوعى تتراجعى او تكسلى وصدقينى هى مسالة تدريب

[moma333]

متخفيش من حاجه مع الوقت ان شاء الله هتبقى محترفه اهم حاجه جمدى اعصابك ومتهتميش للى بيدى كلاكسات كتير من وراكى طالما مراعيه كل اللى اتعلمتيه ولما تيجى تدوسى فرامل المفروض تدوسى دبرياج طالما السرعه هتبطا اوى عشان العربيه متبطلش

[smsm061274]

كلنا عانينا ما تقوليه وانا شخصيا تعلمت فى مدرستين
الاولى بعدها خدت الرخصه واشتريت العربيه ومع اول منحى هوب فى العربيه المركونه
رحت اتعلمت تانى ومن كتر الضغط اللى بعانيه كنت بريح بين كل حصه وحصه يومين تلاته وبعد كده بدأت اطلع بالعربيه يوم الجمعه الصبح واخدتللى شهر كمان ودلوقتى بقيت فل الفل وبمشى زى البلاى ستيشن على البحر وبشتم الناس كمان.

[tomm]

اعطي الطريق حقه سيرى فى خط مستقيم داخل الحارة المرورية الخاصة بك و اعملى مسافة جانبية مناسبة لمرور السيارات الاخرى بجوارك بأمان.
فى حالة الزحام الشديد حاولى السير خلف سيارة امامك مع المحافظة على مسافة امان نصف طول سيارتك ليس اكثر حتى لا يكسر عليك احد للدخول امامك بشكل خطير
على ان يكون جوانب ( بوذ ) سيارتك الامامي موازى تماماً لشنطة السيارة الامامية مع السير فى خط مستقيم
ويفضل تركيب مراة صالون عريضة على مراة الصالون الصغيرة وذلك للرؤية الخلفية الافضل

[heshamzaky]

أولا ألف ميروك على العربية وكما قال لك الزميل الفاضل دوسى على الدبرياج وانتى بتهدى بس مش من الاول يعنى قبل ما تحسى ان العربية ستقف لانك لو دايسة على الدبرياج والفرامل فى نفس الوقت فى حالة الفرملة المفاجئة الجامدة العربية تكون فراملها اقل قوة لو البرياج مداس علية ثانيا حاولى ان تفصلى بين حركة اليد وحركة الرجل ودة حيجى بالتعود واحسن حاجة وانتى بتحودى معلش عودى أيدك على تحريك ذراع الاشارات يمين او شمال وفى طريق السفر بلاش جرى بالعربية حتى لو الطريق مفتوح ومفيش حد على الاسفلت الجرى بيكون بعد ما تحسى انك والعربية حتة واحدة كأنك ماشية او بتجرى على رجلك

[Mustafino]

علييى الدبرياج و الكهرباء و ما تستعجليش فى رفع رجلك من علية فى الزحمة و المطالع خصوصاً و أنتى على الأول و كمان فى الملفات... أنزليى مع حد قريب بيعرف يسوق و يكون حابب يساعدك فى يوم الجمعة الصبح و سوقى على قد ما تقدرى ممكن حتى تروحى الشغل و ترجعى.. ركبى مراية عريضة فى الصالون .. اللادا عموماً بقت أنعم دلوقت من زمان.. أما بالنسبة للسواقة بالليل بلاش دلوقت لحد ما تكتسبى خبرة أكتر بالنهار.. طبعأً خلى بالك من أخطاء من حولك.. و حافظى على أعصابك.. و أنشاء اللة تبقى تمام التمام عن قريب... د. مصطفى

[A.Saad]

http://www.nilemotors.net/Nile/35542-a.html

http://www.nilemotors.net/Nile/144102-a.html

http://www.nilemotors.net/Nile/127724-a.html

الاول تروحى اماكن فاضية تتعلمى فيها
اما تتمكنى شوية
روحى اماكن ازحم
مش ينفع من الاول تسوقى فى الزحمة
تانى حاجة
اما تهدى اوى دوسى دبرياج زى ما الاخوة قالو

الافضل تهدى قبل الدوران
وتاخدى الدوران على الاول ورجلك جاهزة على الفرامل والدبرياج

واقرى المواضيع اللى فوق ونكلم

[derfo]

ولا تشغلي بالك..زمان اول ما اشتريت العربية كنت بافكر ابيعها بعد اسبوع عشان اعصابي باظت لأني اشتريت واتعلمت في نفس الوقت..بعد فترة بتبقى السواقة دي حاجة زي افعال اللاشعور بس مع تركيز طبعا..نصيحة..خلي قلبك جامد بس عيونك صاحية وعارفة قوانين الطريق كويس. مع الوقت هتضحكي على الفترة دي..

[abear77]

انا متشكرة لكل اللي شاركوا في الموضوع و جزاكم الله خيرا و فعلا افادتوني بمعلوماتكم و كمان جمدتم قلبي و انا فعلا في وقت من الاوقات كنت بفكر ابيع العربية من كثر ما انا مش عارفة اتصرف فيها بس الحمد الله انا بحس اني احسن مع الوقت .

[heshamzaky]

انا متشكرة لكل اللي شاركوا في الموضوع و جزاكم الله خيرا و فعلا افادتوني بمعلوماتكم و كمان جمدتم قلبي و انا فعلا في وقت من الاوقات كنت بفكر ابيع العربية من كثر ما انا مش عارفة اتصرف فيها بس الحمد الله انا بحس اني احسن مع الوقت .

العفو على اية على فكرة انا معايا رخصة من 89 تقريبا وعلمت نص اصحابى السواقة بس واحنا صغيرين المدام عندى انا علمتها السواقة وكانت بتقول خلاص مش حا اتعلم دلوقتى حضرتك بنتخانق سويا علشان بتحب تدوس بنزين شوية زيادة وعاوزة تجرى بالعربية على قدر المستطاع لو انا مختش بالى

[a7madramadan]

بالنسبة للدورانات هاقولك على الطريقة الممتازة كمبتدئة عمرها ما هتغلطك خـــــالص

وانتي داخلة عالدوران قبله بمسافة موري العربية و دوسي فرامل لحد ما تبقى سرعة العربية مناسبة للدوران و بعدين لفي بالعربية وهي هادية و هاتي الأول/الثاني على حسب تقديرك لعزم العربية و سرعتك و الدوران نفسه و امشي فيه بهدوووووووووء خالص و سيبك من الي يقوللك يالله يا استاذة ويالله يا سنيورة و يزمر و قلة الادب الي الناس بقت فيها دي .... بصي قدامك و خلي بالك من مسافاتك و ربنا معاكي ;)

[د.محمود صلاح]

التدريب والممارسة لعدة شهور قبل ما تأخذي الثقة كاملة