مشكله ومش عارف لها حل

[geco]

السلام عليكم
كل سنه وانتم طيبين
معلش هاكتب بتفصيل شويه
انا عندى لادا روسى 2107 انجكشن ومكيفه وكان فيها ريداتير الومونيوم كنت اشغل التكيف الحراره تزيد بس مش بتوصل للاحمر فعملت تعديل الكوع فى التوكيل نفع الى حد ما المهم من اسبوع لاحظت ان المروحه لما بتشتغل مش بتفصل خالص والحرارة مش بتزيد ولا تقل ثابته على المؤشر اللى فى النص رحت التوكيل وقاسها بالجهاز الحراره ثابته على 99
قالو اغير حساس الحرارة اللى بيبقى فى الموتور برضه زى ما هى
وقالو اغير الريداتير بس ناس نصحونى اجيب النحاس وفعلا جبته 3 ماسورة نحاس وغيرت غطا الريداتير الوضع اختلف العربيه علشان تسخن وتوصل للعلامه اللى بتشغل المروح بتاخد وقت طويل بس لما المروحه تشتغل برضه مش بتفصل ابدا ولما اشغل التكيف الحرارة مش بتزيد
ازاى اخلى المروحه تشتغل وتفصل زى الاول لانى خايف انها تتحرق وليه الحرارة مش بتقل حتى لما بنقراها من على الجهاز فى التوكيل
شكرا

[Adham]

اعتقد انهم لغوا ثرموستات الكوعه

و شوف ثرموستات العربية

ممكن يكون تالف

[geco]

ثرموستات الكوعه ملغيه من فترة والعربيه اصبحت احسن بكتير بعد الغائها

ثرموستات العربية اللى هى حساس الحرارة اللى فى الموتور ؟؟

[Adham]

صباع او حساس الحرارة دة اللي بيدي اشارة للعداد بتاع الحرارة بحرارة العربية

الثرموستات دة اللي بيدي اشارة للمروحه تشتغل و تفصل و بيبقى في الردياتير من اسفل غالباً

[geco]

صباع او حساس الحرارة دة اللي بيدي اشارة للعداد بتاع الحرارة بحرارة العربية

الثرموستات دة اللي بيدي اشارة للمروحه تشتغل و تفصل و بيبقى في الردياتير من اسفل غالباً

صباع الحرارة كشفت عليه وسليم
العربيه مافيهاش ثرموستات فى الريداتير الاصلى الالومنيوم اللى موجود بيبقى فى الموتور وبرضه سليم
ولما بنحط العربيه على الجهاز فى التوكيل الحراره ثابته على 99 ومش بتقل رغم ان المروحه شغاله على طول

[Adham]

هي العربية لسة جديدة موديل السنة دي و في الضمان ؟؟؟

هل اعراض السخونة دي من اول ما جبتها و لا ظهرت بعدما عملت حاجة معينة في السيارة او تغيير قطعه غيار معينة؟؟؟

[kamalsalem]

معنديش فكرة عن الموديل بتاع حضرتك بس انا عندي في البولونيز كان الحل عشان المروحة تفصل اني اجيب ترموستات اعلى شوية من بتاعها ف يبقى المؤشر دايماً فوق ال90 بشوية بس هي قادرة تفصل... بس انت بتقول عندك ترموستات كوعة واتلغت.. امال العربية دلوقتي بتقيس حرارة منين؟ ترموستات الموتور وملهاش دعوة درجة حرارة المية في الردياتير كام؟

[Adham]

ثرموستات الكوعه مالوش دعوة بقياس حرارة الموتور

هو عبارة عن صمام يغلق دورة التبريد و السيارة باردة لتسخين المحرك بسرعه

و يفتح لدخول مياة التبريد للمحرك عن تخطي المحرك لحرارة التشغيل الملائمة

يعني بيحافظ على مستوى حرارة معين مناسب للتشغيل بغلق او فتح تبريد الردياتير عن المحرك

[geco]

اولا احب اشكر كل الناس وخاصه اللى تفضلو بالرد
العربيه بتاعتى لادا 2107 موديل سنه 2007 روسى 1500 سى سى وعامله 68000 كم
المشكله دى ظهرت من اسبوع بس
اخر راى من بعض الناس انى اظبط تاكيهات العربيه فهل ممكن ان دا يكون حل او التاكيهات لو مش مظبوطه العربيه تفضل الحراره فيها ثابته على 99 حتى لو شغلت لها التكيف
انا وديتها للتوكيل مرتين وكشفو على الطرمبه والثرموستات والريداتير والمروحه والكنترول كله سليم وكنا بنجرب بقطع تانيه جديده لكن المشكله موجوده لغايه ما اتخانقت معاهم لانهم مش عارفين يصلحو العربيه وبيطلبو فلوس اصلاح وكنت هابلغ البوليس

[avbasic]

تبريد مروحة الادا مش قد كده , روح لكهربائى و غير الروحة بمروحة عربية يابانى او كورى و ان شاء الله تفصل

كمان انتى حاطت ماء اخضر و الا ماء عادى ؟؟

[ahsara]

ممكن تتأكد ان التوكيل لما لغى ترموستات الكوع لغى كمان الراجع بتاع المياه السحنه فى الماتور . لانهم لو ملغوش الراجع المياه السخنه هتفضل ثايته فى الماتور وبالتالى الماتوره مش هيبرد أبدا.

إتأكد و إنشاء الله 90% هتلاقى السبب كده و هتدعيلى
بس خد بالك الإلغاء لازم يكون بواسطه طبه خشب مش قطعه شنبر عربيه

[geco]

الثرموستات اللى فى الكوع ملغيه من سنتين والعربيه كانت زى الفل المشكله ظهرت عندى من اسبوعين بس وبحط ميه خضرا
فى واحد قالى يمكن التاكيهات محمله شويه علشان كده العربيه بتسخن
واتنين تانين ميكانيكيه فتحو غطا الريداتير والعربيه سخنه بالراحه فالميا بقت تدلق بشويش برة الريداتير فقالو ان العربيه جابت جوان وش السلندر فمش عارف الكلام ده صح ولا غلط وقالو انهم هايعملوة ويكلف 300 جنيه

[Adham]

العربية لو جايبة جوان المياة تبقلل من الردياتير و العربية باردة الصبح مش و هي سخنة

يعني الصبح قبل ماتدور افتح غطاء الردياتير و بعدين دور السيارة واقف امام الردياتير و شوف هل فية ضغط طالع من الردياتير يعني بتبقلل زي الشيشة و لما تشد شلك الاكساتير هل المياة بتعمل دوامة و تتشفط لتحت و للا بتبقلل زيادة و تنطر برة الردياتير

[geco]

العربية لو جايبة جوان المياة تبقلل من الردياتير و العربية باردة الصبح مش و هي سخنة

يعني الصبح قبل ماتدور افتح غطاء الردياتير و بعدين دور السيارة واقف امام الردياتير و شوف هل فية ضغط طالع من الردياتير يعني بتبقلل زي الشيشة و لما تشد شلك الاكساتير هل المياة بتعمل دوامة و تتشفط لتحت و للا بتبقلل زيادة و تنطر برة الردياتير

فتحت غطا الريداتير والعربيه بارده ودورت العربيه محصلش حاجه وزودت بنزين برضه
اما لما العربيه بتكون سخنه الميكانيكى فتح الغطا بشويش لقى الميه بتفور شويه لكن مش بتنطر لفوق ولا فيى زيت فى الميه ولا الزيت اللى فى الموتور مخلوط بميه لكن فى ميكانيكيه بيقولو دا جوان برضه علشان فوران الميه وناس بيقولو العكس
انا عاوز اعرف هو المروحه ليها معدل كام دقيقه وتفصل وهل الريداتير النحاس 3 ماسورة وحش وهو اللى عامل المشكله دى
شكرا

[Adham]

السؤال اللي يتسأل للميكانيكي اللي فتح غطاء الردياتير و العربية سخنة و قاللك وش سلندر و تتكلف 300 جنية: علل ؟؟
ههههههههه

اي عربية لو فتحت غطاء الردياتير و هي سخنة لازم تفور مياة منها لان ضغط المياة بيبقى عالي في دائرة التبريد و دة يبان بالضغط على خراطيم المياة

انا رأيي انك تركب في العربية الردياتير الاصلي سواء كان اتنين ماسورة او تلاتة ونحاس وللا الومنيوم