النيفا... مالها وما عليها !

[Ashraf_Ibrahim]

ازيكم يا شباب
حابب اعرف معلومات عن النيفا وتقييم شامل وسريع ليها وتكاليف الصيانة والفروق بين الموديلات والشكل الحديث يبتدي من انهي موديل وكدة
ثبات العربية
اعتماديتها
استالهكها للبنزين
فعالية فتيس الغرز بتاعها
كمالياتها
كل تفصيلة مهما كنت سغيرة عنها انا محتاجها
وطبعا اسعارها لو زيرو ولو مستعملة مع موديلاتها
معلش محتاج بحث كامل عنها

[abdalah_hashem]

اللى انا شايفة انها عربية اماكن مكسرة وقوية وبتتحمل وعملية وبتاعت شغل وكمان فيها فتيس غرز تقريبا

لكن مينفعش تسافر بيها لانها بطيئة وعالية عن الارض فنظريا مش ثابتة على السرعات العالية

[Ashraf_Ibrahim]

يعني هي فيها فتيس غرز فعلا؟!
طيب مش سريعة يعني مبتمشيش على 100 مثلا؟! اعتقد صعب ان العربية متجيبش 100!
طب بالنسبة للسخونية
والبنزين وكدة !
وهل هي كاربيراتير واللا انجيكشن ؟!
ادوني معلومات عنها يا شباب اكرمكم الله

[abdalah_hashem]

دفع رباعى
اقصى سرعة فى حدود 137 كم
بابين بس
ممكن تركبلها تكييف ( دة ركبوة للماروتى مش هيتركب للنيفا :)) )
بتاعت السنادى تقريبا فيها باور
عربية عالية
اللى اعرفة انها كاربيراتير مش عارف بقى بتاعت السنادى نازلة بانجيكشن وللا كاربيراتير برضة
بس طبعا عفشتها ناشفة
انا قلت مش بتاعت سفر لانها هتسافر مش هتقول لاة بس مش سريعة يعنى هتجيب 100 عادى
بس هيبقى مقروص عليها زى اللادا العادية

[Ashraf_Ibrahim]

اشكرك على المعلومات دي

[aallmix]

العربية بتتباع جديدة دلوقتي بتوكيل شركة الأمل ب64000 جنيه
دفع رباعي
1700 سي سي
باور ستيرنج
انجكشن
تكييف
زجاج كهرباء
3 باب

[ahmedalramy]

العربية بتتباع جديدة دلوقتي بتوكيل شركة الأمل ب64000 جنيه
دفع رباعي
1700 سي سي
باور ستيرنج
انجكشن
تكييف
زجاج كهرباء
3 باب

3 باب ؟؟؟؟؟؟؟؟؟؟؟؟؟؟؟؟؟؟

[aallmix]

ايوه 2 باب امامي

وباب الشنطة اللي ورا

يبقى كلهم 3 باب

[Ashraf_Ibrahim]

هو مفيش منها 5 باب واللا ايه!؟

[aallmix]

هو مفيش منها 5 باب واللا ايه!؟

موجود بس منزلتش مصر لسه

[Ashraf_Ibrahim]

يا نهار!
منزلتش مصر!
انا شفتها على النت 5 باب وعجبتني جدا حكاية ال 5 باب دي
ممممممممممممممم
وهينزلوها امتى البهوات بقا؟!
وهل الفتيس غرز بتاعها فعال واللا هي مش دفع رباعي بمعنى دفع رباعي؟!

[aallmix]

لا هيا دفع رباعي بكل معنى الكلمة

وفتيس الغرز شغال وزي الفل

معرفش للأسف ليه مش منزلين موديل الخمسة باب في مصر

مع انه لو نزل هيتباع كويس جدااااااااااااااااا

[monzer_500]

انا كان معايا واحده 5 باب وكنت جايبها من السفارة الروسية في مصر كانت في مزاد واشتريتها منهم ..
كانت 1700 سي سي . وهاف باور وسنتر وانذار وتكييف و كانت موديل 86 لونها ابيض وبيعتها لواحد من الفيوم العربيه قويه جدا وثباتها علي الطريق ولا كلمه وفيها 3 فتيس مش اتنين .. فتيس سرعات 2 فتيس غرز امامي وخلفي .. واى حد عنده استفسار عن النيفا انا تحت امره لاني من عشاق العربيه دي ومعايا نيفا

[batigol2020]

عاوز اشتري لادا نيفا

يا جماعه انا عايز اشتري لادا نيفا تكون موديل عالي شويه
يعني اواخر التمانينات والتسعينات
ومش عارف امتا اعرف ان العربيه كويسه وماتلعبش فيها
انا شوفت واحد موديل 86 وكانت من برة حكايه
بس من جوه مبهدله شويه
وصاحبها كان طالب 19 الف
بس مافيهاش غير فتيس واحد !!!
وانا اعرف ان النيفا فيها 3 وكمان دفع رباعي
والله انا عاجباني العربيه (النيفا عموما)
بس خايف اشتريها من هنا واجري على الميكانيكيه من هنا
افيدوني افادكم الله

احمد - batigol.ahmed@yahoo.com

[monzer_500]

طيب صلي علي النبي انا هقولك علي شويه حاجت تقدر تحدد بيها مدي كفائة العربية نيفا كويس هنقسمهم 3 اجزاء
1- الجسم الخارجي للعربية
2- العفشة
3- الموتور
4- الكارونه
اولاً : الجسم الخارجي للسيارة :-
*بص للعربية من جميع الجهات كويس وشوف حالة الدهان في العرية ايه . وطبعا مافيش عربيه نيفا موديل 80 مثلا مش هتكون رشت بره الا طبعا حالات نادرة .. شوف البرومه الي في العربية ومدي تأثيرها علي الصاج من برة ومن جوه .. وخد بالك دايما دايما دايما بتلاقي برومه تحت العتب بتاع العربية وفوق العجل بالظبط وفي الدواسات بص بعينك كده او مد ايدك في الصاج من جوه عشان تتاكد بعد كده قوم واقف جنب العربية وبص لجنابها وشوف في اى فروق بين الباب و والرفرف من ورا او قدام وكلك سطح العربية شوف اى تموجات غريبه مش طبيعيه في شكل جسم العربية او كميات معجون بكثافة في مناطق معينه كده ودي تقيسها بمغناطيس . ده بالنسبه للصاج وجسم العربية . بعد كده انزل تحت العربية بنفسك او ارفعها هتلاقي في قايمين ماسكين من اول العربيه لاخرها بص يهم كويس اوي اوي او ودقق لان عاده بيكون فيهم شروخ وده مش كويس ابداًً لو لاقيت كدا سيبك منها علي طول . وبالمرة بص علي عمود الكردان والفلانشه بتاعه لو في اى تخبيط فيهم او مغير شيء فيهم جديد ومجموعه الفتيس كده من اول كرسي النص وانت طالع اطمن عليها شوفها مثبته كويس ولا لا ناقصه حاجه وهزها بايدك كويس اوي وشوف اذا كان في تسييل زيت من الفتيس كدا بالمرة وانت تحت العربية وبص في حوض العربيه دايما دايما بتلاقي شروخ كده من تحت علبه الدركسون في الصاج كده اتاكد انها سليمه

ثانيا -العفشة :-
بص يا سيدي عفشه العربية دي حديد في حديد لانها مصنوعه للطرق الجبليه والوعرة لكن مافيش مانع انك تتاكد منها برضوا . روح لوش العربية من قدام واضغط عليها كويس وشوف مدي العربية مت بتروح وتيجي معاكي وهل في صوت او لا الناحية الي بتنزل معاك بسهوله عن التانيه دي تبقي عفشتها حالتها مش اوي يعني ودي بتيجي بالممارسه يعني مش اى حد يعمل كده لازم يكون ركب نيفا قبل كدا وعارف كويس .. طيب نكمل ارجع بظهرك شويه لورا وبص لوضع العربية هل هيا مايله من ناحيه او متنزنه .. لو مايله من ناحيه دي تبقي العفشه فيها حالتها مش تمام .. وما تصدقش لو قالك ياعم دي سوسته او ركب لها جلده رفع . اركب العربيه وخد بها لفه خفيفه كده ولف الدركسون للاخر وشوف لو في فرقعه كده او صوت ما شابه ده يبقي البيض الامامي .. تعمد تاخد بيها مطب وشوف صوت العربيه مع المطبات هلي في خربطه او العريه خدت المطب من غير صوت الخربطه دي بص خد بالك صوت عن صوت بيفرق يعني ممكن يا صاحبي يبقي صوت علبه الشكمان وعايز يربط او الاكصدام مثلا ً.. اطلع علي العربية من ورد .. هتقول اطلع ازاى . هقولك من علي الاكصدام الخلفي يا صاحبي ماهي بتشيل بلالالالالالالالالالاوي واتهزي كدا عليها وشوف مدي استجابتها معاك بتطلع او بتنزل معاك او خشنه .. ماشي يا ريس ..

ثالثا- الموتور
دايما بتلاقي النيفا صوتها عالي وده الطبيعي يعني لو انت جاي تركب نيفا لاول مرة ما تستغربش لان ده الطبيعي .. بس اسمع بودنك او كويس نغمة الموتور هل بتعلي هل بتوطي لوحدها في تقطع في نغمه الدوران لو هو ماشي بوتيرة واحده . طبعا لو هو ماشي بوتيرة واحده ومش بيوطي ولا بيعلي ده كويس وهو داير كدا افتح غطاء الزيت وشوف لو في بخره بيضا كدا ولا مافيش . لو في يبقي نوعا ما موتور خفيف وشوف لون الزيت واسال الراجل انت مغير زيت امتي وقارن انت بقي بين لون الزيت والمدة الي هو غيره فيها و مدي احتراقه .. شوف لو في اى صهد كده خارج من الموتور وانت مشغله .. وهيا داير دوس بنزين فجاه وسيبه شوف مدي استجابه الموتور
هل طلع معاك بصور فجائه وبيعد هبط ولا ماقدرش يقوم معاك بسرعه .. شوف لو في اى لون عادم من الشكمان (ابيض او رمادي او ازرق مع سواد كدا ) باستمرار
اذا كان ابيض في جميع الظروف . فده معناه ان الميه التبريد بتتسرب لغرفه احتراق الوقود و بتتخلط معاه
اذا كان رمادي مايل للسود ده معناه انه بتحرق بنزين كتير ودي تبقي عايزة ظبطه كاربرتير من الاخر علي طول
اذا كان ازرق سماوي دي يعني انها بتحرق زيت من البنزين ودي تبقي المكنه عايزة تتحل او شنابر البساتم ودي مقرفه برضوا .. بس خد بالك انا بقولك باستمرار مش وهي واقفه كده ماشي
بعد كده خلي حد يركب مكانك ويدوس بنزين وانت فاتح الكبوت وشوف المكنه بتتهز او بتتحرك .. ده يبقي عايز كراسي مكنه او تربيط الكراسي دي كويس عشان الاهتزاز ده .. لو في العربية يقل ماشي كدا .. اما طبعا لو الموتور بيجيب ميه من الشكمان ودي في حالات نادره في النيفا اعرف ان الموتور تمام ومن غير كلام وربنا يبارك .

رابعا- الكارونه :-
الكارونه وما ادراك بالكارونه . في كارونتنين في النيفا خلفيه واماميه . وبتكون الاماميه راكبه لو في فتيس غرز شغال فيها . نيجي علي الي ورا .. نبص عليها كده وشوف لو في زيت عليه ااو مرشحه مثلا او اى حاجه من دي . وشوف الزيت اللي عليها هل هو جديد ولا قديم لو قديم يبقي بواقي اغيير زيت مثلا وما غسلش الراجل . ولو جديد يبقي حاجه من الاتنين اما هو مغير زيت جديد ليها او انها بترشح باستمرار وفي طريقها للفناء .. طيب اركب العربيه كده وامشي وشوف لو في صوت زن او خربطه او احتكاك من الكارونه الي ورا وارجع لورا كدا وشوف في صوت منها برضوا ولا لا ... واقولك اخسر شويه عشان تطمن وقوله اغير زيت للكارونه عشان اطمن منها .. لو هو رفض يبقي قلقان من حاجه اما لو وافق هيكون فرحان منت هتغير له علي حسابك .. لان في بعض التجار بيعملوا حاجت في الكارونه دي منهم لله .. يحط نشاره خشب .. قشر موز مثلا او يحط زيت ولولينا تقل عشان يمنع صوت الكارونه
منه لله الغشاش . كنت مرة بشرتي نيفا وكانت بتاعه واحد في البيت واشترها من تاجر .. ولت نروح نشكف في البنزيزنه وكده قالي مشاي مافيش مشكله وبنغير زيت الكارونه لاقين فيها نشاره خشب علي قشر موز وزيت ولولينا والله الراجل صعق .. والله .. اشتراها من حد وعمل فيه كدا .. ربنا يكفينا شر الحرام .

كفايه كده لاني تعبت من الكتابه ولو في اى استفسار انا تحت امرك