باركولي يا جماعة جبت أول عربية ليا في حياتي

[AHMED HANAFY]

مليون مبروك...اسكندرانى يعنى لازم تركب لادا (:
ربنا يكفيك شرها..نسيت تقولنا بكام؟

ربنا يخليك يا أبو مالك ربنا يخلهولك يارب وتفرح بية
هية عاملة 15 والرجل وانا بكتب العقد معاة ( هوة أول يد ليها وصاحب الرخصة وموجة في الأزهر )
قالي بص شيل 250 جنية كمان عشان انت شاب زي العسل هههههه قولتلة طيب ما نقضيها نكت وتديهالي ب 10 هههههههههههه

[El Prince]

1000 مبروك
ربنا يديك خيرها ويكفيك شرها
و بالراحه ف الأول :)

[AHMED HANAFY]

مبروك يا معلم و ربنا يكفيك شرها و شر الطريق

الله يبارك فيك يا أبو حميد ,, ربنا يكرمك يا رب

[AHMED HANAFY]

الف مبروك ربنا يعطيك خيرها ويكفبك شرها
بما انك جديد فى السواقه لازم كل يوم الصبح تبص على الميه والزيت ولازم كل فترة تشحم العربيةومتكسلش لو فى حاجه فى العربية لان الحاجه الصغيرة بتكبر
وسوق على مهلك ترجع سليم لاهلك

الله يبارك فيك يا محجوب باشا ... انت راجل تمام ربنا يخليك يا رب نصايح من ذهب
معلش سؤال رفيع بس ( ح يقولي يا بااااي ح يقرفنا اسئلة بقي ) احم احم ...
اشحمها ازاي وفين وفي أي أجزاء في العربية ؟

[YahiaAshraf]

الف مبروك يا باشا و ربنا يباركلك فيها و يحفظهالك يارب

[AHMED HANAFY]

الف مبروك يابو الاحناف بس موديل 82 وفابريكه بره جوه !!

بص علي العربيه كويس ويارب يكون اللي في دماغي غلط ربنا يباركلك فيها ويكفيك شرها واحنا معاك لو في اي حاجه انشألله نحاول نساعدك فيها

وابقي شارك معانا مش زي ناس تدخل تاخد مصلحتها وتخرج ولا حتي تقول النتيجه ايه

الله يبارك فيك يا حسانين يا صديقي ,, تصدق بالله ( يا جدع قول لا الة الا الله ) انا فلتها بمنظار وعملت عليها كونسولتة دكاترة من أقوي خبراء اللادا ( صحابي من علي القهوة ) جبتهم كل واحد ب5 جنية في الساعة ههههههههه وهما كل واحد خد جزء وطبعا النتيجة النهائية كانت عندي,,
88 % برة وجوة والله العظيم انا لازم اصورهالك عشان تتأكد بجد لقطة اللقطة ,, لآ دة انا لازم احكيلك علي القصة من أولها ,, وحنا مع بعض بقي ح نروح فين ...

[AHMED HANAFY]

1000 مبروك
ربنا يديك خيرها ويكفيك شرها
و بالراحه ف الأول :)

الله يبارك فيك يا برنس المنتدي كلة .. اية الاطلالة الحلوة دي منور الدنيا ..
بالنسبة بالراحة في الأول دة انت ح تضحك ضحك بس شوف التقرير اللي ح اعملة كمان شوية

[AHMED HANAFY]

التقرير الأول :
---------------
أول حاجة صحيت الصبح لقيتها يا عيني مش متغطية والشمس مرزوعة فيها عموديا روحت ممورها ونزلت فرامل اليد قوم اية بقي هاة
زأتها في الضل ههههههه هههه
عشان كان الصاج مولع المهم,, فتحت الباب ... بسم الله الرحمن الرحيم لقيت تكيف سخن شغال لوحدة من كتر الشمس اللي كانت علي قفي العربية قولت يا واد افتح الشبابيك وطريها شويتين
وبعدين ادور علي البتاع دة اللي بيفتح الكابوت معرفش مكانة .. جت النجدة واحد جارنا لقيتة بيسخن عربيتة زي حالاتي لادا 2105 ( ح اعمل علي تجنيدة ل جماعة المنتدي)
روحت سألة هو فين البتاع اللي بيفتح الكابوت أصل انا لسة مبتدئ راح ضاحك وقالي اهوة
المهم فتحت الكابوت ومش فاهم حاجة في أي حاجة بس كنت فاكر كلام أخويا امبارح يا واد يا أحمد شيك علي المية والزيت وشوف حاجة بتنقط تحت الماتورأول ما تصحي
طبعا انا مش عارف فين زيت الماتور وفين قربة المياة ههههههه.. بس فاكر كلام حسين الميكانيكي أنك اليومين دول سخن دور واطلع ههههههه.. علي أساس ان العربية فيها مياة خضرا وزيت ماتور متغير لسة جديد وكل الزيت زي الفل فقالي متعملش حاجة خالص يوم الجمعة اللي هوة بعد بكرة تعالالي بيهة وملكش دعوة بحاجة
تمام قولت يا واد وسطن الأمور ازاي يبقي استني أخوك محمد هوة اللي يعمل كل دة
(باختصار هههههههه شديد )
دورت انا العربية وسبتها تسخن شوية لحد ما جاة أخويا قالي شيكت علي الزيت والمياة قولتلة لآ قالي يا حلاوتك يا جمالك وراح مديني بالبوكس في (......) أحم أحم
المهم أول درس في السواقة علي يدة العربية كل شوية تبطل وتنط مني وكنت ح البس في الرصيف وباصص في الدواسة تحت وبهدلة بعيد عنكم جميعا وبهدلتة بصراحة وهو عايز يعلمني السواقة علي أصولها بس أخوكم نرفوز حبتين فقولتلة نكمل بكرة يا محمد اصل انا تعبت من السواقة ( فافي ) هههههههههه
قالي ماشي يا عم ومالة ..ورحت علي البيت
ملاحظات النهاردة :
-العربية فيها حاجة كدة قالي عليها حسين الميكانيكي وهي عمود الكردان فية مشكلة وح اعملة يوم الجمعة
- العربية في المطبات الجامدة زي الفل بس كان فية شارع مكسر سمعنا صوت حكة جامد في نص العربية ( عاملة زي واحد جاب معلقة وضرب علي حلة المونيا )
بس كدة ..
اة نسيت
الراجل صاحب العربية جابلي شهادة المخالفات والتوكيل ورخصة العربية النهاردة وسايبلي في العربية كوريك تمساح وكوريك تاني كدة والمفتاح اللي بيفكة بية الصواميل بتاعت العجل (راجل زي الفل)

الي هنا ينتهي تقريرنا ..
دمتم بصحة وسلاام وامن وما تنساش اربط الحزام

[AHMED HANAFY]

خارج ساعتين زمن كدة وجاي ... رايح عند حماتي ( رايح لقضاااة برجلية ) اوعي حد يمشي انا جاي تاني ,, سلاااام مؤقت مربع لأحلي لاادوية

[AHMED HANAFY]

الف مبروك يا باشا و ربنا يباركلك فيها و يحفظهالك يارب

الله يخليك يا راجل يا طيب ربنا يكرمك

[mahgoup]

شحم فى اى بنزينه او ساعا ت بيبقى فى اماكن بتغير زيت وبتشحم ....اللى بيتشحم البيض وعمود الكردان..انت لما تروح قوله عايز اشحم العربية وهوه عارف حيعمل ايه وانت بتشحم خليه يبصلك على زيت الحروبكس والكرونا...واحنا كلنا هنا فى المنتدى تحت امرك

[mohammed dodda]

ألف مبروك ياباشا وربنا يباركلك فيها

[AHMED HANAFY]

شحم فى اى بنزينه او ساعا ت بيبقى فى اماكن بتغير زيت وبتشحم ....اللى بيتشحم البيض وعمود الكردان..انت لما تروح قوله عايز اشحم العربية وهوه عارف حيعمل ايه وانت بتشحم خليه يبصلك على زيت الحروبكس والكرونا...واحنا كلنا هنا فى المنتدى تحت امرك

والله العظيم أنت انسان خلوق ومحترم يا محجوب باشا ..ربنا يخليك لحبايبك يا غالي
والله لولاك انا ما اعرف حاجة خالص ربنا يباركلك يا منور بصرتي

[AHMED HANAFY]

ألف مبروك ياباشا وربنا يباركلك فيها

الله يبارك في حضرتك يا محمد باشا ويباركلك حبيبي في حياتك منور الموضوع ,,

[AHMED HANAFY]

والله العظيم انتوا وحماتي ( عشان قاعدة جمبي وبتضحك ) وشكوا حلو عليا .. النهاردة انا سوقت العربية لوحدي وطلعت بالعربية من غير ما تبطل,, اية دة سحر يا ناس.. سندت سنة دبرياج مع بنزين مشت زي الفل وجبت التاني لولاش واد بتاع توك توك دخل سيق معايا في اللي يبقي قدام التاني بس انا قولت يا واد بلاش دة واد غلبان فسبتة يجري

النهاردة يوم تاريخي في حياة أخوكم / أحمد حنفي يا جماعة
سجل يا تاريخ
12/6/2013
السيارة :لادا 2105
عدد الاطارات : 4 هههههههه
الاسم الحركي للسيارة : هنا