صوت زنة فى العربية

[محمود سيد محمو]

بسمع صوت زنة فى العربية لما بكون ماشى بسرعة وبشيل رجلى من على البنزين بسمع الصوت ده واضح مش عارف ليه مع انى لسة مغير اسطوانة وديسك وبلية وفلانشة

[ibnelfared]

شوف يا أستاذ محمود فى كذا حاجة ولكن حضرتك مش موضح الزنة مصدر صوتها من قدام ولا ورا ولا فين ولكن مبدئيا هايكون الأتى وأن شاء الله تكون بسيطة :-
1- ممكن تكون الكارونة عندك ناقصة زيت أو فيها حاجة وأن شاء الله مش هاتكون .
2- أتأكد من بلى العجل كويس وأكشف عليه وشحم البليتين ألى قدام .
عمود الكردان ممكن يكون فية مشكلة يعنى ممكن تكون لقدر الله طلعت مطب عالى ورزع على عمود الكردان .
3 - الصلايب أكشف عليها وتشحمها لو سليمة .
4- كرسى النص دة مهم جداااااااااااا.
5- شوف الشكمان ممكن يكون على جسم العربية من تحت .
6- أعمل ششنة كدة على العربية كلها ممكن يكون حاجة مفكوكة مش مربوطة كويس مع السرعه تعمل صوت .
7- ودة الأحتمال الأكيد مية فى المية أن شاء الله هايكون قاعدة الفتيس ممكن تكون مش مربوطة كويس خلية يربطها كويس عشان بردة الزيت وأتأكد بردة من زيت الفتيس ونصيحة من أخوية غير الزيت كله مش هايكلفة 50 جنية الكارونة والفتيس .
شوف يا أستاذ محمود وطمنى وأن شاء الله هاتكون حاجة خفيفة بأذن الله وبردة الزملاس الأعزاء بلمنتدى هايفيدوك بردة أكتر منى .

[mohammed dodda]

رولمان بلى العجل

[محمود سيد محمو]

شكرا يا جماعة على الاهتمام والنصحية وفعلا انا هاروح اغير زيت الفتيس والكارونة
وانا شاكك فعلا فى رلمان بلى العجل

[محمود سيد محمو]

- أتأكد من بلى العجل كويس وأكشف عليه وشحم البليتين ألى قدام .
3 - الصلايب أكشف عليها وتشحمها لو سليمة .
4- كرسى النص دة مهم جداااااااااااا.

السؤال بقى لما غيرت البيض من روسى لتركى قالولى كده ما تروحش المشحمة تانى خلاص مش محتاج تشحم حاجة فى العربية ودلوقتى بتقولوا تشحيم البليتين وتشحيم الصلايب انا مش فاهم
وبعدين ايه موضوع كرسى النص ده وفين مكانه وايه وظيفته
اما الصلايب كشفت عليها وانا بغير الاسطوانة والديسك وقالى زى الفل

[ibnelfared]

- أتأكد من بلى العجل كويس وأكشف عليه وشحم البليتين ألى قدام .
3 - الصلايب أكشف عليها وتشحمها لو سليمة .
4- كرسى النص دة مهم جداااااااااااا.

السؤال بقى لما غيرت البيض من روسى لتركى قالولى كده ما تروحش المشحمة تانى خلاص مش محتاج تشحم حاجة فى العربية ودلوقتى بتقولوا تشحيم البليتين وتشحيم الصلايب انا مش فاهم
وبعدين ايه موضوع كرسى النص ده وفين مكانه وايه وظيفته
اما الصلايب كشفت عليها وانا بغير الاسطوانة والديسك وقالى زى الفل

شوف يا أستاذ محمود البيض التركى من أفضل أنواع البيض للادا وهو مش بيتشحم بس أكشف عليه كل فترة تمام ودة خاص بالعفشة .
بخصوص البليتين ألى قدام دول جوة العجل الأمامى لعربيتك بتفك العجل ويشخمهم ليك عادى ولو فيهم حاجة يغيرهم ليك وكويس الحمد لله أن الصلايب سليمة .
كرسى النص دة عبارة عن قاعدة كاوتش جواها زى رولمان بلى كدة بتحط فيها منتصف عمود الكردان وبيكون فى نص العربية وفايدتة حمل عنود الكردان وتقليل المسافة والجعد الميكانيكى على العامود فى هذة النقطة .

شوف كدة وأحنا معاك

[محمود سيد محمو]

شكرا يا باشا على الرد وعلى الاهتمام
طيب اروح للميكانيكى والا العفشجى

[ibnelfared]

شكرا يا باشا على الرد وعلى الاهتمام
طيب اروح للميكانيكى والا العفشجى

أطلع على الميكانيكى أن شاء الله وحط شحم نوعة كويس وأن شاء الله الصوت يروح

[mohammed dodda]

أنا جربت نوعين من البيض الجاف وكانوا أحسن من بعض : نوع بلغارى ممتاز جدا وقعد معايا اكتر من 15 الف كيلو وغيرته للامان فقط بنوع اسبانى ممتاز جدا برضه.....رولمان البلى لكل عجلة اتنين واحد صغير وواحد كبير ولان معظم سواقتى جرى وطرق سفر مفتوحة فلاحظت زنة زى اللى انت بتقول عليها دى فقولت اغير البلى للعجلتين اللى قدام وجبت الاتنين الكبار المانى والصغيرين ايطالى وجبت علبة شحم اسو....عايز تتأكد ان الزنة من البلى ارفع العربية ناحية العجلة اللى تشك ان الصوت منها وحرك العجلة بأيدك جامد لو سمعت الزنة يبقى تغير البليتين على طول

[محمود سيد محمو]

هأروح ان شاء الله للميكانيكى وهاخليه يعمل تشك على رلمان البلى وبالمرة اخليه يشحم اى حاجة عايزة تتشحم
يعنى من هنا ورايح ما اروحش المشحمة اجيب علبة التشحيم دى واطلع على الميكانيكى وهو يعيش حياته فى التشحيم صح والا غلط

[samehamer84]

عملت ايه لان الصوت ده عندى طمنى

[ibnelfared]

عملت ايه لان الصوت ده عندى طمنى

تم الحمد لله الأنتهاء من 70% من الصوت وكانت المشكلة فى قاعدة الفتيس ووجارى أستكمال أخفائة أصل ألى باع العربية منه لله كان ربنا يكفيكم الشر

[محمود سيد محمو]

معلش انا لسة ما روحتش عند الميكانيكى بس كلمته فى التليفون واكدلى ان الصوت ده عشان عمود الكردان عايز يتشحم

[ibnelfared]

ممكن يا أستاذ محمود بس هو يقصد كرسى النص أو الصلايب شوف وأنا معاك بردة وأن شاء الله هاتكون حاجة بسيطة

[محمود سيد محمو]

المشكلة انى روحت المشحمة اللى متعود اروحها قالولى المسدس بتاع التشحيم اللى عندهم مفيهوش المقاس بتاع عمود الكردان ده عشان المكان صغير اوى
هاشوف مشحمة غيرها ان شاء الله