عفشه اللادا

[ahmedmok]

عندى سؤال ؟؟ ليه كل شويه العفشه بتاعت العربيه اللادا عايزه يتشد عليها ....و بعد كل مشوار تلاقيها فكت تانى و الصواميل مهويه كتير ....مفيش حل للموضوع ده يا جماعه؟؟

[Mustafino]

و الله أنا كمان بضم صوتى ليك. فعلاً ضربة العربية الادا فى عفشتها رغم كل الكلام اللى بيتقال عن أنها قوية و بتستحمل و كل الكلام دة!!! نرجو حد يفدنا فى الموضوع دة.

[mohmdy]

السلام عليكم
وانا بضم صوتي معاكم
وياريت حد عنده فكرة يقولنا فعلا لية العفشة كل شوية عايزة تقريط وانا لسة مغيرها ومظبطها وبعد اسبوع واحد حاسس ان العربية مفكوكة من تحت .
افيدونا افادكم الله

[ahmedmok]

هل من اجابه على السؤال اللى محير معظم مالكى الادا

[Abdm]

يا جماعة السؤال دة لية محدش رد علية من مالكى اللادا الكرام نرجو من جميع الاعضاء المشاركة فى منتدى اللادا للمساعدة فى علاج وحل كل مشاكل اللادا التى لا أعرف للأسف لماذا لا يساعد أعضاء منتدى اللادا ومالكيها على تطوير هذا المكان

للأسف للمرة التانية بعد الاستاذ حسام ما ترك المنتدى لا أجد أى جدية أو مشاركات أو أجابات لاسئلة أغلب الآعضاء مما يؤدى الى عدم الآقبال على شراء اللادا لأن الجميع متخوف من مشاكلها التى لا يساعد اللآعضاء هنا على ايجاد حل جزرى لها أو اى تعديل أو تشجيع على شرائها بعرض المشاكل والحلول لها وكيفية التخلص من هذة المشاكل نهائى

أرجوا من ادارة قسم اللادا خاصة و منتدى نيل موتورز عامة ايجاد بعض الخبراء فى السيارة اللادا يكونو مكلفين باعادة احياء منتدى اللادا ثانية الذى يكاد يحتضر وأن يكون ذلك بأسع ما يمكن والاجابة التفصيلية على كل أسئلة الاعضاء وعمل مواضيع هامة وفعالة وعملية من خلال تجارب الاعضاء للبحث عن المشاكل و ايجاد العلاج لهذة المشاكل حتى لا يكرة الاعضاء اللادا وينفرو منها بسبب عدم وجود علاج نهائى لهذة المشاكل أو الوقاية منها أو كيفية تطوير هذة السيارة لعلاج مشاكلها وبذلك يقبل الجميع عليها

نرجو من سيادتكم التكرم بالنظر لجميع هذة الملحوظات والوصول لعلاج لها والحل لجميع المشاكل

نرجو خبراء ومشرفين للاجابة على أسئلة جميع الاعضاء بشكل علمى وعملى مع عمل موضوعات خاصة بكل هذة المشاكل والحلول لها .

أرجو جميع الاعضاء و مالكين السيارة السابقين والحاليين المشاركة والتفاعل مع الاعضاء والخبراء والمشرفين لاحياء منتدى اللادا من جديد وجعلة منتدى نشيط بعرض جميع المشاكل والحلول لها والاجابة على كل الآسئلة التى تساعد كل من يريد شرائها على الاقبال عليها . أسف على الاطالة وجزاكم الله خيرا

[x_gomgom]

انا والله اعلم من واقع تجربتي مع سيارتين لادا الاتي:
في النيفا مفيش حاجه اسمها الكلام دا خالص انا مغير خلال ال 190,000 كيلو المساعدين مرتين طقم كامل و مره امامي فقط.
اما موضوع بتفك من نحت دي عمري ما حسيت بيها في النيفا (مفيش فيها عيب البيض دا انا عمري ما غيرته الي الان العربيه موديل 1993)...
نيجي بقي للادا 2107 هي الصراحه عفشتها ناشفه شويه و مستغرب ان السوست اللي فيها رفيعه و يمكن دا سبب بيخلي ان المطبات كلها تبقي علي المساعدين و اجزاء العفشه و بالتالي يؤدي الي التفكك (انا كل 10,000 بربط عفشه هي دلوقتي عامله معايا 11000 موديل 2008)...
و ارجه و اقول ان عفشه الادا عامة حمالة قسيه عن واقع تجربتي.. احكيلكم الاتي:
كنت في مره بجري في مدق مكسر بين مزارع و كان في واحد راكب بيجو 504 و افتكرني بروش راح جري ورايا الطريق مكسر لا يتحمل سرعة 30 كيلو بالعافيه انا كنت ماشي 80!!
طبعا وسط التكسير دا كان في مطب طبعا و اكيد لبسته و اكيد انا دماغي خبطت في السقف و الحمد لله انها متفتحتش بس عملت ورم قعد 3 ايام...
اما الاخ بتاع البيجو للاسف عربيتع جابت مقاصات و فرشت علي الارض و جابت كارتيره و اتضررت جامد و الحمد لله انها وتقلبتش...
بعد ما روحت رحت لعفشجي قلت اكيد انها اتكسرت علي الاقل او في مساعد توفي نتيجه المطب و الصدمه انه قالي (المساعدين و العفشه زي الفل يا باشا انت مغيرهم امتي؟؟)
لك ان تتصور الوضع.... لكن الادا 2107 مننصحش اي حد يجرب الكلام دا بيها..
يا رب اكون افدت

[lada2010]

بصوا يارجالة مشكلة عفشة لادا دى سببها ان لازم يحدث فيها تغير لان المساعدين بوجة عامة بتضرب زيت بسرعة لانها مش بتستحمل الضغط فحل مشكلة لادا اولا نبدا صح نجيب مقص شديد زى بتاع البيجو مع سوستة ومساعدين بيجو طول تاكيد تانى مساعدين طوال لان المساعد القصر لاينفع مع لادا ابدا ودا من خلال خبراتى مع لادا اكثر من 15 سنة مساعد طول + سوسيتة تركب على حجم المساعد وتجيب مقص كويس زى بتاع البيجو يستحمل المساعدين والسوسيتة وتكون مربط على القنطرة تمام واتفرج على الكفاءة وهتنسى العفشة واوعى تسمع كلام الصنايعى الا يقول لك دى لا تنفع ومش ادى كدا ما فى النيفا عفشتها عالية وشغالة زى الفل يعنى الحل انك تعلى العربية واى خدمة انا تحت امركم فى اى حاجة عن لادا

[x_gomgom]

بس انا عندي نقطه بس حابب اعلق عليها...
لو علينا ال 2107 او 2105 انت كدا بتقضي علي العربيه من ناحية الثبات يعني مينفعش تمشي بيها فوق 90... لان الادا فعلا معرف عنها انهاا غير ثابته نهائي علي السرعات العاليه..
كمان بالنسبه للسوست او المساعدين انا مش شايف ان الطول المشكله هي والله اعلم ان السوست خفيفه (قطر الحديد المكون للسوسته) و ممكن تنحل بأنك تجيب سوست اعرض لان في الحاله الاولي الحمل كله علي المساعد و بالتالي بيخليه بالفعل طبقا لكلام حضرتك يضرب زيت...
كمان في نوع نازل من المساعدين اسمه غير حاضر في ذهني حاليا هو غاز و زيت و هو بصراحه اكفاء من المساعدين الزيت و انا مركبهم في النيفا و هما بسم الله ما شاء الله تمام ركبهم وو انساهم( ممكن تسأل محل قطع غيار علي المساعدين الغاز و الزيت)
اما موضوع المقصات دا ازاي اجيب مقص زي بتاع البيجو؟ انا اول مره اسمع الكلام دا من حضرتك يا ريت حضرتك توضح اكتر منين بنجيبهم و مين يقدر يعمل الموضوع ده ... و تقبل خالص الشكر
يا رب اكون افدت

[Truman]

بصوا يارجالة مشكلة عفشة لادا دى سببها ان لازم يحدث فيها تغير لان المساعدين بوجة عامة بتضرب زيت بسرعة لانها مش بتستحمل الضغط فحل مشكلة لادا اولا نبدا صح نجيب مقص شديد زى بتاع البيجو مع سوستة ومساعدين بيجو طول تاكيد تانى مساعدين طوال لان المساعد القصر لاينفع مع لادا ابدا ودا من خلال خبراتى مع لادا اكثر من 15 سنة مساعد طول + سوسيتة تركب على حجم المساعد وتجيب مقص كويس زى بتاع البيجو يستحمل المساعدين والسوسيتة وتكون مربط على القنطرة تمام واتفرج على الكفاءة وهتنسى العفشة واوعى تسمع كلام الصنايعى الا يقول لك دى لا تنفع ومش ادى كدا ما فى النيفا عفشتها عالية وشغالة زى الفل يعنى الحل انك تعلى العربية واى خدمة انا تحت امركم فى اى حاجة عن لادا

أنا كنت عايز أعلق على موضوع مشكلة العفشة فى اللادا (2105 - 2107 - 2104)

عن تجربة (عندى لادا 2104) المشكلة مش فى التصميم بتاع نظام تعليق العربية أكتر من أن قطع الغيار الجديدة الموجودة للعربية مضروبة و مغشوشة سواء مكتوب عليها روسى و لا صينى و لا تركى ألخ

أنا شايف الحل (هو مش مضمون أوى) أن اللى بيغير مقصات أو مساعدين يجيب مستعمل إستيراد - فى فى إسكندرية ناس كتير عندها بضاعة نضيفة - بس بشرط يكون معاك عفشجى شاطر و أمين و هو اللى ينقى قطع الغيار لإن فى المستعمل صعب أوى تعرف السليم من المتصلح إلا إذا كنت خبير
عسى أكون أفدتكم و شاكر ليكم جميعا

[x_gomgom]

هو انا عندي اعتراض علي رأي حضرتك...
هو الاستيراد دا عامة هو ما إلا مستعمل ولا عمره هيبقي زي الجديد ابدا بالذات في الحاجات المستهلكه كالعفشه مثلا...
و ببالتالي عمره مش هيبقي زي عمر الجديد و يعيش نفس الفتره.
انا متفق معاك تماماً بخصوص الغش المنتشر اللي يبيعلك الصيني علي اساس انه روسي و اللي يقولك ايطالي و هو تركي و مش معروف له بلد منشأ اصلا ولا معروف عنه مدي جودته...
بس انا شايف انك ممكن تتعامل مثلاً مع محلات محترمه و معروفه و تريح دماغك انا عامة مش بتعامل غير مع محلين و الحمد لله الى الان مشفتش منهم حاجه وحشه (ربنا يديمها نعمه)...
و يا ريت تخلي لجوئك للإستيراد عامه في اضيق الحدود و مش في اساسيات العربيه...
و تقبل مني فائق الاحترام... شكراً

[M.ABDEEN]

فعلا كلام حضراتكم مظبوط لازم كل فترة تربط عليها والقوة دي فعلا بس زمان ايام الروسي الاصلي انما العربية دلوقتي في هندي وتركي ومصري وقطع الغيار اصبحت سيئة وجودتها رديئة والتكنولوجيا المتقدمة في العفشة نراها غائبة انا كانت معاي زمان وبصراحة عانيت من المشاكل دي ورحت لطوب الارض وكل واحد تاخد منه فتاووي للصبح ولكن اجمالا المحصلة هي هي !!!!!!

[M.ABDEEN]

فعلا كلام حضراتكم مظبوط لازم كل فترة تربط عليها والقوة دي فعلا بس زمان ايام الروسي الاصلي انما العربية دلوقتي في هندي وتركي ومصري وقطع الغيار اصبحت سيئة وجودتها رديئة والتكنولوجيا المتقدمة في العفشة نراها غائبة انا كانت معاي زمان وبصراحة عانيت من المشاكل دي ورحت لطوب الارض وكل واحد تاخد منه فتاووي للصبح ولكن اجمالا المحصلة هي هي !!!!!!

انا مش بسيء ليكم ولا للعربية بس ياريت نخلينا صرحاء الادا وخصوصا الشكل القديم انتهى من زمان ومافيش تطوير فيه الا بشوية كماليات واصبحت لا تواكب التكنولوجيا والجودة في بعض الماركات ........انا كنت احد ملاك العربية دي ويا قاسيت معاي وياما قاسيت عليا ولها ذكريات جميلة معاي بس لما جائت ساعة الحسم كان الصبر نفذ وقلت كفاية كده رغم انها كانت روسي وقلت حان وقت التغيير وفعلا غيرت بنوبيرا وكيا اه قلنا نواكب التطور شوية وفعلا ارتحت من قلة المزاج ووجع الدماغ وتضييع الوقت و الفلوس مع التجار والصنايعية واصبح البال مرتاح دلوقتي وربنا يسترها .........
وفي النهاية هي كده وهتفضل كده وطالما غاب الضمير والامانة يبقى نقول على الدنيا السلام .....واسف على الاطالة وعن كلام ممكن يدايق ملاك العربية دي بس انا مقصدش خالص خالص وارجو عدم الهجوم عليا او استعدائي لانها الحقيقة بس ياريت اللي يقول الحقيقة دلوقتي ميتشنقش زي مبيحصل اليومين دول ......ولله الامر ولنا

[ggggggggg]

اللادا وسنين اللادا..... مين بيشتري لادا دلوقتي؟؟؟!!!!!!!!!

[x_gomgom]

الاخ محمد سمير انك كلامك صحيح بالفعل الادا مقصره في موضوع التطوير و موضوع الخدمه ما بعد البيع و عدم توفير قطع الغيار الصليه ....
اما بالنسبه للاخ ggggg العربيه دي ليها شرائح عريضه من المستخدمين و ميقدروش يستغنوا عنها و انا واحد منهم.
من واقع استخدامي اي عربيه من الجديد اللي طالعين بيه السما دا متاخدش في ايدي اسبوع كفايه طريق الشغل بتاعي و طريق المزرعه (عريبات كتير جديده كان اخرها هناك سنه) و الحمد لله ان العربيه دي فيها ميزه و هي في حالة الاعطال عمرها ما تخليك تفلس (50 جنيه تظبطها)...
و الصراحه لازم تدي كل عربيه حقها و دا مش معناه ان الجديد ملوش لازمه لكن له شرائح معينه بتستهلكه ( و لولا اختلاف الازواق لبارت السلع)
و تقبلوا فائق تحياتي

[M.FOUAD]

الاخ محمد سمير انك كلامك صحيح بالفعل الادا مقصره في موضوع التطوير و موضوع الخدمه ما بعد البيع و عدم توفير قطع الغيار الصليه ....
اما بالنسبه للاخ ggggg العربيه دي ليها شرائح عريضه من المستخدمين و ميقدروش يستغنوا عنها و انا واحد منهم.
من واقع استخدامي اي عربيه من الجديد اللي طالعين بيه السما دا متاخدش في ايدي اسبوع كفايه طريق الشغل بتاعي و طريق المزرعه (عريبات كتير جديده كان اخرها هناك سنه) و الحمد لله ان العربيه دي فيها ميزه و هي في حالة الاعطال عمرها ما تخليك تفلس (50 جنيه تظبطها)...
و الصراحه لازم تدي كل عربيه حقها و دا مش معناه ان الجديد ملوش لازمه لكن له شرائح معينه بتستهلكه ( و لولا اختلاف الازواق لبارت السلع)
و تقبلوا فائق تحياتي

كلام سليم جدا
الناس كلها بتبص على استهلاك العربية داخل المدنة في ناس مش عارفة الطرق شكلها في الارياف مثلا
يعني عمرك شفت عربية لادا موديل 83 الشاسية بتاعها فية مشاكل من الطريق او 504 يعني العربيات دية بقالها 25 سنة و اكثر بتتبهدل في شوارعنا و محصلهاش حاجة تعالى بص على الكوري دلوقتي اللي مغرق الدنيا بص على اول عربية نزلت مصر الاكسيل مثلا بتلاقي العربية متفككة من بعضها صحيح انت كسبان تكييف و نعومة في السواقة لكن العربية متنفعش ناس كثير
حتى الياباني القديم بص على الكورولا الثمانيات القديمة و شوف تاثير الشارع المصري عليها بص على السويفت اللي مفيش عربية منها الا لو كان الشاسية بتاعها مفلق
انا مش متحيز للادا و لا حاجة بالعكس الحمد للة البيت في اكثر من عربية باختلاف الموديلات و شايف الفرق قدام عيني
لازم نعترف اننا شعب مظهري اكثر عربية المفروض متقدرش تستحمل شوارعنا هي اكثر عربية منتشرة زي الهيونداي و احسن واحدة تستحمل الشوارع زي الشاهين و لادا هما اقل العربيات انتشارا و غير مرغوب فيهم