حدث فى مركز صيانة القطامية.. 4 أكتوبر 2010..

[mostafa123]

الإخوة الأفاضل الأعزاء
السلام عليكم ورحمة الله وبركاته
أسرد لكم اليوم ما حدث بالأمس فى مركز صيانة القطامية أثناء قيامى بصيانة الألف كم.
لا يخفى عليكم أن بعض الأخوة الأفاضل شكروا فى مركز صيانة الإسكندرية لما وجدوه من حرفية مهنية عالية مقترنة بحسن التعامل مع العملاء وقد أعتبره البعض دعاية مقنعة للشركة وهو بالطبع غير ذلك..على الجانب الأخر نحن نشير هنا إلى كوارث تحدث فى مركز صيانة القطامية شهدناها فى يوم واحد فقط فما بالكم بما لم نراه فى غيره من الأيام.... وبالتالى فأرجو ألا يظن أحد أن ما سأذكره لاحقا نقصد به التشهير بشخص بعينه أو التشنيع على مركز صيانة القطامية أو الشركة ولكن نقصد به بالأساس تشخيص الخطأ ومحاولة علاجه خصوصا وقد علمنا جدية الشركة فى علاج الأخطاء والإستماع لمقترحات وشكاوى ملاك السيارة بى واى دى.. فكما قلنا للمحسن أحسنت فيجب أن نقول للمسئ أسأت...ونتمنى أن تنظر إدارة الشركة بعين الإعتبار لما سأذكره حتى لا يتساوى المحسن مع المسئ وحتى يصل مستوى الخدمة فى جميع مراكز الصيانة إلى المستوى الذى ننشده جميعا.. إدارة وعملاء..

سأسرد لكم ما حدث مقسم على ثلاثة أجزاء تتناول ثلاث أحداث وإن شئتم فقولوا ثلاث بلاوى أو ثلاث كوارث وأترك لكم جميعا الحكم فلعلى كنت مخطئا..

الكارثة الأولى: وصلت المركز الساعة 8:30 صباحا وكانت سيارتى رقم 6 فى طابور الملاكى وكان يسبقنى مباشرة الأخ الفاضل المهندس kokyjoon وكان هذا هو سبب التعارف المباشر بيننا.. لم تمضى أكثر من نصف ساعة وكان خلفى 5 سيارات أخرى تقريبا.. بينما نحن منتظرون فوجئنا بسيارة تجاوزت الطابور ودخلت مباشرة ثم نزل منها صاحبها وتحدث مع بعض الواقفين ثم دخلت السيارة مباشرة وقد أثار هذا إنتباهنا جميعا.. لحظات وسيارة أخرى خرجت من الطابور ودخلت أيضا بواسطة الفنى .. لحظات وسيارة ثالثة خرجت من الطابور ودخلت مع شخص أخر.. أثناء هذا دخلت سيارتان فقط من الطابور وبعد فترة سيارة رابعة تجازوت الطابور ودخلت.. لم يعد بوسعنا الإنتظار لمجئ المهندس لنسأله عن هذه "الكوسة" فسألنا أحد الأفراد المسؤلين عن أخذ بيانات السيارات الداخلة ولزق أرقام الدخول عن هذه السيارات التى تجاوزتنا جميعا.. فأجابنا وقال.. هذه سيارت إستكمال أمر شغل من الأمس وعادوا اليوم لإستكمال ما تبقى بالأمس ثم قال "يعنى لو حد فيكم كان موجود إمبارح وعربيته مخلصتش هيرضى يجى يقف الطابور من أول وجديد.. مش معقول يعنى" ..

عرفتم الخدعة فين يا حضرات.. أعتقد أن هناك من يحدث نفسه ويقول وما أدراك أن هذه السيارات ليست سيارات جاءت لتستكمل أمر شغل بالأمس؟ ولماذا الظن السئ؟؟ أقول لكم كيف عرفنا.. طلبنا جميعا أن نقابل أحد المهندسين أو المسؤلين الكبار لنقص عليه مايحدث وبالفعل جاء مهندس أسمه المهندس حسن.. وأثناء شكوانا خرجت سيارة من السيارات ذات المحسوبية بعد أن خلصت شغل.. خلوا بالكم إحنا لسه ملطوعين بره والبيه خرج بسيارته مع المهندس رامز ذو الوشم على الذراع الأيسر لتجربة السيارة.. أنا أشك إنه مهندس لصغر سنه ولكنهم يقولون عليه مهندس إستقبال.. المهم المهندس حسن سأل المهندس رامز " العربية دى خلصت" قاله "أيوه" قال له "ورينى أمر الشغل".. بعد ماشاف أمر الشغل سأله المهندس حسن "بقى ده إستكمال شغل برضه" أومأ المهندس رامز برأسه دون أن يتكلم وهو مكسوف طبعا "لا".. قال له "لو سمحت مفيش عربية تدخل إلا إللى عليها الدور" ثم توجه المهندس إلينا وإعتذر عن خطأ لم يرتكبه هو وقال لنا "هدخل جوه والف على العربيات والعربية اللى مش فى الدور هتخرج" .. دقائق معدودة خرجت ثلاث سيارات وبعدها أكد المهندس حسن على الواقفين من المركز لثانى مرة مفيش عربية تدخل إلا اللى عليها الدور وأعتذر لنا لثانى مرة.. فعلا راجل محترم ..

عرفتم الكارثة فين؟؟ كلكم بيقول العربيات اللى بتدخل وهى مش فى الدور حسب الواسطة والمحسوبية.. لا والله مش هى دى الكارثة.. الكارثة هى اللى عملها مدير المركز نفسه الأستاذ محمد رمضان.. عربية من العربيات اللى خرجت كانت بتاعة واحد بيه عامل على رأى الست دى أمى "ليمونة فى بلد قرفانه" بدلة وجرافتة وقرفان مننا ومش طايق يقف لا فى الدور ولا معانا .. شاف عربيته خرجت فسأل الفنى.. العربية خلصت؟ قال لا.. قال له ليه؟ الفنى قال له معرفش.. البيه القرفان خد عربيته وهو زعلان وراح عند البراميل اللى على البوابة علشان يمشى.. مين شافه؟ قلت لى مين شافه؟ الأستاذ محمد رمضان وقال العربية دى ماشية ليه؟ راح وجرى عليه وقعد يطيب فى خاطره والأستاذ محمد رمضان بيتصل بـ"ياسر" باشا كما ناداه الأستاذ محمد رمضان.. والعربية رجعت ودخلت تانى... هنا تكلم صاحب السيارة رقم 7 فى الطابور وإعترض على اللى بيحصل فرد عليه الأستاذ محمد رمضان:" لو العربية دى حد أشتغل فيها يبقى ليك الكلام إحنا بس هندخلها وهنشتغل فى عربياتكم الأول" .. خلى بالك العربية دخلت تانى وإحنا لسه ملطوعين بره علشان إحنا مش تبع "ياسر" باشا" ولا حد فينا لابس بدلة من عمر افندى ولا جزمة لميع من "باتا" أيام عزه.. المهم يا حضرات العربية دخلت وشفناها كلنا من الصالة الزجاج فوق واشتغلوا فيها قبل عربياتنا وقابلنا المهندس حسن تانى ووعدنا أنه هينزل يشوف إيه اللى حصل.. للأسف مقدرش يعمل حاجة مش عارفين ليه.. هل لأنهم بالفعل إبتدوا شغل فيها ومينفعش تخرج إلا لما تخلص؟ ولا هل علشان هو تبع "ياسر" باشا ربنا يجعل كلامنا خفيف عليه؟؟ ولا علشان البدلة الجرافتة والجزمة اللميع مايتوسخوش أثناء الإنتظار؟ الله وحده أعلم بالسبب ثم الأستاذ محمد رمضان وطبعا "ياسر" باشا ربنا يجعل كلامنا خفيف عليه... المهم يا حضرات عربيته خلصت على ما شرب كوباية الشاى اللى الصراحة مش عارف شربها إزاى من غير ما يقرف منها زى ما هو قرفان مننا ومن الوقفة معانا.. للتوثيق فقط وحتى لا نكون ممن يلقى الكلام على عواهنه السيارة رقمها "ق هـ ع – 498" وفى الأخر زى ما قلت قبل كده الغلط هو اللى مشى غصب عننا وعين المهندس حسن نفسه.. الحكم لكم .. حتى لا أطيل عليكم فاصل ونواصل الكارثة الثانية ..

[ابو ياسمين]

أخى الدكتور مصطفى .. المحترم .. كنت أنوى الرد بعد أن تكمل حلقات موضوعك .. ولكنى شعرت بالغيظ لدرجة أنى أكتب رد مؤقت الأن .. وأقول للمسؤلين فى شركة الأمل .. أن أكبر أهانة يشعر بها عميل للشركة هى أنه يعامل بغير أحترام .. وهذا هو الوصف الوحيد لما حكاة زميلنا المحترم جدا .. والذى لا نشك لحظة فى صدق ما يقول .. وهذة التصرفات لا توضع تحت بند هرجلة فى العمل أو قلة الخبرة أو حتى أستهتار من القائمين على دخول السيارات .. لأن تصرفهم متعمد ومصرين علية حتى بعد أن أنكشف كذبهم أمام العملاء وفشل المسؤل المحترم هناك فى تصحيحة .. وأذا كان الأخ الفاضل .. sonysonia .. قد تدخل من قبل ونقل لنا رد الفاضل والمحترم رئيس الشركة .. وهو الرد الذى أشعرنا جميعا بأحترام الشركة وقيادتها لعملائها .. وشكرنا الجميع علية .. فأرجو أن ينقل للسيد المحترم رئيس الشركة .. أن موظفيك بالأستقبال ودخول السيارات .. أهدروا تماما ما تبذلونة من جهد .. ولو عوملت فى الصيانة بدون أحترام لى .. وأنا أشعر بالأعتداء على حقوقى .. فلن أكون راضيا حتى لو تمت الصيانة على أعلى مستوى .. أكتب هذا ولا أعلم بباقى قصة الدكتور مصطفى .. ولكنى لم أستطع أنتظار أكمالها ..

[hugan]

متابع باهتمام لما نشوف اخره الكوسه في البلد

[radid]

يا ريت بقية الموضوع و الله العظيم حاجة تغييييييييييييظ بجد

[ابو ياسمين]

عرفتم الكارثة فين؟؟ كلكم بيقول العربيات اللى بتدخل وهى مش فى الدور حسب الواسطة والمحسوبية.. لا والله مش هى دى الكارثة.. الكارثة هى اللى عملها مدير المركز نفسه الأستاذ محمد رمضان.. عربية من العربيات اللى خرجت كانت بتاعة واحد بيه عامل على رأى الست دى أمى "ليمونة فى بلد قرفانه" بدلة وجرافتة وقرفان مننا ومش طايق يقف لا فى الدور ولا معانا .. شاف عربيته خرجت فسأل الفنى.. العربية خلصت؟ قال لا.. قال له ليه؟ الفنى قال له معرفش.. البيه القرفان خد عربيته وهو زعلان وراح عند البراميل اللى على البوابة علشان يمشى.. مين شافه؟ قلت لى مين شافه؟ الأستاذ محمد رمضان وقال العربية دى ماشية ليه؟ راح وجرى عليه وقعد يطيب فى خاطره والأستاذ محمد رمضان بيتصل بـ"ياسر" باشا كما ناداه الأستاذ محمد رمضان.. والعربية رجعت ودخلت تانى... هنا تكلم صاحب السيارة رقم 7 فى الطابور وإعترض على اللى بيحصل فرد عليه الأستاذ محمد رمضان:" لو العربية دى حد أشتغل فيها يبقى ليك الكلام إحنا بس هندخلها وهنشتغل فى عربياتكم الأول" .. خلى بالك العربية دخلت تانى وإحنا لسه ملطوعين بره علشان إحنا مش تبع "ياسر" باشا" ولا حد فينا لابس بدلة من عمر افندى ولا جزمة لميع من "باتا" أيام عزه.. المهم يا حضرات العربية دخلت وشفناها كلنا من الصالة الزجاج فوق واشتغلوا فيها قبل عربياتنا وقابلنا المهندس حسن تانى ووعدنا أنه هينزل يشوف إيه اللى حصل.. للأسف مقدرش يعمل حاجة مش عارفين ليه.. هل لأنهم بالفعل إبتدوا شغل فيها ومينفعش تخرج إلا لما تخلص؟ ولا هل علشان هو تبع "ياسر" باشا ربنا يجعل كلامنا خفيف عليه؟؟ ولا علشان البدلة الجرافتة والجزمة اللميع مايتوسخوش أثناء الإنتظار؟ الله وحده أعلم بالسبب ثم الأستاذ محمد رمضان وطبعا "ياسر" باشا ربنا يجعل كلامنا خفيف عليه... المهم يا حضرات عربيته خلصت على ما شرب كوباية الشاى اللى الصراحة مش عارف شربها إزاى من غير ما يقرف منها زى ما هو قرفان مننا ومن الوقفة معانا.. للتوثيق فقط وحتى لا نكون ممن يلقى الكلام على عواهنه السيارة رقمها "ق هـ ع – 498" وفى الأخر زى ما قلت قبل كده الغلط هو اللى مشى غصب عننا وعين المهندس حسن نفسه.. الحكم لكم .. حتى لا أطيل عليكم فاصل ونواصل الكارثة الثانية ..

لا أتخيل أن مهمة مدير المركز مجاملة أحد على حساب عملاء الشركة وبهذا الأسلوب المستفذ و المكشوف .. وكأنة يتعامل مع مجموعة ناس لا تفهم ولا ترى مايحدث حولها .. وأقول لة أن نتيجة تصرفة الغير مسؤل .. أنة أغضب بشدة مجموعة من عملاء الشركة .. وأنة تسبب لشركتة فى نشر هذا الموضوع الذى سيطالعة ويسمع عنة عدد لا يتصورة من الأشخاص .. وكم زبون ستخسرة الشركة بسبب هذا .. وما حجم الأسائة للشركة وسط مئات من أعضاء المنتدى .. وأقول للسيد المذكور .. أذا كانت الشركة وضعتك فى هذا المكان للأسائة إلية وتدمير سمعتة .. فقد نجحت فى هذا بجدارة وتهنأتى .. وكنت ألوم أفراد الأمن أو الأستقبال أو القائمين على أدخال السيارات أو حتى الفنيين فى الصيانة .. ولكنى لا أتعجب الأن من تصرفاتهم لأنها مناسبة لتصرف القائم عليهم .. بكل أسف ..

[mostafa123]

الإخوة الأفاضل جميعا

السلام عليكم ورحمة الله وبركاته

أسف للتأخير فى سرد الكارثتين المتبقيتين لهجوم البرد المفاجئ على وإصابتى بنزلة برد... والآن إلى الجزء الثانى أو الكارثة الثانية وهى خاصة بسواق تاكسى أراه والله مسكينا جدا.. وكنت قد عاهدت نفسى أن أقص مشكلته هنا فى المنتدى لعل أحد القائمين على الشركة يطلع عليها ليعرف الجميع أن المعاملة فى مركز صيانة القطامية تقوم للأسف الشديد ليس فقط على الوسايط والمحسوبيات بل وعلى أساس طبقى أيضا..

الراجل والله كانت عيناه زائغتان وقاعد مقرفص على سلم الدخول بالتى شرت البسيط والبنطلون الأبسط والشبشب.. فربما لو كان يعرف ياسر "باشا" أو معاه فلوس يجيب حتى بدلة من وكالة البلح وجزمة لميع أى كلام من العتبة ربما لألتفت أحد فى المركز إلى شكوته كما فعلوا مع البيه القرفان اللى لابس بدلة من عمر افندى وجزمة لميع من "باتا" أيام عزه... الأخ السواق ده العربية بقالها معاه شهر واحد بس ودفع قسط واحد فقط... ظهرت عنده مشكلة مبكرة فى المساعدين الخلفية وأصبحت السيارة تحك من الخلف فى العجل مع أى حد يركب فى الكنبة الخلفية وبيسمع "تزييق" فى السيارة من الخلف.. ذهب إلى المركز أول مرة وقالوا له العربية مافيهاش حاجة هى بس عايزة تعلى شوية.. خدوها منه وعلوها ويالا يا عم طريقك أخضر..

الراجل يمشى بالعربية لاقاها عمالة تدب فى المطبات والزوايا باظت معاه والعربية بتصرخ من قدام وبرضه التزييق زى ماهو.. المهم الراجل راح لهم المركز بخصوص المشكلة دى كما قال لى 4 مرات فى شهر واحد وأخرها اليوم اللى انا كنت فيه هناك وكان هناك من الساعة كام يا حضرات؟ من الساعة خمسه ونص صباحا علشان يلحق دور بدرى ويشوف أكل عيشه.. ركنوه مع ثلاث عربيات تاكسى تانيين وقالوا له العربية عايزة تعلى تانى وهنعليها مع الثلاث عربيات التانيين.. يحاول يفهمهم يا جماعة المساعدين بايظين والعربية لو عليت تانى هتتبهدل من قدام تانى.. انت عمال تعلى من ورا وتحمل على قدام .. بعدين الثلاث عربيات التانيين دول شغالين غاز وهم بيحتاجوا يعلوا ورا علشان يعوضوا وزن إسطوانة الغاز .. إنما أنا عربيتى بنزين ومش محتاجة تعلى من ورا أساسا.. يا ناس يا هوه .. المشكلة كلها فى المساعدين.. برضه اللى فى دماغهم فى دماغهم ومصرين العربية لازم تعلى من ورا.. وطالما قلنا تعلى يبقى لازم تعلى ... وكلمتنا لا يمكن تنزل الأرض أبدا.. هو انت إيه ؟؟ فاكرنا الريس حنفى بتاع بن حميدو؟؟ خلاص هتنزل المرة دى والمرة الجاية لا يمكن تنزل الأرض أبدا؟؟ لا يا حبيبى..

المهم أحب أقول لكم إنى مشيت من المركز الساعة 2:30 وسبته لسه بيحاول معاهم وكل شوية يترجى حد فيهم يشوف عربيته ويحل مشكلته ولا حياة لمن تنادى.. الله أعلم عملوا إيه معاه فى الأخر.. هل سمعوا لكلامه وغيروا المساعدين.. ولا برضه العربية هتعلى من ورا يعنى هتعلى غصب عنه؟؟ ولا مشوه من غير مايعملوا له حاجة علشان يجى لهم يوم تانى من الساعة 5:30 صباحا ويؤذوه فى مصدر رزقه وأكل عيشه؟؟ وبعدين إذا ماكنش ده هو اللى يبقى إستكمال أمر شغل أمال يبقى مين يا باشمهندس رامز ويا أستاذ محمد رمضان؟؟ الصراحة والله الذى لا إله إلا هو... مشكلة الراجل دى عكننت على أكتر من مشكلتى اللى لسه هتسمعوا فيها العجب العجاب.. أنا اتنرفزت واتعكننت بسبب المعاملة غير الإحترافية بالمرة لهذا السائق المسكين لأنه محترم مؤدب ولا بيعرف يزعق ولا يصرخ وليس له واسطة ولا محسوبية زى "ياسر" باشا ولا لابس بدلة من عمر افندى وجزمة لميع بتاعة باتا ايام عزه زى البيه القرفان.. على فكرة الراجل مشى بالعربية لحد اليوم ده 10000 كم والمشكلة ظهرت من قبل كده بكتير علشان محدش يقول أنه هو استهلك المساعدين بكثرة الإستعمال.. ومش معقول طبعا تاكسى زيرو يستهلك مساعدين زيرو كل شهر.. ده يروح يولع فيها أحسن.. مرة أخرى حتى لا يظن أحد أننا نلقى كلام فى الهواء.. إليكم بيانات هذا السائق كاملة ونضعها بين يدى الإدارة علها تنقذه من مخالب مركز القطامية... الراجل لا يعرف إيه انترنت ولا يعرف يوصل إزاى للإدارة ووعدته إنى أفعل ما أستطيع لوجه الله فقط لتصل مشكلته للإدارة:

الإسم: حمدى أحمد أبو رحاب
رقم السيارة: رق ه - 472
رقم الموتور: 275
رقم الشاسيه: 1529
رقم التليفون: 0103835231

فاصل ونواصل الجزء الثالث والأخير وهو خاص بما يتعلق بى شخصيا.. وهتسمعوا فيه عجبا .. أثرت أنى أؤخر ماحدث معى شخصيا للنهاية لعدة أسباب: السبب الأول: ما قرءتموه فى الجزءين السابقين يتعلق بمشاكل تحدث مع جميع العملاء من وساطة ومحسوبية وطبقية أيضا فى التعامل مع العملاء والأمانة تقتضى أن نقدم مصلحة العامة على الخاصة.. السبب الثانى: أقسمت أن أعرض مشكلة السواق المسكين قبل مشكلتى لقلة حيلته وضعف قوته وهوانه على العاملين فى مركز القطامية.. السبب الأخير: ما ستسمعوه فى مشكلتى الخاصة يستحق بالفعل أن يكون مسك الختام.. وسترون.. فابقوا معنا... والسلام عليكم

[ابو ياسمين]

.. .. .. .. .. .. .. .. ..

[mostafa123]

لسه يا أخى abojessy
إمسك أعصابك وركز كده معايا فى اللى جاى
نصيحة...
كل مريض بالضغط والسكر يروح ياخد دواه ويجى يقرا المداخلة اللى جاية..

[mostafa123]

الإخوة الأفاضل جميعا

السلام عليكم ورحمة الله وبركاته

والآن إلى الجزء الأخير مما حدث فى هذا اليوم المأساوى فى مركز صيانة القطامية.. وهو الجزء الخاص بما حدث لى شخصيا.. كنت قد قصصت عليكم قصة البيه القرفان والسواق المسكين (سبحان الله قمة التناقض بين الشخصيتين) أما قصتى فقد حدثت بين قصة هذا وقصة ذاك.. أنا أسف إن القصة طويلة.. بس تستحق عناء القراءة..

كنت قد قلت لكم أن ذهبت للمركز الساعة 8:30 ودورى فى الطابور رقم 6 وقد دخلت السيارة عنبر الصيانة الساعة الحادية عشر إلا خمس دقائق بالتمام والكمال.. كنت أراقب سيارتى من الصالة الزجاج العليا وكان معى الأخ الفاضل kookyjoon يراقب سيارته أيضا.. المهم بعد ساعة واحدة فقط وفى تمام الساعة الثانية عشر خرجت سيارتى من العنبر مع فنى وقال لى خلاص يا سعادة الباشا كله تمام ... الصراحة لحد هنا لو كانت السيارة فعلا خصلت وفى هذا الوقت القياسى كان الموضوع هيبقى أهون بعض الشئ.. أى نعم فى وسايط ومحسوبيات بس برضه الناس اهم شايفين شغلهم عشرة على عشرة وبيخلصوا بسرعة والعملية ساعة ولا أثنين ياعم الحاج كأنك وقفتهم فى إشارة على الطريق السريع.. مش مشكلة يعنى وكبر دماغك.. لكن يشاء ربنا إنى أكتشف أن السيارة خرجت لى زى مادخلت وكل اللى إتعمل فيها إنهم غيروا الزيت والفلتر بس وعضة الفتيس.. طيب واحد فيكم هيقول انت عرفت إن السيارة خرجت من غير ما يتعمل فيها حاجة؟؟ هو يا أخى أنت كده دايما سئ الظن كده؟؟ ما يمكن هم عملوها فعلا وانت بتتجنى عليهم... هو انت كده على طول أسير نظرية المؤامرة؟؟ أقول لكم عرفت إزاى يا حضرات..

أولا اللى خرج لى بالسيارة واحد فنى سنه صغير وسايق العربية وقال خلاص يا باشا كله تمام ... روح حاسب.. قلت له كله تمام.. متأكد يعنى إن كل الملاحظات اتعملت؟ أنا كنت كاتب 12 ملاحظة.. ده انت لو ظبطت الزاويا وغيرت الزيت والفلتر يا دوبك هى ساعة... طيب باقى الملاحظات خلصت إمتى؟؟ ده فيه تظبيط أنوار وكشف على التكييف وسحب العربية مش مظبوط وظبط أبواب ومؤشر بنزين .. الخ.. قال يا باشا كل اللى مكتوب فى أمر الشغل خلص واطمئن.. الصراحة الفار لعب فى عبى.. وانا الفار لما يلعب فى عبى لازم اجيب له قط دكر تمسكه وإلا مش هيجيلى نوم.. قلت له ماشى أنا مصدقك.. بينا نطلع نجرب.. لا ياباشا أنا مابجربش.. المهندس بس هو اللى يطلع يجرب مع حضرتك.. طيب نجيب مهندس يجرب.. هنا قال لى أحد الواقفين تبع الشركة وهو صغير جدا فى السن ذو بشرة سمراء وجسمه مليان.. يا باشا انت هتسوقها ولو فيها حاجة هترجع لنا تانى وهنعملها.. قلت ماشى أطلع أجرب وأجى لك.. قال لى لا.. ادفع واطلع جرب ولو فيه حاجة ارجع لنا.. هنا الصراحة يا جماعة جالى شك كبير جدا إن الناس دى فاكرانى من صنف البنى أدمين أصلا.. فتحسست رأسى لم أجد اذنين طويلين.. تحسست اسفل ظهرى لم أجد ذيل.. تحسست ظهرى لم أجد بردعة.. قلت له أزاى أدفع واطلع أجرب وتقول لى لو فيه حاجة أرجع.. طيب ما انا لو دفعت وخرجت من البوابة ما كده خلاص وباى باى.. دفعى وخروجى بالسيارة من المركز معناه كل شئ تمام.. قال لى يا باشا لا طبعا لو فيه حاجة ارجع لنا على طول.. الصراحة بدل الفار الواحد بقى فيه خمستاشر فار وكلهم ماعندهمش دم وعاملين ياكلوا ويقرقضوا فيا.. قلت بينى وبين نفسى ومن غير الفيران اللى فى عبى ياخدوا بالهم طيب ابص كده على ملاحظة من ضمن الملاحظات الظاهرة فى العربية اللى مش محتاجة اجرب العربية علشان أعرف هم عملوا الملاحظات ولا لأ..

قلت أبص على مؤشر البنزين.. كان فيه ملاحظة.. لقيته زى ماهو ومتغيرش فيه حاجة.. قلت له مؤشر البنزين فى ملاحظة متعملتش.. قال لى يا باشا طالما مكتوبة فى أمر الشغل تبقى اتعملت.. سيادتك تطمئن خاااااالص.. طيب أنا مطمئن.. أعمل ايه فى الفيران اللى فى عبى.. قلت له انده لى المهندس وانا مش ماشى ولازم يشوف الملاحظة اللى ماتعملتش دى.. قال لى طيب هو هيجى دلوقت ويبص عليها تانى.. .. العربية قعدت نص ساعة برة على ما جاء المهندس رامز وبص فى العربية.. اقتنع بكلامى و قال هادخل العربية تانى وهنكشف على مؤشر البنزيت تانى وأقول لك.. قلت ماشى..يبقى كثر خيرك..

العربية دخلت وبصيت عليها من فوق وفضلت مركونة كتير من غير ما حد يحط ايه فيها.. ندهت للمهندس رامز.. قلت له لو سمحت خرج العربية ومش عايز حاجة تتعمل فيها أنا مش هفضل مستنى طول النهار... وخلاص عزمت بين وبين نفس إنى أبر بقسم كنت اقسمته على نفسى والأخ الفاضل abojessy يعلمه تماما.. قال لى معلهش هنشتغل فيه أهه.. ساعتها قلت يعنى لو كنت أخذت الحتة السموكن بتاعة جوازى وفردة شراب عملتها جرافتة وغطست الجزمة فى الزفت اللى بيسفلتوا بيه الشارع اللى جنبنا علشان تلمع وكنت كده كلت أكلة كشرى حمضان علشان أبقى قرفان زى البيه إياه.. مش كانوا يمكن خدوا بالهم منى؟؟..

أنا سامع واحد فيكم بيقول هو انت عمال تحكى تحكى... فين يا عم الحاج الدليل أن العربية ماكنش اتعمل فيها حاجة.؟؟

أقول لكم عرفت إزاى علشان تعرفوا بس إن ربنا سبحانه وتعالى أراد أن يكشفهم بأنفسهم.. بينما العبد له بيبص عليهم من الشباك اللى تحت وبيطل عليهم مباشرة منتظر الفرج ويبدءوا فى العربية.. شوية كده لقيت الكهربائى بيبص علينا من بعيد وعايز يعرف مين صاحب العربية بتاعتى.. شاورت له والراجل جه لحد عندى ومعاه أمر الشغل.. معاه إيه؟؟ أمر الشغل.. وهو بيسألنى على المشكلة فى مؤشر البنزين وبيبص على أمر الشغل قلت أبص معاه.. هو حرام يعنى ولا عورة؟؟ لقيت بالكاد ملاحظتين أو ثلاثة هما اللى اتعملوا والباقى ابيض يا ورد.. لسه ولا الهوا.. ضربت كف على كف لإن إحساسى كان صح والفار الشقى اللى فى عبى طلع فار عفريت فعلا.. إتأكدت لما الكهربائى بعد ما حلينا مشكلة مؤشر البنزين (طلع مافيهوش مشكلة على فكرة وهقول لكم بعدين ليه) بيصلح الملاحظات التانية زى النور الواطى اللى كان عالى وقال لى عايزه اعمله إزاى وبص على الأبواب والسنتر لوك.. بعد ماخلص الكهربائى العربية طلعت على التكييف علشان الملاحظة اللى فيه.. يعى انا صح اهه؟؟ العربية كانت خارجة من غير ما يتعمل فيها حاجة.. شوية واتركنت فى نص العنبر..

كنت فى هذه اللحظة وصلت لمرحلة الكتلة الحرجة زى ما بيقولوا اسطوات الطاقة الذرية.. كنت مستعد لإنفجار واللى يحصل يحصل.. ندهت المهندس رامز وقلت له لو سمحت خرج العربية مش عايز حاجة تانى فيها.. قال معلهش.. فاضل الزاويا بس وخلاص على كده.. قلت له يعنى العربية خارجة لى اول مرة من غير ما تتظبط زوايا .. إزاى يعنى تخرج كده.. كالعادة سكت ولا نطق من فوق ولا من تحت.. المهم طال انتظارى حتى جائنى بالسيارة فنى تظبيط الزاويا وقلت له خير؟؟ قال خير إن شاء الله.. العجلة الشمال كانت مفتوحة بس شوية.. يالا نطلع نجرب.. فضل هو سايق وجه واحد تانى معايا قعد قدام وقعدت أنا ورا وجربنا العربية ورجعنا.. بعد مانزلنا بصيت على العربية من جوه من ناحية كرسى السائق والحمد لله لقيت الباب عليه زيت موتور على الجزء الفبر اللى تحت الزجاج على طول والجزء الجلد اللى تحته.. تعمدت إنى أمسحه أمامه لكى يراه.. ولكن لايزال محتاج منظف خاص.. أخيرا رحت دفعت وتنفست الصعداء كما يقول اسطوات اللغة العربية ومشيت الساعة 2:30 تاركا السواق المسكين لمصيره المجهول..

أحب أقول لكم ملاحظة أخيرة علشان تعرفوا برضه طريقة تانية لو حبيتم تخلصوا بيها شغلكم بسرعة فى المركز.. على الساعة 12 كده جت سيارة فيها واحد وزوجته وماكنش فيه غيره فى الدور ودخل على طول.. حتى الأخ kokijoon قالى لى طيب هو ايه لازمتها نيجى بدرى؟؟ بدل ما نتبهدل ونيجى بدرى نيجى 11 ولا 12 وندخل وميبقاش الإنتظار كتير.. المهم الأخ kokijoon مشى قبل مايعرف ايه حصل مع الراجل ده.. الراجل لقى عربيته تقريبا بقى لها ساعة مفيش حد جه جنبها.. اشتغل لهم فى الازرق ودخل لهم جوه العنبر وهات يا خناق وزعيق وعمل لهم مهرجان وازعرينة وكان طايح فيهم..كانت النتيجة إن الراجل عربيته خلصت ومشيت قبل منى ومن الناس اللى كانوا ورايا فى الدور كمان.. عرفتم بقى تخلصوا شغلكم إزاى فى مركز القطامية.. حاجة من اتنين: يا تلبس بدلة من عمر افندى وجزمة لميع من بتوع باتا ايام عزه وتبقى تبع ياسر بيه.. يا إما تشتغلهم فى الإزرق وتقل ادبك وتطيح فيهم..

كفاية كده طولت عليكم والباب مفتوح الآن للتعليق والمناقشة لوضع حد لهذه المأساه المسماه بمركز صيانة القطامية..

أخيرا.. من حسن الحظ أن الملاحظات اللى فى السيارة تم تلافيها.. لإنى كانت ناوى فعلا على نية مهببة .. لو كنت خرجت بيها أول مرة الساعة 12 من غير ما يتعمل فيه حاجة كنت هضطر ابر بقسمى اللى الأخ abojessy يعلمه تماما..

شكرا لكم جميعا

والسلام عليكم ورحمة الله وبركاته

[ابو ياسمين]

لسه يا أخى abojessy

إمسك أعصابك وركز كده معايا فى اللى جاى
نصيحة...
كل مريض بالضغط والسكر يروح ياخد دواه ويجى يقرا المداخلة اللى جاية..

والله العظيم يادكتور مصطفى أنا عندى ضغط وسكر بجد مش هزار وأمراض أخرى لا داعى لذكرها .. وأذا كان إلى فات أهون من إلى جاى .. يبقى مينفعش الدوا .. ولازم أكتب الوصية قبل ما أقرأ الجزء الثالث .. وإنا لله وإنا إلية راجعون ..

[ابو ياسمين]

أخى الفاضل الدكتور / مصطفى .. أرسل لك تهنأتى على خروجك سالما من هذة التجربة الأليمة .. ولابد أن عملك صالح . حتى يكشف لك الله كذب العاملين فى مركز الصيانة .. وأراد بقدرتة أن لا تخرج سيارتك من هناك الا وأنت راضى عنها رغم أنفهم .. ولا أجد ما أقولة غير أن أعيد نشر جزء من شكوى طويلة كتبتها من مركز الصيانة السابق فى العباسية .. وهى منشورة فى موضوع عنوانة ( تمنيت أن أقول لصيانة العباسية شكرا ولكن ) ....... وقد نشرت بتاريخ 17 -7 - 2010 قبل أفتتاح مركز القطامية .. وجاء فى المشاركة :[gdwl] وسأقول نصيحة مخلصة وصادقة لمسؤلى شركة الأمل . أن الجميع ينتظرون ويضعون أمنياتهم على مركز القطامية الجديد . وبعد طول المعاناة مع مركز العباسية . سيكون المركز الجديد تحت المنظار . وأى خطأ سيكون فى وضوح الشمس . وكان الله فى عون من سيديرة . ومن سيعمل بة . لأنة سيبدأ وهو يحمل مسؤلية تجميل الصورة السيئة التى رأها الناس للصيانة بالقاهرة . لذلك يجب أن يعتمد على فنيين أكفاء ومهندسيين مخلصين وأدارة حديدية لاتتهاون وأعلم أن كل هذا موجود بالشركة بدليل . مركز الصيانة بأسكندرية الذى يشكر فية الجميع . فلو وجد الناس مركز القطامية على مستوى أداء مركز العباسية . ستكون هذة ضربة موجعة وقاسية لسمعة الشركة . هذة السمعة التى لن يرفعها . الا أن يكون هدف الشركة المعلن لجميع العاملين فيها .. ( الرضاء التام للعميل ) .. وهذا ليس شئ صعب لأن عندكم بالفعل سيارة رائعة تستطيع أن تواجة بقوة أى سيارة أخرى فى نفس الفئة ..[/gdwl] والأن أسأل نفسى .. هل كنا نقول كلاما فى الهواء !!!!!!

[ابو ياسمين]

السيد المحترم .. sonysonia .. أكتب لك وأنا أعلم بأنك وضعت على نفسك حمل ثقيل بأن تكون سيادتك همزة الوصل بين أعضاء المنتدى وقيادة شركة الأمل .. ولكن أحب أن أسأل سؤال واضح .. هل سيصل هذا الموضوع كاملا للسيد رئيس الشركة .. هل سيتم التحقيق فية ووضع حد لهذة الممارسات المسيئة للشركة قبل العميل .. وهل ستصله مشاركات الأعضاء .. ليعرف سيادته إلى أى حد وصلت حالة الأستياء ؟؟؟ والأهم من هذا .. ( وأقول للفاضل الدكتور مصطفى / عفوا ياسيدى فرغم معاناتك فقد أصلحت سيارتك فى النهاية .. وبأخلاق الفرسان وبكرم النبلاء .. قدمت شكوى السيد / سائق التاكسى على شكوتك شخصيا .. وأكرر السيد سائق التاكسى .. لأن تقديم الخدمة على أساس طبقى كما ذكر الدكتور مصطفى مرفوض كليا .. ( أن أكرمكم عند الله أتقاكم ) .. المهم أسأل .. هل لو أتصلنا بصاحب التاكسى سنجد أن الشركة أهتمت بشكواة وقامت بحلها .. ؟؟؟ وهذة بياناتة أعيد نشرها من موضوع الدكتور مصطفى .. [gdwl]
الإسم: حمدى أحمد أبو رحاب رقم السيارة: رق ه - 472
رقم الموتور: 275
رقم الشاسيه: 1529
رقم التليفون: 0103835231
[/gdwl]أخى الفاضل .. sonysonia .. أحب أن ألفت نظر سيادتك أن من كتب هذا الموضوع وجميع من شاركوا فية وأنا واحد منهم .. لم يفعلوا هذا الا لحرصهم على سمعة الشركة ولكشف أوجة القصور لمعالجتها .. ونحن جميعا نحمل كل التقدير للشركة ورئيسها .. ولم يكن هدف أى شخص التشهير بكم لأعضاء المنتدى .. فالواقع يقول أن من أساء إليكم من عندكم وليس منا .. ومن أهدر جهودكم من عندكم وليس منا .. ومن أحرجكم ومن تسبب فى أن زملاء لنا قرروا عدم شراء السيارة .. وأساء لسمعتها أيضا .. من عندكم وليس منا !!!!!!!!!!!!!! وشئ غريب ياسيدى الفاضل أن يكون عملائكم أحرص على سمعة شركتكم من بعض العاملين فيها !!!!!!!!! وسؤالى الأخير هو : هل سنقرأ رد قريبا يعيد لنا الأمل فى شركة الأمل ؟؟؟؟؟؟؟؟؟؟؟؟

[kokyjoon]

سلام عليكم

أعرفكم أولا بنفسى أنا أخوكم محمد (kokyjoon) اللى كنت مع الخ مصطفى فى مركز القطامية يوم 4/10

وأؤأكد لكم أن كل مادث وحكى عنه الخ مصطفى حتى ومعد رحيلى قد حدث

وغادرالمركز وانا عازم عزما أكيدا على عدم العودة وعدم السكوت على ماحدث

وبالفعل قمت بإرسال فاكس للسيد /رئيس مجلس إدارة الشركة وشرحت له ماحدث

ناهيكم عن أننى كنت ذاهب لصيانة ال ألف وليس عندى ثوى ملاحظة أساسية وأشكو منها منذ بداية شراء السيارة وكل مرة أذهب فيها للصيانة أبلغهم بها واخرج من الصيانة ولم يتم عمل شىء
تعرفو إيه الشكوى

سير البور بيسرخ لما بيكون التكييف شغال
يعنى عاوز يتشد يعنى لو انا عاوز اعملها بنفسى كنت عملتها بس كان نفسى يخيب ظنى فى مركز الخدمة الجديد

ويطلع أحسن من بتاع الدراسة لأننى كان لى معهم مشكلة كبيرة كانت وصلت لغاية الصين

وطلعت من المركز ولم يتم عمل شىء سوى تغيير الزيت والفلتر

وطبعا تأخيرى وحرق دمى ده غير المشوار

[mohamed_e36]

والله انته خليت دمي يفور من الناس ال-------- دي
مش عارف ليه الناس بقت كده كله عايز يلبس التاني العمه
بس الحمد لله انك مطوعتهمش ودفعت ومشيت ربنا يسترها معاك ومعانا

[lonedoctor]

اودان اشكر الاخ الفاضل صاحب المشاركة وجزاه الله خيرا وعوضه عما حدث له خيرا منه وفرج كربه واذهب همه وغمه اللهم امين
المشكلة التى حدثت بالرغم من امها مشكلة سيئة جدا ولا اصاب ااحدا منا مكروها الا انها اظهرت العيب الحقيقى للوكيل والذي اظنه والحمد لله عيب اخلاقى وليس تقنى
بمعنى ان الوكيل يمثل بصورة مصغرة منظومة الحياة فى مصر المحروسة بشكل عام من محسوبية واهمال وعدم احترام لادمية الناس فضلا للاهمال وعدم الدقة والاستسهال......................الخ
ولكن لما بيحبوا يشتغلوا تحت ضغط اما واحد من طرف ياسر بيه او واحد لسع وهيعمل جريمة وصوته اد كدة يبقى الشغل مظبوط وانا ارى ان الحال كما هو طالما انه الطاقم الموجود هناك فى مركز القطامية ظل كما هو ولم يتغير باناس عندهم ضمير وحط تحت هذه الكلمة الف خط
اذا فواجبنا اتغيير هذا الوضع عمل شكاوى جماعية لرئيس مجلس الادارة بالوضع الحاصل والمطالبة بتغيير الادارة الفاشلة فى هذا المكان وكذلك ارسال شكاوى جماعي للشركة الام فى الصين للضغط عليهم بقوة لتغيير هذا الوضع
وتقبلوا تحياتى