بعد سنتين من الاستخدام و المغامرات.... ال f0 ما لها و ما عليها

[S.Hasan]

متابع

[Ahmed_BYD_F0]

يا جماعة انتوا ايه رايكوا فى صاج العربية دى
علشان انا الميكروباصات والموتوسيكلات بيستهيفوا عربيتى
الحادثة الاولانية ميكروباص ريح على عربيتى الاكصدام اللى ورا دخل لجوه شوية ووديتها لسمكرى عدلة الاكصدام وخد 40 جنيه
والثانية والثالثة من موتوسيكلات الثالثة خبط العربية من وره كلبس من الاصدام من ناحية الشمال اكسر وفرق يعنى خلى سن الاكصدام يخرخ شوية يعنى حوالى نص سنتى والرابعة برده موتوسيكل خبط الرفرف الاودمانى وكسر كلبسين وخرج سن الاكصدام حوالى سنتى بره
انا ناوى اوديها لنفس السمكرى لانه نضيف
والا انتوا تنصحونى بايه

[mbebo]

هل f0 موجودة

حد يفيدني فين الاقى ByD f0

[mounnaaa]

السلام عليكم جميعاً...

انا استلمت عربيتي اواخر 2010 و كنت عملت تقرير عنها بعنوان http://www.nilemotors.net/Nile/192582-f0-1150-a.html ...
الكلام دا من مده حوالي سنتين تقريباً و طبعاً الدنيا دوارة ده تقرير نهائي بالحاله العامة لما لمسته من ايجابيات و سلبيات في السيارة كمجمل بعد 34000 كيلو من الأستخدام:

*-* الإنطباع العام:- العربيه من قئه ال City car و بجد تنفع العائلات الصغيره المكونه من 3 او 4 افراد. اقنصادية و موفرة جداً في البنزين . وطبعاً للشباب و شكلها جميل جداً بالمقارنه بالسيارات اللي في فئتها...

-*- الموتور: هو اتنين كامه 12 صباب ثلاثه سلندر الف سى سى صيني الصنع سير الكاتينه بتاعه جنزير و بيطلع حوالي 60 حصان او اقل قليل . وبعد استخدام سنتين و سفر لم الاحظ أي فرق في الاداء و الحمد لله عمرها ما عملت حركة نقص معايا... الموتور به رعشه بسيطه جداً و ده طبعاً عشان ال 3 سلندر و جربت السيريون وان برضه بس الصراحه الرعشه اقل بس فارق السعر كبير....النسبه لاستهلاك البنزين بصراحه هي اقتصاديه للغايه انا سافرت بيها و حسبتها اخدت 23 لتر و عملت 407 كيلو (يعني حوالي 17 كيلو في اللتر) و بسرعه تتراوح بين 100 -120 . و التنك بتاعها 30 لتر. و تم تغير حساس idle وtps و حساس الكرنك في الضمان طوال فترة العامين ودول عطلوا لوحدهم طبعاً مش في يوم واحد أنا كنت ولعت في نفسي و هم كانوا بيخلوا العربيه بتف بنزين بس الحمد لله التوكيل غيرهم في الضمان.

-*- العفشه :- العربية متماسكة جداً على الطريق و عفشتها مش ناشفه و ثابته جداً لحد سرهة 120 مع تحفظي على أبعاد الكاوتش الاصليه . اما عن تجربتي معاها فهي بتحتاج تربيط كل شهرين او تلاته مع العلم أني مركب جنوط أكبر من المقاس المعتمد ليها و دا السبب غي انها بتفك و طبعاً بقت ناشفة بعد الجنوط . العربيه حالياً بتنزل بباور مع اني مش شايف انها محتاجه اليه العربيه دريكسيونها خفيف و سلس. السايارة لو ركب فيها اربع اشخاص بتهبط مع العلم ان العربيه أصلاً واطية على الأرض..

-*- الفرامل : تقيمي ليها انها جيده بعد تجرية عامين. و لتحسن الاداء بصراحه أنا ركبت طقم جنوط و بقت ممتازه( مقاس السيارة الاصلي 165/70/14 و انا ركبت 195/55/15) بس على حساب راحة الراكب لان العفشه بقت ناشفة.

-*- التفيل: الصراحه تقفيلها جيد جداً وبعد تجربة عامين لسه معجب بالتقفيل.الكاسيت اسطوانات (audio only) و راديو ووصله AUX لو هتوصل IPOD OR MP3 و فيها سماعتين في التابلوه مخفيين فيه بطريقه شيك جداً ويعيب الكاسيت أنه الاسطوانات audio only ولا توجد فتحة USB فالطريقة الوحيده هي ال AUX لو عايز تسمع اغاني. العربية للعلم مغيهاش ولاعه وغالبا في موديل 2012 نزلت بولاعة...البابين اللي ورا القزاز بتاعهم شراعه بتتفتح للخارج و شكلهم شيك جداً بس العيب لو حد قاعد ورا وحب يشرب سيجاره توقع انه هيطفي يا في الكنبه يا في الارض.الصالون يسع لاربع اشخاص متوسطين الحجم (لكن لو انت زي حالاتي من اللي برجعوا الكرسي لاخر المجرى و بيريح الظهر سنه اللي هيقعد وراك لو قعد هيدعي عليك) لكن في الوضع العادي بتاخد 4 اشخاص و طبعاً عشان بتهبط لو اربع اشخاص اوزان و هي عمليه جداً و تقدر تقول انها سيارة أسرة صغيرة. طبعاً الشنطة صغيرة جداً تشيل اتنين هاند باج متوسطين الحجم فوق بعض او شنطة سفر واحده متوسطة الحجم و شنطه هاند باج. و الكنبه يمكن طيها بس بتفك مسمارين فيها من كل جنب.

*-* النكييف:- التكيف جيد جداً طول ما أنت مش في زحمة خانقة ولا واقف في إشارة طويلة بيقي تلاجه. أما لو وقفت في إشارة في الزحمة و الدنيا حر التكييف بيبقي ضعيف جداً. و من رأيي الشخصي أنها محتاجه مروحة زياده على الردياتير لزيادة كفاءة التكييف في الزحمة

*-* قطع الغيار: هنا بقي الكلام اللي يزعل السيارة قطع غيارها غير منتشره ولا يمكن انك تلاقيها بره التوكيل دا بالاضافة أنها غير متوافقه مع أي سيارة اخري(عدا فلتر الهواء و الزيت و السير ممكن تلاقيهم برة) . أما في التوكيل الحاجه موجوده و متوافرة بس دي عامله معايا مشكله لأني دائم السفر و كان شغلي خارج القاهرة. أسعار قطع الغيار معقوله جداً و مش مبالغ فيها و هي الحمد لله اعتماديه .

دا كل قصتي مع الجميلة F0 و أسف جداً لعدم تواجدي بالمنتدي نظراً لظروف العمل و حابب أشكر كل أعضاء منتدي ال BYD و يا رب أكون أضفت أو أفدت....
و السلام عليكم و رجمة الله و بركاته

السلام عليكم
ممكن اعرف من حضرتك كفاءة العربية دلواتي لاني قررت اشتريها هي سعرها انهاردة في الامل 60 الف جنيه وهل الموتور بتاعها زي ال f3 متسوبيشي وايه النظام اجيبها ولا اجيب ال f3 افضل
مع العلم انا لسه اول مرة اركب عربية ودي بالنسبالي اول حاجه ياريت رايك وربنا يجزيك كل خير

[M.7assan]

السلام عليكم
يا جماعه انا بسال عن العربيه f0 في شركة الامل قالي ب 60000 كامله .
بس انا كنت بسال ليها قطع غيار بره ولا لا ؛ سالت محل قطع غيار شخلول اللي في الوايلي "" قالي انا مش بشتغل فيها "" بس عنده كل حاجة عن f3.
ارجو الافاده من حضراتكم

[المنسي]

السلام عليكم
يا جماعه انا بسال عن العربيه f0 في شركة الامل قالي ب 60000 كامله .
بس انا كنت بسال ليها قطع غيار بره ولا لا ؛ سالت محل قطع غيار شخلول اللي في الوايلي "" قالي انا مش بشتغل فيها "" بس عنده كل حاجة عن f3.
ارجو الافاده من حضراتكم

هات f3 لانها منتشرة اكتر ... انا بصراحة مشفتش f0 غير مرتين مرة فى المنطقة عندنا والمرة تانية عند موزع
تقبل تحياتى

[ak_626]

عربية ناجحه جداالله أكبر عليها, قطعت بيها اكثر من 40,000 كيلومتر في سنه و نصف.
مفيش اي مشاكل في الصناعه او عيوب خفيه.
سبب انك مش هتشوف منها كثير هو فشل الوكيل المصري في احضار شحنات منها بشكل دوري وايضا فشل سياسة التسويق, كفايه انه اول مابتيجي شحنه منها بتخلص علطول.
السعر هنا يزعل, العربية دي اول مانزلت في 2010 كانت ب 40,000 الف جنيه و انا اشتريت موديل 2013 ب 53,000 من توكيل القطامية و الابشن فيها اعلى شويه من موديل 2010 و كانت اخر واحده عندهم في التوكيل, دلوقتي حرام توصل للسعر ده !
قطع الغيار موجوده في التوكيل و مش بتعامل غير معاه.
انا شخصيا مقتنع بيها جدا جدا ,لو فلوسها معاك هاتها و مش هتندم و لو مستكتر ثمنها يبقى دور على حاجه تانية .... الغناء بالاستغناء :)

[M.7assan]

شكرا على ردكم .
هي العربية عجباني جدا .
بس لما روحت بصيت عليها في معرض النزهه لقيتها من غير عداد rpm و مفيهاش abs ، غير ان التقفيل بتعها مش تمام اوي .
مش عارف انا بقيت محتار اكتر.

[kinbergo29]

هي عاملة كاااام دلوقتي يا باشااااااااا

[Ahmed_BYD_F0]

هي عاملة كاااام دلوقتي يا باشااااااااا

انت قصدك ايه بالسؤال ده
يعنى لو مستعملة انا معرفش تعمل كام
اما الجديدة زى ما الزملاء الاعضاء الكرام بيقولوا لحضرتك كده 60 الف

[kinbergo29]

ممكن يا استاذ احمد تقولي ايه رايك حضرتك في العربيه بعد الفتره الطويلة دي انا بصراحه بدور علي عربيه رخيصه بعني نصحتك ليه اشتريها ولا لأ

[kinbergo29]

انا رحت التوكيل وسعرها دلوقتي ٥٩٥٠٠ بس بتوع توكيل الامل فرع الكربه لابسين شباشب وناس كبيره في السن وقاعدين يقروا جرايد وتقريبا مش فاهمين حاجه ناقص الستات الي هناك تقطف ملوخيه تحس انها مصلحه حكوميه المهم دخلت العربيه والكراسي الي قدام واسعه والي ورا مش بطالين نص نص علي حجمها باقي ااحجات مش بفهم فيها بس مش بطاله المهم هي عامله ايه معاكم بعد الفتره دي واعاده بيعها اكيد مشكله لانها مش مشهوره

[Ahmed_BYD_F0]

ممكن يا استاذ احمد تقولي ايه رايك حضرتك في العربيه بعد الفتره الطويلة دي انا بصراحه بدور علي عربيه رخيصه بعني نصحتك ليه اشتريها ولا لأ

بسم الله الرحمن الرحيم
اخى العزيز احب ان اقولك راى عن العربية دى اجمالا انها عربية ممتازة
وبالنسبة للعيوب فهم ثلاث عيوب لا غير وهم:
1- الدهان ضعيف يعنى اى خدشة ولو بسيطة يظهر الدهان الاسود الخلفى
2- السحب بيضعف قليلا عند تشغيل التكييف
3- مع الحمل التقيل على العربية بتحك فى المطبات الوقفة فقط وانت داخل على المطب مش ببطء كفاية ولكن مش فى كل المطبات
يعنى لو الثلاث عيوب دول مش فارقين معاك قوى زى مثلا فانصحك بشراء العربية دى واقولك مبارك عليك مقدما وربنا يديك خيرها ويكفيك شرها

[خادم للإسلام]

جزاك الله خيرا :)..النقرير بتاع حضرتك فادني جدا والحمد لله رب العالمين

[Ahmed_BYD_F0]

جزاك الله خيرا :)..النقرير بتاع حضرتك فادني جدا والحمد لله رب العالمين

انا تحت امرك فى اى حاجة واى خدمة او سؤال انا موجود