الموضوع: تقرير عن السياره الf0 بعد 1150 كيلو....

السلام عليكم يا رجاله المنتدي....
انا الحمد لله وفقني لشراء السياره ال BYD F0 و استلمت يوم 21/12/2010 و الحمد لله رخصت و عملت 1150 كيلو الى حد الان......
انا اسف ملحقتش اصور العربيه و إن شاء الله هرفع صورها قريب....
-*- الموتور: هو اتنين كامه 12 صباب ثلاثه سلندر الف سى سى صيني الصنع سير الكاتينه بتاعه جنزير و بيطلع حوالي 60 حصان او اقل قليلاً...
الموتور عمرك ما تحس انه صغير او تلاته سلندر (شخصياً كنت متوقع انها موتور توكتوك و هيبقي سحبها في الضياع بس الصراحه اثبتت جداره وهي في سحبها قريبه جداً من البكانتو)
بالنسبه للموتور مع التكييف بيبقي متكتف و تحس ان سحيها قل و دا طبيعي جداً بالنسبه برضه لعربيه موتورها صغير بس اللي يعوض ده ان التكييف بجد بسم الله ما شاء الله معقول جداً و بيبرد العربيه كلها....
عيب برضه في الموتور تحس انه صوته عالي شويه و لما سألت قالولي طبيعي عشان 3 سلندر و فيه رعشه بسيطه برضه لما سألت كان نفس الرد .و جربت السيريون وان (1000 سى سى و تلاته سلندر الصراحه صوتها اقل شويه و الرعشه محدوده فيها بس فرق السعر طبعاً )....
بالنسبه لاستهلاك البنزين بصراحه هي اقتصاديه للغايه انا سافرت بيها و حسبتها اخدت 23 لتر و عملت 407 كيلو (يعني حوالي 17 كيلو في اللتر) و بسرعه تتراوح بين 100 -120 . و التنك بتاعها 30 لتر....
-*- العفشه :- الصراحه بسم الله ما شاء الله العربيه ماسكه نفسها جداً علي الارض و في تفس الوقت العافشه مش ناشفه.....
كنت ماشي في طريق النصر و بنت بتتكلم في الموبايل وانا كنت ماشي على 70 وفجأه عدت الشارع قدامي مكنش في حل غير اني اخبطها يا إما اجازف بأني افاديها علي سرعه و قد كان لفيت الدركسيون حوالي نص لفه او اكتر يمين في شمال و دايس فرامل و الحمد لله فاديتها و بصراحه فوجئت من ثباتها على الارض ولا تنطيط في العربيه ورا ولا زحفت لجنبها و الجو دا مع العلم ان العربيه وزنها حوالي 900 كيلو تقريباص (عمات نفس الحركه دي قبل كده بعربيتي القديمه كان مصيري انها زحفت بجنبها و طلعت على الرصيف بس كنت ماشى 80 او اكتر سنه)
الدركسيون مش باور و هي اساسا مش محتاجه لان بجد دركسيونها خفيف و بصراحه دا عملي مشكله (ولا يمكن عشان اتعودت على البولونيز )
-*- الفرامل : شخصياً انا حاسس انها عندي محتاجه تظبيط لان بعد حوالي 300 كيلو الدواسه وطيت و ما بقتش تقفش غير في اخر المشوار و التيل في صفاره غبيه جداً بس هي قبل كده كانت تمام زي الفل (غالباً محتاجه يتاخد هوا من دوره الفرامل و التيل نوعه رديء لان التيل ملحقش).

-*- التفيل: الصراحه تقفيلها جيد جداً و في رأيي الشخصي انضف بكتير من الاسبرانزا 113 بمراحل حتي في نوعيه الخامات المستخدمه في التابلوه و فرش الكراسي و السقف....
الكاسيت اسطوانات (audio only) و راديو ووصله AUX لو هتوصل IPOD OR MP3 و فيها سماعتين في التابلوه مخفيين فيه بطريقه شيك جداً و في مكان للسماعات في كل باب و صوتهك كويس جداً وواضح وانا شخصياً مقنع انهم كفايه ......
البابين اللي ورا القزاز بتاعهم شراه بتتفتح للخارج و شكلهم شيك جداً بس العيب لو حد قاعد ورا وحب يشرب سيجاره توقع انه هيطفي يا في الكنبه يا في الارض .....
هي عربيه مناسبه جداً لاربع اشخاص (لكن لو انت زي حالاتي من اللي برجعوا الكرسي لاخر المجرى و بيريح الظهر سنه اللي هيقعد وراك لو قعد هيدعي عليك) لكن في الوضع العادي بتاخد 4 اشخاص بالغين و مرتاحين......

انا اللي بجد حابب اوضحه ان المنتج الصيني بيتحسن كل يوم عن الاخر و جودته بتعلي عن الاول يوم بعد يوم و بينافس بشراسه جميع المنتجات على صعيد واسع (انا بتكلم هنا عن الصيني المعلوم الهويه ) و بأسعار منافسه جداً.....
الدور الاهم على التوكيل انه يظهر المنتج للناس و يبتدي يعمل توعيه و يحسن من مستوي الخدمه المقدم عشان بجد يكسب مستهلكين لان بجد في فئه واسعه من الناس بتدور على عربيه جديده و تكون مضومونه و يثق بها بدل ما يشتري مستعمل و يكون سعرها منطقي (عن تجربه غير لطيفه باالمره مع المستعمل خسرت فيها اكثر من 15 الف في اقل من 30 يوم .....)
وحابب اشكر جميع الاخوه هنا في قسم BYD اللي بجد ساعدوني و شكر خاص للاخ الفاضل أحمد اللي بجد نورلي الدنيا قبل ما شتري.....
يا رب اكون افدت....

يعنى انا متردد بينها وبين الشانا
وادينا متابعين