اتسرقت و الحمد لله

[ahmedselaraby]

حبايبى فى قسم بى واى دى ,, أحب أحكيلكم عن قصة واحد غلبان قبض المرتب أخر الشهر عشان يصرفوه على شراء حاجات اتسرقت منه

و الله العظيم الواحد بيستنى المرتب زى عوكل فى الفيلم لما كان تايه فى تركيا و لما سمع صوت السيدة أم كلثوم و شاف القهوة أم قايل

قهوة المصريين

قهوة المصريين

قهوة المصريين

انت مصرى مش كده ,, ايوه انت مصرى ريحتك مصرى قول حاجة

سلام عليكم

ياااااااااااااااااااه ,, أخيرا المرتب نزل ,, قهوة المصريين ,, أخيرا

حاخود العيال و حفسحهم و حفك سجنهم من البيت و حصرف

و حشترى جزمة جديدة بدل اللى دابت

و حشترى بنطلون جينز جديد بدل اللى داب هوا راخر

و حجيب سباك يصلح الحمام اللى بايظ

و و وو وو

يوم الجمعة بعد الصلاة ,, نازل و انا متشيك و طبعا البيت كله نزل و على اهبة الاستعداد ,, نازلين خارجين نتفسح و نصرف و نبعزأ

استنوا هنا حنزل حسخن العربية و أول ما أدى ميزد تنزلوا على طول مش عايز اتلطع كتيير تحت أوك أوك

نزلت و إذا بالمفاجأه

إتسرقت

لا أصدق

مش مصدق ان ديه عربيتى

لا شكل شكل و لا زى زى و لا ده أنا

أحــــــيــــــــــــــــــــــــــــــــه

سرقوا جنطين بالكاوتش و سابولى العربيه على حجرين

طبعا ماعرفوش يسرقوا الجنطين التنيين عشان لازقيين فل رصيف و مش حيعرفوا يفكوهم

طب أعمل ايه

اتصلت بكل اللى ممكن يساعدونى

و طبعا منهم باسم باشا زعيم (و الله زعيم) القسم و المنتدى كله

باسم

أنا اتسرقت

أحيــــــــــــــــــــــــــــــــــه

طبعا الناس فل حته بيقولولى انهم كانوا صاحيين لحد الساعة 3 ز نصف الفجر مافيش حاجة

هى غالبا السرقة وقعت أثناء صلاة الظهر و الناس بتصلى

المهم جالى بتاع الكاوتش بعد مكالمات و وصف الطريق

قعد يقيس المسافة بين خورمين المسامير عشان يجيبلى جنط مؤقت

نزلت الاستبن طبعا و كده فاضل فرده فاضية

الراجل بيقولى أجيبلك بريدجستون و لا ميشلان

قلتلة انت بتشتمنى

حرام عليك

صلى على النبى , ده اللى راكب فيها أصلا جى تى راديال صينى معفن يوم ما أحب ابيعة مش حيجبلى 250 جنية تقوم تقولى بريدجستزن و ميشلان

انزل

انزل كمان

وصلنا للباتلاص التركى الكاوتشه ب 475 جم مقاس 15 زى اللى راكب

اديه كده اتنين 475+475

و الجنط بقة زى بتاعها

كتر خيره باسم سألى عند شخلول الجنط 2013 عامله 500 جنيه

عند زكى جرجس فى شارع دمشق كان عامل 540 جم

من هنا لهنا 525 520 فل أخر خدناه ب 500 زى شخلول

هو من ناحية خدناه فهو احنا خدناه فعلا

ما علينا

و زود على الكلام ده 75 جم طقم أربع مسامير ضد السرقة بلقمة فريدة مافيش زيها اتنين , ركب واحده فى كل جنط لزم الحماية

المحصلة النهائية

ضاعت الأجازة

و العيال ماخراجوش

و نكد و ضغط عالى

و غرامة مالية عدت ال 1500 ج

و توجل كل الالتزامات للصيف الماضى قصدى للشهر الجى عشان الميزانية ماتخرمش

و حسبى الله و نعم الوكيل فلى سرقهم ,, ان شاء الله يصرفهم على عياه ,, قولوا أمــــــيـــــن

[mirra]

بغض النظر عن الموقف السخيف اللى انا اتحطيت فيه قبل كده زى حضرتك اسمحلى اهنيك على اسلوبك الرائع فى الكتابه. يا راجل انا ما بطلتش ضحك. ربنا يعوض عليك بس انا الحرامى بتاعى كان اجدع من الحرامى بتاعك لانه سرق فرده واحده و سابلى المسامير على الارض و ده كان فى رمضان بعد السحور و معايا ضيوف. ربنا ياخد كل المفسدين فى الارض دول و يحفظ لنا عربياتنا و مالنا.

[M I D O]

لا حول ولا قوة الا بالله .. الحمد لله انها جات علي قد كدة وربنا ينتقم من الحرامية وميلحقوش يتهنو بفلوسك

[monamize4]

فداك يا باشا ,, الحمد لله على كل شئ

[mesaharaty]

ربنا ينتقم من الحرامى ويقهره ولا يتهناش بيهم

[ahmedabutaleb]

الحمد لله ياباشا انها جت على قد كده

[akmm]

ربنا ينتقم من الحراميه كلهم ......

[kar!m]

على فكره خير .. "وعسى أن تكرهوا شيئا و هو خير لكم"
ممكن تكون الخروجه دي كان هيصل فيها حاجه .. فربنا منعها عنك.

[ABO MALEK]

هو من ناحية خدناه فهو احنا خدناه فعلا.
كوميدى كوميدى يعنى

[mahmoud_ali]

يجيلوا شلل رعاش ويفضل يصرف فلوسه كلها على مرضه البعيد

[bassem.naguib]

ربنا يعوض ويخلف عليك يا أبو حميد .. هي حرقة الدم في المقام الأول هي الشعور أنك اتسرقت .. وعلى ما تفوق تاخد الصدمة التانية في الخسائر المادية اللي مكنتش على البال .. والحمد لله على كل شيء واعتبرها حاجة فدتك وفدت العيال وده أحسن بكتير .. والحمد لله على كل شيء

بس كدة الموضوع ناقص صور لطقم المسامير واللقمة اللي بتفكه .. وبتركب على أيه وبتتفك ازاي .. وهل هو فعلاً عملي ولا اشتغالة

[samakaerror]

يا رب يتشلوا كلهم ... إحمد ربنا انك كنت قابض .. كسرولى الإزاز قبل كدة و فضلت ماشى 20 يوم بغطى العربية فى كل حتة لحد ما قبضت :] .. و مرة ضربوا البواب و كتفوة و كممووة و سرقوا الأربع كاوتشات بالجنوط الإسبور الفابريكة بتوع ابويا ... ربنا يحفظنا جميعآ

[samakaerror]

ربنا يعوض ويخلف عليك يا أبو حميد .. هي حرقة الدم في المقام الأول هي الشعور أنك اتسرقت .. وعلى ما تفوق تاخد الصدمة التانية في الخسائر المادية اللي مكنتش على البال .. والحمد لله على كل شيء واعتبرها حاجة فدتك وفدت العيال وده أحسن بكتير .. والحمد لله على كل شيء

بس كدة الموضوع ناقص صور لطقم المسامير واللقمة اللي بتفكه .. وبتركب على أيه وبتتفك ازاي .. وهل هو فعلاً عملي ولا اشتغالة

كلام جميل و مستنى الرد

[mazen.com]

على فكره خير .. "وعسى أن تكرهوا شيئا و هو خير لكم"
ممكن تكون الخروجه دي كان هيصل فيها حاجه .. فربنا منعها عنك.

عندك حق

[ابوجنى2112]

لاحول ولا قوة الا بالله
هم يبكى..وهم يضحك
والله ياعربى حزنت جدا.لمّا كلمتنى فى الموبايل..
لكن يخرب بيت سنينك..مش قادر امسك نفسى وانت بتحكى الموضوع..
وخاصة..هو من ناحية خدناه فهو احنا خدناه فعلا..
هو تقريبا كلنا خدناة..ومعاه كريم سفتازيل مليّن.
ربنا يعوض عليك ياصاحبى..
ولله الامر من قبل ومن بعد