عاجل ..... كومود الاعصار الصينى القادم!!!!!!!!

[smsmxx]

ارجو الرد

عزيزي
هل من الممكن ان اتصل بك لكي اطمئن منك علي السياره التيجو
حيث انني انوي الشراء (ان شاء الله) وانت بصراحه بتتكلم عنها كويس اوي
بس انا لي ملاحظتين
1. انت كنت بتتكلم بنفس الحماس علي الكومودو.
2. جميع المشاركات كانت عند 2000 كم و لا اعلم كم من الكيلومترات انتنفذت الان
3. سمعه الاسبرانزا مش ولابد
و علي فكره انا مش ضد الصيني لاني معترف ان كل شئ بتمنه.

اشكرك مره اخري عل مشاركاتك الرائعه

[pinkfloyd]

طبعا يا باشا ابعتلى الميل بتاعك وانا ابعتلك رقم الجوال
انا دلوقتى عامل 6000 كيلو
مرسى لذوئك

[madoo_600]

تيجو ايه يبس كومودو Glx أفضل اختيار وعن تجربه العربيه معايا ومفيهاش الهوا

[pinkfloyd]

يا باشا انا ليا خمسة من اصحابى اتخنقوا منها مع الاسف عربية سيئة جدا انا بحمد ربنا انى رجعت الايصال بتعها .. يا باشا العربية مترمية عند التجار بتمنها من غير زيادة .. الوسيط كل جمعة يوجد به ما يقرب من خمس الى عشر عربيات للبيع بتمنهم برضة.

والناس اللى بتبيع العربية وهى عاملة 3000 كيلو دول ايه ... عموما يا باشا الف مبروك وربنا يكفيك شرها ودام عجباك ميهمكش راى اى حد.

[mido777]

شاهد على الكومودو

العربية مع صديق مقرب ليا جدا

وححكى بأمانه اللى شوفته ( انا مش بحكم على العربية )

- العربية لغاية دلوقتى عاملة 1000 كيلو
- من أول ما استلمناها ولمبة ال ABS منورة
- صوت طقطقه فى العفشه وكان بيزيد مع الوقت
- الفرامل الأماميه كان بيظهر فيها رائحة شياط
- العربية كانت بتسخن
- استهلاك البنزين عالى
- صوت مروحة التكيف كان عالى جدا وكأنه فيه حاجة محشورة


طبعا الكلام ده كله فى اول 1000 كيلو ووارد جدا انه يتعدل

لما روحنا التوكيل بعد العربية لما عملت 500 كيلو لأن المشاكل اللى ذكرتها بدأت تبقى مزعجة
تم حل مشكلة رائحة الشياط بتاعت الفرامل
تم حل صوت العفشة - فكوا العفشه كلها وشحموها
تم حل صوت مروحة التكيف
سخونة العربية راحت لوحدها

ما لم يتم حله حتى الأن علشان الأجهزة مش موجودة فى التوكيل ولازم العربية تروح مصر

- لمبة ABS المنورة لغاية دلوقتى

واستهلاك البنزين قالولنا على معدل المفروض العربية تسهلكه على سرعة 100 كم ونحبقى نحسبه

ده اللى اعرفه بمنتهى الأمانه

حاجة كمان اخيرة
فى مهندس فى التوكيل اعرفه معرفة شخصية جدا جدا
قالى ايه اللى رما صاحبك على العربية دية دى مليانه عيوب تصنيع وخليه يحاول يخلص منها

بس انا شايف ان العربية دية لو اتخلصت من المشاكل دية حتبقى ليها وضع تانى فى السوق
لأن العربية بصراحة كويسة

[babaro500]

يا ريت يا استاذ mido777 تدينا تقرير عن محرك العربية وعفشتها عاملة اية مع صحبك وده لان مفيش حد عاوز يكتب تقييم جيد وشامل عن العربية فلو تتكرم علينا بالتقييم ده والعربية بالنسبة لينا شبه مجهولة رغم ان شركة كبيرة وعريقة هي اللي بتجمعها ومسئولة عن سمعة العربية وهي الهيئة العربية للتصنيع اللي بتعمل الشيروكي والرنجلر وكومندر

[Terrible_DaRsH]

مش مطمن للعربية دى ...

فين مكاسب الوكلاء الخيالية ؟؟

[mido777]

يا ريت يا استاذ mido777 تدينا تقرير عن محرك العربية وعفشتها عاملة اية مع صحبك وده لان مفيش حد عاوز يكتب تقييم جيد وشامل عن العربية فلو تتكرم علينا بالتقييم ده والعربية بالنسبة لينا شبه مجهولة رغم ان شركة كبيرة وعريقة هي اللي بتجمعها ومسئولة عن سمعة العربية وهي الهيئة العربية للتصنيع اللي بتعمل الشيروكي والرنجلر وكومندر

تحت امرك ... بس الموضوع ده وقت شويه

[babaro500]

شكرا جزيلا على زوقك يا غالي وف يانتظارك وممكن تبعتلي على الإيميل دة babaro500@yahoo.com

[faysal1968]

لا لا لا انا تعبت من هذه السياره و مشكلها من يوم ما اشترتها

[faysal1968]

لقد قمت بشراء هذه السياره من 5 شهور فقط و قد قمت بزياره مركز الصيانه فوق ال30 مره و ما زالت العيوب كما هى و نبداء باول عيب سخوبه السياره الشديده و فصل التكييف عند السخونه ثانيا يوجد عيب فى فتيس الاوتومتيك و يعانى نمه جميع مالكى السيارات و هذا من ما شاهدته فى مركز الصيانه فى ابو رواش لا تتحمل درجه حراره الجو العالى فقد صنعت خصيصا للبلاد البارده ثالثا الفرامل يعانى منها مالكى السياره و قد انقلبت سياره كومودو بصاحبها بعد شرائها بيومين فى طريق سفر و ذلك لعيب فى الفرامل و قامت الشركه بارجاع مبلغ السياره لمالكها مع تعويض هذه خبرتى فى الكومودو اللهم بلغت اللهم فشهد

[egyptianmafia]

Ya man, I knew that this car is a total flop....

1) It is Chinese

2) It is assembled in Egypt

3) It has crappy finish

[khaled1962]

كومودو متجمعه تحت بير السلم والصيانة اضعف من الواد بليه

تاريخ اسواء سيارة في التاريخ : السيارة الكومودو.
ما يلي سرد موضوعي للمشاكل التي مريت بها مع السيارة السيئة كومودو منذ استلامها :-
1- ثاني يوم استلام السيارة وجد تسريب مياه من الموتور نتيجة تسرب المياه من كوع مياه
2- عطل بالمارش بعد استلام السيارة بخمسة ايام وذهبت إلي مركز الصيانة بأبو رواش ولم يستطيعوا معرفة كيفية إصلاح العطل وتم تحويلي ثاني يوم إلي مصنع الهيئة العربية وذلك بعد تركي السيارة يوم كامل بمركز الخدمة دون فائدة وتم إصلاح العطل بعد ستة أيام.
3- مجموعة من الأعطال والتي تم الإبلاغ عنها وقت عطل المارش وتم إصلاح بعضها في مركز الخدمة وفي المصنع والبعض الأخر مازال يسبب لي إزعاج إلي يومنا هذا وعلي سبيل المثال:
2-1- لمبة الفرامل لا تنطفئ بعد رفع الرجل عن البدال
2-2- لمبة Check Engine تضئ عند سرعة 80 كم/ساعة
2-3- عوامة تانك البنزين لا تعمل بصورة صحيحة
2-4- الفتيس الأتوماتيك يقف علي وضع P ولا يتحرك من مكانه أحيانا
2-5- تسريب مياه من الموتور
2-6- الكاسيت يمسح الذاكرة عند إغلاق السيارة نظرا لعدم توصيل كابل Backup
2-7- أحزمة الأمان الأمامية معكوسة
2-8- وجود خبط بالدريكسيون وعند رفع الرجل عن بدال البنزين أو الفرامل
2-9- ترمومتر الحرارة يعطي قراءات خاطئة داخل وخارج السيارة
2-10- وحدة رفع الزجاج عند غلق السيارة لا تعمل بصورة صحيحة ويظل الزجاج مفتوحا في أحد أو كل الأبواب
2-11- زجاج الأبواب يخرج من المجري الخاصة به عند الرفع أو يتوقف قبل أن يصل للنهاية
2-12- توجد سخونة في صالون السيارة في الجهة الأمامية يمين
4- لمركز الخدمة لعمل صيانة 1000 كم وقمت بإبلاغ الصيانة بالعيوب التي مازالت موجودة مثل عطل وحدة الرفع والأعطال الموجودة بماكينات الزجاج ولكن بعد استلام السيارة اتضح أن العيوب مازالت كما هي بالإضافة إلي أن زجاج السيارة الخلفي الأيسر أصبح يرتفع عند طلب إنزاله والعكس صحيح (تم عكس تشغيل المفتاح الخاص برفع الزجاج). تم الإبلاغ عن أن مقبض الباب الشمال الخلفي مخلوع وتالف وتم استبداله بمقبض سليم.
5- بعد عدة أيام ظهر رشح مياه من الموتور مرة أخري وقمت بالذهاب إلي مركز الخدمة وتم تغيير كوع مياه مُركب بالموتور حيث ظهر أنه يرشح مياه
6- قمت بالذهاب إلي مركز الخدمة مرة أخري حيث أن الفتيس الأتوماتيك لا ينقل النقلة الرابعة وعداد لفات السرعة يصل إلي حوالي 4000 لفة في الدقيقة عند الوصول إلي سرعة مائة كيلو متر في الساعة وتظل السيارة تعمل علي النقلة الثالثة وتم استبدال وحدة التحكم Control Block بأخرى وقمت بالانصراف من مركز الخدمة واتضح لي أثناء عودتي أن وحدة التحكم التي تم تركيبها تنقل الرابع ولكن تسبب رجه شديدة في السيارة بعد سرعة 80 كم في الساعة وبناء علي ذلك ذهبت مرة أخري وتم استبدال وحدة التحكم بأخرى ولكن علي ما يبدو أنها أيضا لا تعمل بصورة جيدة حيث أنني مازلت أعاني منها عند الوصول بالسيارة إلي سرعة 120 كم في الساعة إذا كان الطريق منحدر لأعلي فيحدث ارتجاج وتأرجح شديد في عداد اللفات من 3000 إلي 4500 لفة في الدقيقة وأكثر ذهابا وإيابا. أي يعلو الموتور ويصل عدد اللفات إلي 4500 ثم بعد ثواني ينخفض إلي 3500 ثم بعد ثواني يعود إلي 4500 مرة أخري وهكذا ، ويحدث نفس الموضوع تقريبا إذا كان المنحدر لأعلي قاسي عند سرعة 100 كم في الساعة.
7- ذهبت لعمل صيانة 5000 كم وطلبت تعديل وضع مفتاح رفع وإنزال الزجاج الخلفي يسار نظرا لأنه تم عكسه سابقا بمعرفة مركز الخدمة وكذلك طلبت عمل ضبط لفرامل اليد وإصلاح زجاج الأبواب ووحدة رفع الزجاج وتم ضبط مفتاح الزجاج ولكن عند عودتي للمنزل وعند الضغط علي الريموت كنترول لقفل السيارة فوجئت بالزجاج الخلفي يسار يفتح بدلا من أن يغلق مما اضطرني للذهاب مرة أخري لإصلاح هذا المفتاح (أي أن وحدة الرفع عند غلق السيارة تعمل كوحدة إنزال لهذا الباب)
8- بعد ذلك وفي ثالث يوم بعد اخر زيارة فوجئت بإنذار يفيد بارتفاع درجة حرارة السيارة واكتشفت أن المروحة لا تعمل وقمت بتوصيلها بسلك علي البطارية حتى تعمل وحتى استطيع أن أصل ثاني يوم لمركز الخدمة بابو رواش. وبناء عليه ذهبت مرة أخري لمركز الخدمة وبعد الاتصال بمدير الشركة ووعده لي كعميل كمودو (علي حد قوله) بأني سوف أستلم السيارة في أحسن حال وأبلغتهم بمركز الخدمة أيضا بأن الزجاج الأمامي يمين تلف نتيجة احتكاكه داخل الباب نتيجة لعدم ضبط الأبواب في جميع المرات السابقة بصورة صحيحة وتم في هذه الزيارة إصلاح عطل مروحة الموتور التي لم تكن تعمل وتم استبدال الزجاج بزجاج جديد ولكن مازال هذا الزجاج لا يعمل بصورة صحيحة حتى الآن وكذلك باقي الأبواب في بعض الأحيان.

والمحصلة النهائية مما سبق أن الجميع بالشركة بداية من مدير الشركة حتى اصغر عامل لا يهمهم مشاكل الجمهور ويكفي عمل زيارة لمركز الخدمة لمشاهدة معاناة الناس علي الطبيعة فهل من الطبيعي أن سيارة لم تستخدم لأكثر من سبعة آلاف كيلو متر (حتى لو كانت صينية المنشأ ومصرية التجميع) يكون بها كل هذه المشاكل والأعطال.

وما سبق هو خلاصة خبرتي مع هذه السيارة وكل واحد عقله في راسه يعرف خلاصة اذا اراد شراء او ركوب هذه السيارة الكثيرة الاعطال والمعيبة

علي فكرة انا خسرت ثلاثين الف جنية بعد بيع هذه العربية المعفنة





العضو المحترم
بالرغم من تسجيلك في منتدانا منذ اليوم فقط
الا أنك أرسلت 9 نسخ من نفس الرسالة
وفي أكثر من موضوع ...مما يوجب تحذيرك

برجاء مراجعة قوانين المنتدى
لعدم حصولك على انذار يستوجب الوقف

مشرف عام.2

[khaled1962]

كومودو متجمعه تحت بير السلم والصيانة اضعف من الواد بليه

تم الحذف للتكرار

[Mostafa Hessen]

شكرا يا باشا