ال fsv ومشكلة إختيار اللون الأمثل

[zemanovaxxx]

السلام عليكم ورحمة الله وبركاته
طبعا الموضوع ده مش عارف حد طرحه قبل كده ولا لأ, بس أتعشم من الناس كلها تشارك
أنا شفت كل ألوان ال fsv وبصراحة العربية دي شكلها حلو ف جميع الألوان, فيا ريت كل اللي شايف العربية دي حلوة أكتر فـ لون معين يقترحه
وشكرا جزيلا

[bassem.kamal]

فضي من غير نقاش ...بتعمل عاكس لون جامد أوي أوي مع العربية ...... و قابلني لو لقيت اي تراب باين عليها زي الأسود و اسأل عن الأسود و حكاية النظافة و التراب معاهم ..... و انا مش بقولك فضي عشان معايا فضي والله لأ بس عشان دي تجربة انا فيها و مفيش شكوي و بليل كمان العربية بتبقي باينة اكتر وضوح عن الاسود ...... للأسف الشديد مش بعرف انزل صور عشان اواريك الشياكة علي حق

[zemanovaxxx]

فضي من غير نقاش ...بتعمل عاكس لون جامد أوي أوي مع العربية ...... و قابلني لو لقيت اي تراب باين عليها زي الأسود و اسأل عن الأسود و حكاية النظافة و التراب معاهم ..... و انا مش بقولك فضي عشان معايا فضي والله لأ بس عشان دي تجربة انا فيها و مفيش شكوي و بليل كمان العربية بتبقي باينة اكتر وضوح عن الاسود ...... للأسف الشديد مش بعرف انزل صور عشان اواريك الشياكة علي حق

كلامك شفته ف الحقيقة
أنا عربيتي الحالية لونها إسود, وفعلا زهقت من نضافتها لدرجة إن واحد من أسباب تفكيري في البيع هو موضوع النضافة
بس متنكرش إن ال fsv شكلها برضه حلو ف الأسود, العربية فخمة وطويلة وبيلبقلها الأسود علي رأي الإخوة اللبنانيين
علي العموم شكرا لمرورك, وتحياتي

[akramesg]

نسيت تحط لونى فى الاستفتاء ازعل ؟
ده اسمه اوليفى وهو غير الفرانى اللى هو جراى

[zemanovaxxx]

نسيت تحط لونى فى الاستفتاء ازعل ؟
ده اسمه اوليفى وهو غير الفرانى اللى هو جراى

علي فكرة أنا قصدي باللون الفيراني اللون بتاع عربيتك (أنا أول مرة أعرف إن لونك ده إسمه أوليفي)
عامة ممكن تصوت بأه دلوقتي للفيراني ده باعتبار إني كان قصدي الأوليفي

[zemanovaxxx]

إيه يا جماعة, لسه في ناس كتير مصوتتش

[bassem.kamal]

السيلفر هيكسب انشاءالله ... كفاية الكاتالوج العربية جايبين فيها اللون الفضي و هو الأساسي بناعها و كفاية انه عامل عاكس لون مع القوايم العربية و الكاوتشات .. احسن ما تبقي كل حاجة اسود في اسود و العربية جمالها مايبانش ..... حرية الاختيار بقي الفيصل في الموضوع

[wkhater]

يا جماعة فى احد يعرف مكان يتوفر فيه عربية fsv

[zemanovaxxx]

يا جماعة فى احد يعرف مكان يتوفر فيه عربية fsv

بص هي العربية موجودة في كذا معرض بس الموزعين بينقطوا بيها السوق للأسف, وممكن تكون عنده في المخزن ويقولك مش موجودة بهدف رفع السعر بعدين.
أنا سألت عليها في التوكيل قاللي أحاول وخللي بالك هيحاول يتصرفلي في واحدة سودا
في أحمد موتورز موجودة بس بيبيع ب 75000 دي اللي هي أول فئة خالص, وممكن تتفاوض معاه
مش عارف سمير ريان موجودة عنده ولا لأ

أسأل ولو عرفت أخبار عن السعر أمانة عليك تبلغ إخوانك هنا للإفادة

[zemanovaxxx]

يا جماعة الإستطلاع لحد دلوقتي مش موضح, إيه هو أحسن لون للبريليانس ال fsv
أنا شايف محدش اختار اللون الأسود تقريبا, بس والباقيين متوزعين علي كل الألوان
هل ده معناه إن العربية دي أي لون بيمشي معاها

يا جماعة من فضلكوا كلوا يدخل ويشارك

[zemanovaxxx]

خلاص أنا كده شكلي بأه هاجيب الفبراني, أو الأوليفي عشان الأخ akramesg ميزعلش
وهو تقريبا كده اللون الوحيد اللي موجود في كل الأماكن اللي أنا روحتها
السيلفر جميل طبعا بس مش لاقيه للأسف
شكرا لكل اللي شارك

[akramesg]

خلاص أنا كده شكلي بأه هاجيب الفبراني, أو الأوليفي عشان الأخ akramesg ميزعلش
وهو تقريبا كده اللون الوحيد اللي موجود في كل الأماكن اللي أنا روحتها
السيلفر جميل طبعا بس مش لاقيه للأسف
شكرا لكل اللي شارك

اختيار موفق
شيك ومبيوسخش واحلى من الفضى لما كانو جمب بعض فى التوكيل انا غيرت رأى واخدتها مع انى كنت حاجز فضى

[bassem.kamal]

انا كدة زعلت اوي اوي اوي اوي .. الا الفضي :( :(

[techno]

استاذ زيمانوفا .. لاقيت العربية فين و هل اتوماتيك و لا مانيوال؟؟ ... انا عايز اتفرج عليها و اشوف الاتوماتيك منها

[zemanovaxxx]

استاذ زيمانوفا .. لاقيت العربية فين و هل اتوماتيك و لا مانيوال؟؟ ... انا عايز اتفرج عليها و اشوف الاتوماتيك منها

techno باشا موجودة عند أحمد موتورز, هو عشان جنبي في شارع الهرم فأنا قررت أشتري منه. ولقيت المانيوال 1.5 gl ومش لاقي ال 1.5 gls خاااااااااااالص
وبصراحة مسألتش علي الأوتوماتيك لإني مش ناوي أشتريها
ده رقم توكيل البافارية فرع الممر التجاري بسور نادي الزمالك لو حابب تسألهم عليها 33444825

انا كدة زعلت اوي اوي اوي اوي .. الا الفضي :( :(

باشا علي عيني والله سامحني, بس والله سألت ع الفضي كتييييييييير وفعلا فعلا فعلا, يعني فعلا فعلا مش لاقيه.
ومش عايز أستني الدفعة الجديدة بصراحة عشان خايف السعر يزيد.

اختيار موفق
شيك ومبيوسخش واحلى من الفضى لما كانو جمب بعض فى التوكيل انا غيرت رأى واخدتها مع انى كنت حاجز فضى

إنت أكيد بتبالغ, ولا إيه؟
أصلي خايف من اللون ده عشان عندي عقدة من الألوان الغامقة (عربيتي لونها أسود ومن ساعتها كرهت الغوامق), فهل فعلا إنت مستريح في نضافتها؟