بريليانس جالينا وسقوط سعرها إلى هذا الحد لماذا ؟

[shaaban2008]

الصيني الصيني ابعد عن الصيني الصيني وحش الصيني بيعض مع احترامي الكامل لهذا الراي ولكن العربيه تتقدر بحالتها ومشيها وخبرة الناس اللي ركبتها

الجالينا 2008 اللي هيه صيني مصري النهارده عمرها داخل علي 5 سنين ومسمعناش حد قال عليها عيب قاتل او انها خربت مثلا مع الاخذ في الاعتبار ان اعظم السيارات الغير صينيه تظهر بها عيوب قاتله زي فتيس التويوتا جنوب افريقيا وفتيس الجيتا dsg صحيح طبعا ان دي شركات محترمه وبتسحب العربيات المعيبة لتغييرها وتصليح العيب لكن تظل هناك عيوب قاتله

الصيني زي ما قال دكتور حازم مافيش ابداع احيانا لكن هيه عربيات عمليه وسعرها مناسب

نييجي للجالينا موتور وفتيس ميتسوبيشي جالانت محدش اشتكي منهم

عفشه رائعه علي فكرة انا اخدت مطب اول امبارح ربنا مايوريكم علي 120 والعربيه كانت محمله ونزلت قلت العوض علي الله في العفشه وهلاقي الزيت علي الارض

والحمد لله بجد العربيه اثبتت انها جامدة وكله تمام طبعا حكت من تحت سنة لكن حتي الشكمان سليم

كلامي مش معناه انها عربيه وهمية لكن باختصار هي عربيه كبيرة وثابته علي الارض وسعرها مناسب
وفي جميع الاحوال انا مابحبش المستعمل

تقبل خالص تحياتي وتمنياتي باختيار موفق حتي لو ماجبتش الجالينا بس استسمحك القي نظرة علي تقرير شامل للبريليانس جالينا هاتلاقيه في القسم

ربنا يباركلك في عربيتك
هيه فعلا صفقه في مقابل السعر

[Batman372]

ملخص الكلام أنا قدامى عربية بريليانس 2009 بسعر 70 ألف وعاملة 100 ألف كيلو وحالته جيدة أشترها وأتوكل على الله ولا لا ؟

بعد التحيه ...
انا اقدر اقول لك على تجربيتى الوحيده فى قياده بريليانس جالينا مو 2007 كانت فى نفس السنه و عامله حوالى 25 الف كم .... انا سوقتها حوالى 35 دقيقه لان عربيتى اتكلبشت تحت المكتب و كانت بتاعت مندوب عميل عندى فعرض عليه اخذها للذهاب بها لنقطه المرور لفك الكلابش ...

بخصوص العفشه فيها اصوات غريبه جدا و ملحوظه جدا !!! اكنك راكب 132 مو سبعينات !!! اصل 132 دى اول عربيه اشتريها :)
الموتور تقيل جدا جدا و صوته خشن ورد فعله بطيئى جدا ...و هى كانت اوتوماتك ...
الباور استيرنج وحش جدا و شعور و تذكر عربيات الثمانينات الى كان فيها باورستيرنج وقتها زى الريجاتا ...
ده طبعا بجانب ان كل المكونات الداخليه من فبر رديء كذلك الخامات و تحس انها لعبه صينى ...

من الاخر - مع كامل احترامى لملاكها - من اسوأ العربيات الى سقتها فى حياتى ... مع انها كانت موديل السنه 2007 و 25 كم !!!!!!!!! و الغريب ان صاحبها بعد تجربتها اكد ليه انها فابريقه اى لم يتم بها اى حوادث او اصلاحات !!!

امال الى عامله 100 الف و عده عليها 4 سنوات ... حتكون عامله ازاى ...
طبعا انا عارف مقدما ان فيه ناس قالت سابقا فيها شعر و انها تقفيل/تصميم بورش و خلافه و تنافس الاوروبى !!! طبعا مش عارف تنافس ازاى و هى اصلا لا تمت باى صله لهندسه السيارات :)

الخلاصه اخى اعمل بنصيحه الزملاء المخلصين و ابعد عن الشر و غنيله ... تحياتى و بالتوفيق ...

[egyptiaaan]

لااااااااااااا
انا لسة بايع واحده ب51
الا لو هتستلم في التوكيل

[tarekjwal]

ما تشتريش دلوقتي اي عربية فوق ال 1600 سي سي لغايت لما نشوف موضوع البنزين دة والدعم واللي هايحصل فية لأنة بعد الدعم العربيات ال 2000 سي سي وأكتر هاتبقي ببلاش الا ربع

[حماده المصري]

معلكش ردي متاخر شويه

ولكن انا شايف ان الناس متهكمه شويه على العربيه

العربيه جميله جدا وفيها variety في اختيار قطع الغيار من متسوبيشي او عفشات وقطع غيار مش غاليه واجزاء العفشه مش غاليه برضو وبالنسبه للفئه الي هي فيها وسعرها ف هي جميله

نبدا بالمميزات

ثبات رائع فعلا

وواسعه من جوه

وشكلها الحقيقه برستيج

وموتورها مش خشن ولا حاجه هو صوته جميل جدا

اما بقى العيوب

فهي مع صديق لي عفشتها فعلا ناشفه ولكن غير مؤذيه للركاب خالص طبيعي عربيه بالحجم ده وواطيه تبقى عفشتها ناشفه

العربيه مع صاحبي كاسره 120 الف كيلو مغيرش اي حاجه في العفشه تماما صحيح ان العفشه تعبانه ولكن ماشيه وعربيه تقعد 120 الف عفشتها ده شيء جميل

طبعا من جوه العربيه بلاستيك مش عالي الجوده زي خامات النيو اكسنت في اعتقاادي

تكييفها كويس ولكن مش ممتاز وان كنت مش عارف صحبي بيعمله صيانه او لا

احيانا في قطع غيار ليها بتبقى اي كلام ولكن انت لو مش بتسترخص هتجيب حاجاه حلوه

بتطلع منها دقات صيني طبعا او دقات الكوري القدييييييم

مره التكييف مشتغلش طلع فيوز

ايام البنزين المضروب كانت بتنتش منه كتييييير ودلوقتي اتزبط


بصراحه العربيه جمله كويسه ومفيهاش مشاكل خطيره تذكر

[ostoraa]

بووووووص بقي يا كبير بأختصار شديد العربيه دي انا مجربها من 2006 جبتها زيرو وقعدت معايا لحد 2012 بسم الله ما شاء الله عليها مغيرتش فيها مسماااااااااااااااااااااااااااااار واحد ومكنتش بغير فيها غير الزيت وكانت بحاله الزيرو وسياره حموله جدا وماتورها حمول جدا بس عيبها بس ان ماتورها صغير علي حجمها شويه وبعتها وجيت الاكسكلوسف وبصراحه ربنا لو جالي فيها 200 الف مش هبيعها لانها عربيه تستحق كل تقدير واحترام وعلي السرعات العاليه والسفر مش بحس اصلا اني ماشي وثبات رهيب واستهلاك البنزين لها بالمقارنه بسيرتي الاخري السيراتو او الكروز فلقيت ان الجالينا بتوفر معايا بنزين جداااااااااا اكتر من السيراتو والكروز ال 1600 مش عارف ازاي يمكن علشان دايما بنزين 92 وفلاتر وصيانات علي طول وزيت كويس فعلشان كده مش بتاكل ولا ايه مش عارف؟؟ بس السيراتو بردو صيانه كامله في التوكيل والكروز كذالك بس الجالينا استهالكها موفر جدا وبتعمل معايا 200 كيلو في الصفيحه وقطع غيارها بقت متوفره في كل مكااااااااااااان هي كانت بصراحه في الاول مش موجوده خالص قطع الغيار بس دلوقتي خلاص بقيت موجوده كتير واسعارها كويسزي الانسر مثلا في الاسعار اما بالنسبه للموتور والفتيس والكبالن فهي ميتسوبيشي ومفيش اكتر بقي من قطع غيار الميتسوبيشي في اي مكان والشاسيه بتاعها بحس انو قوي شويه وشنطتها واسعه وبتشيل وصالونها مريح جداااااااااا وكبير بيشيل بردوووو عيبها بس شويه العفشه بتاعتها ناشفه شويه وبتعمل صوت خفيف في النقر القطع اللي بيبقي علي الطريق بس كويس علي ادد فئتها بس مقبول والعفشه قطع غيارها مش مستهلكه معمره شويه بس عايزه المحافظه يعني مش تكسر فيها وتقولي العفشه باظت يعني حافظ عليها هتحافظ عليك وبالنسبه للتكييف فهو كويس وليس ممتاز بس لو شحنت فريون مظبوط وغيرت فلتر هتلاقيه كويس جدا
بس هي تقيله شويه في طلعتها لان وزنها تقيل علي الماتور زي ما قولت بس بعد كده بتلاقيها نحله معاك وبترووووووووووووووح وفراملها كويسه جداااااا عن تجربه جري علي سرعه 180 وفجأه حادثه قدامي علي بعد 20 متر طربت فرامل علي الاخر بعزم ما فيا ولا هزه ولا عامت ولا زحفت نهاااااائي ووقفت في مكانها وكلبشت في الارض ومن ساعتها وانا اثبتلها بالجداره وانها فعلا عربيه تستحق التقدير بس ابعد النظر عن السياره الموجوده امامك حاليا لانها غاليه وعدادها عاااااالي هات حاجه من علي كونتكت تكون كيلوهات قليله وموديل جديد ممكن تبقي غاليه سنه بس كأنك جبتها زيروووو وخلاص وهتبقي بحالتها ومتجيبش حاجه كيلوهات كتير وتلاقي نفسك عمال تصرف عليها وفي الاخر تلاقي نفسك صرفت عليها اكتر من الزيروووو
هات حاجه غاليه ونضيفه وتحافظ عليها بنفسك وتبقي ماشي علي صيانه واحترم العربيه دي اوي هتحترمك