تقرير أستخدام جيلى أميجراند ec 7 بعد 6000 كيلو

[jackson_75]

السلأم عليكم ورحمة الله وبركاته


بقالى كتير مابكتبش هنا ولأ فى اى منتدى ملحوظاتى عن العربية. السيارة حاليا معايا بقالها شهرين, عداد 6130 كيلو , قبل هذه السيارة كنت امتلك خمسة سيارات أخرى , بالترتيب ( تويوتا ياريس , متسوبيشى لأنسر 1.6 , هيونداى فيفا 1.5 , بى أم دبليو E36 . ثم هيونداى تانى ) وبسوق من 7 سنوات , يعنى تقيمى هيكون عن خبرة وبشكل موضوعى, هاحاول ألخص ملحوظاتى فى نقاط حتى يتسنى للقارىء متابعتها بشكل منتظم ومتسلسل ..
1- أستهلاك البنزين عالى جداً داخل المدينة , أمبارح فولت العربية , اخدت 49 لتر على عداد رحلات 412 , يعنى تقريباً عملت فى اللتر 8 كيلو .. أنا على فكرة رجلى خفيفة جداً على دواسة البنزين ومش من النوع اللى بيحرق فى الطلعة , بسيبها تجمع مع نفسها وبعدين بدوس وبفتح معاها .. أنا ببقى مشغل التكيف طبعاً فى كل خروجاتى , العربية كانت بستهلك معايا فى الطوالى والطرق المفتوحة 11.4 فى اللتر .

2-الكاوتش عندى مظبطه كله على 28 عشان المطبات والنقر بتاعت القاهرة , فى الطرق الطوالى والمفتوحة ببقى مظبطه كله على 30 , يوجد مطبات عشوائية بالقاهرة مستفزة جداً ودائماً العربية بتحك فيها من تحت مع أنى ببقى راكب انا وزوجتى وطفلين صغيرين , مش عارف الوضع يبقى ايه مع المطبات لو راكب معايا 4 أفراد بالغين !!

3-الدهان الخارجى سىء وبيقشر من أقل زلطة او حاجة تتنطر عليه من أي عربية نقل محملة .

4-التجميع فى الغيارات معقول ومش وحش , والطلعة على الأول فى الزحمة حلوة بردوا مش وحشة , بس لو أنت أتزنقت وعاوز تعمل غرزة عشان تعدى من نقل أو عربية فى طريق رايح جاى أو توك توك , مانصحش حد يعملها لأن العربية مش هاتخدمك فى النقطة دى وكمان انت ماتعرفش اللى فى المقابل هيبقى فاهم النقطة دي ولأ هيلبس فيك , فيفضل عدم المغامرة بالنقطة دى لأن تجميعا لعمل غرزة وحش وسىء جداً والمغامرة اكيد مش هتبقى فى صالحك ..!!

5-التكيف مش وحش ومش حلو , معقول , بس فعلاً لأحظت انه لو متظبط على 22 والمروحة تبقى متوسطة بيكون أدائه احسن بكتير وبيسقع كويس .

6- التقفيل جيد جداً واقصد تفقيل المقصورة عن الأصوات الخارجية , ما بحسش أنى سامع الأصوات الخارجية وأنا مقفل الزجاج كله وبالخص لو أنا شارب أسبريت ومشغل الكاسيت واعصابى هادية بتبقى الدنيا ربيع بجد , هههههههههه .

7 - العفشة سيئة جدا وناشفة بشوارع القاهرة , من النوع الناشف ولأزم الكاوتش ينزل على 28 وألأ هاتحس بدبدبة ووجع فى الضهر , ولكن فى الطرق السريعة بتبقى العفشة ولأ أروع من ذلك فى الثبات ..!!

8- الثبات أكثر من رائع مثل الأوكتافيا .

9- الدوفيهات الخاصة بالسيارة كتير وتحتاج حرص لعدم تجريحها وخاصة من الأكصدامات والرفارف والعتب .

10- المرايات اليمين والشمال الخارجية رؤيتها خادعة ولأ تعطى المسافة الصحيحة ولأ يجب
الأرتكان عليها بشكل كلى خاصة لو وراك عربية أو حائط وقريبة جداً من السيارة لأنك هاتلبس فى اللى وراك , رؤيتها غير صحيحة .

11- الكراسي ناشفة ومتعبة للظهر ويوجد مسافة ما بين الظهر من أسفل والكرسي.. عشان كده هتحتاج لمخدة صغيرة او سفنجة لملء هذا الفراغ من أسفل ,, بشكل عام قيادة السيارة بشكل يومى بشوارع مثل شوارع القاهرة سوف يكون مؤلم للجسد والظهر بسب نشوفية الكراسي..!!!

12- السيارة بشكل عامة رائعة فى التصميم الخارجى وملفتة لأنتباه كل من يراها وتعطى أحساس للجميع بأنها تستحق أكثر من ثمنها ..
ع
13- الفرش الداخلى جيد جداً ويمكن تنظيفه بمنتهى البساطة والسهولة .

14 - حساسات الركن رائعة وعملية .

15 - المصابيح الأمامية جيدة جداً ويمكن العتماد عليها , اما الفوجات فنورها ضعيف يفضل أستبدال مصابيحها بزينون

16- سماعات الكاسيت معقولة جداً لمن هم فى مثل عمرى ( أنا 38 عام ) أما بالنسبة للشباب من هواة الصوت العالى فأكيد هيحتاجوا تغير هذه السماعات بأخرى وتركيب gm ..

17- الفرامل قوية جداً ومسعفة ولله الحمد ..

مستوى رضائى عن السيارة 80 % وأنصح بشرائها لفئات الأعمار البالغة ولمن هم ذوى خبرة بالقيادة , اما بالنسبة للفئة العمرية من الشباب بالعشرينات ولمن هم حديثى العهد بالقيادة فلأ أنصح بشرائها لهم ..!!!!

ديه كانت أخر نقاط ملحوظاتى بكل أمانة لكل من هو مقبل على شراء السيارة ولتبادل أراء الأخريين من مالكى السيارة أيضاً ,, أرجو ان اكون قد أفدتكم

[bassem.naguib]

تسلم يا باشا على التقرير الحيادي .. وفي انتظار المزيد منك .

بس أيه حكاية لمبة التشيك دي .. وبما أن رجلك بتيجي في القاهرة حطلب طلب سخيف .. وهو أنك تحط مع التفويلة 5 لتر على الأقل بنزين 95 أو عبوة محسن الأوكتان .. وادينا انطباعك عن أداء الموتور بعد كدة .

ويا ترى تعامل التوكيل في الصيانات تقييمه أيه ؟!

[YahiaAshraf]

الله ينور يا باشا تقرير موضوعى و محايد جزاك الله كل خير
وربنا يباركلك فيها و يحفظهالك يارب

[hugan]

تقرير رائع
رايحين النهارده نستلم عربيه بتاعت واحد قريبي
هانشوف ونجرب وبعد كده نقيم

[M I D O]

تقرير ممتاز ما شاء الله الف شكر يا باشا علية وعلي كدة انا 21 سنة متنفعليش الامجراند لانها مش هترضي روح الشباب

[Ultramisho]

تقرير حيادي ورائع الحقيقة اشكركم عليه
بس ياريتك برضه كنت عملت شوية مقارنات مع العربيات التي امتلكتها قبل كده علشان التقييم يبقى نسبي وليس مطلق فيقدر من له خبرة بالعربيات الاخرى تقدير كفاءة العربية
يعني التكييف كام من عشرة مقارنة بالفيفا واليارس مثلا وهكذا

ولي استفسار عن عزم العربية يعني موضوع عدم التخطي ده وتأخير تجميع العربية مش هين لانك ساعات بتلاقي واحد قدامك مذنبك معاه ولما تيجي تتخطاه يدخل معاك سباق جري هههه وساعتها لو العربية مافيهاش عزم هتتذنب وراه
وكمان بصراحة نسبة انضغاط الموتور في الامجراند 10.3 على ما اعتقد تقلق وتوحي بان الموتور هيتخنق ويستهلك بسرعة مع بنزين 92 ولا ايه رأيك
ياترى احساسك بالموتور عامة ايه انا باسأل لانه صيني بالكامل فهل هو صيني درجة اولى زي اللاب توب والتابلت ولا درحة عاشرة زي بضاعات صيني وعربيات صيني اخرى بتجيلنا للاسف وبالتالي عمره هيبقى قصير انا عارف ان ده استفسار مبكر عن ميعاده ولكنك كخبير في العربيات اكيد بتحس بصوت الموتور واداءه وتطوره كويس علشان كده باستفسر مبدئيا عن النقطة دي

وايه حكاية العيوب العبيطة الي بنسمع عنها زي فبرة التانك ولمبة التشيك والمرايا الي بتفك هل بتلاحظ الحاجات دي ولا لا لان بصراحة دي بتحسسني انها زي الشاهين وعاوزة الواحد يقعد يظبط في كل صغيرة وكبيرة فيها وبالتالي يزور التوكيل او الميكانيكي والكهربائي كل شوية

اخيرا 80% كتقييم عام انا حاسس انها نسبة عالية بعد الياريس والبي ام وحتى الفيفا فهل التقييم ده واضع مقارنتهم في الاعتبار ولا هو تقييم منفصل لما كنت تتوقعه من الامجراند

مرة اخرى اشكركم على اول تقييم محايد ودقيق اقرأه عن هذه العربية المثيرة للاهتمام واحيانا الجدل واتمنى ان يسعفكم الوقت للرد على استفساراتي

خالص تحياتي

[midooo_119]

تقرير حيادي ورائع الحقيقة اشكركم عليه
بس ياريتك برضه كنت عملت شوية مقارنات مع العربيات التي امتلكتها قبل كده علشان التقييم يبقى نسبي وليس مطلق فيقدر من له خبرة بالعربيات الاخرى تقدير كفاءة العربية
يعني التكييف كام من عشرة مقارنة بالفيفا واليارس مثلا وهكذا
التكييف جيد جدا وان كان النوبيرا الى كانت معايا تكييفها بيسقع اسرع

ولي استفسار عن عزم العربية يعني موضوع عدم التخطي ده وتأخير تجميع العربية مش هين لانك ساعات بتلاقي واحد قدامك مذنبك معاه ولما تيجي تتخطاه يدخل معاك سباق جري هههه وساعتها لو العربية مافيهاش عزم هتتذنب وراه
السحب بعد مامشيت بيها 700 كم بقى زى النوبيرا الى كنت راكبها حلو جدا و التكييف مش بياثر عليه

وكمان بصراحة نسبة انضغاط الموتور في الامجراند 10.3 على ما اعتقد تقلق وتوحي بان الموتور هيتخنق ويستهلك بسرعة مع بنزين 92 ولا ايه رأيك
الحقيقه مالحظتش ان البنزين مأثر فحاجه و كله بيحط 92 و محدش اشتكى

ياترى احساسك بالموتور عامة ايه انا باسأل لانه صيني بالكامل فهل هو صيني درجة اولى زي اللاب توب والتابلت ولا درحة عاشرة زي بضاعات صيني وعربيات صيني اخرى بتجيلنا للاسف وبالتالي عمره هيبقى قصير انا عارف ان ده استفسار مبكر عن ميعاده ولكنك كخبير في العربيات اكيد بتحس بصوت الموتور واداءه وتطوره كويس علشان كده باستفسر مبدئيا عن النقطة دي
الموتور صينى صحيح لكنه بتكنولوجيا تويوتا ياريس

وايه حكاية العيوب العبيطة الي بنسمع عنها زي فبرة التانك ولمبة التشيك والمرايا الي بتفك هل بتلاحظ الحاجات دي ولا لا لان بصراحة دي بتحسسني انها زي الشاهين وعاوزة الواحد يقعد يظبط في كل صغيرة وكبيرة فيها وبالتالي يزور التوكيل او الميكانيكي والكهربائي كل شوية
كلها للاسف عيوب التقفيل المصرى

اخيرا 80% كتقييم عام انا حاسس انها نسبة عالية بعد الياريس والبي ام وحتى الفيفا فهل التقييم ده واضع مقارنتهم في الاعتبار ولا هو تقييم منفصل لما كنت تتوقعه من الامجراند
اعتقد ان المفروض نسبه التقييم تبقى بناء على رضائى عن العربية مقابل المبلغ المدفوع فيها و ليس مقارنه بعربيه تانيه

مرة اخرى اشكركم على اول تقييم محايد ودقيق اقرأه عن هذه العربية المثيرة للاهتمام واحيانا الجدل واتمنى ان يسعفكم الوقت للرد على استفساراتي

خالص تحياتي

[jackson_75]

تسلم يا باشا على التقرير الحيادي .. وفي انتظار المزيد منك .

بس أيه حكاية لمبة التشيك دي .. وبما أن رجلك بتيجي في القاهرة حطلب طلب سخيف .. وهو أنك تحط مع التفويلة 5 لتر على الأقل بنزين 95 أو عبوة محسن الأوكتان .. وادينا انطباعك عن أداء الموتور بعد كدة .
ويا ترى تعامل التوكيل في الصيانات تقييمه أيه ؟!

أستاذ باسم , شاكر جداً لتعليق حضرتك والحمد لله أن التقرير عجبك .. بالنسبة للمبة الأتشيك فده موضوع مستفز وبيعانى منه جميع مالكى هذه السيارة , وهو أن هذه اللمبة دائماً ماتنور فجأة وبردوا بتطفى فجأة لوحدها , وهى فى الحقيقة تسبب قلق للسائق نتيجة ظهورها بشكل مستمر منورة بلوحة العدادات, أنا عندى ماكنتش بتنور لحد إمبارح , ولسة منورة اليوم فمش عارف لسه هيكون ليها تاثير على الأداء بشكل عام ولأ لأه.. بالنسبة لموضوع خلط البنزين ماجربتوش , بس أوعدك أبقى أعملها وأقولك .. التوكيل ,, مجربتش غير بتاع شرم الشيخ فى صيانة الألف وتقيمى ليهم صفر من عشرة فى كل شىء .. مابيعرفوش حاجة فى العربية , وباردين فى شغلهم, ومفيش أحترام ولأ زوق مع العميل وعلى فكرة بعد مارحت عندهم اعمل صيانة كتبت فيهم شكوى .. إن شاء الله بصيانة العشرة ألأف بروح على أبو رواش .

[jackson_75]

الله ينور يا باشا تقرير موضوعى و محايد جزاك الله كل خير
وربنا يباركلك فيها و يحفظهالك يارب

أستاذ يحي أشرف ,, أشكر حضرتك على تعليقك ,و مش هاقول غير أننا بنتعلم منك وأحنا تلمذتك ياجنرال وأنت أستاذنا فى التقارير , تحياتى لك

[jackson_75]

تقرير ممتاز ما شاء الله الف شكر يا باشا علية وعلي كدة انا 21 سنة متنفعليش الامجراند لانها مش هترضي روح الشباب

أستاذ ميدو على فكرة أنا لما كتبت أن الأميجراند ماتنفعش الشباب الصغير , كان فى دماغى أكتر من شىء ,, وهو أن العربية تجميعها بطىء وخاصة فى الغرز , وثانياً أنها طويلة جداً وحجمها كبير فبالتالى تناسب راجل بالغ وعائلة أكتر من شاب صغير .. ففئة الشباب يناسبه أكتر السيارات الهاتشباك مثل الأبيزا أو البولو وكمان الفيات برافو.. ولذلك فإن هذه النوعية من السيارات الأخيرة تحقق كل ما يرجوه الشباب من السيارة ,, أما الأميجراند فسامحنى هتبقى عاملة زى الشاب اللى راكب مرسيدس عيون أو أس كلأس بيروح بيها الجامعة وهو فى العشرينات فمش هتبقى راكبة عليه مع حجم جسمه الرفيع وكتافه وكبر حجم السيارة وعرضها .. مع أحترامى الكامل لحضرتك ولك الشباب وتحفظى بالأخص للمرسيدس ملك السيارات وأحترامى لمالكى هذه السيارة الجميلة أنى ذكررت أسمها هنا ,, أرجو أن تكون قد فهمت مقصدى كان أيه , تحياتى لك ولكل شباب مصر ((-:

[YahiaAshraf]

أستاذ يحي أشرف ,, أشكر حضرتك على تعليقك ,و مش هاقول غير أننا بنتعلم منك وأحنا تلمذتك ياجنرال وأنت أستاذنا فى التقارير , تحياتى لك

الله يخليك يا باشا دا احنا اللى تلامذتك

اشكرك على كلامك الرائع يا باشا ده من ذوق سعادتك

واسعدنى مرورك الكريم
وجزاك الله كل خير

[jackson_75]

تقرير حيادي ورائع الحقيقة اشكركم عليه
بس ياريتك برضه كنت عملت شوية مقارنات مع العربيات التي امتلكتها قبل كده علشان التقييم يبقى نسبي وليس مطلق فيقدر من له خبرة بالعربيات الاخرى تقدير كفاءة العربية
يعني التكييف كام من عشرة مقارنة بالفيفا واليارس مثلا وهكذا

تكيف الأميجراند مايفرقش كتير عن كل العربيات اللى أمتلكتها , ولكن انصح كل من هو مقبل على شراء هذه السيارة أنه يشترى اللى بزجاج فاميه مش العادية , لأن مشكلة السيارة ان حجمها كبير فالتكيف بياخد وقت على مابيسقع ولو انت ماشى فى الحر والزجاج عادى فهياخد وقت اطول على ماتحس أنه عمل حاجة وسقع , بس بشكل عام ياخد 7.5 من 10 كأداء تكيف

ولي استفسار عن عزم العربية يعني موضوع عدم التخطي ده وتأخير تجميع العربية مش هين لانك ساعات بتلاقي واحد قدامك مذنبك معاه ولما تيجي تتخطاه يدخل معاك سباق جري هههه وساعتها لو العربية مافيهاش عزم هتتذنب وراه

للأسف ديه حقيقة لايمكن انكرها , العربية لاتصلح لعمل غرز , تجميعها وحش فى الفرك , لكن لو على الهادى بتجمع .. عارف عاملة زى ستات الزمن الجميل اللى يحبوا يسمعوا بيت شعر وتعزمهم فى جروبى وتمشى بيها على الكورنيش , بعكس الهيونداى فيرنا مثلاً عاملة زى بنات اليومين دول تأكل ترمس وأزازة بيبسى تشربها وهى على الرصيف .. أنت فاهم المقصد من كلأمى .. العربية دى عاوزة تتاخد واحدة واحدة . مش بتاعت فرك , لو أنت ليك فى الفرك والغرز والحاجات دى يبقى نصيحة خد حاجة تانية زى ابى أم دبليو e36 مثلاً أو السيات أبيزا

وكمان بصراحة نسبة انضغاط الموتور في الامجراند 10.3 على ما اعتقد تقلق وتوحي بان الموتور هيتخنق ويستهلك بسرعة مع بنزين 92 ولا ايه رأيك
ياترى احساسك بالموتور عامة ايه انا باسأل لانه صيني بالكامل فهل هو صيني درجة اولى زي اللاب توب والتابلت ولا درحة عاشرة زي بضاعات صيني وعربيات صيني اخرى بتجيلنا للاسف وبالتالي عمره هيبقى قصير انا عارف ان ده استفسار مبكر عن ميعاده ولكنك كخبير في العربيات اكيد بتحس بصوت الموتور واداءه وتطوره كويس علشان كده باستفسر مبدئيا عن النقطة دي

بالنسبالى انا وبشكل شخصى , راضى جداً عن أداء الموتور ومش طالب منه أكتر من اللى بيدهولى وأكيد كل اللى فى نفس سنى هيقولولك كده , لأنى دائماً ببقى راكب ومعايا زوجتى واولأدى . أو مثلاً أنا لوحدى وبيجيلى مكالمات وانا ماشى ففى جميع الأحوال مبحبش الجرى ،، والتهور كمان مش مطلوب فى الزحمة ,, أما على الطرق السريعة فبردوا مرضية وجميلة , ونسبة رضائى عن أداء الموتور بشكل عام 90 %

وايه حكاية العيوب العبيطة الي بنسمع عنها زي فبرة التانك ولمبة التشيك والمرايا الي بتفك هل بتلاحظ الحاجات دي ولا لا لان بصراحة دي بتحسسني انها زي الشاهين وعاوزة الواحد يقعد يظبط في كل صغيرة وكبيرة فيها وبالتالي يزور التوكيل او الميكانيكي والكهربائي كل شوية

هى فعلاً زى ما انت وصفتها بالظبط ،، عيوب عبيطة للأسف ،، انا عندى مراية الصالون وقعت بعد يوم من شراء السيارة ولزقوها فى صيانة الألف .. فبرة التانك اتكسرت لانها من بلأستك ردىء وللاسف بيغيروها تبع الضمان بنفس الخامة وبترجع تتكسر ,فى ناس عمليتها ألمونيوم عند خراط وعايشة معهم زى الفل وأحسن من الأول , فماتقلقش ،، أحنا فى مصر ، وكل شىء ممكن يتعمل طالما معاك قرش يقدروا يبنولك هرم زى بتاع خوفو كمان ، ههههههه،، لمبة التشيك بتنور عند الناس كلها وحسب أخر الأخبار من التوكيل هينزل من يوم 20 يونيو الحالى برنامج سوفت وير يوقف هذه اللمبة عن الأنارة كل شوية لأنها على حساس , والحساس ده موجودة بالشكمان وبالتالى نتيجة المطبات والحكات اللى بتيجى بالشكمان فمن أقل لمسة للشكمان تنور ، هى دى المشكلة ولكن مش لعيب بالموتور عشان الناس فاهمة الموضوع ده غلط ..

اخيرا 80% كتقييم عام انا حاسس انها نسبة عالية بعد الياريس والبي ام وحتى الفيفا فهل التقييم ده واضع مقارنتهم في الاعتبار ولا هو تقييم منفصل لما كنت تتوقعه من الامجراند

مرة اخرى اشكركم على اول تقييم محايد ودقيق اقرأه عن هذه العربية المثيرة للاهتمام واحيانا الجدل واتمنى ان يسعفكم الوقت للرد على استفساراتي

تحت أمرك أنت وكل الناس المحترمة هنا بالمنتدى وأرجو ان اكون قد أفدتك بأجاباتى ، ولو فى حاجة مش واضحة أو مش مفهومة أسأل تانى وأنا أجاوبك

خالص تحياتي

أستاذ Ultramisho مساء الجمال ,, أسألتك والله عجبتنى كلها , وتوضح مدى أهتمامك بالسيارة وحبك لمعرفة كل كبيرة وصغيرة عنها , وإن شاء الله أحاول أفيدك بالرد على كل أسئلتك ..

الأجابة فوق بالأزرق ..

[bassem.naguib]

مش ممكن تشبيهاتك غريبة بس زي العسل .. وبتوصل للمعنى المطلوب في أقل كلمات .


ربنا يباركلك فيها ويمتعك بيها ويكفيك شرها ويسلم طريقك .

[M I D O]

أستاذ ميدو على فكرة أنا لما كتبت أن الأميجراند ماتنفعش الشباب الصغير , كان فى دماغى أكتر من شىء ,, وهو أن العربية تجميعها بطىء وخاصة فى الغرز , وثانياً أنها طويلة جداً وحجمها كبير فبالتالى تناسب راجل بالغ وعائلة أكتر من شاب صغير .. ففئة الشباب يناسبه أكتر السيارات الهاتشباك مثل الأبيزا أو البولو وكمان الفيات برافو.. ولذلك فإن هذه النوعية من السيارات الأخيرة تحقق كل ما يرجوه الشباب من السيارة ,, أما الأميجراند فسامحنى هتبقى عاملة زى الشاب اللى راكب مرسيدس عيون أو أس كلأس بيروح بيها الجامعة وهو فى العشرينات فمش هتبقى راكبة عليه مع حجم جسمه الرفيع وكتافه وكبر حجم السيارة وعرضها .. مع أحترامى الكامل لحضرتك ولك الشباب وتحفظى بالأخص للمرسيدس ملك السيارات وأحترامى لمالكى هذه السيارة الجميلة أنى ذكررت أسمها هنا ,, أرجو أن تكون قد فهمت مقصدى كان أيه , تحياتى لك ولكل شباب مصر ((-:

ربنا يخليك يا باشا علي الرد وانا فهمت وجهة نظر حضرتك انت قصدك ان العربية فيها رزانة ووقار كدة بتاع ناس سنهم فوق ال 30 مش للشباب الي عاوز شكل شبابي واداء عالي علي الطريق وتسلم مرة اخرة علي الرد وربنا يوفقك يا باشا ونبقي زمايل عمل في المستقبل ان شاء الله ويحفظلك العربية ويعطيك خيرها ويكفيك شرها

[gamal saad]

الله عليك يامحمد باشا وعلى دقة حضرتك فى كتابة التقرير الوافى والوصف الدقيق السلس جزاك الله كل خير وعموما يعنى لحد الأن نقدر نقول أن السيارة من الناحية العملية معقولة جدا حسب سعرها ووسعها وأمكانياتها ووسائل الأمان بها سواء الحماية التى بها للموتور ضد السخونة أو نظام الفرامل أية بى أس أو الأتزان فى السير بارك الله فيك على أفادتك للغير وجعلها الله فى ميزان حسناتك ويسعدنى لقاء حضرتك فى مصر أنشاء الله