عاوز رد ضرورى وبامانه اشترى الامجراند ولا .. لآ

[Tamer Galal]

الساده اعضاء الجروب الكرام
تابعت مساهماتكم القويه على الجروب .. ولثقتى بكم ارجو الافاده والنصيحه النهائيه لوجه الله تعالى
اشترى الامجراند اللى هاتجنن الناس ولا .. لآ .. برجاء ذكر الاسباب للمناقشه بدون جدال ولا زعل من الاعضاء المحترمين


شكرآ مقدما"احسن ناس

[د.عماد صلاح]

استر يارب ...شوف ياباشا ...انا كل لما اشارك باي كلمه عن العربيه دي تقلب خناقه و الناس تقولك ماعهوش العربيه بيتكلم ليه مع ان لو سالت اي حد اجيب جيتا ولا ﻷ هيقولك خد بالك الفتيس بتاعها فيه مشاكل ...مع انه يا اخي ماجبهاش
شوف ياباشا مفيش عربيه في رانج السعر حتي 200 الف مافيهاش عيوب ...يبقي السؤال ايه العيبراللي انا ممكن استحمله ...و ايه اخبار التوكيل مع العيوب ...
مثلا الاوبتر 117 الف مافيش وسائل امان بنزين اشتهلاك عالي يعنس اللتر يعمل من 10 ال 11.5 كيلو ....بس الاعطال مش كتير و التوكيل معقول وانا عايز راحه الدماغ يعني عربيه ما تقعدنيش جنبها
الايمي 82 الف يعني ارخص ب 35 الف من الاوبتراﻻبس اشيك و افخم و اكبر وفيها وسائل امان و لكن ظهر فيها مشاكل..اكيد حضرتك قراتها ...و التوكيل لم يكن فعالا في التعامل مع تلك المشاكل
لو حضرتك المهم عندك الشكل والوسع والقعده الواسعه مش المريحه و هتستحمل المشاكل وهتستحمل غبور يبقي اتكل
ب انا نصيحتي ليك ايه ....بلاش عشان محدش يخش يتخانق
للهم اجعل كلامنا خفيف عليهم

[M I D O]

بص يا باشا انا عن نفسي ومبدئيا كدة هشتري العربية ان شاء الله عشان بس محدش يدخل يتكلم
بس العربية فيها عيوب ممكن تقابلك وممكن لا لو انت حابب العربية ولو قابلك مشاكل هتستحملها للصيانات توكل علي الله لو انت بتتخنق بسرعة وملاكش في وجع الدماغ شوف حاجة تانية ودة خلاصة الكلام

[Tamer Galal]

الف شكر د . عماد واستاذ ميدو
لكن الرد بتاعكم لا يخلو من المشاكل
بصراحه كده المشاكل دى جوهريه ولا ممكن التعامل معها
للعلم دى اول عربيه هاشتريها افيدونا افادكم الله

[M I D O]

الف شكر د . عماد واستاذ ميدو
لكن الرد بتاعكم لا يخلو من المشاكل
بصراحه كده المشاكل دى جوهريه ولا ممكن التعامل معها
للعلم دى اول عربيه هاشتريها افيدونا افادكم الله

انا برضو هتكون اول عربية شخصية ليا ان شاء الله
المشاكل الي فيها زي التكييف مش قوي اوي بالنهار بس دة بيتغير بواحد افضل شوية لو اشتكيت منة
الدهان خشن شوية بس دي قشطة هركب كاربون علي الاكصدامات و الكبوت و الشنطة
فبرة التنك بتتكسر ودي التوكيل غيرها بنوع افضل
الكاسيت ساعت بيعلق بس ممكن يتحل في ضمان الكاسيت
المشكلة الكبري للاسف الجزء الواصل بين عصا الفتيس و الجير بوكس ضعيف وممكن يتكسر وعشان كدة في صيانة الالف ان شاء الله هخلي الضمان يغيرها كدة كدة عشان اكون مطمن
النظرية ان العربية فيها عيوب كتير مش قليلة بس مش بتقابل كل الناس ومش هيقابلك كل العيوب وممكن ميقابلكش حاجة خالص بس مادام تتصلح في الصيانات خلاص هستحمل للصيانات وامري لله اتمني كدة اكون افدتك وللعلم في مشاكل تانية لم اذكرها بس برضو كل حاجة ليها حل ان شاء الله

[M I D O]

هية المشكلة والي بيخلينا نهاجم العربية ان ازاي التوكيل عارف العيوب الي في العربية ومصر ينزلها بنفس العيوب مش عاوز يصلحها دي الفكرة انما انا عشان حابب العربية هستحمل وامري لله للصيانات

[the lawyer]

نصيحة الحق اشتري الإنفي قبل ما تتقفل في مصر .
ااي عربية متقفلة في مصر تحس انها طالعة من بق .....لا مؤاخذة

[hugan]

نصيحه اشتريها
بالرغم من بعض العيوب ومشاكل التقفيل
ا لا انها تستحق الاقتناء
وممكن تفكر في الانفي
تقفيل صيني بالكامل
وابتدت تندع شويه في الشارع

[hugan]

السيارة عامله معايا 5500كم فقط ومع ذلك اليكم الاتى:-:w6w2005041122 20146b
- نور الاستوب بتاع الفرامل بيعلق بعد غلق السيارة وعشان يطفى لازم ادوس عالفرامل كذا مرة
- صوت طرقعه فى الدبرياج لما انزل بيه للاخر
- ترشيح زيت اعلى وش الموتور وترشيح زيت ايضا من ماستر الدبرياج السفلى ومغرق الدنيا بزودو كل فترة كبيرة
-السحب ضعف جداً ورعشه اثناء تشغيلها واثناء الغلق العربية بتترعش زى مواتير اجاز لما تدور
- المساعد الخلفى يمين هبط وعلى فكرة عشان عارف الرد انا نافخ نتروجين وبشيك عليه كل اسبوع العفشة رديئه عموما جداً جدً
- كمبروسور التكييف انتهى تماما وكل مرة اروح التوكيل بيزودو فيريون ومغروهوليش مع انى من اول الناس اللى اشتكت من التكييف وعودة خروج الهواء الساخن من فتحات التكييف فى التابلوة
- وجود فواصل فى الكنسول دى اكتشفتها مؤخراً
- زحف عند الفرملة بالاخص العجلة الامامية شمال كنت هلبس اكتر من مرةتخيلوا والفرامل ايه بى اس
- وجود ريم على وش مياه الريداتير بكثافه
- صوت عالى بمكنه الباور وده بيوضح جداً عند الركنه
- ردائة الدهان ووجود تقشير اعلى الاكصدام وبعض اجزاء السيارة الداخلية والخارجية
- استهلاك عالى فى البنزين
- صوت الماتور او الماكينه بقى خشن
- الغيارات عموماً بقت بتعض
وذهبت للتوكيل اكثر من 11 مرة وكل ده من رصيد اجازاتى فى العمل يعنى عطلة على الفاضى عدم وجود فنيين على مستوى من الخبرة او العلم بالشىء تقاعس عن الخدمة المطلوبة بطىء شديد وانتظار اكثر من اللازم وعلى ذلك لم يتم عمل اى شىء من المنوه عنه اثناء الاستقبال
- معاملة دون المستوى وحدوث مشاجرات فى بعض الاحيان مع العملة والفنيين
- اهمال شديد عند تجربة السيارة لانى عند تجربة سيارتى من قبل المهندس التوكيل على الطريق خارج التوكيل كان هيخبط السيارة فى عربية نصف نقل كبيرة مسرعه وكان هوا اللى غلطان بالاضافة اننى لاحظت القسوة الشديد على السيارة اثناء تجربتها من جانب الفنيين وايضا وجود شحم واثار متسخه بالصالون عموماً واسلوب غير لائق فى التحدث عند التعليق على ذلك
انا مقدم شكوى فى حماية المستهلك وجارى اتخاذ الاجراءات


منقول من منتدي اخر

[mirra]

أتا من اول الناس اللى فحصت العربيه دى و كنت متحمس لها جدا. لكن الان و بكل امانه اقدر اقولك بلاش العربيه دى لان مشاكلها كتير و مش حتريحك.

[د.عماد صلاح]

هو الاخ اللي عامل 5500 وعندوا كل المشاكل دي ...مش من حقوا يطلع علي جهاز حمايه المستهلك؟

[د.عماد صلاح]

تمام ...ده طلع مقدم فعلا ....ياريت الناس تنضم ليه
طبعا هو جاب سيره فواصل الكونضول اللي انا اتكلمت عليها و كانت مش موجوده الاول وبانت مع الوقت ....نوع البلاستيك ردئ

[midooo_119]

حضرتك توازن بين عربيه صينى بالاوبشن ده و السعر ده و بين المشاكل ديه و شوف انهى كفه اتقل

[M I D O]

انا قرأت الموضوع بتاع الراجل الي بيعاني من مشاكل كتيرة دة قبل كدة بس دي حالة فردية محصلتش لحد خالص ودة طبيعي ان مصنع في مصر بيقفل العربية بايد مصرية متعرفش اي حاجة في اي حاجة اكيد لازم تطلع من تحت ايدهم كام عربية فيها عيوب بالعبيط كدة بس الحمد لله ان دي الحالة الوحيدة الي سمعنا بيها

[saddam]

صديقي المواطن
قولا واحدا لو رأيي يهمك بكره تروح تجيبها ولا تكثر من اﻹستماع للمشاركات المختلفة عشان في اﻵخر حيرتك ستزداد لا يوجد جواب مقنع فالناس إما مع العربية وإما ضدها
وصدقني لا يوجد بديل بسعرها وشكلها ومواصفاتها وكل مشاكلها تافهه وبسيطة وتتحل بساعات إن ظهرت
وبالتوفيق وإلى اﻷمام ومن نصر إلى نصر
ودمتم للنضال