قصة صيانة ال 5000كم في الصحراوي

[dr_bandit]

السلام عليكم ....وحشتوني جدا جدا يا جماعة ...انا كنت النهارده في الصحراوي باعمل صيانة ال5000كم وقلت احكيلكم على اللي حصل يمكن اقدر افيدكم في اي حاجه لاني بصراحه جمايلكم مغرقاني ونفسي ارد اي حاجه ولو بسيطه منها..
انا ححكيلكم الموضوع باسلوب حواري عشان كده بحس انكم موجودين معايا
انا كنت المفروض اروح السبت اللي فات..بس اضطريت ااجله للسبت ده عشان موضوع التكييف...فاكرينه؟؟؟
(مقاومة البلاور اللي هم بوظوها في صيانة 1000كم )المهم اتصلت الاسبوع اللي فات عشان اقولهم اذا كانو حيحلوا الموضوع ولا لا واتكلمت مع المدير وقاللي خليها السبت ده معلش لغاية ما اشوفلك حل
المهم رحت النهارده عادي لقيت الانسه اللي بره بتقولي مفيش حجز باسمك فقلت ادي اول القصيد المهم كلمتها بطريقه جافة شويه وفكرتها بيه(انا اللي باتصل كل شويه عشان اسال على المقاومه وكده) المهم سكتت ومعلقتش مع انها هي اللي ماجله المعاد ليه المره اللي فاتت ..المهم بعد حوالي ساعه ندهت على اسمي.... قابلت مهندس الاستقبال وسالني تأمر بأيه المهم قلتله عايز اعمل صيانة ال5000 واشوف موضوع التكييف وده اهم عندي من الصيانه
سألني ببراءه:تكييف ايه ؟؟؟ماله؟؟؟
رديت:انا كنت عملت صيانة ال1000 من حوالي 3 شهور هنا ومكنش عندي اي شكوى من التكييف وكان عندي ملاحظات بالنسبة للتقفيل المهم عملت صيانة ال1000 والعربيه خرجت فيها نفس الملاحظات وزاد عليها التكييف مش شغال
قاللي: معقوله؟؟لا لا مش ممكن...
رديت:انا مش بتبللى عليكم وعندك المحاضر القديمه وبعدين جيت مرتين بعد كده والعربيه فضلت طول النهار والتكييف زي ماهو وفي الاخر قلتولي ده محتاج مقاومة بلاور ودي مش موجوده ودفعتوني تمن فيوز اخضر ومشيت على اساس ان المقاومه دي حتكون موجوده في خلال 48 ساعه وحتكلموني ومحدش عبرني من ساعتها من 3 شهور
المهندس:طيب معلش اتصل بيه يوم الثلاثاء وانا اقولك
اسلام:لا مش حكلمك يوم الثلاثاء انا اسف انا مش بسوق والازاز مفتوح واديك شايف الجو عامل ازاي وانا بصراحه كرهت العربيه بسببكم..انا لو حطيت كلب في العربية مش بني ادم وقفلت عليه 5 دقايق حيتخنق..حط نفسك مكاني وبعدين دي مش غلطتي اني اتحملكم 3 شهور ويريت في الاخر حليتو المشكله
المهندس :ياعم بس هدي نفسك وابقى خللي الازاز موارب
اسلام:انا عايز اقابل المدير
المهندس:مفيش داعي انا ححللك الموضوع بس كلمني يوم الثلاثاء وربنا يسهل
اسلام:انا عايز اقابل المدير..واعتقد انك بتفهم من اول مره ومفيش داعي افضل اكرر كلامي كتير..
المهندس:حتلاقيه في اول اوضه على الشمال
اسلام :انا دخلت ادور عليه قبل ما اقابلك وملقيتهوش هو فين لو سمحت..
المهندس: ثواني حكلمهولك ..استنى ...اهو المهندس هشام
المهم ندهت عليه وحكيت الموضوع تاني بمنتهى الهدوء والصبر راح مكلم البنت اللي انا قابلتها في الاول وقالها شوفي طلبية الاستاذ...قعدت حوالي ربع ساعه تدور في وسط ورق عندها وفي الاخر هزت راسها يمين وشمال بابتسامه وقالتلي لسه مجتش
اسلام :منا عارف انها لسه مجتش وعشان كده انا جاي ماهي لو كانت جت مكنتش وقفت معاكي ربع ساعه
الانسه:طيب انا مطلوب مني ايه؟؟؟
اسلام: انا اللي مطلوب مني ايه عشان احل المشكله ؟؟؟؟امال المدير قالك شوفي الطلبيه بناء على ايه؟؟؟
الانسه:طيب استنى المهندس هشام وشوف حيقول ايه...
بعد شويه لقيته ماشي في الصالة ندهت عليه وهو عمل نفسه مش واخد باله (وده كلام انا متاكد منه لاني كنت جنبه وانا بندهله ) رحت ماشي وراه ورحت قالب وشي وبدات اتنرفز وقلتله ياباشمهندس انا بنده عليك وانت عامل نفسك مش واخد بالك انا مش شغال عندكم ولا باشحت منكم ويريت تحترم الناس اللي هنا شويه وبدأت الناس تتلم عليه
المهندس:انا مكنتش واخد بالي
اسلام :لا انت واقف جنبي وسامعني..ويريت تحللي المشكله دي دلوقت...
هشام:طيب اتفضل حضرتك سيبلنا العربيه هنا وبعدين حنبقى نتصل بيك لما تتصلح
اسلام:خلاص اديني عربيه مكانها لغاية لما تصلحوا العربيه
هشام :الخدمة دي مش موجوده عندنا
اسلام :انتم اصلا معندكمش اي نوع من انواع الخدمه انتوا شغلكوا كله زيت وفلتر وتبوظوا العربيه لو امكن وكل ده والصوت عالي والناس ملمومه عليه
لقيت واحد تاني جه وقاللو لو سمحت ياباشمهندس سيبلي الموضوع وانا ححله اتفضل يا دكتور 5 دقايق وانا حكون معاك
رحت قاعد على المكتب بتاعه واستنيته
بعد شويه جه وقاللي بالراحه وبهدوء وكل حاجه حتتحل..والله المقاومه مش عندنا والا كنا ركبنهالك على طول
اسلام:منا عارف انها مش عنكم بس دي مش مشكلتي دي مشكلتكم وانتوا بقالكم 3 شهور ومعملتوش حاجه وكان بالراحه وانا دلوقت باتحمل غلطتكم يبأه عايزني اهدى ازاي؟؟؟؟؟؟؟؟
المهندس :طيب معلش احكيلي الموضوع تاني
حكيتله الموضوع للمره العاشره
المهندس:انا عربية خالي والله فيها نفش المشكله ومش عارف اعمله ايه
اسلام:وانا مالي وبعدين انا مش خالك وانا اتحملت كتير
المهندس:طيب عن اذنك ثواني ...................وراح قايم من قدامي وبعدين جه تاني وقاللي بص انا ححاول اخد المقاومه من اي عربيه من بتوع الحوادث اللي مركونه عندنا بمحضر فك وتركيب واركبها عندك ولما تيجي المقاومه بتاعتك حركبها في العربيه التانيه بس للاسف العربيات اللي عندنا 2006 ومينفعش نركبها عندك عشان انت التكييف عندك غيرها
اسلام:طيب والحل؟؟؟؟؟؟؟؟؟؟؟؟؟؟
المهندس:انا اسمي وليد الباجوري اتصل بيه من اول بكره وبالكتير اخر الاسبوع ان شاء الله حيكون موضوعك اتحل ياللا بس دلوقت اعمل صيانة العربيه عادي وبعدين نشوف التكييف زي ماقلتلك
اسلام:تاااااااااااااني؟؟؟لو سمحت اديني مفتاح العربيه انا مش حاعمل اي حاجه لانها ممكن تخرج بايظه اكتر
وليد:هاهاهاهاا طيب اوك مفيش مشكله على العموم صيانة ال5000 ممكن تتاخر شويه نخليها مع التكييف ان شاء الله
اخدت المفتاح وخرجت...انتهت القصه
انا بصراحه مدايق جدا....اولا عشان الاهمال واللا مبالاة اللي هم فيها وثانيا عشان عليت صوتي واتكلمت وحش وده ضد مبادئي تماما وثالثا عشان العربيه زي ماهي ماتصحلتش ...........مش عارف اعمل ايه....
عموما انا اسف جدا على الاطاله واتمنى انكم تتحملوني معلش
واي استفسار انا تحت امركم
اخوكم اسلام حمدي
اسبرانزاوي رقم 8

[baher]

أولا احيي حضرتك مرتين مره علشان حضرتك زعللان من نفسك لأنك عليت صوتك واتكلمت وحش رغم ان ده من حقك تماما بعد ماصبر ايوب نفذذ ثانيا احيك علشان اتنرفزت عليهم واديتهم الوش ده اللي الظاهر هما موش بيستجيبوا الا بيه وللأسف مفيش مكان في مصر تقدر تشكي فيه ولاجمعيه حقوق مستهلك ولا حقوق موش مستهك عموا ربنا يكون في عونك ويارب يصدقوا ويتصلح التكيف

[aamerbebo]

والله يا دكتور مش عارف اقولك اية فعلا واضح ان فيه تكاسل من ناحية التوكيل وانا اكثر من مرة اقولك اصبر بس انت صبرت كثير اوي... معلش اصبر الاسبوع ده كمان يا سيدي وبعدها نشوف الحل مع الناس دي... ويا ريت بقى تفتح الماسنجر

[kamatchodj]

انا حدثت معى نفس المشكله بتاعت مقاومه الباور بتاع التكييف وانتظرت حوالى شهر .... وبعد عده مكالمات المركز كلمنى ورحت ركبتها فى حوالى ربع ساعه..... واتحلت المشكله

بس انا معاك ان التأخير ده زايد عن الحد........ وان التوكيل مش مدى اهميه لحل مشاكل الناس فى التوقيت المفروض

يعنى انا عرفت من التوكيل ان المشكله دى اتكررت كتير وعلشان كده استنفذت كل قطع الغيار اللى عندهم

بس هما المفروض انهم يفروا كل المطلوب للعربيه وعلى حسب علمى بحد اقصى 21 يوم على الاكثر

وللأسف مفيش مكان في مصر تقدر تشكي فيه ولاجمعيه حقوق مستهلك ولا حقوق موش مستهك

هو ده اللى علشانه عملنا المنتدى ورابطه الاسبرانزا ,.,,,,, وان شاء الله هو ده هدف الرابطه حمايه حقوق الاعضاء والحفاظ على على حقوقهم مع التوكيل...... وده اللى احنا عايزين التوكيل يساعدنا فيه لو بالاتفاق بيننا وبين التوكيل على هذه الامور وتكون العلاقه بيننا مباشره ونحاول نساعد بعض ونجد الحلول لكل المشاكل
او اننا ننضم كرابطه الى جمعيه حمايه حقوق المستهلك العامه ونصير شعبه منها تختص بالعربيات والوكلاء وده مش للاسبرانزا بس لا لكل انوع العربيات وهو ده احد اهداف نايل موتورز

[Abonora]

كان الله فى العون يا دكتور اسلام--ولا تلوم نفسك لانك صاحب حق --وصبرت كتير ولا حياة لمن تنادى --اتمنى ان تحل هذة المشكلة فى اقرب وقت--

[وائل عطية]

أن أؤيدك في تصرفك بشدة يا دكتور إسلام ولا يجب أن تلوم نفسك إطلاقا على أسلوبك في التصرف معاهم
والمهندس وليد ده أنا عايزك تقرفه وتتصل بيه يومياً مرة واتنين وأشك إنك هاتوصله بسهولة لأنه هايتهرب منك بدعوى تجربة عربية أو ماشابه
بس لا يضيع حق وائه مُطالب

[TAREK ZIAD]

برافو عليك للأسف هى دى الطريقة الوحيدة للتعامل فى مصر، الإحترام و الذوق ما تنفعش بكل أسف. و قلبى معاك لإنك إنتظرت بكل صبر الفترة دى كلها من غير أى إحساس بالمسئولية من صيانة التوكيل. و رأيى الشخصى إنك تزن عليهم و خصوصا على المدير دة بالتلفون ولو كل يومين علشان يتحركوا و أنصحك تاخد معاك المرة الجاية واحد من إخوانا الحلوين يقدر يفرج عليهم الناس لو لقيت نفس التلاكيك. للأسف هى دى الطريقة الوحيدة وأتمنى لو فى حد من التوكيل متابع المنتدى أنهم يراعوا حل مثل هذه الأمور ... لكن 3 شهور لمقاومة؟؟؟؟ ليه؟؟؟ دة لو قطاع عام و طلبها وهاتيجى على سفينة مش هتاخذ مدة شهر. لك كل الحق تتعقد و تتضايق و تقرف وكل اللى نفسك فيه و أنا معاك كمان.........بس للأسف هى دى مصر.... وما تتنازلش عن حقك.
تحياتى
م/طارق زياد

[Hosam]

اولاً احب اشكر حضرتك انك عرضت تجربتك فى المنتدى و اللى منها عرفت ان فى مشكلة جديدة اول مرة اسمع عنها (المقاومة) اللى المفروض انها حاجة بسيطة و متستاهلش التلاكيك دى كلها .. لكن اللى بيضايق فى الموضوع غير ان التوكيل مش على المستوى المتوقع و دا لمسته لما عملت صيانة 1000كم انه مازال هناك استخفاف بعقول البشر .. يعنى حكاية الطلبية و السكرتيرة اللى حتشوف الموضوع و التلقيف من واحد لواحد و الادهى ان المدير اللى هو المفروض محطوط فى المكان دا عشان يحل المشاكل و ينسق على مستويات اعلى بحيث يكون ايجابى هو اللى سلبى ...! يعنى من الآخر الفكر دا (خدمة ما بعد البيع) مش موجود .. و عشان كدا بأقترح على سعادتك ان الايجابية تكون من عند حضرتك و تشوف كام واحد من اللى عندهم مشاكل مشابهة او اتعمل معاهم نفس الحوارات دى و تاخدوا المبادرة و تروحوا على اقرب قسم شرطة و يتعمل للناس دول محضر ( قضية غش تجارى) و القضية دى عن تجربة بتخرب بيت التاجر .. انا جربتها فى جهاز تليفزيون ملوش ضمان اخدته و ظهر فيه عيب و بكرر ملوش ضمان .. و الراجل صاحب المحل جه لغاية عندى و بدله و هو بيعتذر شديد الاعتذار و دا طبعاً بعد ماكان بيقول بكل عجرفة اخبط راسك فى الحيط انت واخد حاجة ضمانها عند ربنا .. و دا كان تليفزيون مش عربية و بضمان .. عاوز اقول يا جماعة لازم وقفة و عندنا منافذ كتير نقدر نلجألها و لو كل واحد كسل و قال مين دا اللى حيجيبلى حقى؟ محدش حياخد حقه و هو دا اللى بيخلى ناس ذى دول يتمادوا .. و حاحيكلكوا على حاجة حصلت معايا اغرب من كدا .. فى عام 2002 اشتريت نوبيرا زيروا استلمتها بلوحات تجارية بالليل و ركنتها تحت البيت لسه مرخصتهاش تانى يوم الظهر دخل فيها فى الرفرف اللى قدام عربية شرطة (بوكس) طبعاً نزلت اللى سايق كان عسكرى .. وما ادراك ما العسكرى كلنا عارفينه .. ابيض يا ورد .. حتعمل معاه ايه ..؟ خدت نمرة عربية الشرطة و روحت عملت محضر عادى جداً وطبعاً و انا متخيل السيناريو اللى حيحصل (بتعمل محضر لعربية شرطة فى قسم شرطة ) لكن الموضوع كان بالنسبة لى راحة نفسية انى مسيبتش حقى حتى لو مش حاخد اى حاجة و مكنتش مستنى اى حاجة و مفيش حاجة حتعوض عن عربية لسة زيرو اتخبطت فى اقل من 24 ساعة وهى واقفة .. المهم نسيت الموضوع و استعوضت ربنا .. و بعد حوالى شهر فوجئت باتصال تليفونى .. المقدم فلان الفلانى يطلب منى لو عندى وقت فاضى ياريت نتقابل بخصوص موضوع العربية و عاوزين نحله ودى و ان دى غلطة عسكرى و ان العسكرى اخد الجزا اللازم و انه هو كرتبة ممكن يتضر فى الحكاية دى و اللى انا عاوزه حيتنفذ .....الخ الخ من الكلام دا .. المهم قابلته و طبعاً انتم عارفين الناس دى بره طريقتها بتبقى ازاى و لما يكون له عندك حاجة طريقته بتبقى ازاى..! مكنش الموضوع بالنسبة لىَ اكتر من رد اعتبار و مكنتش مستنى حاجة و عشان كدا روحت و اتنازلت عن المحضر طبعاً مع وافر الشكر و التحية و الخدمات اللى ممكن تتقدم مستقبلاً .. كل دا كان لا يعنينى .. .. عاوز اقول محدش يسيب حقه باى طريقة تكون مشروعة .. و ياريت برده رأى الزملاء الافاضل جنب رأيى و بإذن الله تتحل مشكلتك يا دكتور.

[محمد المرسي]

ا / حسام فى الحقيفة لم ارى ردك على الموضوع ...
لكن بالفعل أنت عندك حق ولا بد فعلا أن نكون أو لا نكون ...
الموضوع ليس بالسهولة التى تجعلنا صامتين ... والأموال لا نأتى بها من الهواء لنطيرها ...
وعلى ما أعتقد إذا عرف أبو الفتوح وأمثاله أنه من الممكن أن تكون هناك وقفة لتجاوزتهم لأصبح الأمر مختلف ...

وشكراً جزيلاً ...

[جندى مجند]

و تروحوا على اقرب قسم شرطة و يتعمل للناس دول محضر ( قضية غش تجارى) و القضية دى عن تجربة بتخرب بيت التاجر

سؤال يا أستاذ حسام ... هو محضر الغش التجارى بيتعمل فى أى قسم أم فى مباحث التموين لأنى بصراحة مرة زمان كنت فكرت انى أبقى ايجابى و اعمل المحضر دة عشان كنت شارى سماعات على انها سونى و بعدين طلعت تقليد و لما رحت لأقرب قسم قاللى ان المحضر دة بيتعمل فى مباحث التموين و بصراحة كسلت أروح و استعوضت ربنا ...

بالنسبة للمقاومة اللى عاملة المشكلة يا د. اسلام لو محلوش الموضوع دة فى التوكيل ممكن حضرتك تجرب حل تانى (مع اتخاذ الاجراءات القانونية لاسترداد حقك طبعاً) و الحل ان لو حضرتك عارف المقاومة دى مكانها فين تفكها و تشوف قيمتها كام أوم (Ohm) و الباوربتاعها كام و تجيب مقاومة من أى واحد بتاع الكترونيات (ممكن النخيلى مول أو راديو شيك أى مكان مماثل) بشرط تكون ليها نفس قيمة الأوم و ممكن تكون بنفس قيمة الباور أو أعلى لكن مش أقل و ممكن أى كهربائى يلحمها فى مكانها و ينتهى الموضوع ... لو المقاومة قيمتها مش مكتوبة عليها و موجود عليها شوية ألوان ممكن حضرتك تصورها و تعرض الصورة هنا و حأقول لحضرتك قيمتها كام أوم.

[Hosam]

[quote]
سؤال يا أستاذ حسام ... هو محضر الغش التجارى بيتعمل فى أى قسم أم فى مباحث التموين
[/quote
فى الحقيقة يا باش مهندس احمد انا لما عملت المحضر كان عادى جداً فى القسم و ماكنتش اعرف حكاية قضية الغش التجارى دى لكن لما التاجر خلص الموضوع عرفت بعديها انه عشان ميتعملهوش قضية غش تجارى و دى فيها غرامة مالية كبيرة و اظن قالولى ممكن يكون فيه حبس أو غلق مش فاكر بالظبط .. اما عن مباحث التموين فبيتهيألى و دا رأى شخصى ان اختصاصها بيكون للسلع الغذائية فقط . عموماً التجربة دى مر عليها حوالى 10 سنين تقريباً و الله اعلم كل يوم فى جديد هنا فى مصر.

[kamatchodj]

مباحث التموين تختص بكل السلع الغذائيه وغير الغذائيه

[dr_bandit]

تابع تقرير الصيانه في الصحراوي

السلام عليكم جميعا....وحشتوني جدا جدا .....معلش انا اسف لاني مشاركتش معاكم من ساعة ماكتبت عن اللي حصللي في توكيل الصحراوي .... بس والله كنت مشغول جدا جدا ومكنتش بادخل على النت خالص
المهم ....بعد اللي حصل في التوكيل كلمت المهندس وليد الباجوري اللي اداني رقمه في الصحراوي اكتر من مرة بس كل مره كانت المدام هي الي بترد عيله وبتقوللي انه مش موجود وناسي الموبايل معاها او ده نايم لغاية لما رد عليه وكلمته طبعا مش فاكرني اساسا ولما فكرته اعتذرلي انه مراحش الشغل من ساعتها وانه كان في اجازه ووعدني انه يكلمني كمان اسبوع عشان يكون وص لحل (كالعاده ....اسلوب مسكنات)
الكلام ده كان يوم الثلاثاء اللي فات فانا طبعا مقتنعتش باللي هو قالهولي ورحت يوم الارعاء اللي فات على الفرع الرئيسي اللي في المعادي عشان اعمل شكوى رسميه في فرع الصحراوي والمعامله اللي هناك
المهم قابلت واحد اسمه محمد ابو الخير في خدمة العملاء في الدور التاني وحكيتله كل اللي حصل بالتفصيل من 3 شهور لغاية اخر مره كنت في التوكيل ...طبعا هو فهمني ان ده اهمال منهم طبعا وكان مستغرب ازاي انا كنت ساكت كلده وكده يعني...المهم اخد بياناتي ووعدني انه حيكلمني بعد يومين ويحللي المشكله ...طبعا خرجت من عنده وانا متاكد برضه ان ده اسلوب مسكنات كالعاده بس قلت استنى يمكن....المهم بعد ساعه بالظبط كلمني وقاللي انه حل المشكله والمقاومه وصلت هناك وحجزلي معاد كمان يوم الاحد (امبارح )عشان اروح وقاللي ان لو في اي حاجه اكلمه وهو حيتصرف واعتذرلي بادب عن اللي حصل...فانا طبعا شكرته وقلت لما اشوف حيحصل ايه....المهم يوم السبت (اول امبارح) كلمتني الانسه سالي من الصحراوي وقالتلي ان المقاومه بتاعتي وصلت واني ممكن احجز معاد واركبها في اي وقت المهم انا رديت عليها وقلتلها اني عارف الكلام ده من يوم الاربعاء وان محمد ابو الخير هو اللي حاجزلي المعاد على يوم الاحد طبعا هي استغربت ومكنتش مصدقاني وقالتلي ثانيه واحده لما اتاكد من الحجز لقيته فعلا حاجزلي يوم الاحد ...المهم رحت امبارح وسلمتهم العربيه وقلت بالمره اعمل صيانة ال 5000 اللي معملتهاش وسالت على موضوع التعديل بتاع الدريكسيون فقاللي حنعملهولك بالمره .ومكانش عندي اي ملاحظه تانيه على العربية المهم فضلت قاعد من الساعه 8 ونص لغاية الساعه 4 وبعدين خرجت باتمشى شوية لقيت العربيه بره جربتها لقيت التكييف زي ماهو !!!!!!!! طبعا فقد اعصابي خالص ورجت للمهندس اللي استلم مني العربيه وقلتله ان التكييف زي ماهو وجه معايا وجربه عشان يتاكد راح واخد العربيه تاني وقعد حوالي ربع ساعه وبعدين رجع قاللي حنغير علبة الفيوزات كلها قلتله ماشي وبعد ساعه رجع قاللي انه غير علبة الفيويزات بس برضه زي ماهي فسالته طيب والحل قاللي (مش عارف)
طبعا قالتله امال مين اللي يعرف؟؟؟؟؟؟؟؟
قاللي تعالى بكره وانا افك الضفيره كلها واشوف العيب فين بس انت اهدى وكل حاجه حتتحل وكده..... المهم جيت ابص على الفاتوره لقيتهم عملو التعديل بتاع الدريكسيون وصيانة ال5000 كم وفيوز اخضر والفاتوره 96 جنيه .....اللي اعرفه ان الصيانة بحوالي 56 جنيه امال ايه الباقي ده ؟؟؟؟قاللي ده الصيانه غليت فقلتله اني مش حادفع تمن الفيوز ومدفعتوش ....المهم رحت النهارده فعلا والعربية فعلا دخلت على طول وقعدت لغاية الساعه 2 الظهر والحمد لله التكييف اشتغل كويس ....انا عرفت شويه حاجات برضه وعايز اقولهالكو يمكن تفيدكم
اولا... التكييف نفسه في تعديل بيتعمل له عشان يزود كفاءته ...التعديل ده بيغير فيه الفالف بتاع السخن والبارد زي التكييف القديم بالظبط وده بيتعمل بالحجز زي علبة الدريكسيون
ثانيا ...انا قابلت صاحب العربيه الكبيره اللي مقلوبه في التوكيل هناك وعرفت منه ان العربيه العجلتين فرقعوا مره واحده والعربيه اتقلبت 4 مرات بيه بس هم كلهم طلعوا سلام والعربيه اللي باظ فيها الرفرف الرواني والشنطه لكن الباب بالمتور والردياتير والكابينه والباقي كله سليم ولقيت كمان الاير باجز مفتوحه واعتقد ان دي العربيه اللي كان بيتكلم عنها واحد من اصحابنا هنا المهم كان مخنوق منهم لان العربيه بقالها شهر تقريبا ومعملوش فيها حاجه قلتله يكلم محمد ابو الخير في خدمة العملاء وفعلا كلمه واتصل بيهم هناك في الصحراوي والراجل دخل للمدير واتفق معاه والنهارده فعلا ملقيتش العربيه واضح انهم هناك بيخافوا من بتوع المعادي عشان كده اي واحد منكم عنده مشكله مع الصيانه يروح المعادي وهم حيتصرفوا....
ثالثا....رغم اني حاسس بالراجل صاحب العربيه دي لكن اللي انا شفته خلاني اطمن على العربيه لانها على الحادثه دي يعتبر محصلش حاجه فيها غير شغل سمكره وتغيير مقصات بس مش اكتر وده معناه ان العربيه متينه ماشاء الله
انا اسف على الاطاله واتمنى اني اكون افدتكم ومعلش على التاخير في الرد عليكم وارجو انكم تسامحوني على كده
اخوكم اسلام حمدي
اسبرانزاوي رقم 8

[ooo]

الف شكر لك علي شرح ماذا حصل في الصيانة وايه الجديد هناك .
والف مبروك علي اصلاح موضوع التكييف في سيارتك.
اريد ان اسألك هل موضوع تعديل التكييف اطلبه منهم انا قبل الصيانة ؟.
انا السيارة عندي محتاجة تعديل علبة الدريكسيون وايضا التكييف لم يعدل بعد.
مع العلم اني اجري الصيانة في مركز جسر السويس . وهل صيانة 5000 لابد ان اعملها بعد اتمام
ال5000 الاف بالضبط ام هناك فترة سماح .وهل سأضطر لترك السيارة هناك لمدة يوم مثلا لأجراء هذه التعديلات.؟

شكرا لك اخي وطبعا بعد هذا الكلام لن اذهب انا الي اجراء الصيانة بل ان شاء الله سيقوم بها زوجي لكي
يستطيع التفاهم اذا حدثت مشكلة مماطلة مثلا في التعديلات المطلوبة او تأخير في الصيانة.أكيد هو سيكون
اجدر مني علي التفاهم واكفأ من ناحية المعرفة العامة بالسيارات.


اسبرانزاوية رقم 28.

[dr_bandit]

اولا..........لا شكر على واجب يا مدام وده واجبي لاني انا مش جاي احكي على حاجه واشيلكم همي وخلاص بالعكس انا عايز افيد باي وسيله وباي شكل وربنا يبارك في حضرتك ويكفيكي شر الاعطال اللي في العربيه ويباركلك فيها
ثانيا.....موضوع تعديل التكييف انا كلمتهم في جسر السويس وقالولي ان القطع جايه بكره وهم بعد كده حيبداو يكربوها في العربيات بس انت وانت بتحجزي معاد الصيانه فهميهم انك عايزه تعملي تعديل التكييف وتعديل الدريكسيون ...عشان يعملوا حسابهم ولو ساعتها القطع مش متوفره انصحك انك تستني عشان متروحيش مره عشان الصيانه ومره عشان التعديلات وخليها كلها مره واحده احسن والتعديلات بتتعمل في نفس اليوم ومش محتاجه انك تسيبي العربيه هو تعديل الدريكسيون بياخد حوالي3 ساعات والتكييف بياخد حوالي نص ساعه او ساعه بالكتير ده غير ان صيانة ال5000 نفسها متاخدش وقت لانهم مش بيعملوا فيها حاجه مجرد تربيط للعفشه وتشييك على العربيه ولو عندك اي ملاحظات بيشوفوها
ثالثا...صيانة ال5000 مش لازم عند ال5000 بالظبط بالعكس انت بتعمليها في اي وقت بعد ال5000 لانها زي ماقلقتلك مجرد تشييك على العربيه وعلى الملاحظات بس انت بتعمليها عشان تبقي عامله الصيانه الدوريه بتاعتك بانتظام ومتخرجيش من الضمان وفي نفس الوقت ياخدو منك فلوس برضه لاني بصراحه انا شايف ان 90 جنيه كتير على صيانة ال5000 دي
رابعا ....موضوع ان حضرتك تروحي او زوجك هي المساله من وجهة نظري الشخصيه مش مشالة خناقه داخلها واشوف مين اللي يكسب هم رغم كل ده بيحاولوا يحلو مشاكل كتيره بس هم محتاجين وقت لكن لو الوقت اتاخر زياده عن اللزوم يبأه ساعتها انا ممكن اجي مع حضرتك لانهم دلوقت عرفوني اني بتاع مشاكل وساعتها حيخلصوا كل حاجه :) وان شاء الله ربنا ميجيبش حاجه وحشه مع حضرتك او اي حد من المالكين للعربية ...
وانا تحت امرك في اي ملاحظه او سؤال
اخوكم اسلام حمدي
اسبرانزاوي رقم 8